Ek Sakoot E Bekaraan by Syeda Episode 8

سیاہ اندھیری رات روشنی کی سمت سفر کر رہی تھی۔روشنی کے مسافروں کو اندھیرے سے ہو کر گزرنا تھا۔کچھ لوگوں کے حصے میں روشنی کی منزل آنی تھی تو کچھ لوگوں نے اندھیرے میں ہی گم ہو جانا تھا۔روشنی جو لازماً چہار سو پھیلنی ہی تھی مگر جلد باز نفوس اس سے محروم ہو کر اندھیروں کی نذر ہو جانے تھے۔
رات نے چار کا ہندسہ عبور کیا۔مختلف گھروں میں لگی مختلف اقسام کی گھڑیاں ٹک ٹک کرتی چار بج کر پندرہ منٹ پر رکیں تو اندھیرے میں ہلچل سی مچ گئی۔موبائل اور لیپ ٹاپ کی روشنی نے اندھیرے میں ہلکا سا ارتعاش پیدا کیا تھا کیونکہ یہ روشنی امید کی نہیں انسان کی مضطرب ایجادات سے نکلتی مصنوعی روشنی تھی جو انسان میں ہیجان پیدا کرتی ہے۔
اب دنیا ایک چھوٹے سے گاؤں کی مانند نظر آ رہی تھی اور مختلف جگہوں کے مناظر بصارت کے سامنے واضح ہو رہے تھے۔دنیا کے مختلف کونوں میں چلتے مناظر گویا فلم کی صورت ایک ساتھ دکھائی دینے لگے تھے۔
نوجوان نسل اورکا کا شکار ہو رہی تھی اور یہ بیماری تیزی سے ان کے درمیان پھیل رہی تھی۔پھیلتی ہوئی جان لیوا بیماری کے مریضوں کے حالات ایک ایک کر نظروں میں سما رہے تھے۔سماعتیں رات کی خاموشی سننے لگی تھیں۔
“کیا آپ اورکا بننے کیلیے تیار ہیں؟”ایک پیغام تھا جو بیک وقت کئی سکرینوں پر روشن ہوا تھا۔ایک سوال تھا جو بیک وقت کئی نوجوانوں سے کیا گیا تھا۔ایک کھائی تھی جس میں بیک وقت مستقبل کے سہانے خوابوں کو پھینکا گیا تھا۔
نوجوانوں کے چہرے خوشی سے دمکنے لگے تھے تو کئیوں کے چہروں پر اضطراب تھا اور کافی سارے خوف میں مبتلا تھے مگر جواب سب نے ہی ایک دیا تھا۔کیا اتفاق تھا!
“یس۔۔۔۔”یک لفظی جواب تھا جو تمام ہی سکرینوں پر منتخب کیا گیا تھا گویا یہی اس کا صحیح جواب تھا یا شاید یہی اس کا واحد جواب تھا۔باوجود دوسرے انتخاب کی موجودگی کے،منتخب صرف ایک ہی کرنا تھا۔سب نے ہی ہاں کرنی تھی کیونکہ اگر وہ اس کا جواب انکار کی صورت دیتے تو ہرجانہ بڑا بھاری تھا اور وہ تو ابھی بچپن سے نکل کر لڑکپن میں آئے تھے۔ان کے دل جلدی سہم جاتے تھے۔وہ ابھی والدین سے ڈرتے تھے۔انہیں لوگوں کا خوف تھا۔ان میں اعتماد کی کمی تھی۔وہ اپنی غلطی کو قبول کرنے کا حوصلہ نہیں پاتے تھے کیونکہ یہ انہیں کسی نے سکھایا ہی نہیں تھا۔
جواب ہاں میں آیا اور خونی کھیل شروع ہوا۔۔۔
اونچے پل پر کھڑی لڑکی نیچے کی سمت دیکھتی ہوئی،توازن برقرار رکھنے کی کوششوں میں تھی۔وجود لرز رہا تھا گویا ابھی گر پڑے گا مگر کوشش بھرپور تھی۔دماغ سے ڈر کو نکالنے کی کوشش۔
“اس طرح سے یہاں کھلی ہوا میں کھڑے ہونے میں کتنا مزہ آ رہا ہے۔”کچھ دیر خوف نے قابو میں رکھا پھر بالآخر دماغ خوف سے آزاد ہو کر آرام دہ حالت میں چلا گیا۔
