علینہ زاہد اپنے کمرے میں نرم و ملائم تکیے سے ٹیک لگائے نیم دراز تھی۔روشنی مدھم تھی،اور کمرے میں ہلکی سی خوشبو پھیلی ہوئی تھی۔اس کے چہرے پر ایک مدھم مسکراہٹ تھی،مگر آنکھوں میں وہ چمک نہیں تھی جو کسی کے دل کی سچائی میں گم ہونے سے آتی ہے۔وڈیو کال جاری تھی،سامنے وہ تھا،جو دل کی گہرائیوں سے اس کے الفاظ پر یقین رکھتا تھا۔
”ایک ماہ ہوگیا ہے، ہم ملے نہیں“۔اس کی آواز میں ہلکی سی کسک تھی۔
”تو؟ملنے سے کیا فرق پڑتا ہے؟بات تو ہو رہی ہے ناں“۔علینہ نے لاپرواہی سے زلفیں انگلیوں میں لپیٹیں۔
”اب کی بار پاکستان آؤں گا تو ڈیڈی سے شادی کی بات کروں گا۔پھر تمہیں اپنے ساتھ لے کر ہی لندن آؤں گا، ہمیشہ کے لیے“۔اس کی آواز میں ایک سنجیدہ عزم تھا۔
”اتنی بھی کیا جلدی ہے؟“۔علینہ نے ہلکی سی ہنسی دبائی۔اس کے لہجے میں ایک انجانی بےفکری تھی۔
”چھ ماہ گزر چکے ہیں۔میں چاہتا ہوں کہ اب ہم اپنے رشتے کو کوئی نام دے دیں۔اگر تم چاہو تو ابھی صرف نکاح کر لیتے ہیں،شادی بعد میں سہی“۔اس نے التجا کی۔
”ایک سال بعد کر لیں گے،نکاح اور شادی دونوں ساتھ“۔علینہ نے آنکھیں مٹکائیں،اس کی غیر سنجیدگی واضح تھی۔
”نکاح کرنے میں کیا قباحت ہے؟“۔وہ الجھن میں پڑ گیا۔ علینہ نے کندھے اچکائے۔”اچھا مما بلا رہی ہیں، بعد میں بات کرتی ہوں“۔پھر اچانک چونک کر بولی۔
کال کاٹنے کے بعد وہ بیڈ پر دراز ہو گئی، گہری سانس لی، اور چھت کو گھورتے ہوئے سوچوں میں کھو گئی۔ان دونوں کی ملاقات نادرن ایریاز کے ایک سفر میں ہوئی تھی۔پہاڑوں کے دامن میں،جہاں بادلوں کی نرم چادر بچھتی تھی،وہ حادثاتی طور پر اس کے قریب آیا تھا۔برف پر پھسل کر گری تو یہی ہاتھ تھا جس نے تھام لیا تھا۔وہ لمحات مسحور کن تھے،ایک نئی داستان کے آغاز جیسے۔مگر کچھ کہانیاں صرف خوبصورت ہوتی ہیں،گہری نہیں۔
وہ انہی خیالات میں گم تھی کہ دروازہ کھلنے کی آواز نے اس کی توجہ کو جھنجھوڑ دیا۔
”مما کیا ہے؟اس طرح کون کمرے میں آتا ہے“۔علینہ نے ناگواری سے تکیہ ایک طرف پھینکا۔اور اٹھ بیٹھی۔
”ماں ہوں تمہاری،جس طرح چاہے آسکتی ہوں“۔ریحانہ بیگم اس کے قریب آ کر بیٹھ گئیں۔
”اب کیا ہوا؟“۔علینہ نے بیزاری سے ان کی طرف دیکھا۔
”یہ آج کل تم کون سی ایکٹیویٹیز میں مصروف ہو؟گھر پر بھی وقت دے دیا کرو۔گھر پہ اگر ہو تو سارا دن بس اپنے کمرے میں بند رہتی ہو“۔ریحانہ بیگم نے ایک لمحہ توقف کیا،پھر سنجیدہ لہجے میں بولیں۔
”مما پلیز،میری اپنی ایک سوشل لائف ہے۔مجھے وہاں وقت دینا ہوتا ہے۔میں ہر وقت گھر میں بیٹھی رہ کر کیا کروں؟“۔علینہ نے آنکھیں گھمائیں۔
