رات نے خوبصورت وادی پر اپنے پر پھیلائے تو ہر سو سکوت چھا گیا۔لکڑی کے اس گھر کے نچلے حصے میں بنے کمرے میں دو نفوس بیڈ پر لیٹے ہوئے تھے۔کمرے میں نیم اندھیرا تھا اور ماحول باہر کی سردی سے محفوظ،پرحدت تھا۔رات کے قریباً بارہ بجے کا وقت تھا اور سِنان سبین کے ساتھ نیم دراز،اسے سلانے کی کوشش میں تھا۔
سبین آنکھیں موندے لیٹی ہوئی تھی۔نیند کی وادیوں میں سفر کرنے کیلیے تیار۔۔۔
جب سے وہ لوگ یہاں آئے تھے،اس دن سے سِنان کا معمول تھا کہ وہ سبین کو سلا کر دوسرے کمرے میں اپنا کام کرنے کی غرض سے جاتا تھا اور اس بات کا سبین کو بھی علم تھا۔یہاں کام نہ کرنے کی وجہ یہی تھی کہ خواہ مخواہ میں پریشان رہتی تبھی وہ دوسرے کمرے میں کام نمٹایا کرتا تھا۔
آج بھی وہ معمول کے مطابق اس کا سر تھپکتے ہوئے اسے سلانے میں مصروف تھا کہ وہ سوئے تو وہ کام کو دوڑے۔وہ بھی آنکھیں بند کیے لیٹی تھی۔
کچھ دیر یونہی گزر گئی اور سبین کی گہری گہری سانسوں کی آواز سناٹے میں گونجنے لگی۔مدھم سانسیں سِنان کو زندگی بخش رہی تھیں۔وہ ٹھیک تھی،خیر و عافیت سے تھی اور اب تو مطمئن بھی تھی اور کیا ہی چاہیے تھا؟
“شب بخیر خانم۔۔۔”بہت دھیمی آواز میں کہہ کر اس نے سبین کی بےداغ پیشانی پر لب رکھے اور بیڈ سے اٹھ کھڑا ہوا۔
اس سے قبل کہ وہ باہر نکلتا سناٹا شور مچانے لگا اور دور جنگل سے کتوں کے بھونکنے کی آوازیں توجہ کھینچنے لگیں۔سِنان نے سر جھٹکا اور بیڈ پر لیٹے وجود پر نگاہ ڈالی۔حسبِ توقع حالات سامنے تھے۔وہ اٹھ بیٹھی تھی اور خوف زدہ نگاہوں سے اسے دیکھ رہی تھی۔
وہ اس کے نزدیک آکر بیٹھا اور اسے اپنے سینے سے لگایا۔
“سبین۔۔۔کیا ہوا ہے؟”اسے ہولے سے پکار کر سِنان نے اسے متوجہ کرنا چاہا۔وہ بنا کچھ کہے مزید اس میں سمٹ گئی۔اسے بہت خوف محسوس ہو رہا تھا۔کتے مسلسل بھونک رہے تھے اور شور تھا کہ بڑھتا ہی جا رہا تھا۔
“شش۔۔۔سبین میں سِنان۔۔۔کچھ نہیں ہوا۔ادھر دیکھو میری طرف۔”اس کی گرفت محسوس کر سِنان نے اس کا چہرہ اوپر کی جانب کیا تو اس ملگجے سے اندھیرے میں اسے امید کی کرن کی طرح روشن ہوا،وہ مسکراتا چہرہ نظر آیا اور وہ پرسکون ہو گئی۔
“یہ آوازیں کیسی ہیں؟”اب وہ پوری طرح حواسوں میں تھی اور کچھ خائف بھی۔اس وادی میں آکر سب کچھ اچھا ہو گیا تھا بس یہ کتوں کی آوازیں تھیں جو روز رات کو اسے ڈرا دیتی تھیں۔
