وہ ایسا کر چکے ہیں!“ فروزہ کے یقین دہانی کرانے پر اس کی برداشت ختم ہو گئی تھی بنا کچھ اور سنے اس نے غصے کی زیادتی سے فون دیوار پر دے مارا- پھر بھی اس کا غصہ کم نا ہوا ایک آگ سی تھی جو اس کے اندر لگ چکی تھی اسے گھٹن سی محسوس ہونے لگی تھی اس نے بے ساختہ شرٹ اتار کر فرش پر ماری- گہرے گہرے سانس بھرتے وہ گلدان، لیمپ یہاں تک کمرے کی ہر ہاتھ آنے والی شے کو تباہ و برباد کرنے لگا- پورا کمرہ تہس نہس کر کے بھی اس کا دل نہیں بھرا تھا-
”مرجینہ!” لبوں نے ہولے سے پکارا تھا- نام لیتے ہی اس کا نازک سے سراپا چھم سے اس کی نظروں کے سامنے گھوم کر اس کے اضطراب میں اضافہ کر گیا-
”آآآآ۔۔۔آآ“ وہ پوری قوت سے چیختے ہوئے فرش پر گرا تھا- یہ اس کے غصے کو کم کرنے کا ایک طریقہ تھا- اس کا بس نہیں چل رہا تھا پوری دنیا کو آگ لگا دے-
اس کی فلک شگاف چیخ سنتے کچن میں کافی بناتا رافیل سب چھوڑ چھاڑ کر بھاگتا ہوا آیا تھا-
”محتشم!“ وہ حیران سا اسے فرش پر گٹھنوں کے بل گرا دیکھ کر کمرے کے حشر تک کو فراموش کر گیا تھا- فرش پر بکھری چیزوں سے بچتے بچاتے رافیل بمشکل اس تک پہنچا تھا-
”محتشم یہ سب کیا ہے؟“ رافیل کی آواز پر اس نے اپنی سرخ نگاہ اوپر اٹھائی تو رافیل دھک سے رہ گیا-
”تم ٹھیک ہو؟“ رافیل نے مدھم آواز میں پوچھا تھا اس کی لہو رنگ آنکھیں دیکھ کر وہ خوفزدہ ہوا- آج سے پہلے اس نے محتشم کو کبھی اتنے غصے میں نہیں دیکھا تھا-
”جاؤ یہاں سے!“ وہ حلق کے بل دھاڑا تھا کہ رافیل دو قدم دور ہوا تھا اسے محتشم کی حالت تشویشناک لگی-
”دفع ہو جاؤ یہاں سے، تمھیں سنائی نہیں دیتا؟“ اسے جم کر کھڑے دیکھ محتشم مزید بپھر گیا تھا- وہ رافیل پر حملے کی نیت سے یہاں وہاں نظریں دوڑانے لگا- رافیل جو آگے بڑھ کر اس سے بات کرنے کا چاہ رہا تھا اس کے خطرناک ارادے بھانپ کر الٹے قدم تیزی سے باہر نکل گیا-
”تمھارے تایا سائیں نے مرجینہ کو ونی میں دے دیا ہے-“ بار بار وہی ایک جملہ کان میں بازگشت ہوتا اس کے دماغ پر ہتھوڑے برسا رہا تھا-
”نہیں! اس نے بےبسی سے اپنے کانوں پر ہاتھ رکھے تھے-
”وہ صرف میری ہے- صرف میری!“ وہ ہذیانی کیفیت میں چیختے جیسے خود کو دلاسہ دے رہا تھا-
🌼°°°°°°°°°°🌼 
