کئی دن اسی طرح گزر گئے۔ دونوں نے ایک دوسرے کو مخاطب کرنا ترک کردیا تھا۔ ناشتے سے لے کر کھانا تک دونوں اپنے لیے خود بناتے۔
کل رات سے ہی زینب کو اپنی طبیعت کچھ بوجھل سی محسوس ہورہی تھی۔ اور بار بار قے آنے کے باعث وہ نڈھال ہوگئی تھی۔ اب اس میں اتنی بھی ہمت نہ بچی تھی کہ اٹھ کر ایک گلاس پانی پی لیتی۔ بستر کی پائنتی سے ٹیک لگائے وہ اپنے ماں باپ اور بھائیوں کو یاد کرتے سسکنے لگی۔ اسے سمجھ ہی نہ آئی کہ کس سے اپنا دل کا بوجھ بانٹے۔ انہی سب میں اسے مریم بے انتہاء یاد آئی۔ یکدم ہی اس کا جی بری طرح گھبرانے لگا۔ اس نے اپنی حالت سے گھبرا کر اس نے مریم کو کال ملائی۔
ابراہیم آج وقت سے پہلے گھر آگیا تھا۔ جس کیس میں پچھلے کئی دنوں سے الجھا ہوا تھا، اب جاکر اس سے جان چھوٹی تھی تو اس نے زینب سے دوٹوک بات کرنے کا ارادہ باندھا۔ تاکہ اس آئے روز کے کھانا بنانے کے مشغلے سے اس کی جان چھوٹے۔
دروازے کے دستے پر ابھی ہاتھ رکھا ہی تھا کہ زینب کی روتی ہوئی آواز اس کے کانوں سے ٹکرائی：
“مریم！تم نے بالکل ٹھیک کہا تھا۔ افسانوی باتوں اور عملی زندگی میں بہت فرق ہوتا ہے۔ دیر سے سہی مگر مجھےسمجھ آچکی ہے۔” وہ اذیت سے مسکرائی۔
“یہ تم کیسی باتیں کررہی ہو زینب؟ تم ٹھیک تو ہو نا؟” مریم پریشان ہوئی۔
“میں ٹھیک نہیں ہوں مریم۔ مجھے بچالو۔ میں یوں بند کمرے میں اپنوں سے دور بالکل بھی نہیں مرنا چاہتی۔ مجھے آکر اپنے ساتھ لے جاؤ۔ ورنہ میں مرجاؤں گی۔” وہ التجائیہ ہوئی۔
“ہوا کیا ہے آخر؟ مجھے ساری بات بتاؤ۔” مریم کے پوچھنے پر اس نے شادی سے لے کر اب تک کی تمام باتیں اس کے گوش گزار کردیں۔ تمام حقیقت جان کر مریم کو حقیقی معنوں میں دکھ ہوا۔
“مریم کچھ بھی کرو۔ مگر مجھےاس قید سے دور لے جاؤ۔ ورنہ۔۔۔” زینب ابھی بات کررہی ہی تھی کہ آنکھوں کے سامنے اندھیرا چھاتے ہی وہ بےہوش ہوگئی۔ مریم ہیلو ہیلو کرتی رہ گئی مگر بےسود۔
دوسری جانب دروازے کے اس پار کھڑا ابراہیم اپنی جگہ ساکت رہ گیا۔ زینب کی باتیں سن کر اسے حیرت کا جھٹکا لگا۔ اس کے وہم و گمان میں بھی نہ تھا کہ زینب کی اس سے شادی کی وجہ یہ ہوسکتی ہے۔
اس کے اچانک خاموش ہونے پر اسے کسی گڑبڑ کا احساس ہوا۔ کمرے میں داخل ہوتے ہی اس کی نظر بستر پر سیدھی لیٹی زینب پر پڑی جس کی گردن ایک طرف ڈھلکی ہوئی تھی۔ وہ فوراً سے بیشتر اس کی جانب لپکا۔ نبض اور سانسوں کو ٹٹولا تو وہ نہایت مدھم چل رہی تھیں اور بخار سے سارا جسم تپ رہا تھا۔ اسے اپنی بانہوں میں بھرکر وہ باہر کی جانب دوڑا۔
ہسپتال پہچنتے ہی اسے ایمرجنسی میں داخل کردیا گیا۔ طویل انتظار کے بعد ڈاکٹر باہر آئیں۔
