امانی ملک کی آنکھ کھلی تو سر میں شدید درد کی ٹیسیں اٹھ رہی تھیں۔ ایسا محسوس ہو رہا تھا جیسے کسی نے اس کے سر کے اندر چھوٹے چھوٹے ہتھوڑے بجا رکھے ہوں۔ وہ بمشکل بستر سے اٹھی، مگر جسم میں جیسے جان ہی نہیں تھی۔ آنکھیں آدھی کھلی، آدھی بند۔ اچانک باورچی خانے سے برتنوں کے ٹکرانے کی کھٹ پٹ سنائی دی، جیسے کوئی جنگی مشقیں کر رہا ہو۔
“یہ کون ہے جو صبح صبح زلزلے کے جھٹکے دے رہا ہے؟” وہ بڑبڑاتے ہوئے دروازے تک آئی اور حیران رہ گئی۔
سامنے نورا اپنے مخصوص “ماہرانہ” انداز میں کچن میں سوپ بنا رہی تھی۔ چولہے پر ہنڈیا دھواں چھوڑ رہی تھی، چمچ کسی تلوار کی طرح گھمایا جا رہا تھا، اور اس کے چہرے پر ایک فاتحانہ مسکراہٹ تھی، جیسے کسی عظیم شاہکار کی تکمیل ہونے والی ہو۔
“آئیں پھوپھو، میں نے آپ کے لیے سوپ بنایا ہے!” نورا جوش سے بولی اور ایک پیالہ اس کی طرف بڑھایا۔
امانی نے مشکوک نظروں سے پیالے کو دیکھا۔ سوپ کی رنگت عجیب تھی، جیسے کسی سائنسدان کی ناکام تجربہ گاہ کا نتیجہ ہو۔ اس میں کچھ تیر رہا تھا شاید سبزیاں تھیں، یا کچھ اور جو شناخت کے دائرے سے باہر تھا۔
“یہ کیا ہے؟” امانی نے ناک چڑھاتے ہوئے پوچھا۔
“سوپ!” نورا نے فخر سے کہا، ” سر درد کے لیے بہترین علاج!”
امانی نے ایک نظر نورا پر ڈالی، پھر ایک نظر سوپ پر۔ دل کڑا کر کے ایک چمچ لیا، ہونٹوں تک لائی، اور جیسے ہی چکھا اس کے چہرے کے تاثرات کسی ہارر فلم کے کردار جیسے ہو گئے۔
“یہ۔۔۔۔ یہ کیا چیز ہے نورا؟” اس نے پانی کا گلاس اٹھا کر ایک ہی سانس میں پی لیا۔
نورا نے معصومیت سے کہا، “خاص ترکیب سے بنایا ہے، میری دادی کا نسخہ ہے!”
“دادی کا نسخہ؟ واللہ میری ماں نے کبھی اتنا بھیانک سوپ نہیں بنایا ، یہ تو کسی دشمن کا انتقام لگ رہا ہے!” امانی نے فوراً پیالہ ٹیبل پر رکھا، “ایسا لگ رہا ہے جیسے میں نے سائنسدان کے خراب تجربے کا کیمیکل نکال کر چکھ لیا ہو!”اس نے برا سا منہ بنایا، “پھوپھو آپ کو پتا ہے، آپ بہت ناشکری ہو!”
”بیٹا ایسی چیزوں پر نا شکری ہی بنتی ہے“
امانی نے گہرا سانس بھرتے کہا جب کہ نورا نے شرارت بھری مسکراہٹ کے ساتھ امانی کو دیکھا اور کہا ، “پھوپھو، رکیں! میں آپ کے لیے دوسرا سوپ بنا دیتی ہوں!”
“رہنے دو بھئی، وقت سے پہلے مجھے کوما میں جانے کا کوئی شوق نہیں! میرے مریضوں کو میری ضرورت ہے، ڈاکٹر ہوں، ڈاکٹر ہی رہنے دو، مریض نہ بناؤ!”
نورا نے کندھے اچکائے، “اچھا چلیں، پھر چائے بنا دیتی ہوں؟”
امانی نے فوراً ہاتھ جوڑ دیے، “خدا کے واسطے، وہ بھی نہ بنانا! میں ابھی زندہ رہنا چاہتی ہوں!”
