Ek Sakoot E Bekaraan by Syeda Episode 13

“چلتا ہوں خانم،گھنٹے تک لوٹ آؤں گا۔اللہ حافظ۔۔۔”اس کو ساتھ لگائے کھڑے سِنان نے اس کے بالوں پر بوسہ دے کر اسے الوداع کہا۔
“اللہ حافظ۔”اس نے سر اٹھا کر اثبات میں سر ہلاتے ہوئے اسے جانے کی اجازت دی۔
اس کو مسکراہٹ سے نواز کر وہ سیڑھیوں کی جانب بڑھا اور تیزی سے سیڑھیاں پھلانگنے لگا۔سبین اپنی شال سنبھالتی،مسکراتی ہوئی اسے دور جاتا دیکھ رہی تھی۔
وہ نیچے اترا،مڑ کر ایک نظر پیچھے دیکھ مسکرایا۔سبین بھی جھٹکے سے ہنس دی پھر سِنان نے ہاتھ ہلا کر اس سے رخصت لی۔اس نے بھی ہاتھ ہلا کر اپنے شوہر کو اللہ کی امان میں دیا اور وہ مرکزی دروازے کے پار ہو گیا۔اب سبین تنہا رہ گئی تھی سو آس پاس نظر آتے نظارے دیکھنے لگی۔
سنہرا روپہلا سا دن نکلا تھا آج سفیدی کی وادی میں سورج نے ہلکی سی جھلک دکھلائی تھی۔اسی سبب گھر کے اوپری حصے میں کھڑے ہو کر مناظر کا لطف لینے کا بہترین موقع تھا۔آسمان صاف اور روشن تھا البتہ زمین اور پربت برف سے ڈھکے ہوئے تھے سو تاحد نگاہ سفیدی ہی سفیدی تھی مگر چمکتی ہوئی۔
سبین نے اونی شال کو اپنے گرد اچھے سے لپیٹا ہوا تھا اور سر اور کان ٹوپے سے جبکہ ہاتھ اور پیر،موزوں اور دستانوں سے ڈھانپے ہوئے تھے۔ہاتھ میں قہوے کا مگ بھی موجود تھا جو کہ خود ساختہ گرم ہونے کی صلاحیت رکھتا تھا سو اس میں پڑا مائع ٹھنڈ سے محفوظ تھا۔یونہی آسمان کو دیکھتے ایک خیال کوندا سو وہ پیچھے پلٹی اور سیدھ میں قدم بڑھانے لگی۔یہاں سے کچھ دور ایک لکڑی کا دروازہ تھا۔وہ اسی پر نظر ٹکائے،اسی سمت میں بڑھ رہی تھی۔
دروازے کے عین سامنے پہنچ کر قدم تھمے اور اس نے مسکرا کر بائیں ہاتھ سے دروازہ کھولا۔سورج کی ہلکی سی کرن اندر کمرے میں گئی۔یہیں سے نظر آ گیا تھا کہ بیڈ پر لیٹا وجود خواب خرگوش کے مزے لوٹ رہا تھا۔اس نے مطمئن سے گہری سانس خارج کی اور دروازہ احتیاط سے بند کر واپس مڑ گئی۔شال سنبھالتی وہ دوبارہ اپنی سابقہ جگہ پر آکھڑی ہوئی۔
دائیں ہاتھ میں مگ اور بائیں ہاتھ کو اس نے منڈیر پر ٹکا کر ٹھوڑی اس پر رکھ دی تھی۔چہرہ مطمئن تھا گویا ہر فکر مٹ گئی ہو اور چین پڑ گیا ہو۔وہ یونہی سوچنا شروع ہوئی اور ماضی کے در کھلنے لگے۔
“پتہ بھی نہیں چلا کہ دس دن کب گزر گئے۔”وہ آسمان کو بغور دیکھ رہی تھی۔
“جب ہم لوگ یہاں آئے تھے تو کتنے مسائل تھے اور اب دیکھو تو سب ٹھیک ہو گیا ہے۔یوں لگتا ہے جیسے کچھ ہوا ہی نہیں تھا۔”مطمئن سوچیں زندگی کی نوید سنا رہی تھیں یعنی خطرات ٹل چکے تھے اور موت کا جمود ٹوٹ چکا تھا۔
