Dil O Janam Fida E Tu By Aniqa Ana Episode 63 Past Special

لندن شہر کے ہنگاموں سے دور ہٹ کر، مضافاتی علاقے میں بنا وہ فارم ہاؤس اسفند جاہ نے خاص طور پر ایلسی جاہ کے لیے شادی کی پندرہویں سال گرہ پر خریدا تھا۔اس کے عقب سے جھانکتے سر سبز پہاڑ اور چھوٹی سی وہ جھیل دن میں تو دل کو لبھاتی ہی تھی لیکن رات میں بھی اس جگہ کی خوب صورتی دیکھنے لائق ہوتی تھی۔ چاند کے عروج کی راتوں میں جھیل کے ٹھہرے پانی میں دکھائی پڑتا چاند کا عکس انسان کو کسی اور ہی دنیا میں لے جاتا تھا۔ ”یہ سب کتنا خوب صورت ہے اسفند!“ آج بھی چاند پوری آب و تاب سے چمک رہا تھا۔ جھیل میں اس کے عکس اور دودھیا چاندنی کو دیکھتے ایلسی چاروں طرف گھوم کر اس نظارے کا مزہ لے کر بولی تھی۔”تمھیں پسند آیا یہ سب؟“ اسفند کی پر شوق اور وارفتہ نگاہیں اس کے صبیح چہرے کا طواف کر رہی تھیں۔”بہت پسند آیا ہے۔ تم ہر بار شادی کی سال گرہ پر مجھے حیران کر دیتے ہو۔“ پندرہ سالوں میں کبھی لگژری کار تو کبھی ڈائمنڈ رنگ یا نیکلس تو کبھی ان کی پسند کا مہنگا ترین لباس اور اس بار یہ۔۔۔ وہ ان کا بازو تھام کر ان کے قریب ہوئی تھی۔”لیکن تم نے مجھے حیران نہ کرنے کی قسم کھا رکھی ہے۔“ وہ انھیں خود سے قریب کرتے شکوہ آمیز انداز میں بولا تھا”سوائے پہلی سال گرہ کے، جب تم نے مجھے باپ بننے کی خوش خبری سنائی تھی۔“ ایلسی نے برا سا منھ بنا کر اس لمحے کے اثر کو زائل ہوتے محسوس کیا تھا۔”اب تمھیں حیران کرنے کے چکر میں، مَیں اپنا فگر اور اپنی خوب صورتی خراب نہیں کر سکتی۔“ اسفند جاہ نے ان کے لہجے میں محسوس کی جانے والی برہمی محسوس کی تھی۔”اس ایک خبر نے جتنا سرپرائز تمھیں کیا تھا اس سے کہیں زیادہ میں خود ہوئی تھی۔“ اس نے بے ساختہ اپنے پیٹ پر ہاتھ رکھ کر کچھ یاد کیا تھا۔ لہیم کی پیدائش کے بعد کتنی ہی پلاسٹک سرجریاں کروانے کے بعد ان کے جسم سے وہ اسٹریچ مارکس ختم ہوئے تھے۔ چہرے کی رنگت اور نشانات، جسم کا پہلی حالت میں واپس آنا، اس سب کے لیے انھوں نے کتنی تگ و دو کی تھی یہ وہی جانتی تھیں۔”عورت کا پہلا عشق اس کا حسن ہوتا ہے اسفند!“”اور اس کا آخری عشق اس کی اولاد ۔۔“ ایلسی نے کہا تو اسفند نے فوراً جملہ مکمل کیا تھا۔”میرا آخری عشق بھی میرا حسن میری خوب صورتی ہی ہے۔“ ایلسی نے تصحیح کرنا ضروری سمجھا تھا۔”اور میرا پہلا دوسرا تیسرا اور آخری عشق بھی۔۔ تم ہی ہو۔“ وہ اسے دونوں بازوؤں سے پکڑ کر اپنے قریب کرتے ہوئے جذبات سے مغلوب لہجے میں بولا تھا۔”صرف میں ہی ہوں نا!“ اس کے سینے پر ہاتھ رکھ کر اپنے اور اس کے بیچ فاصلہ برقرار رکھتے ہوئے اس نے کسی خیال کے تحت پوچھا تھا۔”ہاں! صرف اور صرف تم!!“ اسے اپنے درمیان یہ ذر سی بھی دوری برداشت نہیں ہو رہی تھی۔”اور لہیم؟؟“ ایلسی نے تیرہ سالہ بیٹے کا ذکر کیا تو اسفند کی آنکھوں میں تحیر ابھرا تھا۔”وہ ہمارا بیٹا ہے ایلسی! اس کی اپنی جگہ ہے اور تمھارا میری زندگی میں اپنا ایک الگ مقام ہے۔“”نہیں اسفند!“ اس نے ایک جھٹکے سے ہاتھ پر دباؤ ڈال کر اسے خود سے دور کیا تھا۔”مجھے تمھاری زندگی میں صرف میں ہی چاہیے ہوں۔ تمھاری صبحیں تمھاری شامیں صرف میری ہیں۔ ان میں، مَیں کسی دوسرے کا وجود برداشت نہیں کر سکتی؛ چاہے وہ ہمارا بیٹا ہی کیوں نہ ہو۔۔؟“ اسفند بنا کچھ کہے، بنا پلکیں جھپکائے اسے دیکھتا رہا اور پھر اس کا بازو تھام کر اسے اپنے قریب کرتے ہوئے بولا:”جیسے تم کہو میری جان!“ پھر وہ ایلسی کی کوئی مزاحمت خاطر میں نہ لایا تھا۔ ایلسی جذبات کے سمندر میں اس کے ساتھ بہتی، مسکرا دی تھی۔ اسے خوب اندازہ تھا کہ اسفند جاہ کو کب اور کیسے مٹھی میں کرنا تھا اور کس طرح اپنے دام میں الجھائے رکھنا تھا۔