”السلام علیکم! سویرا کے کزن ولید رحمٰن یہیں رہتے ہیں؟“ اس نے مہذب انداز میں تصدیق چاہی۔
”وعلیکم السلام جی، پر آپ کون؟“ وہ کھٹکا۔
”میں جنید شمسی، آپ مجھے سویرا کا سینئر کہہ سکتے ہیں، کیا سویرا یہاں آئی ہے؟“ اس کے اگلے سوال پر زین دنگ رہ گیا۔
لاؤنج میں خاموشی چھائی ہوئی تھی جب زین کی پیروی میں جنید وہاں آیا اور سب اس کی جانب متوجہ ہوئے۔
”آپ کون؟“ احتشام نے پوچھا۔
”جنید آپ یہاں؟“ اسی پل سویرا حیرت سے کہتی کھڑی ہوئی۔ ولید نے بھی تقلید کی۔
”جب تم نے فون پر روتے ہوئے کہا تھا کہ تم گھر سے جا رہی ہو تو میں سمجھ گیا تھا کہ تم ولید کے گھر ہی آئی ہوگی۔“ وہ بتاتا ہوا آگے آیا۔
”آپ یہاں کیوں آگئے؟“ اسے فکر ہوئی۔
”تم یہاں کیوں آئی ہو؟“ اس نے مقابل رک کر الٹا سوال کیا۔ وہ چپ ہوگئی۔
”کیا ضرورت تھی اتنا بڑا قدم اٹھانے کی؟“ انداز میں مبہم سی ڈپٹ تھی۔
”تو اور میں کیا کرتی؟ میں نے آپ سے کہا تھا ناں کہ ابو کبھی میری بات نہیں سمجھیں گے لیکن آپ کا کہنا تھا کہ چھوڑ دو آسائنمنٹ پوری کرنے کی فکر اور ان سے بات کرکے بتا دو کہ مجھے نفسیات نہیں پڑھنی، آج جب میں نے بات کی تو وہ یہ کہہ کر چلے گئے کہ ایسی نافرمان اور نالائق اولاد سے بہتر تھا کہ خدا انہیں بے اولاد رکھتا۔“ وہ بتاتے ہوئے آخر میں پھر رو پڑی۔
”اور وہ ٹھیک ہی کہہ رہے تھے کہ میں کسی لائق نہیں ہوں، نہ ان کا نام روشن کر سکی اور نہ آپ سے کیا وعدہ پورا کر سکی، اب میری وجہ سے آپ کو بھی اپنی ماں کے سامنے شرمندہ ہونا پڑے گا۔“ اس نے خود کو ملامت کرتے ہوئے اس کے بازو سے سر ٹکا لیا۔
”نہیں مجھے کوئی شرمندگی نہیں ہے، تم پریشان مت ہو۔“ جنید نے آہستگی سے سر سہلایا۔
چاروں نے ایک دوسرے کو دیکھا۔ دونوں کی اس قدر قربت انہیں کچھ کچھ معاملہ سمجھانے لگی تھی۔
”انکل کو ابھی بس وقتی غصہ ہے، جب یہ غصہ اترے گا اور وہ تمھیں غیر حاضر پائیں گے تو سب سے زیادہ پریشان وہ ہی ہوں گے۔“ جنید نے مثبت رخ دکھایا۔
”لیکن آپ کی امی میڈم سلمیٰ؟ ان کا غصہ تو وقتی نہیں ہے، وہ بھی اول روز سے مجھے نالائق ہی کہتی آئی ہیں اور اب تک میری اتنی غلطیوں کے باوجود صرف آپ کے اصرار پر مجھے موقعے دیے ہیں، اب تو ان کی بات بھی درست ہوجائے گی اور۔۔۔۔“ وہ کہتے ہوئے اچانک چپ کر گئی۔
”اور کیا؟“ زین کو مزید جاننے کا تجسس ہوا۔
”اور وہ ان کیلئے ان ہی کے جیسی ایک لائق اور قابل بیوی لائیں گی۔“ اس نے نظریں جھکا کر بات مکمل کی۔
”بیوی میری ہے تو مرضی بھی میری ہوگی، تم اس کی فکر مت کرو اور گھر چلو۔“ جنید کے پاس حل تیار تھا۔
”نہیں، میں گھر نہیں جاؤں گی۔“
”تم گھر نہیں جاؤ گی تو میں امی کو ہمارے رشتے کی بات کرنے کیا یہاں لاؤں گا؟“ جنید کا سوال ان چاروں کے شک پر تصدیق کی مہر لگا گیا۔ مطلب یہ صرف نفسیات کا نہیں، دل کا بھی معاملہ تھا۔
چاروں نے ایک دوسرے کو دیکھا لیکن اس وقت صورت حال ایسی تھی کہ نہ کچھ کہہ سکے اور نہ ایک دوسرے کی اندرونی کیفیت کا اندازہ لگا پائے۔
اسی پل ولید کا موبائل بجا تو سب کی توجہ اس کی جانب ہوگئی۔
”پھوپھو کی کال ہے۔“ ولید نے بتایا۔
”مت بتانا کہ میں یہاں ہوں۔“ سویرا نے تلخی سے منع کیا۔
