Ek Sakoot E Bekaraan by Syeda Episode 11

“سوری بیٹا کہ آپ کی بات کاٹ رہا ہوں لیکن یہ کیا بات ہوئی کہ کسی کے بھی کہنے پر خودکشی کر لی۔جان لینے کیلیے ہمت چاہیے ہوتی ہے۔”احمد صاحب نے معذرت کرتے ہوئے درمیان میں اس کی بات کاٹی۔گفتگو کا کوئی سرا نہیں مل رہا تھا۔سِنان نے اپنے گٹھنوں پر ٹکے ہاتھ اٹھائے اور انگلیاں کھول کر دائیں ہاتھ سے اپنی قمیض کی چاک نیچے کی پھر گویا ہوا۔”نہیں انکل اپنی جان لینے کیلیے کوئی ہمت نہیں چاہیے ہوتی۔یہ بزدلی کا کام ہے،ہمت والے تو ہر طرح کے حالات کا سامنا کر کے زندگی گزارتے ہیں۔ڈٹ کر مقابلہ کرتے ہیں حالات کا اور اللہ پر بھروسہ رکھتے ہیں۔اپنے ہاتھوں اپنی زندگی ڈرپوک لوگ لیتے ہیں اور یہ گیم یہی کرتی ہے۔انسان کی کمزوریوں کو اپنے ہاتھ میں لیتی ہے،انہیں خوف میں مبتلا کرتی ہے،ان کے اپنوں کے ذریعے انہیں بلیک میل کرتی ہے،ان کی عزت کا خوف دلاتی ہے انہیں،انسانوں میں بدنام کر دینے کی دھمکیاں دیتی ہے اور بس پھر انسانوں کا خوف رب کے خوف پر حاوی آتا ہے،انسان رب کی رضا بھول کر اس کے غیض و غضب کو آواز دیتا یے اور اپنی زندگی جو امانت تھی اس کا خائن ہو جاتا ہے پھر انسان کا خوف تو ختم ہو جاتا ہے مگر رب کی ناراضگی ختم نہیں ہوتی اور انسان کا خوف بہت برا ہوتا ہے۔اسی لیے انسان کو انسانوں کے خوف سے نکلنا چاہئیے۔کوئی کچھ نہیں بگاڑ سکتا کسی کا،اگر اللہ نہ چاہے۔ہاں کچھ بگاڑ انسان اپنی بیوقوفیوں سے بھی اپنی زندگیوں میں لاتا ہے۔”بہت ہی وضاحت سے سمجھایا تھا اب کی بار اس نے اور ان دونوں کو ہی پوری گفتگو کا حاصل سمجھ آ گیا تھا۔ساتھ ہی پچھلی باتوں کا ان باتوں سے جڑنا بھی عقل میں آگیا تھا۔”جو کوئی بھی ہے اس گیم کے پیچھے وہ اسی طرح سے جان لے رہا ہے لوگوں کی۔انہیں اپنے دام میں پھنسا کر،انہیں دھمکیاں دے کر،ان کو انسانوں کے درمیان ذلیل ہونے کا خوف دلا کر۔اسی لیے وہ بچے جو ابھی ہی حقائق کی دنیا میں آئے ہیں،اس کا شکار ہو رہے ہیں۔”وہ اب کرسی سے ٹیک لگا کر آرام دہ انداز میں بیٹھ گیا۔احمد صاحب پرسوچ انداز میں گردن ہلا رہے تھے۔”مطلب کہ کوئی بہت بڑا ماسٹر مائنڈ ہے اس کے پیچھے۔”پرسوچ نگاہیں اپنے داماد پر ٹکائیں۔”نہیں انکل،بہت معذرت لیکن آپ غلط سمجھ رہے ہیں۔اس کے پیچھے کوئی ماسٹر مائنڈ نہیں بلکہ ہمارے،آپ کے جیسا کوئی عام بندہ ہے۔آپ بتائیں اگر کوئی آپ کو کہے،میرے منہ میں خاک کہ ایک جانب آپ کی بیٹی کی عزت ہے اور ایک جانب آپ کی زندگی تو آپ کیا چنیں گے؟”دل پر ہاتھ پڑا تھا احمد صاحب اور ان کی بیگم کے۔بھلا بیٹی کی عزت سے بڑھ کر تھی کیا زندگی؟ان کی بیٹی ان کی عزت تھی،ایک کیا وہ تو کئی زندگیاں اپنی ناموس پر قربان کر سکتے تھے۔جان عزت سے بڑھ کر نہیں تھی۔”اللہ نہ کرے بیٹا مگر جان عزت کے بعد آتی ہے۔ایک عزت ہی تو ہوتی ہے ہم شریفوں کے پاس،اگر وہ بھی کوئی چھین لے تو زندگی کا مقصد کیا۔”انہوں نے حسبِ توقع جواب دیا مگر سِنان کو یہ جواب اچھا نہیں لگا۔جان بوجھ کر نکالی تھی اس نے یہ بات اور افسوس ہوا تھا بہت۔”کیا بحیثیت مرد ہم اتنے کمزور ہیں کہ اپنی عورت کی عزت کی حفاظت نہیں کر سکیں اور اگر کوئی بھول چوک ہو جائے کہ جس سے عزت پر حرف آئے تو ہم جان دے دیں گے،یہ جانتے ہوئے بھی کہ عزت و ذلت اللہ کے ہاتھ میں ہے اور جان اس کی امانت ہے اور کیا میں نہیں جانتا کہ عزت اگر عورت کی جائے گی تو باپ بھائی جان بھی اسی کی لیں گے۔