“یہاں سے جنگل قریب ہے تو رات کے وقت جنگلی کتوں کے بھونکنے کی آوازیں آتی ہیں لیکن تم فکر نہیں کرو جو بھونکتے ہیں وہ کاٹتے نہیں۔”اس نے ہر بار کہی جانے والی بات کہی اور وہ سر جھٹک کر اس پر گرفت مزید مضبوط کر گئی۔
“ارے تم سب چھوڑو اور سو جاؤ۔”اس نے اسے پیار سے پھسلایا۔اسے اپنا کام پورا کرنا تھا تبھی وہ چاہ رہا تھا کہ وہ جلد از جلد سو جائے۔
وہ بھی اثبات میں سر ہلا کر لیٹ گئی اور آنکھیں موند لیں۔کتوں کے بھونکنے کی آوازوں میں بھی کچھ کمی آگئی تھی مگر مکمل بند نہیں ہوئی تھیں اور یہ بات وہ دونوں ہی جانتے تھے کہ وقفے وقفے سے یہ آوازیں آتی رہیں گی سو اس کا کوئی حل نہیں تھا۔
“سِنان۔۔۔میرے پاس سے ابھی کہیں مت جائیں۔مجھے ڈر لگ رہا ہے۔”کچھ دیر گزری اور جب اسے یقین ہو چلا کہ وہ سو گئی تو وہ اٹھنے لگا کہ اس کی سہمی سی آواز نے سِنان کے قدم جکڑے۔وہ اس کی کلائی کو مضبوط گرفت میں لیے ہوئی تھی۔
“نہیں جا رہا کہیں بھی۔یہیں ہوں،تم آنکھیں بند کرو اور سو جاؤ۔”وہ ٹہرا اور اسی کے برابر میں نیم دراز ہو گیا۔سبین کو اطمینان ہوا اور اس نے آنکھیں موند لیں۔
وہ اسے پیار بھری نگاہوں کے حصار میں لیے ہوئے تھا۔اس وقت سب بھول گیا تھا بس یاد تھا تو وہ نازک ڈرا ہوا وجود جسے اس کے ہونے سے ڈھارس تھی۔
***
“شکر ہے سو گئی۔”وہ غنودگی میں چلی گئی تھی سو اس نے پھر سے الوداعی بوسہ اس کی پیشانی کی نذر کیا اور محتاط سے انداز میں بیڈ سے اتر۔پیروں میں چپل اڑسی اور ایک نظر پھر سے اس کے سراپے پر ڈالی گویا مزید اطمینان کیا اس کے سونے کا۔وہ سو چکی تھی اور اب آوازیں بھی معدوم ہو گئی تھیں سو وہ کمرے کے مرکزی دروازے کی سمت چل دیا۔
دروازے پر پہنچ کر ایک نگاہ پھر سے اس پر ڈالی اور مسکرایا۔
“چلو جی اب کام پہ لگیں۔۔۔”گہری سانس خارج کر کے اس نے ایک بھرپور انگڑائی لی اور کمرے کا دروازہ کھول کر باہر نکلا۔بےحد احتیاط سے دروازہ بند کیا اور دوسرے کمرے کی جانب بڑھ گیا۔
باوجود بہت احتیاط کے دروازے کے بند ہونے کی ہلکی سی مخصوص آواز ابھری اور اسی کے ساتھ کمبل ایک جھٹکے سے ہٹا۔نیم اندھیرے میں وہ سیدھی اٹھ بیٹھی۔ملگجی سی روشنی اس کے چہرے پر پڑ کر اسے نمایاں کر رہی تھی۔اس کے چہرے پر مسکان سجی تھی۔
کچھ کرنے کا عزم چہرے کے تاثرات سے عیاں ہو رہا تھا۔وہ اٹھی اور کمرے کو روشن کر دیا۔اب اس کا سراپا واضح ہوا تھا۔اس نے وائن کلر کا مخملیں نائٹ گاؤن پہنا ہوا تھا۔دراز زلفیں رات کی سیاہی کی مانند پشت پر پھیلی ہوئی تھیں۔
