اسی کمرے کے ساتھ بنے کمرے کے مناظر کچھ مختلف تھے۔سِنان لیپ ٹاپ کھولے بیٹھا تھا۔سکرین پر میسنجر کا چیٹ گروپ کھلا ہوا تھا جہاں نیلے اور سفید ڈبوں میں مختلف مکالمے لکھے تھے جو مختلف لوگوں نے کہے تھے۔لیپ ٹاپ ابھی کھلا تھا مگر اس کا دھیان سکرین کی جانب نہیں تھا بلکہ وہ ہاتھ میں پنسل لیے ایک رجسٹر کی جانب متوجہ تھا اور اس پر لکھے جملوں کے آگے ٹک لگا رہا تھا۔
“ٹاسک:اپنے ہاتھ پر بلیڈ کی مدد سے تین کٹ لگائیں مگر دھیان رہے کہ کٹ زیادہ گہرے نہ ہوں۔۔۔ٹاسک پورا کر کے تصویر بھیجیں۔”اس نے انگریزی میں لکھا پورا جملہ پڑھا اور ایک نظر اپنے ہاتھ پر ڈال کر اس جملے کے سامنے ٹک لگا دیا پھر آگے بڑھا۔
“ٹاسک:کاغذ پر پنسل کی مدد سے اورکا بنائیں اور تصویر کھینچ کر بھیجیں۔۔۔”زیر لب پڑھ کر اس نے وہیں رکھی ڈرائنگ بک پر نظر ڈالی جس میں اس کے مطابق اس پورے گیم کی سب سے خوبصورت اورکا بنی ہوئی تھی۔وہ مسکرایا اور اس ٹاسک کے سامنے بھی ٹک کر دیا۔
“ٹاسک:بھیجی گئی ویڈیوز اندھیرے کمرے میں،رات چار بج کر بیس منٹ پر اکیلے بیٹھ کر دیکھیں۔۔۔”عبارت پڑھی اور نگاہوں کے سامنے وہ عجیب و غریب اشکال گھومنے لگیں جو بےہنگم طریقے سے حرکت کر رہی تھیں اور جن کے رنگ چیختے ہوئے تھے۔
“اکیلے بیٹھ کر وہ بھی رات میں ایسی ویڈیوز دیکھنا بڑا رسک ہے بھئی۔کوئی بھی شخص باآسانی ہیپاٹائٹس ہو سکتا ہے۔”سِنان نے خود سے کہا اور اس ٹاسک کے سامنے بھی ٹک کر دیا۔
“ٹاسک:کیا آپ اورکا بننے کیلیے تیار ہیں؟اگر ہاں تو اپنی ٹانگ پر yes لکھیں اور اگر نہیں تو بطور سزا اپنے جسم پر کہیں بھی بلیڈ سے کٹ لگائیں۔”نظر کرسی سے لٹکتے پیر سے ہو کر واپس لوٹی اور اس نے اس جملے کے سامنے بھی ٹک کر دیا۔
“ٹاسک:اپنا ہونٹ کاٹیں اور تصویر کھینچ کر بھیجیں۔”کسی کسی ٹاسک کے ساتھ خاص طور پر یہ درج تھا کہ تصویر کھینچ کر بھیجیں جبکہ عمومی طور پر ہر ٹاسک کی تصویر ارسال کرنی ہی ہوتی تھی۔اس نے ان لفظوں کو پڑھ کر وہاں بھی ٹک لگایا۔
“ٹاسک:اپنی کلائی پر اورکا بنانا شروع کریں اور ہر ٹاسک کے ساتھ اسے تھوڑا تھوڑا آگے بڑھا کر آخر تک مکمل کریں۔۔۔”کلائی پر ایک نظر ڈالی اور اس پر بھی ٹک کر دیا۔
“ٹاسک:رات چار بج کر بیس منٹ پر اکیلے بیٹھ کر کری ایٹر کی جانب سے بھیجا جانے والا میوزک سنیں۔۔۔”دماغ کی شریانیں پھٹیں اور اس کی رگیں ابھر گئیں۔گہری سانس خارج کر اس نے اس ٹاسک کے سامنے بھی ٹک لگا دیا۔
“ٹاسک:اپنے ہاتھ پر بار بار سوئی گھسائیں۔۔۔”پنسل تھامے دایاں ہاتھ اس نے نگاہوں کے سامنے کیا پھر اس جملے کے سامنے ٹک کر دیا۔
“ٹاسک:خود کو تکلیف پہنچائیں،خود کو بیمار کریں۔۔۔”سِنان کے دماغ میں ٹیس اٹھی اور اس نے اس عبارت کے آگے بھی ٹک کر دیا۔
“ٹاسک:دوسری اورکا سے ویڈیو کال پر بات کریں۔۔۔”اس نکتے پر آکر وہ ٹہر گیا۔ماضی کی رات اس کمرے کے مناظر کو دھندلا کر گئی۔
“ہائے۔۔۔”گہری نیلی روشنی سکرین کی دوسری جانب میں واضح تھی جس میں کچھ بھی واضح نہ ہو رہا تھا۔وہ تیز روشنی کبھی جلتی تو کبھی بجھتی ہوئی منظر کو واضح ہونے سے روک رہی تھی۔اس نیلی روشنی میں بیٹھا وجود سیاہ رنگ کے لباس میں خود کو چھپائے ہوئے تھا کہ اس کی آنکھیں بھی ٹھیک سے نظر نہ آ رہی تھیں۔
“ہائے۔۔۔”سِنان بھی اندھیرے میں بیٹھا تھا اور چہرے کو سیاہ نقاب سے ڈھانپا ہوا تھا مگر اس کی کانچ سی سبز آنکھیں عیاں تھیں۔
“کیا آپ گیم میں آگے بڑھنے کیلیے تیار ہیں؟”اس شخص نے سوال کیا۔سِنان کی نگاہیں سکرین پر ٹہر گئیں۔آنکھوں میں نیلی روشنی جلنے بجھنے لگی۔وہ جز بز تھا۔آیا کہ سکرین کے پار بیٹھا شخص گیم کا خالق دمتری ہی تھا یا پھر کوئی اور!