“سِنان کتنے اچھے ہیں۔انہوں نے جو کہا وہ کر دکھایا۔”اپنے شوہر کیلیے پیار سا جاگا دل میں اور شرمیلی سی مسکان نے لبوں کا احاطہ کر لیا۔
“شروع شروع میں تو سب کچھ کتنا ڈسٹرب تھا۔احمر بھی چپ چپ،الگ تھلگ رہتا تھا اور میرا دل بھی ڈرا رہتا تھا۔۔۔”قہوے کا ایک گھونٹ بھر کر وہ اوائل دنوں کو سوچنے لگی۔ایک خوبصورت واقعہ ذہن کے دریچہ پر آن وارد ہوا۔ایک شخص کی موجودگی اس واقعہ کو خوبصورت بنا رہی تھی۔
“کراچی کے لوگ تو برف دیکھ کر پاگل ہو جاتے ہیں اور ایک تم ہو خانم جو یوں شکلیں بنا رہی ہو جیسے برف سے تمہاری کوئی دشمنی ہو۔”ایک جگہ ٹہر کر وہ اس کی جانب جھکا اور سرگوشی کی۔
“نہیں ایسی تو کوئی بات نہیں،وہ بس یونہی۔۔۔”وہ گڑبڑا کر صفائی دینے لگی۔
“ارے رے اتنا سا تو تمہارا دل ہے فوراً سے گھبرا جاتا ہے۔صفائی تھوڑی مانگی ہے میں نے جو تم یوں پریشان ہو رہی ہو۔”اسے اپنے سامنے کر دونوں کندھوں سے تھام کر سِنان نے اسے پاس موجود سنگی بینچ پر بٹھایا اور خود اس کے دونوں ہاتھ تھام کر گٹھنوں کے بل اس کے سامنے بیٹھ گیا۔
“آپ نیچے کیوں بیٹھ رہے ہیں؟”وہ اسے برف پر بیٹھتا دیکھ پہلو بدلنے لگی۔
“ارے کوئی نہیں میری جان یہ ساری باتیں چھوڑو۔تم مجھے یہ بتاؤ کہ تمہارے حسین چہرے پر بارہ کیوں بج رہے ہیں جبکہ ابھی وقت تو دس ہوا ہے۔”وہ بڑے پیار سے گویا ہوا اور شرارتی انداز اپنایا۔
وہ مسکرانے لگی۔
“ہاں یہ ہوئی نہ بات۔اب دیکھو صحیح ٹائم ہو گیا۔دس بج کر دس منٹ۔”سِنان نے اپنے دائیں ہاتھ کی شہادت کی انگلی اور انگوٹھے کی مدد سے مسکراتا ہوا چہرہ بنایا اور خود بھی مسکرایا۔
“دس بج کر دس منٹ؟”سبین کے بات پلے نہ پڑی تھی۔
“ہاں دس بج کر دس منٹ۔۔۔دیکھو یہ گھڑی۔”اس نے اپنی بات پر زور دے کر اپنی کلائی میں بندھی گھڑی دکھائی۔
وہ بغور دیکھنے لگی۔
“اس میں چھوٹی سوئی دس پر ہے اور بڑی سوئی دو پر تو دونوں سوئیاں اوپر کی جانب کھلی ہوئی ہیں جیسے سمائل کرتے ہوئے انسان کے ہونٹ اوپر کی جانب کھل جاتے ہیں بالکل ویسے ہی۔”اس نے اچھی طرح سے تفصیل سمجھا کر سبین کی جانب دیکھا جس کی آنکھیں حیرت سے پھیل گئی تھیں۔
“کیا ہوا اب آنکھوں کو؟”اس نے سبین کی آنکھوں کے سامنے چٹکی بجائی۔وہ چونکی۔
“آپ کا کامن سینس اچھا ہے۔”وہ قائل ہوئی۔
