Man Angan Mein Deep Jale by Sana Sufiyan Khan Eid Special Novel Episode 1

بسم اللہ الرحمٰن الرحیم
(شروع کرتی ہوں میں اللہ کے نام سے جو نہایت مہربان اور رحم فرمانے والا ہے۔)
~~~~
ممبئی۔۔! روشنیوں سے جگمگاتا ہوا شہر جہاں زندگی رقص کرتی محسوس ہوتی ہے۔ جسے بالی ووڈ کی نگری بھی کہا جاتا ہے۔جہاں اپنوں کے رویے بیگانے اور بیگانوں کے رویے اپنے لگتے ہیں۔۔
ممبئی کی سرزمین پر کھڑی ہوئی بلند و بالا عمارت جو کوکلا بین ہاسپٹل کے نام سے مشہور ہے۔ ہال نمبر چار کے کونے میں رکھے ایک بینچ پر ایک دوشیزہ بیٹھی سوچوں میں غرق تھی۔اس کی نظر فرش پر مرکوز تھی۔ اس کے چہرے پر اتنی سنجیدگی، اتنی بے بسی نظر آرہی تھی جیسے وہ اس زندگی سے تنگ ہو، جیسے یہ دنیا اس کے لیے چھوٹی پڑ گئی ہو۔۔
وہ بھی اپنے بینچ پر بیٹھے تقریبا دو گھنٹے سے اس لڑکی کو ایسے ہی ساکت و جامد بیٹھے دیکھ رہا تھا لیکن اب اسے دیکھتے ہوئے وہ اٹھ کر کھڑا ہوا اور چند قدم چل کر اسی کے بینچ پر خاموشی سے بیٹھ گیا۔ اس کے بیٹھنے کے باوجود اس دوشیزہ کی سوچ میں کوئی خلل پیدا نہیں ہوا۔ وہ حیران نہیں ہوا کیونکہ اس نے بھی لوگوں کے رنگ بہت قریب سے دیکھ رکھے تھے۔۔
“اتنی مایوسی اچھی نہیں ہوتی کبھی کبھی یہی مایوسی ہمیں زندگی کے رنگوں سے روشناس کروانے کے بجائے بہت پیچھے دھکیل دیتی ہے۔۔!!” گمبھیر خاموش فضا میں اس کی سحر زدہ آواز گونجتی اسے چونکا گئی۔۔
اس نے رخ موڑتے نظر اٹھا کر سامنے دیکھا جہاں ایک تقریباً تیس سالہ پرکشش مرد بیٹھا اس کی طرف ہی دیکھ رہا تھا۔وہ اس پر ایک نظر ڈالنے کے بعد بڑی بے مروتی سے ذرا سا ترچھے گھوم کر بیٹھ چکی تھی اس کے اس انداز پر مقابل بیٹھا شخص زیر لب مسکرایا تھا۔۔
اسے یہ بےرخی اور اجنبیوں سے دوری اختیار کرنے والی ادا بڑی پیاری لگی۔ وہ زیرِ لب مسکرا دیا۔۔
“ایک ترحم یا حقارت بھری نظر بھی کسی کی زندگی کے رنگوں کو چھین سکتی ہے اور یہ بات ہر کوئی جانتا ہے لیکن پھر بھی باز نہیں آتا۔۔!!”چند پل کی خاموشی کے بعد اس کی مترنم آواز سن کر اسے ایک نظر اس نے دیکھا جو دوسری طرف نظر پھیرے اس کے سوال کا جواب دینا نہیں بھولی تھی۔۔
اس کے لہجے میں چھپی بے بسی پر اس نے بغور اس کا جائزہ لیا۔سیاہ رنگ کا عبایا پہنے چھوٹے سے پرس کو اپنی گود میں رکھے وہ خاموشی سے بیٹھی تھی۔۔
“یہ دنیا تو ہمیشہ سے ہی ظالم رہی ہے۔ اس نے ہمیشہ لہراتے ہوئے پرچم کا ساتھ دیا ہے کبھی جھکے ہوئے پرچم کا ساتھ اس نے نہیں دیا ہے۔ اس لیے ہمیشہ یاد رکھنا چاہیے کہ اپنے حصے کی جنگ خود ہی لڑنی پڑتی ہے۔۔!!”اس کی سحر زدہ آواز سن کر وہ ایک بار پھر اس اجنبی کی طرف متوجہ ہوئی تھی۔۔
