وہ آنکھیں سکیڑے ہمہ تن گوش تھا۔وہ تفصیل بتا رہی تھی اور اس کا دماغ سوچوں کی تیز گام میں سفر کر رہا تھا۔
“Game,dëprêsi0n,sū!c!dë….”
یہی تین الفاظ ذہن میں گردش کر رہے تھے جن کا آپس میں کوئی تال میل بیٹھ نہیں رہا تھا۔
“مطلب کہ تمہارا بھائی بھی اس گیم میں انوالو ہے؟”بات کے اختتام پر سِنان نے گہری سانس خارج کر،سوال کیا۔
“ہاں۔۔۔”سبین افسوس سے گویا ہوئی۔
“مگر مجھے نہیں لگتا کہ ایک گیم کسی کو اس حد تک پہنچا سکتا ہے کہ وہ اپنی جان دے دے۔”وہ ماننے سے انکاری ہوا۔
“مجھے بھی نہیں لگتا لیکن۔۔۔”وہ ٹہر گئی۔
“لیکن کیا؟”سِنان کو ادھوری بات جاننی تھی۔
“لیکن آج وسیم نے تو اپنی جان دے ہی دی اور وہ بھی گیم کھیل رہا تھا۔”سبین کا دل خوف زدہ تھا۔وہ گو مگو کی کیفیت میں تھی۔
“اس کے پیچھے کوئی اور وجہ بھی تو ہو سکتی ہے۔”وہ ہنوز تردد سے کام لے رہا تھا۔
“اور پھر زرش کے بارے میں کیا کہیں گے آپ؟وہ بھی تو مسلسل یہی کہہ رہی تھی۔”سبین کے پاس ابھی بھی سوال تھے۔
“وہ صدمے میں تھی یار اور ایسا آدمی جس کا دماغ ماؤف ہو جائے وہ کچھ بھی بولتا ہے۔”پھر سے سوال رد کیا گیا۔
“نہیں،مجھے نہیں لگتا کہ یہ سب اتنا سمپل ہے۔کچھ نہ کچھ تو غلط ہو رہا ہے۔”وہ بھی اپنی بات پر اڑی ہوئی تھی۔
“اچھا تم پریشان مت ہو۔”وہ اس کی آواز سے اس کی کیفیت بھانپ گیا۔
“میں اس بارے میں انویسٹیگیٹ کروں گا۔اگر کچھ پتہ چلا اس بارے میں،تو تمہیں انفارم کروں گا لیکن تم اس بارے میں زیادہ سوچو مت،خواہ مخواہ تمہاری طبیعت نہ بگڑ جائے۔مجھے تمہاری صحت اور زندگی عزیز ہے۔”بھرپور الفاظ میں تسلی کرواتے ہوئے آخری جملے میں اس کی اہمیت کی وضاحت کی گئی۔
وہ مسکرانے لگی۔
“اب بس مسکراؤ گی ہی یا کچھ اور بھی کہو گی؟”
“بہت شاطر ہیں یہ سِنان۔پہلے مجھے بلش کرواتے ہیں اور پھر تنگ کرتے ہیں۔”وہ سوچوں میں گم ہو کر مسکرائے گئی۔
“میں کیا کہوں؟اب مجھے نیند آ رہی ہے۔”وہ شرارت سے بولی حالانکہ آج نیند آنا مشکل تھا۔
“آج فجر پڑھ کر سونا۔”وہ پھر سے سابقہ انداز میں لوٹ گیا۔
“مجھے سچ میں نیند آ رہی ہے۔میں جاگ نہیں سکتی،تھک گئی ہوں۔”اس کے اعصاب پر تھکن سوار ہوئی اور نیند غالب آنے لگی مگر دل کسی اور وجہ سے بھی کھٹک رہا تھا تبھی وہ اس سے گفتگو دراز نہیں کرنا چاہ رہی تھی۔
“چلو ٹھیک ہے،کوئی بات نہیں۔تم سو جاؤ،ہم کل بات کریں گے۔”سِنان کو کچھ برا لگا اس کا یوں سپاٹ سا جواب مگر ضبط کر گیا۔
“آپ کو برا تو نہیں لگا نا؟”احتیاط میں ڈوبی آواز تھی اور سِنان کو اندر تک ٹھنڈک بخش گئی تھی۔
“تمہارا آرام میرے لیے اہم ہے،باتیں کرنے کیلیے عمر پڑی ہے۔ہم بھی یہی ہیں اور تم بھی یہیں ہو۔”دوبارہ سے اس کا موڈ خوشگوار ہو گیا تھا۔
“اللہ حافظ۔”شرمیلی سی نسوانی آواز میں خیرباد کہا گیا۔
“اللہ حافظ۔”اس نے بھی جواب دیا اور رابطہ منقطع ہو گیا۔اس کے بعد کے حالات دونوں کمروں میں مختلف تھے۔
“کچھ تو ہے جو چھپا ہوا ہے۔اب تو مجھے بھی لگ رہا ہے کہ وسیم کی موت کسی بڑے راز سے جڑی ہوئی ہے اور اس کے حقائق تک پہنچنا ضروری ہو گیا ہے۔”سِنان اپنی فطرت کے ہاتھوں مجبور ہو گیا تھا۔اب اسے اس معاملے کی تہہ تک پہنچنا تھا اور خود اس کے حقائق دوسروں کے سامنے لانے تھے۔پہلے وسیم کی اچانک ہوئی حادثاتی موت پھر اس کے والد کے انکشافات اور وہ زخم اور مچھلی کی تصویریں پھر زرش کی بے سر و پا باتیں اور اب سبین کی گیم کے متعلق دی گئی معلومات۔۔سِنان کی جاسوسی طبیعت کو اب چین نہیں پڑ رہا تھا۔
دوسری طرف سبین کا کمرہ تھا جہاں وہ بیڈ پر لیٹی ہوئی تھی اور آنکھوں سے نیند کوسوں دور تھی تو پھر اس نے سِنان سے جھوٹ کیوں کہا تھا کہ اسے نیند آ رہی ہے جبکہ اس کے چہرے کی اڑی ہوائیاں تو کچھ اور ہی قصیدہ سنا رہی تھیں۔
“کتنی ہمت کی تھی پھر بھی پوری بات بتانے کا حوصلہ نہیں ہوا۔”سوچوں میں ہلچل مچی ہوئی تھی یعنی کچھ تو تھا جو ابھی راز تھا اور یہ راز رات کے ساتھ سبین کے وجود پر بھی بھاری تھا۔
***
Ek Sakoot E Bekaraan by Syeda Episode 8
