Dil O Janam Fida E Tu By Aniqa Ana Episode 63 Past Special

”تم کب چھوڑ رہی اسے؟“ بلوریں بوتل سے سیاہ رنگ کا محلول گلاس میں انڈیلتے ہوئے ایلسی جاہ کے ہاتھ پل بھر کو ساکت ہوئے تھے۔”تمھیں کس نے کہا کہ میں اسے چھوڑ رہی ہوں؟“”کیوں کہ تم مجھ سے محبت کرتی ہو؟“”وہ تو میں اس سے بھی کرتی ہوں۔“”تم ایک ہی وقت میں ہم دونوں سے کیسے محبت کر سکتی ہو؟“”جب تم مرد بیک وقت دو یا تین عورتوں سے محبت کر سکتے ہو تو ہم عورتیں کیوں نہیں؟“ گلاس ہونٹوں سے لگاتے ہوئے اس سے بڑے چبھتے ہوئے لہجے میں سوال کیا تھا۔”کچھ چیزوں کو ہمارا معاشرہ کبھی قبول نہیں کرتا ایلسی! ہم مشرقی مرد کتنے بھی ترقی یافتہ کیوں نہ ہو جائیں لیکن اپنی عورتوں کے معاملے میں ہمیشہ قدامت پسند ہی رہتے ہیں۔“ اس نے گہری نظروں سے اسے دیکھتے ہوئے سنجیدگی سے کہا تھا۔”اگر میں تم سے محبت کا دم بھرتا ہوں اور تم بھی مجھ سے محبت کی دعوے دار ہو تو میں یہ کبھی برداشت نہیں کروں گا کہ تم کسی دوسرے مرد کی زندگی میں رنگ بھرو۔“ ایلسی کو اس کے لہجے کی ٹھنڈک اپنی ریڑھ کی ہڈی میں اترتی محسوس ہوئی تھی۔”دوسرا مرد وہ نہیں تم ہو جمال۔۔! وہ میرا شوہر ہے۔“ اس نے اپنے خوف اور گھبراہٹ پر قابو پاتے ہوئے کہا تھا۔”مرد دوسری عورت رکھے تو چل جاتا ہے لیکن معاشرہ ایسی عورت کو اچھا نہیں سمجھتا ایلسی ڈارلنگ۔۔“ وہ اس کے قریب ہوتا اس کے چہرے کو انگشتِ شہادت سے چھوتے ہوئے بولا تھا۔”بہ ہر حال! میں تمھیں بتانا چاہتا ہوں کہ جتنی جلدی ہو سکے اسفند جاہ سے چھٹکارا حاصل کر لو تو ہم دونوں ہی کے لیے اچھا ہو گا۔“ وہ خالی گلاس ہاتھ میں لیے، چہرے پر مسکراہٹ سجائے اسے دیکھتی رہی تھی۔”تم کچھ کہو گی نہیں؟“ ”نہیں! ابھی میں بس یہ سوچ رہی ہوں کہ چھٹکارا کیسے حاصل کروں کہ معاملہ بھی ختم ہو جائے اور کسی کو کانوں کان خبر بھی نہ ہو۔“ گلاس کے کنارے پر انگلی پھیرتے ہوئے وہ گہری سوچ میں مگن تھی۔”ہاں! اس میں تو تم ماہر ہو۔“ وہ بائیں آنکھ کا کونہ دباتے ہوئے بولا تھا۔”تین سال سے میرے ساتھ ہو اور اسفند جاہ کو آج تک کانوں کان خبر نہیں ہوئی۔“ ”ماہر تو تم بھی ہو۔۔۔ تم نے بھی اپنی بیوی کو کہاں کچھ پتا چلنے دیا ہے؟“ ”کہتی تو تم ٹھیک ہو لیکن میں اسے چھوڑنے کا فیصلہ کر چکا ہوں۔ بس اب تم بھی اسفند جاہ سے پیچھا چھڑا لو تو ہمیں ایک ہونے سے کوئی نہیں روک سکتا۔“ اس نے خالی گلاس میز پر رکھا اور اٹھ کھڑا ہوا تھا۔”اب مجھے چلنا چاہیے۔“ ہینگر سے اپنا کوٹ اتار کر پہننے لگا تو ایلسی اٹھ کر اس کے قریب آئی اور کوٹ پہننے میں اس کی مدد کرنے لگی تھی۔”میں تمھیں جلدی ہی اس روپ میں اپنے گھر اپنے بیڈروم میں دیکھنا چاہتا ہوں ایلسی!“ وہ اس کی کمر کے گرد بازو حائل کرکے اسے اپنے قریب کرتے ہوئے جذبات سے مغلوب ہو کر بولا تھا۔”بس کچھ دن اور۔۔۔“ وہ پھر لگاوٹ سے مسکرائی اور اس کے منھ پر ہاتھ رکھ کر اسے پیچھے کی طرف دھکیلا تھا۔”تمھیں اب جانا چاہیے۔ اسفند کے آنے کا وقت ہو گیا ہے۔“ وہ سر ہلاتا اس سے الگ ہوا اور میز پر سے اپنا فون اور گاڑی کی چابیاں اٹھا کر اسے ہاتھ ہلاتا باہر نکل گیا تھا۔ ایلسی کمرے کی کھڑکی میں کھڑی اس کے جانے تک وہاں ٹھہری رہی تھی جیسے ہی اس کی نیلی سپورٹس کار نگاہوں سے اوجھل ہوئی اس نے فون اٹھایا تھا۔”سنو! اب وقت آ گیا ہے کہ ہم اپنے منصوبے پر عمل کر گزریں۔ اس سے پہلے کہ معاملہ ہاتھوں سے نکل جائے اس کے پَر کاٹ دینے چاہییں۔“ فون پر دوسری جانب سے کچھ کہا تھا تو وہ سختی سے اسے ڈانٹتے ہوئے بولی تھی:”نہیں! اسے مرنا ہی ہو گا۔ میں اپنے پیچھے کوئی سراغ نہیں چھوڑنا چاہتی۔ لہیم کافی عرصے سے مجھ پر نظر رکھے ہوئے ہے یہ تو اسفند میری آنکھوں سے دیکھتا اور میرے کانوں سے سنتا ہے تو میں اب تک بات سنبھالتی چلی آ رہی ہوں لیکن اب یہ بات زیادہ نہیں چھپے گی۔“ وہ ہوں ہاں کرتی مقابل کی بات سنتی رہی وہ خاموش ہوا تو بولی:”پیسوں کی تم فکر مت کرو بس پولیس کیس نہیں بننا چاہیے۔“ اس نے تاکید کرنا لازمی سمجھا تھا۔”بس ٹھیک ہے۔“ اس نے فون بند کیا اور کھڑکی سے سر ٹکائے کسی گہری سوچ میں گم ہوئی تھی۔