ــــــــــــــــــــــــــــــــــــــــــــــــــــــــــ
”کیسی ہیں آپ؟“۔وہ پارک کے پرسکون ماحول میں اس کے ساتھ ہمقدم ہوا تو وہ چونک گئی۔ شام کی مدھم روشنیوں میں براؤن شرٹ اور بلیک جینز پہنے، وہ بےحد وجیہہ لگ رہا تھا۔ماریہ چونک کر اسے دیکھنے لگی،وہ اس کے اچانک موجودگی کو سمجھنے کی کوشش کر رہی تھی۔م
”میں ٹھیک ہوں، آپ سنائیں؟“۔اس نے شیفون کے مسٹرد رنگ کے دوپٹے کے کنارے کو انگلیوں میں لپیٹتے ہوئے جواب دیا۔نظریں چند لمحے کے لیے ارمان پر پڑیں اور پھر فوراً جھک گئیں۔
”فیلنگ گڈ ناؤ“۔ارمان نے جیبوں میں ہاتھ ڈالے،ہلکی سی مسکراہٹ کے ساتھ کہا۔”کیا کر رہی ہیں آج کل؟“۔
”یاد کرنے کے علاوہ میرے پاس کوئی کام نہیں بچا“۔اس کی آواز میں اداسی اتر آئی۔ماریہ نے ماحول پر نظر دوڑائی۔پارک میں بچے قہقہے لگاتے دوڑ رہے تھے، جھولوں کی دھیمی چرچراہٹ فضا میں گونج رہی تھی۔
”تو آپ کی یادوں میں کون شامل ہے؟“۔اس کے لہجے میں ہلکی سی دلچسپی تھی۔ایک لمحے کے لیے جھکا اور قریب آتی ہوئی بال اٹھا کر بچوں کی طرف اچھال دی۔
”احسن اور فاطمہ کے علاوہ کون ہو سکتا ہے؟“۔اس کے لہجے میں اداسی کی جھلک نمایاں تھی۔”فاطمہ کی طرف سے پھر بھی تسلی ہے، لیکن احسن…“۔ اس کی آواز بھرا گئی، اور پلکوں پر نمی لرزنے لگی۔
”سب ٹھیک ہو جائے گا۔ فکر مت کریں“۔اس نے تسلی دی اور پھر آئسکریم شاپ کی طرف بڑھ گیا۔چند لمحوں بعد وہ آئسکریم کے دو کپ لیے لوٹا۔ ایک کپ ماریہ کی طرف بڑھایا۔
”پولیس سے بات نہیں کی آپ لوگوں نے؟“چند قدم چل کر،
دونوں بینچ پر بیٹھ گئے۔ ارمان نے آئسکریم کا پہلا چمچ لیتے ہوئے پوچھا۔
”کوشش کی تھی۔ ایک ہفتے تک سب نے بہت دوڑ دھوپ کی۔ لیکن پھر جیسے سب تھک گئے۔بڑے تایا تو باہر ہیں،چھوٹے تایا اور عابد اپنے کاموں میں مصروف ہو گئے،اور بابا پولیس کے چکر کاٹتے رہتے ہیں،مگر وہاں سے بھی بس دلاسے ملتے ہیں“۔ماریہ نے چمچ آئسکریم میں ڈبویا پھر آہستگی سے منہ تک لے گئ۔
”ڈونٹ وری۔ان شاء اللہ، سب بہتر ہوگا۔احسن مل جائے گا“۔اس کی آواز تسلی تھی جو ماریہ کو پل بھر کے لیے سکون دے گئی۔اس نے ہلکی سی مسکراہٹ کے ساتھ سر ہلایا۔
”آپ کو اپنی یادوں میں ایک اور شخص کا اضافہ کر لینا چاہیے“۔کچھ لمحوں بعد اس کی مسکراتی ہوئی آواز سنائی دی۔ماریہ نے حیرت سے اسے دیکھا۔
”کیا مطلب؟ کس کا؟“۔اس کی آواز میں الجھن تھی، اور آنکھوں میں سوال۔
”میرا مطلب ہے کہ کبھی کبھی زندگی میں ایسے لوگ آتے ہیں جنہیں یاد کر کے دل خوش ہو جاتا ہے۔آپ کو بھی کسی ایسے شخص کو یاد کرنا چاہیے جو آپ کی دنیا کو تھوڑا بہتر بنا دے“۔ارمان نے دھیرے سے مسکراتے ہوئے بات سنبھالی.ماریہ نے نظریں جھکائیں،جیسے وہ اس کے الفاظ کا مطلب سمجھنے کی کوشش کر رہی ہو۔آئسکریم کا خالی کپ ارمان نے اچھالا تھا جو کچھ فاصلے پہ موجود ڈسٹ بن میں جاگرا۔
”ایسا کوئی نہیں ہے“۔اس نے مختصر سا جواب دیا اور آئسکریم کے آخری چمچ پر توجہ مرکوز کر لی۔لیکن دل میں ایک ہلچل سی مچ گئی تھی۔کیا اس کی آنکھیں راز عیاں کررہی تھیں؟۔
”مجھے اب چلنا چاہیے“۔ماریہ نے پرس کندھے پر ڈالتے ہوئے کہا اور کھڑی ہو گئی۔ارمان بھی فوراً اٹھ کھڑا ہوا۔وہ چند قدم آگے بڑھی اور ڈسٹ بن میں آئسکریم کا خالی کپ پھینکی۔
”کل لنچ پر چلیں گی؟“۔ارمان نے نرمی سے پوچھا۔اس پیشکش پر وہ جی بھر کر حیران ہوئی۔
”نہیں، میں نہیں جا سکتی“۔ماریہ پل بھر کو رکی، اور پھر اعتماد سے بولی۔
”کیوں؟“۔ارمان نے پوچھا لیکن اس کے چہرے پر حیرانی بالکل نہیں تھی۔جیسے وہ یہ جواب پہلے ہی جانتا ہو۔
”ہسپتال میں ملنا اتفاق تھا۔پارک میں ملاقات، یہ بھی محض ایک اتفاق ہے یا پھر آپ بہتر جانتے ہونگے۔لیکن لنچ پر جانا مطلب ایک خاص ملاقات،جو میرے اصولوں کے خلاف ہے۔فاطمہ کمال کہتی ہیں کہ اگر کہیں اکیلے جانا ہو، تو گھر والوں کی اجازت ضروری ہوتی ہے تاکہ وہ تحفظ فراہم کر سکیں۔اور میرے گھر والے اس کی اجازت نہیں دیں گے، اس لیے انکار کیا“۔ارمان نے سر ہلایا۔
”فاطمہ کمال واقعی خاص ہیں“۔اس کے لہجے میں مخلصانہ تعریف تھی۔
”امید ہے،آپ برا نہیں منائے ہونگے گے“۔ماریہ نے ہلکی سی مسکراہٹ کے ساتھ کہا
”بالکل بھی نہیں“۔اس نے فوراً کہا۔
ـــــــــــــــــــــــــــــــــــــــــــــــــــ