اذیت بھی وہی اٹھائے گی۔”سوچیں ہی سوچیں تھیں سِنان آفریدی کے ذہن میں مگر سامنے بیٹھا شخص جواب کا منتظر تھا سو زبان کھولی۔”آپ کی زندگی کا مقصد عزت و ذلت کا بیلنس نہیں ہے۔ہاں اپنی عزت کی حفاظت آپ کی ذمہ داری ضرور ہے مگر یہ مقصد حیات نہیں ہے اور نہ ہی عزت کا چلے جانا یا مل جانا آپ کے ہاتھ میں ہے۔جب ہم یہ کہتے ہیں کہ عزت دینے والا بھی اللہ ہے اور ذلت دینے والا بھی اللہ ہے تو پھر ہم اس بات پر یقین کیوں نہیں کرتے؟اس کی دی گئی عزت کو اگر قبول کرتے ہیں تو پھر اس کی دی گئی ذلت کو کیوں قبول نہیں کرتے؟کیوں ذلت پر اس قدر غمزدہ ہو جاتے ہیں کہ اس کی نافرمانی کرتے ہوئے اپنی جان تک دے دیتے ہیں۔اگر اللہ نہ چاہتا تو کسی کی مجال تھی کہ آپ کو ذلیل کرتا۔اسی لیے اس کی دی گئی عزت بھی سر آنکھوں پر اور اس کی دی گئی ذلت بھی سر آنکھوں پر۔جو اس نے دیا ہے تو قبول ہے اور پھر ایسا ہی یقین مایوسی سے بچاتا ہے،پھر نہیں ہوتے آپ اتنے غمزدہ کہ اپنی جان لے لیں۔”اس کی باتوں نے پھر سے سحر طاری کر دیا تھا۔اب کی بار سننے والوں کے رونگھٹے بھی کھڑے ہو گئے تھے۔آنکھیں ساکت تھیں اور سماعت اس کے الفاظ سننے پر مجبور۔کیسی پیاری باتیں تھیں اور کیسا یقین تھا اس ساحر کی آنکھوں میں جو دلوں کو تسکین دے رہا تھا کہ اللہ ہے نا تو پھر کیسی مایوسی اور کیسا خوف۔احمد صاحب یکدم ہی اپنی نشست سے اٹھے۔وہ کھڑے ہوئے تو ادب میں بےساختہ سِنان بھی اٹھ کھڑا ہوا۔وہ اس کی طرف مڑے اور اسے سینے سے لگا لیا۔سِنان کیلیے یہ غیر متوقع تھا۔وہ پہلے ساکت ہوا پھر ان کی گرمی محسوس کر خود بھی ان کو تھپکنے لگا۔سنعیہ بیگم آنکھوں میں نمی لیے یہ نظارہ دیکھ رہی تھیں۔خوشی کی نمی تھی،اپنی بیٹی کے نصیبوں کیلیے مانگی گئی دعائیں مجسم ان کے سامنے کھڑی تھیں۔”تمہاری باتوں نے نئے راستے کھول دیے ہیں سِنان۔بہت شکریہ بیٹا۔میں بھی آج تک زبان سے ہی یہ کہتا آیا تھا مگر اب سے یقین رکھوں گا اس بات پر اور اب سے اس گنہگار بندہ کو بھی رب کی جانب سے دی گئی عزت بھی قبول اور اس کی جانب سے ملی ذلت بھی قبول۔”احمد صاحب کی آواز لرز رہی تھی اور نمی سی گھلی ہوئی تھی اس لرزاہٹ میں۔بھرپور انداز میں اس کے بغلگیر ہو کر وہ الگ ہوئے تو سِنان انہیں دیکھ مسکایا۔جواباً وہ بھی نم آنکھوں سے مسکرائے۔”بیٹھیں۔”پھر پورے احترام سے اس نے اپنے سسر کو نشست سنبھالنے کا کہا۔”ہماری سبین بہت نصیبوں والی ہے سنعیہ۔”پیار سے اسے دیکھتے ہوئے وہ اپنی بیگم سے مخاطب ہوئے۔”الحمدللہ۔”جواباً سنعیہ بیگم بھی متفق ہو کر اللہ کی شکر گزار ہوئیں۔”آپ لوگ مجھے شرمندہ کر رہے ہیں۔”سِنان نے عاجزی دکھائی اور اس عاجزی پر وہ دونوں مزید نہال ہوئے۔”اب بات کی طرف آتے ہیں پھر سے۔”سِنان نے دوبارہ بات کا آغاز کیا کہ یہ وقت کی اہم ضرورت تھی۔”بلکہ یوں کہہ لیں کہ گیم کی طرف آتے ہیں۔اب گیم میں عزت اور جان دونوں کا خطرہ دکھا اور ساتھ ہی اپنوں کی زندگیوں کا تو وسیم زرش نے گیم میں دی گئی ہدایت پر عمل کیا اور اپنی جان دے دی۔یہ میرا مفروضہ ہے،ضروری نہیں کہ ان دونوں نے گیم ہی کی وجہ سے جان دی ہو مگر یہ بالکل درست ہے کہ اگر کوئی بھی گیم کی وجہ سے جان دے گا تو اس کی تین وجوہات ہوں گی۔ایک اپنوں کی زندگیوں کا ڈر،دوسرا اپنی عزت کا خوف اور تیسرا دماغ کا سرور اور سراب۔