”تم چپ رہو۔۔۔۔ولید آپ کال ریسیو کرکے آنٹی کو تسلی دے دیں کہ سویرا ٹھیک ہے اور آپ کے ساتھ گھر آرہی ہے۔“ جنید نے سورہ کے جذباتی پن کو لگام ڈالتے ہوئے ولید کو ہدایت دی۔ اس نے سر ہلا کر کال ریسیو کی۔
”السلام علیکم۔۔۔۔۔جی پھوپھو سویرا یہیں ہے۔۔۔۔۔۔جی وہ ٹھیک ہے آپ پریشان نہ ہوں۔۔۔۔۔۔۔جی میں اسے گھر لے کر آتا ہوں تھوڑی دیر تک۔۔۔۔۔جی۔۔۔۔۔اللہ حافظ۔۔۔۔“
اس نے مختصر بات کرکے لائن کاٹی۔
”مجھے گھر نہیں جانا۔“ وہ تھک کر صوفے پر بیٹھ گئی۔
”فرار حل نہیں ہے، مسائل کا سامنا کرنے سے ہی یہ حل ہوتے ہیں۔“ جنید بھی اس کے برابر میں بیٹھ گیا۔
”جنید کی بات درست ہے سویرا، تمھیں واپس جا کر تحمل سے بیٹھ کر بات چیت کرنی چاہئے، ایسے بات کیے بنا فرار ہونے سے معاملہ اور بگاڑ جائے گا۔“ احتشام نے تائید کی۔ جنید نے تشکر سے اسے دیکھا۔
”جنید کی بات کبھی غلط ہوتی بھی نہیں ہے۔“ سویرا کے انداز میں رشک اتر آیا۔ جو چند لمحوں کیلئے اپنا دکھ بھول گئی۔
”میں نے کہا تھا ناں کہ ماہر نفسیات بنتے نہیں ہیں، ہوتے ہیں، کیونکہ قدرت بطور خاص کچھ لوگوں کو یہ ہنر بخش کر بھیجتی ہے، جنید ان ہی خاص لوگوں میں سے ہیں۔“ سویرا نے فخر سے ان لوگوں کو بتایا۔
”پتا ہے احتشام آج تک میں نے تم سے جتنی بھی پازیٹیو باتیں کیں، جو بھی حل بتائے وہ سب مجھے جنید بتاتے تھے۔“ اس نے ایک اور انکشاف کیا۔
”پینل کے سامنے جو ہمارا پہلا سیشن ہوا تھا تب جنید بھی اس پینل کا حصہ تھے، اور وہ جان گئے تھے کہ تمہارے ساتھ میرا رویہ غلط ہے، انہوں نے ہی مجھے سمجھا کر تم سے سوری کہنے کا کہا تھا، اس کے بعد بھی تمہارے سارے ہیلنگ پراسیس کا کریڈٹ انہیں جاتا ہے، میں صرف ان کی باتوں پر عمل کر رہی تھی۔“ آج سویرا نے اس اصلی مسیحا کا تعارف کرایا جو اب تک پس پردہ تھا۔
”مجھے کوئی کریڈٹ نہیں جاتا، دراصل اپنی ہیلنگ ہر شخص کے اپنے ہاتھ میں ہوتی ہے، اور بلاشبہ احتشام نے خود کو بہت اچھے سے سنبھالا ہے۔“ جنید نے بھی رسان سے کہا۔
”میں خود کو سنبھال پایا کیونکہ میرے ارد گرد فیملی اور دوستوں کی صورت اتنے مخلص سہارے جو ہیں۔“ احتشام نے باری باری سب کو قدر کی نگاہ سے دیکھا۔
”کاش میرے پاس بھی ایسے سہارے ہوتے۔“ سویرا بے ساختہ حسرت سے کہہ گئی۔
”تمہارے پاس بھی یہ سہارے ہیں بس تم انہیں پہچان نہیں رہی ہو، اگر یہ لوگ نہ ہوتے تو کیا تم گھر سے نکلنے کا اتنا بڑا قدم اٹھاتی؟“ جنید نے نتیجے پر پہنچتے ہوئے سوال اٹھایا۔ اس نے نظریں جھکا کر نفی میں سر ہلا دیا۔
”آپ لوگوں کو پتا نہیں ہے لیکن سویرا آپ لوگوں کے بارے میں بہت باتیں کرتی ہے، کہ احتشام کی صورت اسے ایک اچھا دوست مل گیا ہے، ولید بھی کزن نہیں بھائی جیسا ہے، حسن اور زین بھی بہت عزت کرتے ہیں، تب ہی میں سمجھ گیا تھا کہ سویرا نے اگر اتنا بڑا قدم اٹھایا ہے تو اس سے زیادہ محفوظ جگہ اسے اور کوئی نہیں ملی ہوگی۔“ جنید نے مبہم مسکراہٹ کے ساتھ بتایا۔
ان چاروں نے بھی جواباً مسکراہٹ پیش کی لیکن معنی خیز نظروں سے ایک دوسرے کو دیکھنے لگے۔
”لیکن پھر بھی میں سویرا کی اس حرکت کی مذمت کروں گا کہ اسے گھر نہیں چھوڑنا چاہئے تھا، یہ بہت بڑا رسک تھا۔“ جنید نے آخر میں اپنی نااتفاقی کا اظہار کر دیا۔ وہ کچھ نہ بولی۔
”خیر۔۔۔۔ولید اب آپ سویرا کو گھر ڈراپ کر آئیں، آنٹی پریشان ہو رہی ہوں گی۔“ جنید واپس اصل موضوع پر آیا۔
٭٭٭٭٭٭٭٭٭٭٭٭٭٭٭٭٭٭٭