دونوں کے قہقہے کچن میں گونجنے لگے، اور اس سر درد بھرے دن میں بھی ایک ہنسی کا لمحہ آ گیا۔
💙👀
الیکزینڈر ایک یاماہا بائیک کے قریب جا کر رُک گیا۔ گہرے نیلے اور سیاہ رنگ میں دمکتی ہوئی بائیک کی شاندار باڈی، نفیس ایروڈائنامک ڈیزائن اور اسپورٹی لک نے اس کی توجہ کھینچ لی۔ اس کی انگلیاں غیر ارادی طور پر بائیک کی ہینڈل پر چلنے لگیں، جیسے کوئی مصور کسی شاہکار کو چھو کر محسوس کرتا ہے۔
کائد غزنوی، جو چند قدم پیچھے کھڑے یہ منظر دیکھ رہے تھے، مسکرا کر آگے بڑھے اور ہلکی آواز میں بولے،
“کہیں تمہارا بائیک خریدنے کا ارادہ تو نہیں؟”
الیکزینڈر نے ایک لمحے کے لیے بائیک پر ہاتھ جمائے رکھا، پھر دھیرے سے مُڑ کر ان کی طرف دیکھا۔ اس کی آنکھوں میں ایک عجیب سی چمک تھی، ہلکی مسکراہٹ اس کے لبوں پر رقص کر رہی تھی۔
“نہیں، ڈیڈ!” وہ ہلکے سے ہنسا، “میں محبت میں بے وفائی کا قائل نہیں ہوں!”
کائد غزنوی نے حیرانی سے ایک ابرو اٹھائی، “اوہ! تو اب بائیک سے عشق بھی ہونے لگا ہے؟”
الیکزینڈر نے بائیک کے ہینڈل پر ہاتھ پھیرتے ہوئے شوخی سے کہا، “بالکل! جس دن میں نے اپنی پہلی بائیک چلائی تھی، اسی دن فیصلہ کر لیا تھا کہ میرا دل اس کے علاوہ کسی اور پر نہیں آئے گا!”
کائد غزنوی نے ہنستے ہوئے اس کے کندھے پر ہاتھ رکھا، “چلو، یہ تو اچھی بات ہے کہ کم از کم کسی ایک چیز کے لئے تو سیریس ہو!”
ان کی بات سن کر اس نے پر مصنوعی خفگی سے دیکھا جس پر مسکرا کر اس کے سانوں پر ہاتھ رکھتے آگے بڑھ گئے۔
💙✨
کائد غزنوی اپنی آرام دہ کرسی پر نیم دراز بیٹھے تھے۔ ان کی نظریں فائل پر تھیں، مگر دھیان کہیں اور، ایک ماہ ہونے کو آیا تھا اور اس دوران امانی ملک کا دوبارہ کوئی سامنا نہ ہوا، نہ کوئی ملاقات، نہ ہی کوئی جھڑپ۔۔۔۔
دوسری طرف، الیکزینڈر نے آفس باقاعدہ سے جوائن کر لیا تھا، جو کائد غزنوی کے لئے حیرانی و خوشی کا باعث تھا۔ ابھی بھی وہ الیکزینڈر کو لیپ ٹاپ پر کوئی کام کرتے دیکھ رہے تھے جو ان کے لبوں پر مسکراہٹ بکھیرنے کا باعث بنا۔
“میں نوٹ کر رہا ہوں کہ کوئی باقاعدگی سے آفس آنا شروع کر چکا ہے۔”
کائد نے ایک معنی خیز مسکراہٹ کے ساتھ کہا،
اس نے فوراً نظریں گھما کر باپ کو دیکھا اور اسی انداز میں جواب دیا۔
“اور میں نوٹ کر رہا ہوں کہ کوئی باقاعدگی سے ہسپتال جا رہا ہے، چیک اپ کے لیے۔۔۔”
کائد نے بھنویں چڑھائی۔۔۔
“ہاں؟ یہ نئی کہانی کیا ہے؟”اپنے باپ کو معنی خیز نگاہوں سے دیکھتا بولا جب کہ وہ جھینپ گئے۔
“ایسی کوئی خاص بات نہیں، بس کچھ کام تھا، اور ویسے بھی، تم زیادہ باپ نہ بنو۔۔۔۔
ان نے جھیپ مٹانے کی کوشش کی، مگر ناکام رہے
“چلیں، ٹھیک ہے ڈیڈ ، میں زیادہ باپ نہیں بنتا، بس اتنا بتا دیں کہ کام کے نام پر دل کا علاج ہو رہا ہے یا دماغ کا؟”
کائد ہکّا بکّا رہ گئے، پھر جلدی سے کھڑکی کی طرف دیکھنے لگے۔
“آج موسم کتنا اچھا ہے! واقعی، کیا خوبصورت دن ہے!”
