اونچی عمارتیں اندھیرے میں ڈوبی ہوئی تھیں۔سیاہ آسمان پر گول چاند روشن اور واضح تھا۔ننھے ننھے ستارے ٹمٹما رہے تھے۔نظریں آسمان کے خوبصورت نظاریں دیکھ رہی تھیں اور سماعتیں سناٹا سن رہی تھیں مگر پھر کچھ ایسا ہوا کہ رات کے سناٹے کو کچھ آوازوں نے چیر دیا۔سناٹے کو تھپڑوں کی آواز اور مغلظات نکالتی زبان نے نگل لیا۔
شہر میں موجود چاند کو چھوتی عمارتوں میں سے ایک عمارت کا ایک گھر روشن تھا اور وہیں سے یہ آوازیں اٹھ رہی تھیں۔کمرہ روشن تھا اور وہاں ایک جوان لڑکا ایک نوجوان لڑکے کو بری طرح زد و کوب کا نشانہ بنا رہا تھا۔ساتھ ہی زبان کے جوہر بھی دکھائے جا رہے تھے۔
“تمہیں تو پیدا ہوتے ہی مار ڈالنا چاہیے تھا۔پتہ نہیں کیوں ہی تمہیں زندہ رکھا۔ہم سب کی زندگیوں پر بوجھ ہو تم۔”وہ مار کھاتے ہوئے سسک رہا تھا۔آنکھوں سمیت پورا وجود سرخ ہو رہا تھا۔دوسری طرف مارنے والے کا بھی چہرہ سرخ تھا اور آنکھیں یوں تھیں جیسے وجود نگل لیں گی
“کیا کیا ہے اب اس نے؟کیوں مار رہے ہو اسے؟”اچانک کمرے میں ایک بڑی عمر کی عورت داخل ہوئی اور اس پٹائی کرنے والے شخص کو مخاطب کیا۔
“کیا کیا ہے اس نے؟آپ تو یہ پوچھیں کہ کیا نہیں کیا۔۔۔”جواب دیتے ہوئے بھی اس کا ہاتھ نہیں رک رہا تھا اور پٹنے والا شخص یا تو بہت فرمانبردار تھا یا پھر بزدل کہ ایک بار بھی مارنے والے کا ہاتھ نہیں روکا تھا بس چپ چاپ مار کھائے جا رہا تھا۔
“مجھے تو سمجھ نہیں آتی یہ بریس کب سدھرے گا؟میں نے تو اب اس سے کوئی امید لگانا ہی چھوڑ دی ہے۔”وہ عورت کچھ زیادہ ہی بدگمان تھی اور یہ کون سا نئی بات تھی!وہ تو بچپن سے ہی اس سے بدگمان رہی تھی۔
اپنی بات مکمل کر کے وہ یونہی اسے پٹتا چھوڑ باہر نکل گئی۔لیو کچھ دیر مزید اسے پیٹتا رہا اور جب تھک گیا تو اسے زور سے پھینک کر،اس کے وجود کو ٹھوکر مار کر وہاں سے نکل گیا۔پیچھے بریس سسکنے کیلیے تنہا رہ گیا تھا۔
گاؤں میں چھائے بادل جب شہر میں چھٹے تھے تو مناظر دیکھنے سے تعلق رکھتے تھے۔امید افزا خیالات تھے۔یوں محسوس ہوتا تھا کہ گاؤں کی برف سے گزر کر شہر میں امید کا سورج دیکھنے کو ملے گا مگر یہاں تو معاملات میں کوئی فرق نہ پڑا تھا سوائے اس کے کہ ان لوگوں کی عمریں بدل چکی تھیں۔درمیان کے سالوں میں کیا کیا گزرا تھا،یہ ہنوز مخفی تھا۔
وہ تو گاؤں سے شہر آگئے تھے۔بریس کے خوابوں کے مطابق تو بادلوں کے اس پار کا منظر خوبصورت وادیوں جیسا ہونا تھا پھر یہ منظر اندھیری غار کا سا کیوں تھا؟