“ہاں۔۔۔”کچھ دیر ساکت رہنے کے بعد اس نے جواب دیا۔
“ابھی تک کے ٹاسک پورے کر لیے؟”پھر سوال آیا۔اس کی آواز گہری تھی کہ گونج رہی تھی۔حالانکہ وہ بہت دھیما بول رہا تھا۔
“ہاں کر لیے۔۔۔”اس نے جواب دیا۔نظریں اس کے سراپے اور عقب میں نظر آتے مناظر کو ٹٹول رہی تھیں مگر نیلی روشنی اس میں رکاوٹ بن رہی تھی۔
“گڈ۔۔”اسے شاباشی سے نواز کر وہ ہنسا پھر کچھ دیر کسی اور جانب متوجہ ہوا۔
سِنان کی نظریں وہیں جمی تھیں۔وہ سیاہ وجود جب دوبارہ سکرین کی جانب پلٹا تو ایک مخصوص دھن پورے ماحول میں گونجنے لگی تھی اور وہ اس پر سر دھن رہا تھا۔غالباً وہ دھن اس کی پسندیدہ تھی لیکن سِنان کے کانوں میں چبھ رہی تھی۔
“خر۔۔۔”سِنان اپنے اعصاب پر قابو پاتے ہوئے تحمل کا مظاہرہ کر رہا تھا۔
“تمہارا نام کیا ہے؟”سِنان نے کچھ سوچتے ہوئے سوال کیا۔
جواباً وہ ہنسا پھر بولا۔
“کیوں جاننا ہے میرا نام؟”
“یونہی۔۔۔”سِنان نے بات کو سرسری سا رنگ دیا۔
“اورکا۔۔۔اورکا نام ہے میرا۔”وہ کچھ آگے کو ہو کر گویا ہوا۔سِنان کو اس کی آنکھیں کچھ نظر آئیں پھر وہ بےساختہ ایک جھٹکے سے پیچھے ہو کر کرسی پر گھول گھول گھومنے لگا۔
“اب میں کیا اس خر کے کرتب دیکھوں؟”سِنان کوفت سے سوچ رہا تھا۔
وہ یونہی کچھ دیر گھومتا رہا اور سِنان اس پر غور کرتا رہا پھر اچانک سے کال منقطع ہو گئی۔
ایک سحر تھا جو یکدم ٹوٹ گیا۔دھن بند ہوئی تو سِنان کے کان سائیں سائیں کرنے لگے اور دماغ کی رگیں پھٹنے لگیں۔وہ میز پر سر رکھ کر آنکھیں موند گیا۔کبھی جلتی کبھی بجھتی نیلی روشنی آنکھوں میں اس قدر بیٹھ گئی تھی کہ ہر جگہ دکھائی پڑ رہی تھی حتی کہ بند آنکھوں میں بھی سما رہی تھی۔
یہ پچھلی رات کا واقعہ تھا۔وہ دوبارہ حال میں لوٹا اور سر جھٹک کر اس ٹاسک کے آگے بھی ٹک لگا دیا۔
دس راتیں مکمل ہوئی تھیں اور آج گیارہویں رات تھی۔سبین کے دن بڑے ہی خوشگوار گزرے تھے جبکہ راتیں بےخبری کی نذر ہوئی تھیں۔اس کے برعکس سِنان کی راتیں اس خونی گیم کے پیچھے کالی ہوئی تھیں۔سبین کو روک کر وہ خود اس گیم کو کھیل رہا تھا۔سارے ٹاسک بھی اس نے پورے کیے تھے۔اب کیا بچ گیا تھا؟
سِنان کی دس راتیں کھل کر سامنے آگئی تھیں اور بےچین کر گئی تھیں۔
سوال ہی سوال تھے اور جواب دینے والا کوئی نہیں تھا۔کیا سِنان مرنے والا تھا؟کیا وہ دوغلی شخصیت کا مالک تھا کہ جو دوسروں کو تو ہمت دے رہا تھا مگر خود اسی گیم میں غرق تھا؟یا پھر وہ خود بھی اس نفسیاتی گیم کے چنگل میں پھنس گیا تھا؟کیا اس کا دماغ بھی اس پر حاوی آگیا تھا؟کیا وہ گیم اس قدر مضبوط تھا کہ سِنان جیسے قوی دماغ شخص پر بھی گرفت مضبوط کر چکا تھا؟