وہ نجانے کیوں اس سے اتنی نرمی سے پیش آرہا تھا حالانکہ وہ کوئی چھچھورا قسم کا انسان نہیں تھا۔ اس کی سنجیدگی اور متانت ہی اس کی پہچان تھی۔وہ کروڑوں کے بزنس کا اکلوتا مالک زوحان سعید اس اداس سی شہزادی کے لئے اپنے دل میں ایک نرم گوشہ محسوس کیا۔ ایسا تو کبھی نہیں ہوا تھا کہ کوئی پہلی ہی ملاقات میں زوحان سعید کو متاثر کر دے لیکن آج کایا پلٹ گئی تھی۔۔
“آپ جانتے ہیں ہم لڑکیوں کی زندگی کیسی ہوتی ہے۔۔؟ سمندر میں تیرتی اس چھوٹی سی مچھلی کے جیسی جسے ہمیشہ یہ ڈر ہو کہ کہیں اس کا سامنا کسی بڑی مچھلی سے نہ ہو جائے جو بنا سوچے سمجھے اسے نگل جائے اور اس کی زندگی اندھیروں کی نظر ہو جائے۔۔!!”اس نے بڑے عام سے انداز میں کہا تھا لیکن پھر بھی وہ ایک بار پھر چونک گیا۔۔
وہ لڑکی اسے کوئی بہت بڑی عمر کی نہیں معلوم ہو رہی تھی۔ پچیس چھبیس سال کی لگ رہی تھی لیکن جس طرح سے وہ باتیں کر رہی تھی اس کی باتوں سے زندگی کے ہر رنگ سے واقفیت حاصل کرنے کی بو آرہی تھی۔ وہ اس کی سننا چاہتا تھا نجانے کیوں۔۔؟
“میں نے پل پل لوگوں کو بدلتے دیکھا ہے۔ ہر موڑ پر اپنوں کو اپنوں سے ہی پیچھے ہٹتے دیکھا ہے۔ اجنبی سے بیگانہ بنتے دیکھا ہے۔ اپنے مفاد کے لئے الزام تراشیاں کرتے دیکھا ہے۔۔!!” اب کی بار شاید وہ مسکرائی تھی جس سے نقاب سے نظر آتی اس کی پرکشش آنکھیں بھی مسکراتی ہوئی لگیں۔ وہ ان پرکشش آنکھوں کے سحر میں جکڑ چکا تھا۔۔
“مجھے لگتا ہے کہ آپ کے پاس بھی شاید وقت ہے اس لیے آپ کسی اجنبی کے پاس بیٹھ کر اپنا وقت ضائع کر رہے ہیں تو آئیے میں آپ کو ایک کہانی سناتی ہوں کیونکہ میرے پاس بھی وقت ہی وقت ہے۔۔!!” اب کی بار بڑے سکون سے وہ اس کی طرف رخ موڑ کر بیٹھ چکی تھی۔۔
“جی ضرور کیوں نہیں۔۔!!” اثبات میں سر ہلاتے ہوئے فوراً تیار ہوا تھا۔وہ اس کو صرف اور صرف اس وقت بولتے ہوئے سننا چاہتا تھا اور وہ ایسا کیوں چاہتا تھا یہ سمجھنے سے قاصر تھا۔۔
“ایک لڑکی جو پیدا تو مڈل کلاس میں ہوئی تھی لیکن ماں باپ کی محبت اور شفقت نے اسے کسی شہزادی کی طرح اپنی زندگی کو محسوس کروایا۔ اس لڑکی کو اپنی زندگی یونی تک پہنچنے کے باوجود شہزادیوں سی ہی محسوس ہوئی لیکن اچانک ایک بہت بڑا حادثہ ہوا اور سب کچھ تبدیل ہو گیا۔۔!!” وہ غیر مری نقطے پر نظر مرکوز کیے بولتے بولتے اچانک خاموش ہو گئی چند پل کے وقفے کے بعد وہ پھر وہیں سے دوبارہ شروع ہوئی جبکہ مقابل بیٹھا شخص اس کی باتیں سننے میں محو تھا۔۔
وہ اسی شہر ممبئی کا باشندہ تھا اور آج اپنے والد کو لے کر چیک اپ کرانے آیا تھا۔ جب تک وہ اندر تھے تب تک وہ اس لڑکی کے ساتھ ہی بیٹھا تھا۔۔
“اس لڑکی کا رشتہ آیا تھا اور پکا بھی ہو گیا تھا کیونکہ لڑکی میں کوئی عیب جو نہیں تھا۔ سب کچھ ٹھیک تھا جب شادی کے ایک ماہ پہلے ایک سڑک حادثے میں لڑکی نے اپنے پیر گواں دیے۔ کیونکہ اب وہ لڑکی عیب دار ہو چکی تھی تو وہی رشتہ جو پہلے بہتر ہی نہیں بہترین ثابت ہوا تھا چند پل بھی دیر لگائے بغیر منہ پر ہی رشتے سے انکار مار کر پیچھے ہٹ گئے۔۔!!”
