ڈیڑھ بجے کا وقت تھا۔رات کے سناٹے نے جیسے پورے ماحول کو منجمد کر رکھا تھا۔وہ بہت آہستگی اور چپکے سے اندر داخل ہوا۔قدم ایسے ہلکے تھے کہ ان کی آواز بھی خود کو سننے سے قاصر تھی۔اس کا رخ سیدھا اپنے کمرے کی طرف تھا۔نظریں مسلسل چاروں طرف گھوم رہی تھیں،ہر حرکت کا بغور جائزہ لے رہی تھیں۔وہ ہر قدم نہایت محتاط انداز میں بڑھا رہا تھا۔لیکن قسمت آج اس کے ساتھ نہیں تھی۔وہ جس سے بچنا چاہ رہا تھا،وہی سامنے کھڑی تھی۔
”تت… تم… تمہاری شرٹ… دور رہنا مجھ سے… قریب مت آنا… تم قاتل ہو… تم برے ہو“۔الفاظ بمشکل اس کے لبوں سے نکل رہے تھے۔اس کی حالت غیر ہونے لگی۔ وہ رو رہی تھی، چیخ رہی تھی، اور اس کا پورا وجود ڈر سے کانپ رہا تھا۔
”فاطمہ!میری بات سنیں،پلیز“۔وہ اس کی طرف ہاتھ بڑھاتے ہوئے التجا کر رہا تھا۔اس کے لہجے میں دھیما پن اور تسلی کا عنصر واضح تھا۔
”نن… نہیں… قریب مت آنا… اللّٰہ مجھے بچائیں… مجھے چھوڑ دو… پلیز چھوڑ دو“۔وہ چیختی ہوئی نیچے بیٹھ گئی۔ دونوں ہاتھوں سے چہرہ چھپا گئی۔ فاز عالم کی آنکھوں میں درد اتر آیا۔وہ اسے بےبسی سے دیکھ رہا تھا۔
”پرسکون ہو جائیں،میں کچھ نہیں کر رہا،یقین کریں۔آپ محفوظ ہیں،فاطمہ۔خود کو اذیت دینا بند کریں“۔اس کی آواز میں ایک غیر معمولی ٹھہراؤ تھا۔وہ اسے پرسکون کرنا چاہتا تھا۔اس کے قریب جاکر تسلی دینا چاہتا تھا۔لیکن وہ اس کے قریب نہیں جاسکتا تھا۔
”تم… تم ظالم ہو“۔ اس کی آواز آہستہ آہستہ مدھم ہوتی جا رہی تھی۔
”کمرے میں جائیں، فاطمہ“۔فاز نے بڑی مشکل سے اپنی نظریں ہٹائیں۔اس کا دل ایک عجیب کیفیت میں ڈوبا جا رہا تھا۔فاطمہ اس کی وجہ سے تکلیف میں تھی۔اسے لگتا تھا تھا اسے کسی بات سے فرق نہیں پڑسکتا۔لیکن یہ بات آج غلط ثابت ہوئی۔فرق پڑرہا تھا اور بہت زیادہ پڑ رہا تھا۔
”کمرہ؟“یہ لفظ جیسے اس کے لیے نجات دہندہ تھا۔وہ فوراً تیزی سے اوپر کی طرف بھاگی۔فاز عالم نے زخمی نگاہوں سے اسے جاتے ہوئے دیکھا۔ پھر اپنے خون آلود شرٹ کی طرف نظریں ڈالیں۔ ایک گہری سانس بھر کر کمرے کی طرف بڑھ گیا۔
ــــــــــــــــــــــــــــــــــــــــــــــــــــــــــــ
”مراد! میں نے تم سے کیا پوچھا تھا؟“۔وہ بمشکل اپنی شرٹ تبدیل کر رہا تھا۔چہرے پر تکلیف کے آثار نمایاں تھے۔موبائل اسپیکر پر تھا،اور اس کی آواز غصے سے بھری ہوئی تھی۔
”کیا پوچھا تھا، سر؟“۔ دوسری طرف مراد کی آواز قدرے ہچکچاتی ہوئی تھی۔
