اس کے سمجھانے کے باوجود وہ اپنی ضد پر اڑا رہا تھا۔ عبدالمعید نے خود کو مشکل سے مزید کچھ کہنے یا کرنے سے روکا اور اثبات میں سر ہلایا تھا۔”تمھاری سرکاری گاڑی میں جانا مناسب نہیں ہے۔“ لہیم جاہ نے کہتے ہوئے اس کے لیے اپنی گاڑی کا دروازہ کھولا جیسے اپنے رویے کا ازالہ اور اس کا غصہ ٹھنڈا کرنا چاہ رہا ہو۔ اس نے بڑی حیرت سے اسے یہ کرتے دیکھا تھا۔ لہیم جاہ نے اس کی آنکھوں میں حیرت کے ساتھ ساتھ خوشی کے امنڈتے تاثرات واضح محسوس کیے تھے۔”میں برا ہوں لیکن اتنا بھی نہیں۔۔۔“ وہ سینے پر ایک ہاتھ رکھے سر خم کرتا ہوا بولا تھا۔”اور یوں بھی شہر کے حاکم صاحب اپنے کام سے ایک دن چھٹی لے کر میرے لیے جان ہتھیلی پر رکھ کر آئے ہیں تو میرا بھی فرض بنتا ہے کہ ان کی اس محبت کا جواب محبت سے نہ سہی، کم از کم اپنائیت سے ہی دے دوں۔“ یہ سب کَہ کر مسکراتا ہوا وہ عبدالمعید کو بہت پیارا لگا تھا۔”ایک نمبر کے کمینے اور خبیث انسان ہو تم اس کے باوجود مجھے جان سے بھی زیادہ عزیز ہو۔“ اس نے بے ساختہ اسے سینے سے لگایا تھا۔”ہاں ہاں! اب بہت ہو چکا، چلو ہمیں دیر ہو رہی ہے۔“ ایسے جذباتی مظاہرے لہیم جاہ کو ہمیشہ الجھا دیتے تھے۔ اسے سمجھ میں نہیں آتا تھا کہ ایسی محبتوں کا جواب کس طرح دے؟ وہ رشتوں ناطوں اور تعلق کی ڈور میں الجھ کر کم زور نہیں پڑنا چاہتا تھا۔ اس بات سے بے خبر کہ جب قدرت محبتیں نچھاور کرنے پہ آئے تو پہاڑ ایسے مضبوط انسان کو بھی خس و خاشاک کی طرح بہنے پر مجبور کر دیتی ہے۔منتظر ہے ایک طوفان بلا میرے لیےاب بھی جانے کتنے دروازے ہیں وا میرے لیےپر مصیبت ہے مرا عہد وفا میرے لیےاے غم دل کیا کروں اے وحشت دل کیا کروںدل میں اک شعلہ بھڑک اٹھا ہے آخر کیا کروںمیرا پیمانہ چھلک اٹھا ہے آخر کیا کروںزخم سینے کا مہک اٹھا ہے آخر کیا کروںاے غم دل کیا کروں اے وحشت دل کیا کروں(اسرار الحق مجاز)
٭٭٭٭٭٭٭٭٭٭٭٭٭٭٭٭٭٭٭
