؏ اسے بے چین کر جاؤں گا میں بھی صبح دم آنکھ کھلی تو لاشعوری طور پر اس کا ہاتھ موبائل کی طرف گیا تھا۔ انٹرنیٹ آن کرتے ہوئے اس نے نوٹیفکیشن چیک کیے۔ واصب کے نمبر سے آیا پیغام سب سے پہلے نگاہ میں آیا تھا۔ کتنی عجیب بات تھی کہ اس نے اب تک اس کا نمبر محفوظ نہیں کیا تھا۔ ایک دو بار وہ نمبر محفوظ کرنے کا سوچ کر، پھر کرتے کرتے رک گئی تھی۔ وہ سمجھ ہی نہیں پا رہی تھی کہ واصب کا اس کے اس طرح قریب آنے کا مقصد کیا تھا؟ کبھی وہ شہرین کے حوالے سے بات کرنے لگتا تھا تو کبھی اس کا ذکر یک سر فراموش کرکے صرف مطیبہ کی بات کرنے لگتا تھا اور رات جو اس نے کہا تھا۔ وہ سب سوچ کر پھر سے اس کا دماغ سن ہوا تھا۔ اس نے چیٹ کھولی تھی۔؎ اسے بے چین کر جاؤں گا میں بھی خموشی سے گزر جاؤں گا میں بھی (امیر قزلباش)”جانا ہے تو چلے جاؤ۔۔۔ میری زندگی میں طوفان برپا مت کرو۔“ وہ شعر پڑھتے ہوئے بڑبڑائی تھی۔ وہ اس کے خاموشی سے چلے جانے کی خواہاں تھی اور یہ بھول گئی تھی کہ ہر خاموشی اپنے اندر اسرار و رموز کے بے پایاں طوفان چھپائے ہوتی ہے۔”کیسی ہو مطیبہ۔۔؟“ اسے شاید میسجز پہ نیلا ٹک نظر آ گیا تھا۔ اسی لیے فوراً کال ملائی تھی۔ فون کا والیوم اگرچہ کم تھا لیکن اس کے غیر متوقع طور پر فون ملانے سے وہ ایک دم گھبرا گئی اور کچھ شہرین کے جاگ جانے کا بھی اندیشہ تھا۔ اس نے فون اٹھانا ہی ضروری سمجھا کیوں کہ وہ ایسا نہ کرتی تو واصب کال پر کال کیے چلا جاتا۔
Dil O Janam Fidaye Tu By Aniqa Ana