اس تشدد کی کوئی خاص وجہ نہیں تھی اس کے بھائی کے پاس۔یہ تشدد سہتے سہتے وہ بچپن سے لڑکپن میں داخل ہو گیا تھا۔پہلے اس کی ماں اسے بات بے بات ذلیل کیا کرتی تھی اور کبھی کبھار اس پر ہاتھ بھی اٹھایا کرتی تھی۔اسی طرح بھائی بھی اس سے ہاتھا پائی کیا کرتا تھا مگر بڑے ہونے کے ساتھ ساتھ اس سب میں کمی آنے کی بجائے اضافہ ہی ہوا تھا اور اس مسلسل تشدد کے باعث جوان ہوتے بریس کی ذہنی اور جسمانی حالت ابتر تھی۔وہ مار اور ذلت جو بچپن میں شدت سے محسوس ہوتی تھی اور وہ خواہش کرتا تھا کہ وہ ان حالات سے نکل کر ایک محبت کرنے والے خاندان کی طرح ساتھ ساتھ رہیں،اب وہ اس سب کا عادی ہو گیا تھا اور وہ بچپن والی خواہش پر اب اسے ہنسی آتی تھی۔
“ہم کبھی بھی ایک اچھا خاندان نہیں تھے۔مام کو ہمیشہ سے لیو پسند تھا اور ابھی بھی وہی پسند ہے اور بریس،بریس تو ناکارہ ہے جو کچھ نہیں کر سکتا۔وہ تو اے گریڈ بھی نہیں لا سکتا،وہ تو مام کو ذلیل کرواتا ہے،وہ تو خاندان کی بدنامی کا باعث ہے،وہ تو قاتل ہے،وہ ناکام تھا،ہے اور رہے گا۔”یونہی پڑے پڑے وہ خاموش آواز سے رو رہا تھا اور لبوں پر ان الفاظ کی بازگشت تھی۔
وہ یونہی کچھ دیر روتا رہا پھر اس نے سر اٹھایا۔آنکھیں سرخ تھیں اور چہرے پر آنسوؤں کے مٹے مٹے نشان تھے۔وہ اب رو نہیں رہا تھا بس خالی خالی نگاہوں سے خلا کو گھور رہا تھا۔کچھ دیر وہ اسی میں مشغول رہا پھر یکدم اس کے چہرے پر مسکان ابھری۔شیطانی مسکراہٹ۔۔۔کھلی ہوئی باچھیں مزید کھلیں اور وہ ہنسنا شروع ہوا۔آہستہ آہستہ ہنسنے کی آواز بلند ہوئی اور اب وہ پاگلوں کی طرح ہنس رہا تھا۔ہنستے ہنستے وہ دہرا ہونے لگا تھا مگر ہنسی تھی کہ رک ہی نہیں رہی تھی۔رات کے اندھیرے میں اس کا اس طرح ہنسنا منظر کو خوفناک بنا رہا تھا۔
“میں بہت خوش ہوں ڈیڈ۔بہت زیادہ خوش ہوں۔دیکھیں شہر آکر سب کتنا اچھا ہو گیا ہے۔میں نے پہلے ہی بولا تھا کہ سب ٹھیک ہو جائے گا۔ڈیڈ،مام،لیو۔۔آپ سب کہاں چھپ گئے ہیں۔رکیں میں آپ سب کو ڈھونڈتا ہوں۔”اب جو جملے اس کے منہ سے برآمد ہو رہے تھے،وہ اس کے دماغی توازن کے بگڑنے کا خلاصہ کر رہے تھے مگر کیا یہ سچ میں دماغ کے عدم توازن کی نشانی تھی یا پھر کچھ اور راز تھا اس کے پیچھے۔
بچپن سے لڑکپن میں چھٹنے والے بادل گرج چمک کے ساتھ برس رہے تھے اور بریس کے وجود کو بھگو رہے تھے۔
***