“میرا پراپر سینس بھی اچھا ہے خانم۔”وہ ہنسا۔وہ بھی ہنسنے لگی۔چٹکیوں میں اس کا موڈ خوشگوار کر دیا تھا سِنان نے۔کچھ دیر کیلیے ہی سہی اورکا کا بھوت اتر گیا تھا۔
“چلو آؤ تمہیں مکئی کھلاؤں۔اس ڈھلوان سے نیچے جا کر دائیں طرف جو لمبی سے سڑک ہے نا جہاں سے ہم آئے تھے؟”وہ اس سے سوال کر رہا تھا۔
“ہاں۔۔۔”اس نے یک لفظی جواب دیا۔
“تمہیں کہاں یاد ہوگا یارا،تم سو رہی تھیں جب ہم اس سڑک سے گزرے تھے۔”وہ ہنسنے لگا۔وہ ہنستا ہوا بہت پیارا لگ رہا تھا۔
“جب آپ کو پتہ ہے کہ میں سو رہی تھی تو کیوں پوچھا یہ سوال؟”سبین نے مصنوعی خفگی دکھائی اور دونوں ہاتھ سینے پر باندھ کر گردن دائیں طرف جھکائی۔
“ارے ایسے ہی پوچھ لیا،مزہ آتا ہے تمہیں تنگ کرنے میں۔”اس کی نظریں بدلیں اور مسکراہٹ سمٹ گئی۔
“چلیں پھر مکئی کھانے؟”سبین نے اس کا دھیان دوسری جانب کیا۔
“ارے فکر نہیں کرو یار،یہ کھلے آسمان کے نیچے نہیں بہکنے کا تمہارا مرد۔یہ دھندے بند کمروں میں ہی اچھے لگتے ہیں اور یہ نظریں نرمی کی تھیں،خماری کی نہیں۔تمہیں تو یہ بھی نہیں پتہ،چھوٹی ہو نا۔”اس نے اس کی چادر پر پیار سے چپت لگائی۔وہ بھی مسکرا دی۔
“چلو آؤ کھڑی ہو جاؤ۔”وہ کھڑا ہوا اور اس کے سامنے اپنی چوڑی ہتھیلی پھیلائی اور سبین نے ایک نظر ہتھیلی کو دیکھا پھر وہ ہاتھ تھام لیا۔
ہاتھ تھام کر نیچے تک گئے تھے وہ دونوں اور مکئی کھائی تھی۔
“کتنا مزہ آیا تھا اس دن۔۔۔”وہ حال میں لوٹی تو مسکان گہری تھی۔
“پھر جب ہم لوگ شاپنگ پر گئے تھے اس دن تو احمر بھی ہمارے ساتھ آیا تھا۔”ایک اور قصہ یاد آیا تھا۔آسمان پر اشکال واضح ہونے لگی تھیں۔
“اوئے پہاڑ کہاں دیکھ رہے ہو؟نیچے دیکھ کر چلو ورنہ منہ کے بل گرو گے۔”سِنان نے چلتے ہوئے احمر کو ڈانٹا جو گم صم سا ایک اونچے پہاڑ کو بغور دیکھ رہا تھا۔ڈانٹ پڑی تو کھسیانا سا ہو کر ہنس دیا اور نیچے دیکھ چلنے لگا۔
“اس دن تو واپسی پر برف پڑنے لگی تھی۔کتنی مشکل سے گھر کو لوٹے تھے ہم لوگ اور سِنان نے اس دن ضد کرنے پر آئس کریم بھی کھلائی تھی۔”ذہن و دل میں سِنان ہی سِنان تھا بس۔وہ اب ہنس رہی تھی۔ہنستے ہوئے ایک گھونٹ قہوے کا اتارا پھر چہرہ ہتھیلی سے اٹھا کر گہری سانس لی۔
“پڑ گئیں نا بیمار؟کہا بھی تھا کہ مت کھاؤ آئس کریم۔لو اب قہوہ پیو۔”صبح آئس کریم کھائی تھی اور شام میں وہ اس کی خدمت کر رہا تھا کیونکہ اسے نزلہ زکام ہو گیا تھا۔یہ ہونا لازمی تھا۔برفباری کا موسم،کراچی کی پیدائش اور ٹھنڈی آئس کریم،ان کا بھلا کیا جوڑ تھا!