”میں پوچھا تھا نہ،فاطمہ اپنے کمرے میں ہیں یا نہیں؟“۔وہ شرٹ کے بٹن بند کرتے ہوئے غصے سے تن گیا۔
”جی، سر۔میں نے معلوم کروایا تھا۔وہ اپنے کمرے میں ہی تھیں“۔مراد نے تیزی سے جواب دیتے دیتے رکا۔”کیا وہ اپنے کمرے میں نہیں تھیں؟“۔حلق سے پھنسی پھنسی آواز نکلی۔
”نہیں۔اور تم لوگوں سے تو بعد میں نمٹوں گا۔تیار رہنا“۔فاز نے بالوں میں ہاتھ پھیرا، پھر کال کاٹ دی۔غصے کے تاثرات کو ڈھیلا چھوڑتے ہوئے اس نے خود کو پرسکون کیا اور فاطمہ کے کمرے کی طرف بڑھا۔ کمرہ لاک تھا۔ اس نے نفی میں سر ہلایا، جیب سے ڈوپلیکٹ چابی نکالی،جو وہ ساتھ لیتے ہوئے آیا تھا اور دروازہ کھول دیا۔
بیڈ پر وہ بیٹھی ہوئی تھی۔ دونوں پاؤں سینے سے لگائے، ہاتھ باندھ کر ان پر سر رکھے ہوئے۔وہ لرز رہی تھی۔اس کے ڈرے ہوئے چہرے پر آنسوؤں کی دھاریں صاف دکھائی دے رہی تھیں۔ دروازہ کھلنے کی آواز پر اس نے خوفزدہ ہو کر سر اٹھایا۔ فاز عالم دروازے پر کھڑا تھا۔اس کی شرٹ کی آستینیں کہنیوں تک موڑی ہوئی تھیں۔وہ اس سے ڈر رہی تھی اور یہ بات اسے تکلیف دے رہی تھی۔۔وہ سمجھ سکتا تھا کہ اس کے ساتھ ان دنوں کیا کچھ بیتا تھا۔وہ ذہنی طور پر ڈسٹرب تھی۔احسن کا اغوا ہونا،عابد کا جیل جانا،شادی کا ٹوٹ جانا،رشتوں کی حقیقت،اور اس شخص کے ساتھ نکاح جسے وہ ان ساری چیزوں کا زمہ دار سمجھتی تھی۔سنبھلنے میں تھوڑا وقت تو لگنا تھا۔
”تم یہاں کیوں آئے ہو؟پلیز چلے جاؤ“۔وہ بےبسی سے اسے قریب آتا دیکھ کر بولی۔
”نہیں چھوڑ سکتا آپ کو یوں“۔آنکھیں بند کرکے کھولتا خود کو پرسکون کیا۔”ایک بار میری بات سن لیں“۔اس سے کچھ فاصلے پہ بیڈ پر بیٹھتے ہوئے نرمی سے گویا ہوا۔
”میں کچھ نہیں سننا چاہتی“۔اس نے چہرہ دوسری طرف موڑ لیا۔اس کی آواز زکام زدہ اور کانپتی ہوئی تھی۔
”میں جانتا ہوں،میرے یہاں بیٹھنے سے آپ کمفرٹیبل نہیں ہیں۔جتنی جلدی میری بات سنیں گی، یں اتنی جلدی یہاں سے چلا جاؤں گا“۔وہ بےحد نرمی سے بولا۔کمرے میں زیرو پاور بلب روشن تھا۔گیلی خم دار پلکیں نیلی آنکھوں کو مزید خوبصورت بنا رہی تھیں۔
”تم سمجھتے کیوں نہیں؟قاتل ہو تم۔کیوں مارا تم نے؟“۔اس کی طرف دیکھتی وہ بلند آواز میں چیخی۔
”بس کریں،فاطمہ! مت دیں خود کو اتنی تکلیف“.اس نے دونوں بازوؤں سے پکڑ کر اسے جھٹکا دیا۔اس کی بلند آواز نے اسے پل بھر کے لیے ساکت کر دیا۔پلک جھپکائے بغیر اسے دیکھنے لگی۔