سوال بنا جواب کے پورے مناظر میں حرکت کر رہے تھے اور وہاں بیٹھا شخص مطمئن تھا۔تمام نشانات پورے ہو گئے تو وہ لیپ ٹاپ کی جانب متوجہ ہوا۔گھڑی ساڑھے تین کا وقت بتا رہی تھی کہ تبھی سکرین پر انگریزی میں لکھا پیغام ابھرا۔
“آپ کی موت کی تاریخ پچیس دسمبر دو ہزار سولہ۔۔۔”سکرین پر لکھا پیغام پڑھ کر وہ ہنسا۔
“چلو جی مل گئی موت کی تاریخ۔۔۔ٹھیک ہے بھئی صاحب دیکھتے ہیں کیا ہوتا ہے پچیس دسمبر کو۔۔۔”اس نے سر کرسی کی پشت سے ٹکایا اور دونوں ہاتھ باہم پیوست کیے شہادت کی انگلیاں لبوں پر ٹکائیں۔آنکھیں سکرین پر مرکوز تھیں۔کمرہ روشن تھا جو کہ معمول کے برخلاف تھا۔وہ ہمیشہ روشنیاں گل کر کے اندھیرے میں کام کرتا تھا مگر آج لائٹ بند کرنے کا دھیان نہیں رہا تھا۔
“موت کی تاریخ۔۔۔”وہ سکرین دیکھے گیا پھر آگے ہو کر اس لنک پر کلک کر کے کھولا۔عمل شروع ہو گیا،کچھ وقت کا انتظار تھا کہ تبھی۔۔۔۔
“This site can’t be reached…”
وہ ہڑبڑایا اور دوبارہ لنک کھولنا چاہا مگر۔۔۔
“This site can’t be reached…”
“یہ کیا مسئلہ ہو گیا آخر؟یہ ویب سائٹ بند کیسے ہو گئی۔”اس نے کئی بار لنک کھولنا چاہا مگر بےسود۔۔۔وہ گیم،وہ خونی گیم دی اورکا رخصت ہو چکا تھا۔دنیا کی پہنچ سے دور چلا گیا تھا۔اپنی تاریکی میں لوٹ گیا تھا۔سِنان نے مطمئن سانس خارج کی لیکن اندر ہی اندر کچھ ہلچل سی تھی۔
وہ نشست سے اٹھا،لیپ ٹاپ کی سکرین بند کی،ایک نظر دیوار پر لٹکی گھڑی پر ڈالی اور کمرے میں بنے اٹیچ باتھ روم کی سمت بڑھ گیا۔
چھوٹی سوئی تین سے چار کی سمت بڑھ گئی تھی اور بڑی سوئی چھ سے سات کی جانب گامزن تھی۔
***
“بس بہت ہو گیا انتظار۔۔۔”وہ کتاب بند کر کے بیڈ سے اٹھی اور گھڑی پر نظر ڈالی۔وقت ساڑھے تین سے آگے نکل رہا تھا۔اس نے اپنے گرد اچھے سے شال لپیٹی اور مسکراتی ہوئی اپنے کمرے سے باہر نکل گئی وہاں جانے کیلیے جہاں اس کا سِنان اس کا منتظر تھا۔
سہج سہج قدم بڑھاتی وہ دروازے تک پہنچی اور آہستگی سے اسے کھولا۔اندر جھانکنے پر سِنان کی میز خالی دکھی اور وہ کہیں نظر نہ آیا تو اس نے قدم اندر کی جانب بڑھائے۔تین چار قدم آگے آکر اس کی نظر دائیں جانب بنے دروازے پر گئی۔
“واشروم گئے ہوں گے۔”غیر موجودگی کی وجہ سمجھ میں آئی سو اس نے اطمینان سے مرکزی دروازہ بند کر دیا اور سیدھ میں چلتی ہوئی اس کی میز کے نزدیک آکر رک گئی۔
“لیپ ٹاپ بند ہے یعنی کام ختم ہو گیا ہے۔”وہ لیپ ٹاپ دیکھ مسکائی پھر یونہی سرسری سی نگاہ لیپ ٹاپ کے ساتھ رکھے رجسٹر پر ڈالی۔وادی میں موجود ساری پربتیں ایک ساتھ اس کے سر پر آن گریں اور وہ ان کے ملبے میں دفن ہو گئی۔مسکراہٹ سمٹی اور آنکھیں ابل پڑیں۔چیخ حلق میں ہی پھنس گئی اور وہ ساکت ہو گئی۔وجود پر سکوت چھا گیا۔گہرا سکوت،سیاہ رات سے بھی زیادہ سیاہ اندھیرا آنکھوں کو ویران کرنے لگا۔
***
جاری ہے
