Mohabbat Fateh Tehri by Ayesha Asghar Episode 5

شمائلہ چچی کمرے میں داخل ہوئیں تو ابراہیم مصطفیٰ کو کرسی پر گم صم بیٹھے پایا۔ کتاب گود میں کھلی پڑی تھی، مگر ان کی نظریں نہ کتاب پر تھیں،نہ کسی اور شے پر۔ ان کے چہرے پر ایسی گہری سوچ کی پرچھائیں تھی جیسے وہ کسی پرانی،تلخ یاد میں الجھے ہوں۔باہر ہلکی بارش کی بوندیں کھڑکی سے ٹکرا رہی تھیں،اور کمرے میں مدھم سی اداسی پھیلی ہوئی تھی۔
”ابراہیم، میں دیکھ رہی ہوں، جب سے فاطمہ کا نکاح ہوا ہے، آپ کچھ پریشان رہنے لگے ہیں۔کیا بات ہے؟“.شمائلہ چچی نے نرم لہجے میں پوچھا،احسن کی پریشانی تو تھی ہی لیکن اس کے علاؤہ بھی وہ انھیں پریشان لگے۔ وہ ابراہیم مصطفیٰ کے قریب آئیں اور ان کے سامنے کھڑے ہو گئیں۔وہ چونک کر سیدھے ہو گئے،انہوں نے ایک لمحے کو چچی کی طرف دیکھا۔
 ”ہاں؟ کیا ہوا؟“۔ان کی آواز بوجھل اور کسی حد تک کھوئی ہوئی تھی۔
”آپ کچھ پریشان لگ رہے ہیں۔سب ٹھیک ہے نا؟“۔شمائلہ چچی نے ان کے قریب بیٹھتے ہوئے بات دہرائی۔انھوں نے گہری سانس بھری اور کرسی کی پشت سے ٹیک لگا لی۔باہر بارش کی ہلکی پھوار اور ہوا کے شور نے ماحول کو اور گمبھیر بنا دیا۔
 ”میں سوچ رہا تھا،انسان غلطیاں کرکے دل پر سخت خول چڑھا لیتا ہے۔ایسا سخت خول کہ نہ کوئی بات اندر جاتی ہے نہ باہر آتی ہے۔اور جب کبھی ضمیر جاگنے کی کوشش کرے،تو خود کو صحیح جان کے،اسے بھی دبا دیتے ہیں لیکن…“انہوں نے ٹھہر کر شمائلہ چچی کی طرف دیکھا۔ ”لیکن جب وہ غلطی سامنے آ جائے،آنکھوں کے سامنے کھڑی ہو جائے، تب کیا کیا جائے؟“۔شمائلہ بیگم کے ماتھے پر فکر کی لکیریں گہری ہو گئیں۔
”کون سی غلطی،ابراہیم؟آپ یہ کیسی باتیں کر رہے ہیں؟“۔ ان کی آواز لرزی اور آنکھوں میں خوف سما گیا۔یوں لگتا تھا وہ کہیں نہ کہیں اس بات کے پس منظر سے واقف تھیں۔ابراہیم نے ایک لمحے کو خاموشی اختیار کی، جیسے الفاظ چن رہے ہوں۔
 ”کسی کو آنا تھا، شمائلہ، اور مجھے لگتا ہے وہ آ گیا ہے“۔ان کے لہجے میں ایک عجیب سی بے بسی تھی۔شمائلہ چچی گھبرا گئیں۔جلدی سے اٹھیں اور پانی کا گلاس بھر کر ان کے قریب آئیں۔ 
”کون آ گیا ہے؟آپ کھل کر بات کریں۔آپ کی باتیں مجھے پریشان کر رہی ہیں،ابراہیم“۔ان کی آواز اب واضح طور پر بے چینی سے بھری ہوئی تھی۔
 ”کچھ نہیں، شمائلہ۔ صرف احسن کی وجہ سے فکر مند ہوں۔ شاید زیادہ سوچ رہا ہوں، بس“۔ابراہیم نے ایک لمبی سانس لی اور زبردستی ہلکی سی مسکراہٹ لاتے ہوئے کہا۔شمائلہ چچی نے انہیں غور سے دیکھا۔ ان کی آنکھیں شک اور فکر سے لبریز تھیں،لیکن وہ خاموش ہو گئیں۔