درحقیقت وہ بہت اچھے سے اس کی باتوں میں چھپے مفہوم کو سمجھ سکتا تھا کیونکہ وہ بھی اسی دنیا سے ہی تعلق رکھتا تھا۔۔
“آپ کو معلوم تو ہوگا ہی کی لڑکیاں تھوڑی حساس ہوتی ہیں اس لیے اس لڑکی نے بھی اس حادثے کے بعد اپنی زندگی میں ہوئے اتنے بڑے سانحے کا بہت زیادہ اثر لیا۔ شاید وہ کچھ دنوں میں ہی ان سب سے نکل آتی لیکن یہ تو بس ابھی شروعات تھی۔۔!!” وہ کسی روبوٹ کی طرح بولتی جا رہی تھی۔۔
“اس لڑکی کو محسوس کروایا گیا کہ اب اس کی زندگی بوجھ بن گئی ہے صرف اس لئے کہ وہ اب عیب دار ہو چکی ہے۔ آنے والے ہر رشتے کی ایک لمبی چوڑی ڈیمانڈ ہوتی تھی جس پر وہ لڑکی اب کھری نہیں اتر سکتی تھی اس لئے اس لڑکی سے اور اس کے والدین سے خوش رہنے کا حق بھی چھینا جا رہا تھا۔۔!!” اس کی کہانی میں اب روانی آ چکی تھی اور وہ خاموشی سے اپنے لبوں پر ہتھیلیاں جما کر بیٹھا بس اس کی باتیں سن رہا تھا لیکن درمیان میں اسے بولنا پڑا۔۔
“والدین کے لئے بیٹے ہوں یا بیٹیاں کبھی بوجھ نہیں لگتیں اور ڈاکٹر کیا کہتے ہیں۔۔؟” اس نے نرمی سے کہتے ہوئے سوال بھی پوچھ لیا۔۔
“ہاں بالکل لیکن یہ دنیا تو بتا دیتی ہے ناں کہ اپنے والدین کے گھر پر بیٹھی ہوئی لڑکی بوجھ ہوتی ہے۔۔!!” اسے جواب دینے کے ساتھ ہی ساتھ وہ سامنے دیکھتے ہوئے اپنا پرس ٹھیک کرنے لگی تھی۔ اس نے بھی نظریں گھما کر سامنے دیکھا جہاں سے ایک بزرگ ہاتھوں میں فائل لیے ان کے قریب ہی آرہے تھے۔۔
“بہت شکریہ میرے ساتھ اپنا قیمتی وقت ضائع کرنے کے لئے۔۔!!” وہ قریب آتے شخص کا ہاتھ تھام کر اٹھ کھڑی ہوئی اور بڑی مشکل سے فرش پر پیر جماتے ہوئے انہیں بزرگ کے سہارے چلتی ہوئی اس کے سامنے سے نکل گئی۔۔
جبکہ وہ ساکت و جامد سا وہیں بیٹھا رہ گیا۔ اسے لگا تھا کہ وہ لڑکی کسی اور کی آپ بیتی سنا رہی تھی لیکن اس کے لڑکھڑاتے ہوئے پیروں کو دیکھ کر اسے اب سمجھ آیا تھا کہ وہ خود پر گزری داستان سنا رہی تھی۔۔
اس کی درد بھری آواز اور اس کی بے بسی اس کے دل میں تلاطم برپا کر گئی تھی۔ ان تیس سالوں میں اس کے احساسات کبھی کسی کے لیے ایسے نہیں ہوئے تھے اس لیے ہی تو اس نے آج تک اپنے باپ کے کہنے کے باوجود شادی جیسے خوبصورت رشتے سے بھی پیچھے ہٹتا رہا تھا۔۔
دواؤں کا پرچہ تھامیں اس کے والد صاحب اس کے سامنے کھڑے اسے پکار رہے تھے لیکن اسے کچھ ہوش نہیں تھا۔ وہ کسی اور ہی دنیا میں اس وقت پہنچا ہوا تھا۔ دوبارہ سے ان لفظوں کو محسوس کر کے وہ اپنے دل کی دھڑکنوں کو قابو کر رہا تھا۔۔
وہ اس لڑکی کو بنا دیکھے بھی اس کے سحر میں گرفتار ہوا تھا۔ اس نے اپنے والد کا ہاتھ تھام کر بنا کچھ بولے اسی دروازے سے ان کے پیچھے بھاگا تھا۔۔
