Aaghaz E Inteqam by Aakasha Ali Episode 4

رات کا نجانے کون سا تھا وہ پلنگ پر چت لیٹی چھت کو گھورنے میں مصروف تھی- نیند اس کی آنکھوں سے کوسوں دور تھی- اس کے بائیں طرف چندا فرش پر بستر ڈالے گہری نیند سو رہی تھی-
وہ علی مراد کی بیٹی تھی تو اس کی ماں کون ہے؟ وہ کیوں اسے علی مراد جیسے پتھر دل ، ظالم انسان کے سپرد کر گئی کیا وہ بھی اس سے نفرت کرتی تھی؟“ وہ لاشعوری طور پر اپنی اصل ماں کے بارے میں جاننے کی خواہش مند ہو رہی تھی-
”وہ زندہ ہے بھی یا نہیں؟“ ایک اور سوال ذہن میں اپنی جگہ بنانے میں کامیاب ہو گیا تھا-
”مہرو سچ تو نہیں کہہ رہی تھی؟ کیا وہ مراد سائیں کی رکھیل!“ کتنا گندہ لفظ تھا اس نے ضبط سے آنکھیں میچ کر دوبارہ کھولیں تھیں-
”میں ناجائز ہوں؟“ اس خود سے ہی کراہیت محسوس ہونے لگی تھی-
”لیکن ان سب میں میری کیا غلطی ہے؟“ سوچ سوچ کر اس کا دماغ مفلوج ہونے کو تھا-
”یا اللّٰہ میرے ساتھ ہی کیوں ، پہلے میری زندگی کم بری تھی جو بدترین بن گئی ہے ، مجھے نہیں چاہیے یہ عذاب جیسی زندگی!“ وہ خدا سے شکوہ کناں ہوئی اس کی خوش آنکھیں ایک بار بھر برسنا شروع ہو گئیں تھیں-
گزری صبح سے پہلے زندگی کتنی پُرسکون گزر رہی تھی- اسے ہزاروں شے کی کمی تھی لیکن زندگی میں سُکون تو تھا مگراب؟ اب وہ سکون ختم ہو گیا تھا – کتنی آرزو تھی اسے باپ سے ملنے ان کے بارے میں جاننے کی لیکن اماں(بختاور) نے ہمیشہ یہی بتایا تھا کہ وہ اس کی پیدائش سے قبل ہی مر گئے تھے-
کتنا ترستی تھی وہ باپ کی شفقت ان کی محبت کے لیے، جب بھی وہ مہرو کو علی مراد کی ساتھ لاڈ جاتے دیکھتی تھی تو اسے باپ کی کمی بہت خلتی تھی لیکن جس روپ میں آج اس نے باپ کو دیکھا تھا اسے انہیں نا دیکھنا زیادہ اچھا لگا تھا کم از کم اس رشتے کے لیے اس کے دل میں عزت تو تھی اب تو اسے باپ نام لفظ سے بھی نفرت محسوس ہونے لگی تھی- سویرے کا منظر ایک بار پھر اس کی یادوں کا حصہ بنا تھا-
”آپ کس کی مرضی سے میرا نکاح کر رہے ہیں؟“ وہ مراد علی کے سامنے تن کے کھڑی تھی-
بانی نے حسنہ بیگم کے حکم پر اسے اچانک ہونے والے نکاح کی اطلاع دی تھی تاکہ نکاح کے وقت وہ کوئی ہنگامہ نا کھڑا کر دے جس پر وہ غیظ و غضب کا شکار ہوتی سیدھا ان کے سامنے جا کھڑی ہوئی تھی-
”اپنی مرضی سے-“ انہوں بڑے آرام سے اکڑ کے جواب دیا تھا کہ اس کے ماتھے پر بل پڑ گئے تھے-
”آپ کو یہ حق کس نے دیا؟“ اس کی دیدہ دلیری پر علی مراد عش عش کر اٹھے تھے –
” کسی کے دینے کی مجھے ہرگز بھی ضرورت نہیں، یہ حق روز اول سے ہمارے پاس ہے!“ انہوں نے استہفامیہ لہجے میں غرور سے کہا تھا-
”ہم آپ کے ملازم ہیں زر خرید غلام نہیں، جو آپ اپنی من مانیاں ہمارے سروں پر مسلط کر دیں-“ مرجینہ کا خون کھولا ہوا اٹھا تھا-
”میرا جو دل کرے گا میں وہ کروں گا ، اپنے فیصلے پر میں تمھیں جوابدہ نہیں- اب جاؤ یہاں سے ہمارا دماغ خراب مت کرو!“ ان کی بیزاریت سے بھرپور گرجدار آواز پر بھی وہ ٹس سے مس نا ہوئی-
”جواب دینا پڑے گا ، آپ ہوتے کون ہیں میری زندگی کا فیصلہ کرنے والے؟“ وہ تقریباً چیخ اٹھی تھی-
”تمھارا باپ ہوں میں-“ اس کی ہٹ دھرمی پر علی مراد کی ناچاہتے ہوئے بھی زبان پھسل گئی تھی- مرجینہ کی آنکھوں میں تحیر سمٹ آیا تھا-
”یہاں مذاق چل رہا ہے؟“ وہ جھنجھلاہٹ کا شکار ہوئی اسے اتنے سنجیدہ وقت میں علی مراد جیسے بارعب شخصیت کے مالک انسان سے اتنی غیرہ سنجیدہ بات کی توقع ہرگز نہیں تھی-
”تمھارا ہمارا مذاق ہے؟“ انہوں نے بھونیں سکوڑ کر الٹا سوال داغا تھا-
”بلکل بھی نہیں!“ وہ قطعیت سے انکار کر گئی-
”تو پھر؟ ہمارا دماغ کیوں خراب کر رہی ہو- جو ہم نے کہہ دیا ہے وہی ہو گا، آ گے ہم تمھاری بحث نہیں سننا چاہتے- جاؤ دفع ہو جاؤ یہاں سے!“ انہوں نے بات ہی ختم کر دی تھی-
”میں آپ کا فیصلہ نہیں مانوں گی، آپ کو جو کرنا ہے کر لیں- میں نکاح کے وقت انکار کر دوں گی-“ مرجینہ کا ازلی ضدی پن عود آیا تھا اس نے بھی اپنے فیصلے سے آگاہ کر دیا تھا- ابھی تو اسے علم بھی نہیں تھا کہ اسے ونی کیا جا رہا ہے- بانی کی مکمل بات سنی ہی کہاں تھی اس نے، وہ تو صرف نکاح کا سن کر ہی بلبلاتی ہوئی یہاں پہنچ گی تھی-
”چپ ایک لفظ اور نہیں کہنا! ہم تمھارے ساتھ برا برتاؤ نہیں کرنا چاہتے لیکن تم مسلسل ہمارا صبر آزما رہی ہو، تم قبل از پیدائش سے آج تک ہمارے لیے سراپائے آزمائش بنی ہوئی ہو- پتا نہیں وہ کونسی منحوس گھڑی تھی جب ہم نے تمھاری ماں سے رشتہ جوڑا تھا ، بے حیا عورت اپنی جیسی ڈھیٹ اولاد پیدا کر کے ہمارے سر ڈال گئی“وہ مرجینہ پر قہربار نگاہ جمائے خود کو کوستے ہوئے اپنے دل کی بھڑاس نکالتے چلے گئے، جبکہ وہ پے در پے انکشافات پر ششدر سی اپنی جگہ جمی رہ گئی تھی-