 ”بس یہی بات ہے؟“۔ان کے لہجے میں ابھی بھی ایک دبی ہوئی امید چھپی ہوئی تھی۔ابراہیم صاحب نے اثبات میں سر ہلا دیا،مگر ان کی نظریں اور لہجہ ان کے دل کی کہانی سنانے سے قاصر تھے۔
یہ سوات کی سرسبز وادیوں کے بیچ ایک شاندار گھر تھا، جہاں کی فضا خوشبو اور سکون سے بھری ہوئی تھی۔گھر کے ایک کمرے میں اگر جھانکا جائے تو کھڑکی کے پاس ایک نفیس سی عورت کھڑی نظر آتی تھی۔ان کی گہری آنکھوں میں ایک کہانی چھپی تھی،اور چہرے پر ماضی کے غموں کی ہلکی پرچھائیاں تھیں۔وہ عورت،شازمہ شاہ،جن کا حسن ایک زمانے میں لوگوں کے دلوں کی دھڑکن بن جاتا تھا،آج بھی اپنے دلکش وجود سے وقت کو تھم جانے پر مجبور کر سکتی تھیں۔مگر ان کے چہرے پر ایک خاموشی کی چادر تنی ہوئی تھی،جو ان کے ماضی کے دکھوں کی گواہی دیتی تھی۔
یہ فجر کے بعد کا لمحہ تھا،ان کا مخصوص وقت،جب وہ خاموشی کی گہرائیوں میں ڈوب کر اپنے ماضی کی گلیوں میں کھو جاتی تھیں۔کھڑکی کے باہر وادی کی ہوا نرم دھاگوں کی طرح ان کے بالوں کو چھو رہی تھی، لیکن ان کی سوچ کہیں اور تھی۔ وہ لمحے یاد آ رہے تھے، جب ایک شخص نے پہلی بار ان سے محبت کا اعتراف کیا تھا۔
”میں نے جب پہلی بار سوات کی گلیوں میں تمہیں دیکھا تھا، وہیں اپنا دل کھو دیا تھا“۔
یہ شادی کی رات کا منظر تھا۔کمرے میں ہلکی روشنی مدھم سی روشنی کر رہی تھی، اور شازمہ شاہ کا چہرہ دلہن کی سرخی لیے ہوا کسی خواب کی مانند لگ رہا تھا۔ان کے سامنے وہ شخص بیٹھا تھا،جس نے ان کی زندگی کے خواب بُننے شروع کیے تھے۔
”دل کو چھوڑ کر کراچی واپس جا نہیں سکتا تھا۔تمہارے بغیر جانا ممکن ہی نہیں تھا۔اس لیے میں نے فیصلہ کر لیا تھا کہ شازمہ شاہ کو ہمیشہ کے لیے اپنا بناؤں گا۔”
یہ کہہ کر اس نے شازمہ کے نرم و نازک ہاتھوں کو تھاما،اور ان کی آنکھوں میں جھانک کر اپنی محبت کا یقین دلایا۔
”اور دیکھیں میں اپنے دل کو اپنے ساتھ کراچی لے آیا“۔شازمہ شاہ کے ہونٹوں پر ایک ہلکی مسکان نمودار ہوئی۔
”آپ کو معلوم ہے،مجھے سوات سے عشق ہے۔اس کی وادیاں، اس کی ہوائیں،سب کچھ میرا اپنا ہے۔میں نے کبھی سوچا بھی نہیں تھا کہ میں سوات کو چھوڑ کر کہیں اور جاؤں گی“۔۔شازمہ کی آواز میں ایک عجیب سا درد تھا، لیکن ان کے لہجے میں ایک ایسی نرمی بھی تھی، جو محبت کے رنگ میں ڈھل چکی تھی۔
”اب کراچی سے عشق کرنا سیکھ لو، شازمہ“۔
یہ کہہ کر اس نے شرارت سے انہیں دیکھا۔ان کی مسکان نے کمرے کی روشنی کو مزید مدھم کر دیا۔
باہر اماں کی آواز سن کر شازمہ چونک گئیں،اور لمحے بھر میں وہ حال کی دنیا میں واپس آ گئیں۔مگر وہ پل ان کے دل میں نقش ہو چکا تھا۔کھڑکی کے باہر وادی کی ہوائیں اب بھی چل رہی تھیں۔کچھ محبتیں،بھلائے نہیں بھولتیں۔