Mohabbat Fateh Tehri by Ayesha Asghar Episode 5

آسمان پر نارنجی اور سرمئی بادلوں کی تہیں بکھری ہوئی تھیں۔گھر کے لان میں لگی روشنیاں جلنا شروع ہوگئی تھیں۔فاطمہ کمال تیز قدموں سے اندر داخل ہوئی۔قدموں کی چاپ پر فاز نے سر اٹھایا۔اسے سامنے دیکھ کر ایک انجانی سی خوشی محسوس ہوئی تھی۔موڈ خوشگوار ہوا تھا۔لیکن نگاہیں جیسے ہی اس کے ہاتھ پہ بندھی بینڈیج پر گئیں،رگیں تن سی گئیں۔
”کیسے لگی یہ چوٹ؟“۔وہ بظاہر نرم لہجے میں پوچھ رہا تھا،مگر اس کے لہجے کی گہرائی اس کے اندر اٹھنے والے طوفان کی عکاسی کر رہی تھی۔
”کیا کروگے جان کے؟“۔فاطمہ نے اس کی طرف سپاٹ چہرے کے ساتھ دیکھا اور لاپروائی سے کہا۔ٹشو کا ڈوپٹہ کندھے پر پھیلایا ہوا تھا۔بیگ کی اسٹریپ تھامے، اس کی نظریں سیدھی فاز کی آنکھوں میں جمی تھیں۔
”فاطمہ،آپ مجھے اس کا نام بتائیں،جس نے آپ کو تکلیف پہنچائی ہے“۔وہ بپھر گیا تھا۔اس کے لہجے میں ایک عجیب وحشت اور بےبسی تھی۔دل کی گہرائیوں میں اٹھتی اذیت نے اسے کمزور کر دیا تھا۔
”کیا کرو گے اس کے ساتھ؟ بتاؤ؟“۔فاطمہ نے ہلکی سی طنزیہ مسکراہٹ کے ساتھ اس کی بات سنی اور ایک قدم اس کے قریب آتے ہوئے بولی۔اگر کوئی اور لڑکی ہوتی،تو فاز عالم کے خوبصورت چہرے اور اس کی بے پناہ شخصیت کے سحر میں مبتلا ہو جاتی،مگر مقابل فاطمہ کمال تھی، جو نہ اس کی خوبصورتی سے متاثر تھی اور نہ اس کے غصے سے خوفزدہ۔
”میں اسے جان سے مار دوں گا، ہر اس شخص کو جو آپ کو تکلیف دینے کی وجہ بنے گا“۔فاز عالم کی آنکھیں غصے سے دہک رہی تھیں۔ماضی کے کچھ دھندلے سایے اس کے دماغ میں ہلچل مچا رہے تھے۔اس کے اندر کہیں دو کہانیاں مل رہی تھیں۔حال اور ماضی کی کہانیاں ایک دوسرے سے گڈمڈ ہو رہی تھیں۔
”پکا جان سے مارو گے نا؟“۔فاطمہ کی ہنسی لاؤنج کی خاموش فضا میں گونجی،مگر اس ہنسی میں درد اور تلخی چھپی ہوئی تھی۔فاز کے اثبات میں سر ہلانے پر فاطمہ نے جھکتے ہوئے سینٹرل ٹیبل سے گن اٹھائی اور اس کے ہاتھ میں تھما دی۔
”یہ کیا کر رہی ہیں آپ؟“۔فاز الجھ گیا۔ 
 ”لو، پکڑو اسے اور مار دو مجھے،کیونکہ اب خود کو زخم دینا میرا پسندیدہ مشغلہ بن گیا ہے“۔فاطمہ تلخ لہجے میں کہتی سلگتی نگاہوں سے اسے دیکھنے لگی۔
اس کے الفاظ کی سفاکیت نے فاز کے اندر اٹھتے طوفان کو جیسے لمحوں میں خاموش کر دیا۔وہ بےدم ہو کر صوفے پر گر گیا۔پہلے جو ایک بپھرا ہوا شیر تھا،اب وہ شکستہ حال اور تھکا ہوا نظر آ رہا تھا۔اسے یقین نہیں آرہا تھا یہ وہی فاطمہ کمال ہے جو بڑی نرم گو سی ہوتی تھی۔سمجھدار سی فاطمہ کمال اس لمحے کہیں کھوئی ہوئی معلوم ہوئی۔
