The last nightZainab nasar khan
____________
چار دن بعد:۔دن چڑھا تو ہر طرف جیسے ایک نئی صبح کا آغاز ہوا۔ وائرس سندھ کے مختلف علاقوں میں پھیل کر بہت سی جانیں لے چکا تھا۔ ریبیز کی ویکسین میں قلت آتی جارہی تھی کیونکہ ڈی جی آئی سندھ نے آدھی سے زیادھ وائرس کا شکار ہونے والی عوام کو ریبیز کی ویکسین لگانے کا حکم دیا تھا۔ اب پریس کانفرنس رکھی گئی تھی تاکہ بتایا جاسکے کہ امریکہ سے خصوصی اس وائرس کی ویکسین منگوائی جارہی ہے۔ “سر اتنی دیر کیوں؟ یہ جانتے ہوۓ بھی یہ وائرس ایک ڈیڈلی وائرس ہے آپ نے اتنی تاخیر کیوں کی؟” ایک صحافی نے سوال کیا۔ ہارون صدیقی ایک دفعہ چپ سے کرگئے۔ “کیونکہ ہم اتنی مہنگی ویکسین افورڈ نہیں کرسکتے تھے مس فرخندہ! ہمیں ڈونیشنز دی گئیں، کچھ حکومتی خزانے سے پیسے لیے گئے اور پھر ویکسین کو منگوایا گیا۔ کوئی بھی چیز اتنی آسانی سے نہیں مل جاتی۔” ان کی آواز میں واضح لڑکھڑاہٹ تھی۔ “سر پرسوں رات کو نشینل سٹیڈیم میں جو کچھ بھی ہوا، آپ کی اس بارے میں کیا راۓ ہے؟” پیچھے بیٹھی ایک رپورٹر نے سوال کیا۔”میرا خیال ہے یہ ایک کانفیڈشنل کیس ہے۔ بہتر ہے کہ آپ اس بابت سوال نہ کریں۔” انہوں نے سنجیدگی سے کہہ کر بات ٹال دی۔ “لیکن سر ابھی تک آرمی نے اس حوالے سے کوئی بات نہیں کی۔ لوگ ہسپتالوں میں اپنے پیاروں کو ڈھونڈ رہے ہیں اور جب آپ جیسے صاحب اقتدار لوگ بھی جواب نہیں دیں گے تو کیسے مسئلے حل ہوں گے؟” فرخندہ نامی رپورٹر بڑی سنجیدگی سے سوال کررہی تھی۔ “آپ کو اپنی صحافت کے کرئیر میں کتنی مشکلیں آئی تھیں مس فرخندہ؟” شاید وہ اس صحافی کو جانتے تھے۔ “ویل سر! یہ میرے سوال کا جواب نہیں ہے۔” اس نے مسکراتے ہوۓ کہا۔ لیکن چہرے پر الجھن رقم تھی۔ “اگر آپ نے پاکستان میں رہتے ہوۓ صحافت کی ڈگری لی ہے اور کوئی فراڈ، سوری ٹو سے، نہیں کیا تو آپ کو اندازہ ہونا چاہیے کہ پاکستان میں کسی مسئلے کا حل ایک بڑی تعداد کی قربانی مانگتا ہے۔ میں خود اس وائرس کا شکار ہوں۔” انہوں نے اپنے ہاتھ پر لگے کینولا کی طرف اشارہ کیا۔ سارے صحافی متوجہ ہوۓ۔ “سر کیا آپ ہمیں اس وائرس کے حوالے سے کچھ بتا سکتے ہیں؟ کس طرح کی علامات سے ہم پہچان سکتے ہیں کہ ہم انفیکٹڈ ہیں یا نہیں؟” دوسرے صحافی نے نیا سوال کیا۔ اب کہ ہارون صدیقی ہنس دئیے۔ “ویل! آپ پریشان نہیں ہوں۔ یہاں پر کوئی شخص بھی ایسا نہیں ہے جو انفیکٹڈ ہو۔” وہ مسکراتے ہوۓ تھوڑا آگے ہوۓ اور مائیک کو پکڑ کر مزید بولے۔ ” کیونکہ آپ لوگوں کی خوشبو ابھی بھی میرے لیے دلکش ہے۔” ان کا مسکراہٹ میں دبا انداز تھا مگر سامنے بیٹھے صحافیوں کے چہروں کی جیسے ہوائیاں اڑگئیں۔ “سر ہمیں لگتا ہے آپ کو ریسٹ کرنی چاہیے، سوال تو پھر ہوتے رہیں گے۔” ایک صحافی اٹھتے ہوۓ بولا۔ باقی سب بھی اس کی تقلید میں اٹھتے گئے۔ ہسپتال کے کیفے میں بیٹھے وہ دونوں ڈی جی آئی کی پریس کانفرنس بڑی توجہ سے سن رہے تھے۔
