اسے برائی کیلیے اکساتا ہے اور اسے نیکیوں سے روکتا ہے۔عرفِ عام میں سمجھا جاتا ہے کہ انسان کے ساتھ محض فرشتے ہوتے ہیں جبکہ در حقیقت انسان کے ہمراہ شیطان بھی ہوتا ہے کیونکہ یہ خیر اور شر کی جنگ ہے۔ہاں فرشتے محض اس کے اعمال لکھتے ہیں مگر قرین انسان کا ساتھ دیتا ہے اور برائی پر اکساتا ہے اور برائی کا غلبہ ہمیشہ دماغ پر ہوتا ہے کیونکہ انسان کے دل نرم ہوتے ہیں اور بھٹکتا دماغ ہی ہے۔دماغ ہی جسم کو کنٹرول بھی کرتا ہے۔”وہ ٹہرا۔”لیکن ہر ایک کا دل تو نرم نہیں ہوتا۔”احمد صاحب کی تشفی نہیں ہوئی سو سحر ٹوٹا۔”بالکل اور وہ دل وہی ہوتے ہیں جن پر مہریں لگ جاتی ہیں صرف مہر لگا دل ہی تاریک ہوتا ہے ورنہ چاہے انسان کتنا ہی برائی میں مبتلا کیوں نہ ہو،کسی نہ کسی کیلیے دل میں نرمی محسوس کرتا ہے اور یہ علامت ہوتی ہے اس بات کی کہ رب نے اس کے دل پر تالا نہیں لگایا ہے۔ہاں ایک بار اگر وہ پاک ذات تالا لگا دے تو پھر تاریکی چھا جاتی ہے اور وہ دل سخت ہو جاتا ہے۔تبھی تو کہا گیا ہے کہ یہ آنکھیں اور کان نہیں ہیں جو دیکھ اور سن نہیں پاتے بلکہ یہ دل ہے جو سمجھ نہیں پاتا،یہ عقلوں پر لگے تالے ہیں۔”سِنان کے پاس ہر بات کا بڑا سہل جواب تھا۔احمد صاحب اپنی بیٹی کے مستقبل سے مطمئن ہوتے جا رہے تھے۔کیسا کوہِ نور تھا جو اللہ نے جھولی میں ڈالا تھا۔وہ کون سی نیکی کا انعام تھا،احمد صاحب اس کا اندازہ لگا رہے تھے۔”اب یہ آسان انداز میں یوں سمجھ لیں کہ دماغ ہے اور ایک دل ہے۔دل انسان کے جسم میں زندگی کی نوید ہے اور دماغ جسم کا کنٹرولر جو ہر چیز پر قابض ہے سوائے دل کے۔آنکھیں اور کان اس دماغ کی مرہونِ منت ہیں تبھی جو چیز دماغ کہہ دے وہ حکم بجا لانا ہے،چاہے وہ گناہ ہو یا ثواب لیکن پھر ہے ایک دل کہ اگر اس پر مہر نہ لگی ہو تو وہ کام کرتا ہے۔اب وہ کیا کام کرتا ہے؟وہ جو ایک مدھم سی آواز ہوتی ہے نا کہ آپ یہ کام نہ کریں،اس میں خطرہ ہے،یہ گناہ ہے،یہ مدھم آواز ہوتی ہے دل کی۔یوں دل و دماغ کی یہ جنگ ازل سے ابد تک جاری رہنے والی ہے بشرطیکہ دل مزاحمت کرنے والا ہو کیونکہ مزاحمت کرنے والا دل ہی روشن ہے۔”سِنان نے اب کچھ مزید آسان طریقہ اختیار کیا۔وہ دونوں بےساختہ گردن اثبات میں ہلانے لگے گویا اشارہ تھا کہ بات سمجھ آگئی تھی۔”مگر ان ساری باتوں کا گیم سے اور خودکشی سے کیا تعلق ہے؟”احمد صاحب نے الجھ کر سوال کیا کیونکہ وہ بات تو اپنی جگہ جوں کی توں موجود تھی اور یہ گفتگو تو بالکل ہی موضوع سے الگ تھی۔سنعیہ بیگم بھی جز بز تھیں۔سحر اب پوری طرح ٹوٹ گیا تھا۔”دماغ۔۔۔دماغ کے ذریعے کیا جا رہا ہے یہ کام۔بچے جو ابھی جوانی کی دہلیز پر ہی پہنچے ہیں،ان کے دماغوں کو کنٹرول کیا جا رہا ہے اور اس کے پیچھے عوامل انسانی ہیں۔یہ کسی جن بھوت کا یا جادو ٹونے کا کام نہیں۔یہ سمپلی ایک ٹِرک ہے کہ جس کے ذریعے ٹین ایجرز کو اپنے بس میں کیا جاتا ہے۔ان کو ٹاسک دیے جاتے ہیں،انہیں آہستہ آہستہ موت کیلیے تیار کیا جاتا ہے پھر جب وہ بالکل تیار ہو جاتے ہیں تو انہیں اپنی جان لینے کا کہا جاتا ہے اور وہ اس شخص کی باتوں میں آکر اپنی جان دے دیتے ہیں لیکن۔۔۔”
Ek Sakoot E Bekaraan by Syeda Episode 11