الیکزینڈر نے کرسی پر آرام سے ٹیک لگا لی اور ہاتھ باندھ لئے اور ان کی جانب دیکھتے معنی خیزی سے بولا
”جب دل کا موسم اچھا ہو تو باہر کا موسم بھی اچھا ہی لگتا ہے“۔۔۔ الیکزینڈر کی بات سن ان کا دل کیا یہ پیپر ویٹ اٹھا کر اس کے سر میں دے ماریں ، جو ان کو باتوں میں مات دیے جا رہا تھا۔
آخر وہ کیوں بھول جاتے تھے کہ وہ ان ہی کا بیٹا ہے جو باتوں اور کام دونوں میں ان سے دو ہاتھ آگے ہے۔
”کانفرنس روم میں ملو مجھے“۔۔۔۔ گلا کھنکھارتے وہ باہر کی جانب بڑھ گئے جب کہ ان کے جاتے ہی الیکزینڈر کا قہقہ گونجا۔
💐👀
کانفرنس روم میں خاموشی تھی، مگر ماحول میں نورا کی باتوں کی گونج تھی۔ وہ پورے اعتماد کے ساتھ ایک بڑی اسکرین پر اپنی پریزنٹیشن دے رہی تھی۔ اس کے الفاظ میں روانی تھی، لہجے میں ٹھہراؤ، اور انداز میں ایک خاص کشش جو سامنے بیٹھے ہر شخص کو اپنی بات سننے پر مجبور کر رہی تھی۔
“یہ ڈیزائن اسپیس کو نہ صرف وسیع دکھائے گا بلکہ قدرتی روشنی کا زیادہ سے زیادہ استعمال بھی کرے گا۔ کلائنٹس کا پہلا تاثر ہمیشہ بہترین ہونا چاہیے، اور انٹیریئر اس کا سب سے بڑا ذریعہ ہے،” نورا نے اسکرین پر سلائیڈ تبدیل کرتے ہوئے وضاحت دی۔
سامنے بیٹھے آفس اسٹاف میں سے کچھ نے ستائشی انداز میں سر ہلایا، جب کہ کچھ نوٹس بنا رہے تھے، لیکن سب سے زیادہ خاموشی اگر کسی نے اختیار کر رکھی تھی، تو وہ الیکزینڈر تھا۔
وہ نورا کی مہارت، اس کے اعتماد اور ہر چیز کو اتنی باریکی سے سمجھنے کے انداز کو بغور دیکھ رہا تھا۔ اسے ماننا پڑا کہ نورا واقعی غیر معمولی ذہین تھی، مگر دل کے کسی کونے میں ایک ہلکی سی جلن یا شاید بے چینی تھی۔ وہ لڑکی ہو کر اس سے زیادہ صلاحیت رکھتی تھی، اور یہ احساس اس کے اندر کہیں چبھ رہا تھا۔
“یہ آئیڈیا کافی انوکھا ہے، نورا،” ایک سینئر ایگزیکٹو نے تبصرہ کیا۔
“مگر کیا یہ بجٹ میں ایڈجسٹ ہو پائے گا؟”
نورا نے مسکراتے ہوئے پر اعتماد انداز میں جواب دیا،
“یقیناً، میں نے لاگت کا پورا حساب رکھا ہے۔ اگر آپ سلائیڈ 14 پر نظر ڈالیں، تو آپ دیکھیں گے کہ کس طرح ہم کم لاگت میں زیادہ موثر نتائج حاصل کر سکتے ہیں۔”
الیکزینڈر نے بے ساختہ آنکھیں سکوڑ کر سلائیڈ کو دیکھا۔ وہ واقعی ہر زاویے سے چیزوں کو پرکھ کر آئی تھی۔
“امپریسیو،” اس کے منہ سے بے اختیار نکلا، مگر اگلے ہی لمحے اس نے خود کو نارمل ظاہر کرنے کے لیے ہاتھ باندھ لیے اور کرسی سے ٹیک لگا لی۔
نورا نے اس کی طرف دیکھا اور ہلکی سی مسکراہٹ اس کے چہرے پر ابھری۔
“شکریہ، کچھ اور سوالات؟”
الیکزینڈر نے ایک زبردستی مسکراہٹ دی اور ہنکارا بھرا،
“سوالات تو خیر کوئی نہیں، ابھی تمہارے جوابات ہی ہضم کرنے کی کوشش کر رہا ہوں۔”
پہلی بات مسکرا کر کہتے دوسری بات خود سے بڑبڑاتے ہوئے کہی۔
نورا نے ایک آخری نظر اس پر ڈالی، پھر فائل بند کرتے ہوئے کہا،
“یہی تھی میری آج کا پریزنٹیشن، شکریہ۔”
کمرے میں تالیاں بجیں، اور الیکزینڈر کے لبوں پر ہلکی سی مسکراہٹ آ گئی ، ایک چیلنج قبول کرنے والی مسکراہٹ، وہ لڑکی آج پھر اپنی قابلیت سے اسے دوبارہ چینلج کر گئی۔
جاری ہے