”وہ خون کسی اور کا نہیں،میرا اپنا تھا۔گولی میں نے کسی کو نہیں ماری،گولی مجھے لگی تھی“۔وہ اسے اپنا زخمی بازو دکھا رہا تھا۔بنا زخم کی پرواہ کیے۔جھٹکا لگنے کی وجہ سے اسے تکلیف ہوئی تھی۔فاطمہ خالی نگاہوں سے اسے دیکھ رہی تھی۔ اس کے اندر ایک عجیب سناٹا چھا گیا تھا۔
”خود کو نکالیں اس فیز سے۔جتنا برا آپ کے ساتھ ہونا تھا، ہوچکا۔خوف ختم کریں اپنا۔آپ کہتی ہیں،میں برا ہوں، تو ہاں،میں برا ہوں۔لیکن فاطمہ اتنا تو یقین رکھیں مجھ پہ،میں آپ کو کبھی نقصان نہیں پہنچا سکتا۔آپ محفوظ ہیں یہاں“۔وہ کھڑکی کے قریب گیا،چند لمحوں کے لیے رکا، پھر دھیمی آواز میں بولا۔”مت دیا کریں خود کو تکلیف“۔
اور یہ کہہ کر وہ چلا گیا۔ کمرہ اس کی غیر موجودگی میں مزید سناٹے میں ڈوب گیا۔فاطمہ یک ٹک بیٹھی تھی۔اس کی نظروں کے سامنے اس کے چہرے کے تکلیف دہ تاثرات ابھرنے لگے۔جب وہ اپنا زخمی بازو دکھا رہا تھا۔وہ بےچین ہو گئی۔
اس کا دل بوجھل سا ہو گیا تھا۔
پورے ایک روز بعد فاطمہ کمال اپنے کمرے سے باہر نکلی تھی۔بند کمرے کی تنہائی نے اسے خود سے لڑنے کا موقع دیا تھا، اور وہ کسی حد تک اپنے جذبات کو سنبھالنے میں کامیاب ہو چکی تھی۔دن کی روشنی ڈھل رہی تھی،اور لاؤنج کی بڑی کھڑکی سے آتی سورج کی آخری کرنیں ماحول کو ایک سنہری روشنی میں نہلا رہی تھیں۔ ۔
لاؤنج میں قدم رکھتے ہی ایک ملازمہ،جو بلیک یونیفارم میں ملبوس تھی، فوراً اس کے قریب آئی۔
”میم،آپ کو کوئی کام ہے؟“۔اس نے مہذب اور پروفیشنل انداز میں دریافت کیا۔
”مجھے تمہارے سر سے ملنا ہے۔ کہاں ہے وہ؟“۔فاطمہ نے اس پر ایک نظر ڈالی اور سنجیدگی سے کہا۔
”سر ابھی ایک اہم کام میں مصروف ہیں،اور اس کمرے میں جانے کی اجازت کسی کو نہیں ہے“۔پروفیشنل انداز میں اس نے جواب دیا۔
”جاکر بتاؤ کہ میں ابھی بات کرنا چاہتی ہوں“۔یہ کہتے ہی وہ صوفے پر جا بیٹھی۔ملازمہ اسے عجیب انداز میں دیکھی، کندھے اچکائے اور فوراً فاز عالم کو پیغام دینے چلی گئی۔
اگلے لمحے فاز عالم،جو ہمیشہ کی طرح پروقار اور پُرسکون دکھائی دے رہا تھا،اس کے سامنے تھا۔وہ زرد رنگ کا،چھوٹےچھوٹے پھولوں کی پرنٹ والا لان کا لباس پہنے ہوئے تھی، اور اس کے بالوں کی پونی ٹیل اسے مزید جاذبِ نظر بنا رہی تھی۔فاز عالم کے قدموں کی آواز کے ساتھ ہی فاطمہ نے نظریں اٹھائیں۔آج وہ پورے ایک روز بعد اس کے سامنے تھی۔وہ بھی اتنا مصروف تھا کہ اس سے مل نہیں سکا۔
