حمزہ! آپ اپنے ساتھی تین افسران کو اپنے ساتھ رکھیں اور یہی ہمارا انتظار کریں۔ اگر ہم لوگ اگلے آدھے گھنٹے میں واپس نہ آۓ تو آپ لوگ اندر آجانا۔” اس نے حمزہ کی طرف دیکھا۔ جس نے فوراً “یس میم” کہا۔”آفیسر بختاور! آپ ہمارے ساتھ چلیں۔ ایک گاڑی میں آپ بیٹھیں گے دوسری میں ہم لوگ۔ ٹک شاپ پر پہنچتے ہی چیک ان کرکے ہم لوگ بلڈنگ کے اندر جائیں گے۔ اذ دیٹ کلئیر؟” اب کہ اس نے سب کی طرف دیکھا۔”یس میم!””تکبیر!” ایک افسر نے کہا۔ “اللہ اکبر!” سبھی نے یک آواز جوابی نعرہ لگایا اور واپس مڑے۔ دونوں بلٹ پروف گاڑیوں میں بیٹھتے گئے۔ اس وقت اس کی مکمل ٹیم دس افراد پر مشتمل تھی۔جس میں سے چار اس نے دروازے کے قریب ہی کھڑے کردئیے تھے۔ باقی چھ اس وقت آپریشن کیلیے ائیرپورٹ کی حدود میں داخل ہوچکے تھے۔ ائیرپورٹ کی تمام روشنیاں گل کردی گئی تھیں۔ ہر طرف صرف اندھیرا تھا۔ اس نے وہاں پھیلے خطرناک اندھیرے کو دیکھتے ہوۓ فوراً بختاور سے رابطہ کیا۔”اپنی ہیڈ لائٹس بند کردیں بختاور، صرف نارمل لائٹس کا استعمال کریں۔” دوسری طرف یس میم کہتے ہی سفید بتیاں بند کرکے زرد کم روشنی والی ہیڈ لائٹس جلادی گئیں۔ دونوں گاڑیاں آہستگی سے ائیرپورٹ کے صدر دروازے سے ہوتے ہوۓ بالکل پیچھے ٹک شاپ تک پہنچ گئیں۔ اس وقت وہاں صرف خاموشی تھی، ایک خوفناک لرزا دینے والی خاموشی اور اس خاموشی پر اندھیرے کا راج تھا۔ جیسے ہی گاڑیاں ٹک شاپ پر رکیں، اس نے بے اختیار تھوک نگلا۔ ایسا لگ رہا تھا جیسے کوئی فلم چل رہی ہو۔ اس نے پچھلے پانچ چھ سالوں میں بہت سے خطرناک آپریشنز کیے تھے۔ کئی دفعہ گولیاں تک کھائی تھیں مگر کبھی اس طرح خوف نہ آیا ۔ شاید وہاں کا منظر ہی کچھ ایسا تھا کہ ہر کوئی ڈر جاتا۔ اس نے بے اختیار جھرجھری سی لی۔ بغیر وقت ضائع کیے وہ لوگ اپنی گاڑیوں سے نیچے اترنے لگے۔ ٹک شاپ کا پچھلا دروازہ کھلا ہوا تھا۔ وہ اور بختاور آگے تھے، دو افسران دائیں بائیں کھڑے تھے تاکہ اچانک ہونے والے حملے پر نظر رکھ سکتے جبکہ دو افسران بختاور اور کمالہ کے پیچھے کھڑے تھے۔ ان کی پیشانیوں پر اس وقت چھوٹی چھوٹی ٹارچ لگی ہوئی تھیں۔ بختاور نے آگے بڑھ کے دروازے کو دھکیلا اور پھر کمالہ کی طرف دیکھا۔ اس نے سرہلا کر آگے بڑھتے رہنے کا کہا۔ بہت آرام سے قدموں کی چاپ پیدا کیے بغیر وہ اندر داخل ہوا، کمالہ بھی بالکل اس کے ساتھ تھی۔ شاید یہ جگہ کچن کے طور پر استعمال ہوتی تھی۔ مگر اس وقت اندھیرے کے باوجود وہ اس فرنشڈ کچن کی خستہ خالی پر دل مسوس کے رہ گئے۔
___________
