”ہم پھر بات کریں گے۔“ مطیبہ کے کچھ بولنے سے قبل ہی اس نے کہا اور فون بند کر دیا تھا۔ وہ خالی الذہنی کی سی کیفیت میں فون ہاتھ میں لیے لیٹی ہوئی تھی۔”سب جھوٹ ہوتا ہے۔ مجھے ایک بار پھر اسی تکلیف اور اذیت سے نہیں گزرنا۔“ دل میں آئے ہر خوش کن خیال کو جھٹکتے ہوئے وہ اٹھ بیٹھی تھی۔ ”میں تمھارے ہر غم کا مداوا کر دوں گا۔“ واصب کے نمبر سے آیا پیغام پھر اس کی توجہ حاصل کرنے لگا تھا۔”میرا ہاتھ تھام لو مطیبہ! میں تمھیں بتاؤں گا کہ محبت کتنا آفاقی جذبہ ہے۔“ اس کی دھڑکنیں ایک بار پھر منتشر ہونے لگی تھیں۔”میں پہلے دن، تمھیں دیکھتے ہی تمھاری محبت میں گرفتار ہوا تھا۔ ایسا کیوں ہے مطیبہ کہ میرے جذبوں کی آنچ تم تک نہیں پہنچ رہی؟“ دل کی دھڑکنیں یک دم تیز ہوئی تھیں۔میرے خوابوں کے جھروکوں کو سجانے والیتیرے خوابوں میں کہیں میرا گزر ہے کہ نہیںپوچھ کر اپنی نگاہوں سے بتا دے مجھ کومیری راتوں کے مقدر میں سحر ہے کہ نہیںپیار پر بس تو نہیں ہے مرا لیکن پھر بھیتو بتا دے کہ تجھے پیار کروں یا نہ کروںتو نے خود اپنے تبسم سے جگایا ہے جنہیںان تمناؤں کا اظہار کروں یا نہ کروں(ساحر لدھیانوی)”میں تو تمھارے حسن کے تیر سے پہلے ہی روز گھائل ہو گیا تھا تو ایسا کیوں ہے کہ میری محبت تمھارے دل کو پگھلا نہیں پا رہی؟“ مطیبہ نے شکر کیا کہ وہ یہ سب فون پر نہیں کَہ رہا تھا۔ ورنہ وہ کچھ بول ہی نہیں پاتی اور وہ اس کی خاموشی کو وہ اپنی مرضی کے معنی پہنا دیتا۔”محبت کی یہ سب باتیں قصے کہانیوں میں ہی اچھی لگتی ہیں۔“ واصب اس کا چہرہ تصور میں رکھے بڑی معنی خیزی سے مسکرایا تھا۔”مجھے اب اسکول جانا ہے۔ خدا حافظ“ وہ فون رکھ کر بستر سے نکلی تھی۔ شہرین بھی آنکھیں کھولے اسی کو دیکھ رہی تھی۔”یہ صبح صبح تم اسی نمونے سے بات کر رہی تھیں؟“ اس کا اشارہ چیٹ کی طرف تھا۔ اس نے بالوں کو سمیٹتے ہوئے صرف سر ہلانے پر اکتفا کیا اور شہرین کے مزید کچھ کہنے سے قبل ہی بولی تھی:”تم اس بات کو لے کر میری کلاس، کل اسکول فنکشن کے بعد، تسلی سے لے لینا۔ آج کے لیے مجھے چھوڑ دو۔“ شہرین نے اسے گھورتے ہوئے ”اچھا“ کہا تھا۔ اگر شہرین کو یہ پتا چل جاتا کہ وہ نمونہ دراصل وہی بھیڑیا تھا جس سے عزت بچا کر وہ یہاں آئی تھی تو مطیبہ کو ایک لمحے میں اس کی حقیقت سے آگاہ کرتی اور کچھ بھی کر کے اپنی بہنوں جیسی کزن کو اس درندے سے دور کر دیتی لیکن جو ہونا ہوتا ہے وہ تو ہو کر ہی رہتا ہے۔ تقدیر کا لکھا اٹل اور انسان کی سوچ اور ارادوں سے کہیں پرے کی چیز ہے۔
٭٭٭٭٭٭٭٭٭٭٭٭٭٭٭٭٭٭٭
