احتشام کے رویے کی بظاہر تبدیلی سے سب خوش تھے کہ شکر وہ واپس زندگی کی طرف تو آیا۔ لیکن صرف ولید جانتا تھا کہ احتشام نے اب تک پرانی یادوں کو چھوڑا نہیں ہے، بلکہ ان کا نادیدہ بوجھ کسی لاش کی مانند اپنے کندھوں پر لیے سب کے ساتھ چلنے کی کوشش میں در حقیقت خود کو گھسیٹ رہا ہے۔ اور وہ اپنے دوست کو اس بوجھ سے آزاد دیکھنا چاہتا تھا۔ پر کیسے؟
”آج کھانا میں بنا لیتا ہوں ولی۔۔۔“ لاؤنج کے صوفے پر بیٹھے احتشام نے اسے کچن میں جاتا دیکھ کہا۔ احتشام کے ساتھ زین بھی بیٹھا تھا اور دونوں ایل ای ڈی پر کوئی شو دیکھ رہے تھے۔
”نہیں میں فری ہوں، بنا لوں گا، تو بس یہ بتا کیا کھائے گا؟ چکن کڑاہی یا چکن قورمہ؟“ اس نے فریزر کھول کر کچن سے ہی پوچھا۔
”چکن قورمہ بول دے یار، کڑاہی کھا کھا کر اوب گیا ہوں۔“ زین نے کان میں سرگوشی کی۔
”چکن کڑاہی بنا لے ولی۔۔۔“ احتشام نے اطمینان سے جان بوجھ کر یہ جواب دیا۔ اس حرکت پر زین اسے خونخوار نگاہوں سے گھور کر رہ گیا۔
”یار کوكنگ آئل کی تو پوری بوتل خالی پڑی ہے۔“ ولید نے کیبنٹ سے بوتل نکالتے ہوئے کہا۔
”ہاں میں بتانا بھول گیا تھا کہ تیل ختم ہوگیا ہے، اور ساتھ کچن کی کچھ مزید چیزیں بھی اینڈ ہو رہی ہیں، لانی ہیں۔“ زین نے جواب دیا۔
”تو کب لائے گا؟ اینڈ ہونے کے بعد؟“ ولید کچن سے نکل کر وہاں آیا۔
”اچھا تو مطلب یہ سب لانا میری ذمہ داری ہے؟ میں اکیلا سارا راشن کھاتا ہوں؟“ زین نے تیور چڑھائے۔
”چھوڑو یار، ایسا کرتے ہیں سب مارٹ چلتے ہیں، جو سامان ختم ہو رہا ہے وہ لے آتے ہیں اور آج کھانا باہر سے منگوا لیں گے۔“ احتشام نے مداخلت کرکے بیچ کی راہ نکالی۔
”ہاں یہ آئیڈیا اچھا ہے، میں ابھی حسن کو بتاتا ہوں۔“ زین بھرپور حمایت کرتے ہوئے اٹھا اور کمرے کی طرف چلا گیا۔
”باہر کے کھانے کیلئے اور باہر جانے کیلئے یہ ہمیشہ تیار رہتا ہے۔“ ولید بڑبڑایا۔
٭٭٭٭٭٭٭٭٭٭٭٭٭