“لائیں پیتی ہوں۔قہوہ پیو اور سب ٹھیک۔”سبین نے اس کے انداز میں کہا کیونکہ اس کے مطابق ہر چیز کا علاج تھا قہوے میں اور سبین اتنے سے دنوں میں ہی اس کا قہوے کیلیے لگاؤ سمجھ چکی تھی۔
“ہاں تو۔۔۔”اس نے آنکھیں دکھائیں گویا یہ بھی کوئی مذاق کی بات تھی۔
اس کی وہ سبز آنکھیں اس وقت بھی ساکت کر گئی تھیں اور ابھی حال میں بھی وہ ٹہر گئی تھی پھر سر جھٹک کر دھیان بٹایا۔ایک اور صبح کا کچھ فکر میں ڈوبا وقت یاد آنے لگا تو اپنی ہی فکر میں گندھی آواز سماعتوں سے ٹکرائی۔
“آپ خود احمر سے کہیں کہ وہ ہمارے ساتھ بیٹھا کرے۔پورا دن کمرے میں ہی بند رہتا ہے،مجھے تو دھڑکا لگا رہتا ہے ہر وقت۔”سبین نے باتوں کے درمیان پریشانی ظاہر کی۔سِنان نے اسے تو منع کر دیا تھا کہ احمر کو نہ ٹوکے سو وہ اسی سے التجا کرنے لگی۔
“تم اتنا ہلکان کیوں ہوتی ہو سبین۔وہ بچہ ہے میں مانتا ہوں مگر وہ چھوٹا بچہ نہیں ہے جس پر ہم زبردستی کریں۔اسے کرنے دو جو وہ کر رہا ہے۔ابھی فی الحال صبر کرو،زبردستی معاملات خراب کر دے گی۔”سِنان نے وہی جواب دیا جو وہ کئی بار دے چکا تھا۔سبین نے سر جھٹک کر رخ موڑ لیا۔
“اچھا اب ناراض تو نہ ہو۔”وہ فوراً اس کی جانب کھسکا اور اس کا چہرہ اپنی جانب موڑا جو اترا ہوا تھا۔
“نہیں میں ناراض نہیں ہوں۔”وہ سرسری سے انداز میں گویا ہوئی مگر تاثرات چیخ چیخ کر گواہی دے رہے تھے کہ وہ ناراض تھی۔
“بس اوئے چہرہ دیکھ کر ہی پتہ چل رہا ہے۔چلو اٹھو۔”مذاقاً جواب دے کر وہ اٹھ کھڑا ہوا اور اسے بھی ٹہوکا دیا۔وہ ناسمجھی سے اٹھ گئی اور اسے منتظر سی دیکھنے لگی۔
“جاؤ بلا کر لاؤ اپنے بھائی کو اسے باہر گھمانے لے کر چلتے ہیں۔برفباری ہو رہی ہے باہر مزے کریں گے۔”گو کہ اسے کام تھا مگر کام کچھ دیر بعد بھی کیا جا سکتا تھا۔بیگم کا موڈ البتہ ابھی ہی ٹھیک کرنا تھا۔اس نے کہا اور وہ حسبِ توقع خوش ہو گئی۔
“ابھی بلا کر لاتی ہوں۔”اسے پیار سے کہہ کر فوراً سیڑھیوں کی جانب دوڑی۔
“ہاہ۔۔۔پیار سے دیکھا بھی تو اپنے بھائی کی وجہ سے۔لڑکیوں کو بھی اپنے بھائیوں سے کچھ خاص قسم کا ہی لگاؤ ہوتا ہے۔”پیچھے وہ ٹھنڈی آہ بھر کر رہ گیا۔
“سنبھل کر جانا۔”ساتھ زوردار آواز میں تاکید کرنا نہیں بھولا تھا۔
ماضی کی پریشانی یاد آئی تھی تو حال میں وہ پریشانی رفع کرنے والا بھی یاد آیا تھا۔
