صبح کے دس بجے کا وقت تھا۔کراچی کے ایک عام محلے کی گلیاں زندگی سے بھرپور نظر آ رہی تھیں۔سورج کی نرم کرنیں کینوس کی مانند عمارتوں پر پھیل رہی تھیں،جبکہ ہوا میں ہلکی سی نمی کا احساس تھا۔گلیوں میں سبزی فروشوں کی آوازیں گونج رہی تھیں،جو تازہ سبزیوں کی منادی کر رہے تھے۔
اے آئی اور وائے ڈی اپنے مخصوص کیبن میں بیٹھے تھے،جو محلے کی ایک پرانی عمارت کی دوسری منزل پر واقع تھا۔کیبن کی کھڑکی سے باہر کا منظر صاف دکھائی دے رہا تھا۔بچوں کے کھیلنے کی آوازیں اور پرندوں کی چہچہاہٹ ماحول کو مزید خوشگوار بنا رہی تھیں۔
”احسن تمہارے پاس ہے؟“۔اے آئی نے اپنی کرسی پر تھوڑا آگے جھکتے ہوئے پوچھا،اس کی آواز میں تجسس نمایاں تھا۔
”میرے پاس ہی ہے“۔فاز نے سر کو دھیرے سے جنبش دی،اس کی نظریں میز پر رکھی چائے کی پیالی پر مرکوز تھیں،جس سے ہلکی بھاپ اٹھ رہی تھی۔
”لیکن کیوں؟تمہیں کیا ضرورت پڑی اسے اغواء کرنے کی؟“۔ اے آئی کی آنکھوں میں حیرانی تھی۔
”مجھے کیا ضرورت ہے کسی کو اغواء کرنے کی۔وہ کسی اور وجہ سے میرے پاس ہے“۔فاز نے کوفت سے جواب دیا۔آس پاس نظریں گھماتے،چائے کا گھونٹ بھرا۔
”لیکن وہ تو اغواء ہوا تھا“۔اے آئی ناسمجھی سے اسے دیکھ رہا تھا،اس کے ذہن میں سوالات کا طوفان برپا تھا۔
”وہ اغواء ہوا تھا،لیکن اسے میں نے نہیں،کسی اور نے کیا تھا۔میں بس اسے وہاں سے نکالا ہوں“۔اس نے گہری سانس بھرتے کرسی کی پشت سے ٹیک لگا گیا۔
”تو تم نے مجھے اس بارے میں کیوں نہیں بتایا؟“۔اب اے آئی کے لہجے میں خفگی تھی۔
”جب مجھے اس کے اغواء ہونے کی اطلاع ملی تو مراد اور حارث سے کہہ کر میں نے اسے وہاں سے بازیاب کروا لیا تھا۔ تمہیں بتانا ضروری نہیں لگا،لیکن وہ الگ بات ہے کہ تم پہلے ہی کھوج میں لگے تھے“۔فاز کے چہرے پر تبسم پھیلا،اس میں ہلکی سی شرارت جھلک رہی تھی۔اے آئی اس تبسم کے پیچھے کا مفہوم سمجھ کر خفت سے بالوں پر ہاتھ پھیرتا ہنس دیا۔
”تم مجھ سے ڈائریکٹ سوال کر لیتے؟مراد کو میرے پیچھے کیوں لگایا؟“۔۔اسے کل ہی معلوم ہوا تھا مراد اس کی ہر خبر رکھ رہا ہے۔اور وہ آج فاز کے سامنے حاضر تھا۔
”مجھے سیدھے کام پسند نہیں“۔فاز بے نیازی سے کندھے اچکا گیا۔
“اب سیدھے کام کرنے کی عادت ڈال لو،ورنہ کچھ وقت بعد گنجے ہو جاؤ گے“۔اے آئی شرارت سے اسے دیکھتا ہنسا،اس کا اشارہ فاطمہ کی طرف تھا۔
”ان کے سامنے سیدھا سادہ بندہ ہی ہوں“۔تصور میں فاطمہ کا چہرہ لاتے ہوئے فاز مسکرا دیا۔
ـــــــــــــــــــــــــــــــــــــــــــــــــــــــ
شاہد عباسی نے آنکھیں بند کیں تو ماضی ایک بھیانک خواب کی طرح حقیقت بن کر آنکھوں کے سامنے آ گیا۔
اندھیرا کمرا…
بارش کی مدھم آواز…
اور ایک بندوق…
جو کسی کی سانسوں کا حساب کرنے کو تیار تھی۔
تقریباً اٹھائیس سالہ مرد کی گرفت پسٹل پر مضبوط ہو گئی۔اس کے سامنے تقریباً ہم عمر ایک شخص،پسینے میں بھیگا،آنکھوں میں التجا لیے اور بدن میں کپکپاہٹ۔