“زوحان کہاں جا رہے ہو بیٹا۔۔؟” وہ حیران پریشان سے اس کے ساتھ تیزی سے قدم اٹھاتے ہوئے اس سے گویا ہوئے۔۔
“آپ کی بہو سے آپ کو ملوانے کے لئے۔۔!!”اس کے جواب پر وہ بےاختیار مسکرا دیے کیونکہ پہلی بار وہ شادی کے حوالے سے کوئی بات خود کر رہا تھا جو کہ خوش آئند بات تھی۔۔
“اچانک سے میری بہو کہاں سے تمہیں مل گئی۔۔؟”ان کی مسکراہٹ گہری ہوگئی۔۔
“اچانک سے ہی ملی ہے اس لیے ہی تو بھاگ رہا ہوں اس کے پیچھے۔۔!!” اپنے خوبرو بیٹے کو دیکھتے ہوئے وہ اس کے ساتھ چلتے ڈسپنسری کے قریب پہنچ کر رک گئے کیونکہ وہ اطراف میں نظر ڈالتے ہوئے شاید کسی کو ڈھونڈ رہا تھا۔۔
“بابا وہ دیکھیں آپ کے سمدھی جی ہیں۔ جا کر ان سے بات کریں میں آپ کی بہو سے ڈبلو ڈبلو ای کر کے آتا ہوں۔۔!!” وہ انگلی سے پہلے ایک بزرگ کی طرف اشارہ کرنے کے بعد ایک طرف رکھے بینچ پر خاموش بیٹھی ہوئی لڑکی کو انہیں دکھاتے ہوئے زیر لب مسکرایا تھا۔۔
وہ ان سے اجازت لے کر اب دوبارہ اسی لڑکی کی طرف بڑھا تھا جس نے چند پل کے لیے ہی صحیح پر اس کے دل کی دنیا کو ہلا کر رکھ دیا تھا۔۔
“آپ کو پتہ ہے ہمیشہ زندگی ایک سی نہیں رہتی۔ زندگی ہمیشہ ایک نیا موڑ لیتی ہے اور ہر نئے موڑ پر انسان کو چند پل رک کر ایک بار اپنے پیچھے ضرور دیکھنا چاہیے کہ کہیں کوئی ہے تو نہیں جو آپ کا ہاتھ تھام کر اس دنیا کی سرد و گرم ہوا سے بچا سکے اور اگر آپ کو ایسا کوئی نظر آ جائے جو خلوص دل سے آپ کی طرف بڑھا ہو تو آپ کو اس کا ہاتھ ضرور تھام لینا چاہیے۔۔!!”اچانک اس کے سامنے آتے اپنی باتوں سے اسے چونکا گیا تھا۔ بڑی حیرت انگیز نظروں سے وہ اس شخص کا جائزہ لے رہی تھی جسے کچھ دیر پہلے ہی وہ اپنی کہانی سنا کر واپس آئی تھی اور اب وہی شخص اس کے سامنے کھڑا تھا۔۔
“کک۔۔ کیا مطلب۔۔؟” اس کے لہجے کی لڑکھڑاہٹ صاف واضح تھی۔۔
“مطلب صاف ہے کہ میں اپنی زندگی کا ہر حصہ، اپنے قیمتی وقت کا ہر پل آپ کے ساتھ ضائع کرنے کو تیار ہوں۔ کیا آپ بھی اپنا قیمتی پل اور قیمتی لمحہ میرے ساتھ ضائع کرنے کو تیار ہیں۔۔؟”وہ نرمی سے مسکراتے ہوئے اس سے ذرا سا فاصلے پر سامنے ہی گھٹنوں کے بل بیٹھ چکا تھا۔ ایسا دل فریب نظارہ جسے دیکھ کر اس کی آنکھیں نم ہوئی تھی۔ کیسا شخص تھا یہ جو سب کچھ جاننے کے بعد بھی اسے کوئی فرق نہیں پڑ رہا تھا یا پھر وہ اس سے ہمدردی کر رہا تھا۔۔؟