“خانم۔۔۔کتنا پیارا لگتا ہے اس کے لبوں سے یہ نام۔”وہ سوچتے ہوئے شرمائی پھر قہوے کو لبوں سے لگایا۔قہوہ پی کر بھی تو وہی ظالم یاد آ رہا تھا کیونکہ بنایا اسی نے تھا۔سبین کو قہوہ بالکل پسند نہیں تھا مگر سِنان کے ہاتھ کے قہوے میں الگ ہی ذائقہ ہوتا تھا،محبت کا ذائقہ سو وہ بڑے مزے سے پی لیتی تھی جیسے ابھی پی رہی تھی۔
تین سے چار دن ہو گئے تھے کہ احمر خوشگوار موڈ میں ہی ہوتا تھا جیسے پہلے ہوا کرتا تھا،اورکا سے پہلے۔وہ ان لوگوں کے ساتھ باہر جانے آنے لگا تھا۔ان کے درمیان بیٹھنے اور باتیں کرنے لگا تھا۔پچھلے دنوں ماما پاپا سے بھی بات ہوئی تھی۔ان سے بھی اچھے سے بات کی تھی احمر نے۔ماضی پھر سے درمیان آن ٹہرا۔
“ٹھیک ہو نا تم؟سِنان بھائی کو تنگ تو نہیں کر رہے؟”سپیکر کے دوسری جانب سے سنعیہ بیگم سوال کر رہی تھیں۔
“جی ماما میں ٹھیک ہوں بلکہ اب تو بالکل ٹھیک ہوں۔”وہ خوشی سے جواب دے رہا تھا۔سبین کا دل مطمئن سا ہو گیا۔
“بس آپ دونوں کو مس کر رہا ہوں۔”اب کی بار اس کا لہجہ گلو گیر ہوا۔سبین نے پیار سے اس کے بالوں پر ہاتھ پھیر کر اسے تسلی دی۔وہ بھی تھوک نگل کر مسکایا۔
“بس چند دن کی ہی تو بات ہے پھر تو تم واپس گھر ہی آؤ گے۔میں اور پاپا بھی تمہیں مس کر رہے ہیں۔”دوسری جانب سنعیہ بیگم کی مامتا بھی تڑپی تھی۔
“ہاں صحیح کہہ رہی ہیں آپ بس کچھ دن بعد میں واپس آجاؤں گا۔سِنان بھائی اور آپی مجھے واپس کراچی لے جائیں گے آپ کے اور پاپا کے پاس۔”وہ سادہ سے انداز میں کہے گیا اور سبین مسکراتے ہوئے اسے دیکھے گئی۔
ابھی بھی اپنے بھائی کا معصوم چہرہ نظروں میں آیا اور دل رب کا شکر گزار ہوا کہ جس نے اس کے بھائی کی جان بچا لی تھی اور سِنان کو ان کا محافظ و مددگار بنا کر بھیج دیا تھا۔
“اگر سِنان نہیں ہوتے تو۔۔۔”بس اس سے آگے وہ سوچ نہ پائی۔
“کیوں نہیں ہوتے۔۔۔اگر وہ نہیں ہوتے تو ان کی خانم بھی نہیں ہوتی۔۔۔”دل میں محبت کے جذبات بڑھتے ہی جا رہے تھے اس شخص کیلیے جس نے اسے اور اس کے بھائی کو اس خونی گیم سے بچا لیا تھا گو کہ کوئی باقاعدہ بات نہیں ہوئی تھی سبین کی اس بارے میں،نہ سِنان سے اور نہ ہی احمر سے مگر حالات دیکھتے ہوئے اور دونوں کے انداز و اطوار دیکھتے ہوئے اسے یہ یقین ہو گیا تھا کہ گیم ان کی زندگیوں سے نکل چکا تھا۔یہی سوچ اسے مطمئن کر رہی تھی اور یہ اطمینان اسے سِنان کی محبت،رویے اور اس کی بدولت احمر کے بدلتے مزاج نے دلایا تھا۔