”جو میرا راز جان لیتا ہے،اسے زندہ رہنے کا حق نہیں“۔آواز میں ایسی برفانی سفاکی تھی کہ کمرے کی دیواریں بھی لرز گئیں۔دنیا کی نظر میں وہ ایک بزنس مین ہونے کے ساتھ ساتھ سوشل ورکر بھی تھے۔لیکن ایک دنیا اور بھی تھی۔سیاہ دنیا۔جہاں سیاہ کھیل کھیلے جاتے تھے۔سامنے کھڑا شخص خوفزدہ نظروں سے اسے دیکھ رہا تھا۔
”تم مجھے مار نہیں سکتے“۔آخری امید سے لبریز ایک کمزور سی سرگوشی،لیکن جواب میں صرف بےرحم مسکراہٹ ملی۔
”واقعی؟کون بچانے آئے گا تمہیں؟یہاں ہمارے علاوہ کوئی اور بھی ہے کیا؟“۔اس نے چہرہ قریب کیا،آنکھوں میں وحشت کی چمک تھی۔
”میں کسی کو کچھ نہیں بتاؤں گا“۔۔
”جب موت قریب دکھے، تو سب یہی کہتے ہیں“۔چہرے پر سفاکی ابھری،بندوق کی نالی اس کی گردن پر جمائی اور دبے دبے لہجے میں گویا ہوا۔
”میری دنیا کے اصول ہیں،جو راز جان جائے اسے اگلی سانس کی مہلت مت دو۔تمہارا تجسس تمہیں یہاں لے آیا اور اب یہی تجسس تمہیں قبر تک چھوڑ آئے گا“۔
سامنے کھڑے شخص کی آنکھوں میں خوف مزید گہرا ہوا،سانسیں بےترتیب ہوئیں،اور پھر آخری کوشش میں وہ بمشکل سرگوشی کر پایا۔کمرے میں موجود شیشے کی کھڑکی کے پار دو چھوٹی آنکھوں نے یہ منظر ذہن میں محفوظ کیا تھا۔
”تم پچھتاؤ گے“۔لیکن اس کے چہرے پر کوئی تاثر نہیں آیا۔
”میں کبھی نہیں پچھتاتا“۔ کہنے کے ساتھ ہی انگلی نے ٹریگر دبا دیا
‘ٹھاہ’۔
گولی گردن کے اندر پیوست ہوئی،گرم خون کے چھینٹے زمین پر بکھر گئے،اور وہ شخص ایک لرزتے جھٹکے کے ساتھ نیچے گر گیا۔آنکھوں میں حیرت،بدن سے زندگی کا آخری قطرہ بھی نکلتا محسوس ہوا۔
ــــــــــــــــــــــــــــــــــــــــــــــــ
”افتخار!“۔شاہد عباسی ہڑبڑا کر اٹھ بیٹھے۔سانسیں بےترتیب، ماتھے پر پسینے کے قطرے،اور دل کی دھڑکن جیسے پسلیوں کو چیرنے کے در پر تھی۔آنکھیں کھولیں تو اسٹڈی کا منظر واضح ہوا،وہ ابھی بھی اپنی جگہ موجود تھے،لیکن ان کا وجود جیسے ماضی کے بوجھ تلے دب چکا تھا۔ہاتھ چہرے پر پھیرا، گہری سانس لی،مگر اندر بسنے والا طوفان کم نہیں ہوا۔ کچھ چیزیں آپ کا پیچھا کبھی نہیں چھوڑتیں۔وہ قبر تک آپ کے ساتھ جاتی ہیں۔
وہ گزرے وقت کی خاک سمجھ کر آگے بڑھتے رہے،مگر وہ راکھ آج بھی انگارے بن کر سینے میں دہک رہی تھی۔شاہد عباسی نے کرسی کی پشت سے سر ٹکایا۔کمرے کی روشنی مدھم تھی،مگر ان کے اندر کا اندھیرا کہیں زیادہ گہرا تھا۔ وقت گزر چکا تھا،لوگ بدل چکے تھے،مگر وہ چیخ،وہ بےجان آنکھیں،وہ خون کی بوندیں۔۔سب وہیں کے وہیں منجمد تھیں۔ماضی کے کچھ لمحے ایسے ہوتے ہیں جو وقت کے ساتھ مدھم نہیں ہوتے،بلکہ اور گہرے ہوتے جاتے ہیں، جیسے کندہ کیے گئے الفاظ جو پتھر پر ثبت رہیں۔
کچھ چیزیں قبر تک ساتھ جاتی ہیں…اور گناہ قبر کے بعد بھی پیچھا نہیں چھوڑتے۔ہر گناہ کا حساب دینا ہوتا ہے۔اِس جہاں میں اگر بچ بھی جائے،تو اُس جہاں میں بچنا ناممکن۔ ہے۔