“آپ جیسا سوچ رہی ہیں وہ غلط ہے۔ یہاں ہر انسان کے اندر کچھ نہ کچھ عیب ہوتے ہیں، کچھ ایسے عیب ہوتے ہیں جو ظاہر نہیں ہوتے اور ان عیبوں کی پردہ پوشی ہمارا رب کرتا ہے اور کچھ عیب ایسے ہوتے ہیں جو سامنے نظر آتے ہیں، ان عیبوں کی پردہ پوشی بہت مشکل ہے لیکن آپ یہ نہ سوچیے گا کہ اس سے کسی کی زندگی متاثر ہوتی ہے نظر اور نظریے کا فرق ہے بس۔۔!!” اس کی آنکھوں میں جھانکتے وہ فوراً سے پہلے ہی اس کے سوال کو بھاپ گیا تھا اب کی بار حیران ہونے کی باری ایشل کی تھی۔۔
“میری ساری باتیں جاننے کے بعد آپ کو مجھ سے ہمدردی ہو رہی ہے ناں لیکن آپ کو شاید معلوم نہیں ہے کہ ہمدردی میں انسان ہمیشہ غلط ہی فیصلے کرتا ہے۔۔!!”اپنے سامنے گھٹنوں کے بل بیٹھے اس خوبرو شخص کو اس نے ایک نظر دیکھنے کے بعد اپنی نظروں کا زاویہ بدل لیا۔۔
“اب اِس کے جواب میں یہ مت کہیے گا کہ راہ چلتے آپ کو محبت ہو گئی ہے کیونکہ یہ محبت نہیں ہے۔۔!!” اس کے لہجے میں چھپی سچائی کو محسوس کرتے ہوئے وہ مدھم انداز میں مسکرایا تھا۔۔
“ابھی نہیں ہے محبت تو کیا ہوا شادی کے بعد اپنی بیوی سے ہی محبت ہوگی مجھے کیونکہ اس بات کا مجھے یقین ہے۔۔!!” اس کے گھبرائے ہوئے انداز پر وہ محضوظ ہوتے ہوئے اسے قائل کرنا چاہتا تھا۔۔
وہ سرخ چہرہ لیے رخ موڑ چکی تھی۔ حقیقت میں اب اپنے رخسار حدت سے تمتماتے محسوس ہوئے۔۔
“آپ کو وقت چاہیے تو بےشک لے لیں بلکہ مجھے سمجھنے کے لئے اور جاننے کے لئے جتنا وقت چاہیں لے سکتی ہیں لیکن مجھے آپ سے نکاح اسی ہفتے کرنا ہے۔۔!!” اس کے حتمی فیصلے پر وہ چونک گئی کیونکہ پہلی بار اس پر کوئی حق جتانے کی کوشش کر رہا تھا۔۔
“آپ سوچ لیں اور پھر فیصلہ کریں کیونکہ بعد کے پچھتاوے سے اچھا ہے کہ آپ وقت لیں۔ اور دوسری بات یہ ہے کہ اچھی بیٹیاں اپنے فیصلے کا اختیار اپنے والدین کو سونپ دیتی ہیں۔۔!!” نرمی سے کہتے ہوئے وہ بڑی مشکل سے اپنے پیروں کو گھسیٹتے ہوئے آگے بڑھ گئی جبکہ وہ ایک بار پھر دھیرے سے مسکرا دیا۔ وہ کوئی ٹین ایج نہیں تھا کہ جلدبازی میں فیصلہ کر لیا، وہ ایک میچیور تیس سالہ مرد تھا جس نے اپنی زندگی کے ہر حصے سے کچھ نہ کچھ سیکھ کر آگے بڑھا تھا اور آج وہ جہاں کھڑا تھا وہاں اس کی سوچ تک رسائی حاصل کرنا بھی ناممکن تھا۔۔
فیصلہ ہو چکا تھا بس عمل درآمد ہونا باقی تھا۔۔
ان دونوں کے والدین بھی ان سے کچھ فاصلے پر کھڑے اپنے بچوں کے چہرے پر خوشی اور حیرانی محسوس کر سکتے تھے۔ وہ خوش تھا جبکہ سامنے کھڑی دوشیزہ حیران تھی اور اس کا حیران ہونا بنتا بھی تھا۔ شاید یہ سب کچھ ایسے ہی لکھا تھا اور جو جس کے نصیب میں ہوتا ہے وہ اسے مل ہی جاتا ہے۔۔
ان دونوں کا نصیب ایک دوسرے سے جڑا تھا تو بھلا وہ دونوں کسی اور سے کیسے جڑ جاتے۔۔
٭٭٭٭٭