یہ منظر ختم ہوا تو رات نے ایک اور راز سنبھالا۔بند کمرہ تھا،لیپ ٹاپ سے نکلتی روشنی تھی،باقی ماندہ جگہ اندھیر تھی اور تھا ایک وجود جو لیپ ٹاپ کے سامنے بیٹھا تھا۔سکرین پر انگریزی میں لکھے الفاظ روشن تھے۔
“اس لنک پر کلک کر کے ویڈیو دیکھیں۔”پیغام جونہی کوندا لڑکے نے ہدایت پر عمل کیا اور یوں خوفناک مناظر سکرین پر نظر آنے لگے۔
عجیب و غریب مخلوقات تھیں۔بگڑے ہوئے چہروں پر خوفناک مسکراہٹیں سجائے،مسلسل سکرین پر گردش کر رہی تھیں۔کچھ مخصوص رنگ تھے جو سکرین پر حرکت کر رہے تھے۔یوں محسوس ہو رہا تھا کہ جیسے سکرین سے باہر نکل آئیں گے۔لڑکے کے رونگھٹے کھڑے ہو رہے تھے مگر ویڈیو دیکھنا لازم تھا،ٹاسک جو پورا کرنا تھا۔
“کب ختم ہو گی یہ ویڈیو!”آواز میں خوف نمایاں تھا مگر پھر بھی وہ سکرین پر سے نظریں نہیں ہٹا رہا تھا۔وجہ وہی تھی کہ ٹاسک تھا تو پورا کرنا تھا گویا کوئی اس پر نظریں جمائے بیٹھا ہو۔وہ لڑکا اس ویڈیو میں چلتی پھرتی اشکال اور بڑی چھوٹی ہوتی رنگوں میں لپٹی تصویروں سے خائف ہو رہا تھا مگر آنکھیں بغور اس پر ٹکی ہوئی تھیں۔
کچھ وقت سرکا پھر منظر ہی بدل گیا۔وہ لڑکا جو ابھی تک جھنجلاہٹ میں تھا،اب ان رنگوں کے اثر میں آ کر سکون پا چکا تھا۔دماغ نے اس چیز سے دور ہٹنا چاہا مگر نگاہوں کے انکار نے دماغ کو پسپا کر دیا اور یوں آنکھوں کو انہی رنگوں کے درمیان چھوڑ،دماغ مطمئن ہو گیا۔
اگلا منظر اگلی کہانی دکھا رہا تھا۔تیز دھار بلیڈ ہاتھ میں پکڑے وہ کانپ رہی تھی۔ہاتھ لے جا کر بازو کے نزدیک کیا ہوا تھا اور آنکھیں میچی ہوئی تھیں۔
“یا اللہ۔۔۔سسسس۔۔۔۔”بالآخر درد برداشت کیا اور ایک زخم اپنی کلائی کے اوپری حصے پر ڈالا۔کٹ زیادہ گہرا نہیں تھا مگر بائیں آنکھ سے آنسو کا قطرہ اور کلائی سے خون کا قطرہ ایک ساتھ سیدھ میں گر کر بےمول ہوئے تھے۔
ایک اور کمرہ تھا،ایک اور قصہ تھا۔سادہ سفید کاغذ اور ہاتھ میں موجود پنسل ربڑ،یہ چیزیں تو پتہ دے رہی تھیں کہ وہ جواں سالہ لڑکا کوئی خوبصورت سی تصویر بنانے لگا تھا۔کوئی سینری یا پھر کوئی پیارا سا پھول یا غالباً کوئی آزاد اڑتی ہوئی تتلی۔۔۔ہاں وہ بنا تو تصویر ہی رہا تھا مگر تصویر ابھی ہاتھ کے نیچے تھی تو واضح نہیں تھی۔
“اوہ شکر ہے بن گئی۔کب سے کوشش کر رہا تھا۔میری تو ویسے ہی ڈرائنگ خراب ہے۔”سکھ کا سانس خارج ہوا اور ہاتھ کی آڑ ہٹی۔اب تصویر واضح تھی،وہ تو ایک مچھلی کی تصویر تھی۔وہیل نما مچھلی۔۔۔
اگلے نظارے میں ایک اور وجود تھا اور یہ جگہ کھلی ہوئی تھی۔کوئی اندھیرا یا روشن کمرہ نہیں بلکہ ہواؤں سے بھری ایک کھلی چھت تھی۔