”کیا ہوا؟بیٹھ کیوں گئے؟ کہاں گیا تمہارا غصہ، تمہارے بڑے بڑے الفاظ؟ مارو مجھے“۔فاطمہ اب چیخ رہی تھی، اس کی بھیگی سوجی آنکھیں اس کے اندر چھپے دکھ کا آئینہ تھیں۔وہ اپنا سارا غصہ،ساری فرسٹریشن اس پہ نکال رہی تھی۔
”فاطمہ“۔فاز کی بےبسی اس کے چہرے پر نمایاں تھی۔ اس نے سر اٹھا کر اسے دیکھا۔
”نام مت لیا کرو میرا اپنی زبان سے“۔فاطمہ نے نفرت بھرے لہجے میں ٹوکا۔اس کے ہر لفظ نے فاز کے دل میں ناجانے  کتنے زخم لگادیے۔
 ”آپ خود کو تکلیف مت دیا کریں،پلیز فاطمہ“۔فاز نے تھکے ہوئے انداز میں التجا کی۔وہ کسی سے التجا نہیں کرتا تھا۔وہ کام کے علاؤہ کسی سے زیادہ گفتگو نہیں کرتا تھا۔لیکن آج وہ مخلتف نظر آرہا تھا۔اس کی آنکھوں میں کچھ منظر ابھرے تھے۔نیلی آنکھوں والی گڑیا خون میں لت پت تھی۔اس کی گود میں سر رکھے وہ دم توڑ گئی تھی۔
”تم میرا پیچھا چھوڑ دو، میں خود کو تکلیف دینا چھوڑ دوں گی“۔۔سرد لہجے میں وہ حل پیش کی،یا یوں کہ لیں موت کا پروانہ۔
”آپ سے دستبرداری یعنی موت؟“۔اس کی آنکھیں بےتاثر ہوگئیں۔اس کے کانوں میں کوئی آواز گونج رہی تھی۔کوئی اس سے وعدہ لے رہا تھا۔اور وہ نبھانے کا وعدہ کررہا تھا۔
”مرنا تمہاری اپنی چوائس ہوگی،تم مجھ سے دور ہو جاؤ، مجھے اس کے علاوہ تم سے کوئی مطلب نہیں“۔فاز عالم مدھم سا مسکرایا۔ہاں یہ وہی نرم دل فاطمہ کمال تھی،جسے وہ جانتا تھا۔جس نے غصے میں اس سے یہ نہیں کہا تھا ‘ہاں مرجاؤ’۔کیونکہ فاطمہ کمال کسی کو ایسا کہ نہیں سکتی تھی۔
”آپ سے دور ہونے کی تو ایک ہی راہ ہے… موت“۔اس نے گہرے لہجے میں کہا۔
”راہیں تو بہت ساری ہیں، وہ الگ بات ہے کہ تم خود مرنا چاہتے ہو“۔
”ٹھیک کہ رہی ہیں۔راہیں تو بہت ساری ہیں،تو پھر آپ میرے ساتھ شامل کیوں نہیں ہو جاتیں؟“۔ڈھلتی شام رات میں بدل رہی تھی۔کھڑکی سے نظر آتا چاند چپکے سے ان کی تکرار سن رہا تھا۔
 ”فاطمہ کمال مر تو سکتی ہے،فاز عالم، لیکن تمہاری زندگی میں شامل ہرگز نہیں“۔ایک نفرت بھری نگاہ اس پہ ڈالی اور تیزی سے واک آؤٹ کر گئی۔
فاز عالم وہیں کھڑا رہ گیا، اس کی نظریں اس کے جاتے ہوئے وجود کو دیکھتی رہیں۔ اس نے بےبسی سے اپنے بالوں میں ہاتھ پھیرا اور گہری سوچ میں ڈوب گیا۔
”کبھی کبھی ہم اپنی مرضی سے کچھ نہیں کرتے، یہ حالات ہوتے ہیں جو ہم سے سب کچھ کروا دیتے ہیں۔کاش، آپ سمجھ سکتیں“۔