وہ یونہی مسکراتے ہوئے ڈریسنگ ٹیبل کے سامنے آکھڑی ہوئی اور اپنے سراپے کو دیکھنے لگی۔کچھ دیر خود کو نہارا پھر وہاں رکھی وائن کلر کی ہی لپ سٹک اٹھائی اور گلابی لبوں کو رنگ لیا۔اس کے بعد کاجل اٹھایا اور آنکھوں کو اس سیاہی سے بھر لیا۔وہ بہت کم کاجل لگاتی تھی،کسی خاص موقع پر ہی مگر لگاتی ہمیشہ بھر بھر کر تھی کہ آنکھوں کے نیچے کے حصے میں بھی وہ سیاہی کھنچ جاتی تھی۔کاجل لگا کر اس نے آنکھیں کھولیں تو سیاہ مائل بھوری آنکھیں کاجل کی سیاہی سے مل کر غضب ڈھا رہی تھیں۔وہ تیار تھی کیونکہ اور کسی لوازمات کی ضرورت نہیں تھی بس ایک چیز اور تھی جو پہننی تھی۔وہی نکالنے کیلیے وہ نیچے جھکی۔بال چہرے کے پیچھے سے نیچے کی سمت لہرا گئے اور حسین چہرے پر بکھرنے لگے جیسے چودھویں کے چاند پر چھانے کیلیے کوشاں بادل۔
دراز کھول کر اس نے ایک مخملیں ڈبیہ نکال کر کھولی۔مطلوبہ چیز سامنے تھی۔اس نے وہ چوڑیاں نکالیں اور دونوں ہاتھوں میں باری باری پہن لیں۔سونے کی چوڑیوں سے کلائیاں سج گئیں۔یہ چوڑیاں سِنان نے اس کیلیے بنوائی تھیں سو آج کی رات کیلیے یہ بالکل موزوں تھیں۔
“کتنی خوبصورت لگ رہی ہیں۔”مخمور آواز میں کہہ کر اس نے وہ چوڑیاں آنکھوں کے سامنے کیے اپنی کلائیاں گھمائیں۔چوڑیاں اس کی کلائی میں پریشان ہو گئیں۔
وہ مسکرائی اور اٹھ کھڑی ہوئی۔ایک بار پھر اپنے وجود کا ناقدانہ جائزہ لیا پھر خود ہی شرما گئی۔
وہ اپنی تیاری سے مطمئن تھی سو اب منزل کی جانب روانہ ہونے کا وقت تھا۔اس نے ایک نظر دیوار گیر گھڑی پر ڈالی۔تین بجنے میں پندرہ منٹ تھے۔
“اوہو ابھی تو انہیں گئے پندرہ ہی منٹ گزرے ہیں۔ابھی تو وہ کام میں مصروف ہوں گے۔”گھڑی دیکھ کر سبین کا موڈ غارت ہو گیا مگر گہری سانس خارج کر خود کو پرسکون کیا۔
“کوئی بات نہیں کچھ دیر بعد چلی جاؤں گی۔۔۔”وہ خود سے ہی بولی اور بیڈ پر آکر بیٹھ گئی۔
کمرے کی دیواریں تکتے ہوئے وہ خاصی کوفت کا شکار تھی۔انتظار کی کوفت۔۔
“تب تک کیا کروں؟؟”سوچیں بکھرنے لگیں تو نظریں ایک دیوار پر ٹہر گئیں۔آنکھیں روشن ہوئیں اور وہ اس سمت دوڑی۔وقت گزاری کیلیے مشغلہ مل گیا تھا۔
وہاں ایک بک شیلف لگا ہوا تھا جہاں کتابیں رکھی ہوئی تھیں۔وہ مطالعہ کیلیے جنونی نہیں تھی مگر دلچسپی تھی کتابیں پڑھنے سے سو اس نے شیلف میں سے ایک کتاب نکالی۔اس کتاب کا موضوع انسان کی نفسیات تھا۔
“ہممم انٹرسٹنگ۔۔۔”اسے کور دیکھ اچھا لگا سو وہ پڑھنے بیٹھ گئی۔
اب کم از کم وہ بور نہیں ہو رہی تھی۔
***