“اس پر دھونس نہیں جماؤ۔”
“اس پر سختی مت کرو۔”
“اس پر نظر مت رکھو۔”
“اسے آزاد چھوڑ دو۔”
“اس کے والدین نے مجھے اس کا نگران بنایا ہے سو میری صلاحیتوں پر بھروسہ رکھو۔۔۔”ان کے درمیان جب بھی احمر کو لے کر بات ہوتی،وہ انہی جملوں سے اس کی تشفی کرتا تھا۔جب بھی وہ احمر کو لے کر اپنی پریشانی ظاہر کرتی،وہ یونہی اسے اطمینان بخش دیتا تھا اور یہ اسی کی شخصیت،صحبت اور تربیت کا اثر تھا کہ احمر بہتری کی جانب گامزن تھا۔
“جو شخص اپنے سالے کو اتنے اچھے سے سنبھال کر سیدھے راستے پر ڈال سکتا ہے تو پھر وہ اپنے بچوں کی تربیت تو کتنی اعلی کرے گا۔”قہوے کا آخری گھونٹ بھر کر سبین نے گہری سانس بھری،مطمئن و مسرور سی سانس۔
اس کا دل بےساختہ وہ مناظر دیکھنے کیلیے ہمکنے لگا کہ جن میں وہ اپنے بچوں کو سمجھائے گا،جہاں وہ اپنے بچوں کی تربیت کرے گا،ان کے مسائل حل کرے گا۔
“کتنے خوش بخت ہوں گے میرے بچے جو سِنان جیسے اعلی اقدار کی حامل شخصیت کے زیرِ سایہ پروان چڑھیں گے۔سِنان ہوں گے ان کے فادر۔”وہ اب مسکراتے ہوئے ماضی کی بجائے مستقبل دیکھ رہی تھی۔سنہرا،تابناک مستقبل اور اپنے ڈھیر سارے بچے کیونکہ بقول مورے کہ انہیں سِنان کا بہت سارا بچہ دیکھنا ہے۔۔۔
“بس اب جلدی سے بچے ہو جائیں تا کہ میں سِنان جیسے اور بھی پازیٹو لوگ دیکھ سکوں۔”اپنی ہی سوچ پر وہ شرم سے سرخ ہوئی۔
“باقی رسموں کی طرح یہ رسم بھی بعد کیلیے اٹھا رکھو خانم۔۔۔”سِنان کے جملے کی بازگشت کان میں گونجی اور لوئیں سرخ ہو گئیں۔
“اب وہ رسم ادا کرنے کا وقت آگیا ہے سِنان خاناں۔۔۔”وہ اب شرماتے ہوئے مسکرا رہی تھی۔نظریں بظاہر آسمان پر ٹکی تھیں مگر دیکھ کچھ اور ہی مناظر رہی تھیں۔
دس دن جو گزرے تھے وہ تو اس کی سوچوں میں سما گئے تھے مگر اب رات نے ڈیرہ ڈالا تھا سوچوں کی زمین پر۔آج کی رات جو ان کے ملن کی رات ہونے والی تھی۔وہ اپنے خوبصورت شادی شدہ زندگی کے سفر کو آگے بڑھانے والی تھی آج کہ یہ اس کے شوہر کا حق تھا اور پھر اس نے بہت قربانی دے لی تھی،اب صبر کا میٹھا پھل ملنے کا وقت آیا چاہتا تھا۔
سبین کی حیا سے لرزتی پلکیں،سرخ ہوا چہرہ اور شرمیلی مسکان میں ڈھلے گلابی لب،الوہی سی داستان سنا رہے تھے کہ جو آج رات رقم ہونا تھی۔
***