”تو پھر بھول جاؤ عابد کو۔تمہاری مامی اپنی بھانجی کو بہو بنانے کے خواب دیکھ رہی ہیں“۔ریحانہ بیگم کی آنکھوں میں غصہ اور فکرمندی جھلک رہی تھی۔
”ارے مما،ڈونٹ وری۔عابد کی شادی صرف علینہ زاہد سے ہوگی“۔۔وہ بےفکری سے ہنسی۔
”میں تمہیں خبردار کر رہی ہوں،بعد میں مت کہنا کہ بتایا نہیں تھا“۔ریحانہ بیگم نے نرم سی تنبیہ کی۔
”فکر نہ کریں مما،عابد آپ ہی کا داماد بنے گا،صرف اور صرف ریحانہ سجاد کا“۔علینہ نے ان کا ہاتھ تھاما، نرمی سے دبایا۔ریحانہ بیگم نے مسکرا کر سر ہلایا، مگر ان کے دل میں ماں کی بےچینی اب بھی کہیں باقی تھی۔
”اپنی چھوٹی بہن کو بھی کچھ وقت دے دیا کرو“۔ انھوں نے دھیرے سے کہا۔
”مما، پلیز!مجھ سے یہ سب نہیں ہوتا۔اور ویسے بھی، وہ آپ کی لاڈلی بیٹی،اس کے انداز تو دیکھیں!آدھے سے زیادہ عادتیں فاطمہ کمال جیسی ہیں۔مجھ سے تو برداشت نہیں ہوتا،اوپر سے اتنی کم عمر اور ہر وقت تھان بھر کا دوپٹہ لپیٹے رہتی ہے“۔۔اس کے انداز میں بیزاری اور کوفت شامل تھی۔
”اچھا،جیسے تمہاری مرضی۔۔۔“ریحانہ بیگم نے ایک گہری نظر اس پر ڈالہ،پھر آہستہ سے بولیں۔
واش روم سے تازہ دم ہوکر نکلنے کے بعد،فاطمہ آئینے کے سامنے کھڑی خود کو دیکھ رہی تھی۔آنکھوں میں اداسی کی پرچھائیاں تھیں،لیکن ہونٹوں پر عزم کی لکیر کھنچ چکی تھی۔
“فاطمہ بہت گزار لیا تم نے مایوسی اور کم ہمتی میں یہ وقت…تم ایسی تو نہیں تھی!دادی اور پھوپھی کی تلخ باتیں بھی تمہارا حوصلہ نہیں توڑ سکیں،پھر اب کیوں؟تم فاطمہ کمال ہو،جو ہر مشکل کو راکھ بنا کر اپنی راہ نکالتی ہے“۔اس نے اپنا عکس غور سے دیکھا،جیسے خود سے کوئی وعدہ لے رہی ہو۔
”مجھے یہاں سے نکلنا ہوگا…اور اس کے لیے مجھے وائے ڈی کے بارے میں جاننا ہوگا۔اس نے مجھ سے نکاح کیوں کیا؟“۔ہاتھ ڈریسنگ پر رکھا،کریم اٹھائی اور نرمی سے چہرے پر لگانے لگی۔
”فاطمہ کمال کو جاننا ہی ہوگا تم کون ہو؟اور تمہارا مقصد کیا ہے؟“۔۔بالوں میں برش چلاتے ہوئے اچانک ماضی کے خوشگوار رنگ آنکھوں کے سامنے بکھر گئے۔
”فاطمہ،یو آر سو ڈفرنٹ!آپ کے نقشوں میں ترکی کی لطافت اور پاکستان کی نزاکت دونوں ہی شامل ہیں۔ایک حسین امتزاج۔آپ ترکش بھی لگتی ہیں اور پاکستانی بھی۔دوہری خوبصورتی“۔ماریہ ابراہیم آنکھوں میں ستائش لیے،ہنستے ہوئے اس کا میک اپ کر رہی تھی۔
”اماں ترکش،اور ابا پاکستانی ہو… تو پھر بچہ میری طرح ہوگا“۔۔فاطمہ کمال کھلکھلا کر جواب دی تھی۔نیلی آنکھیں ہر کسی پہ نہیں جچتی،لیکن فاطمہ کی آنکھوں کو دیکھ کر لگتا تھا یہ رنگ اسی کے لیے ہے۔فاطمہ کمال کو آنکھوں کی یہ خوبصورتی ماں سے ملی تھی۔اس کی آنکھیں،ہلکے گھنگریالے کمر تک آتے بھورے بال،اور صاف رنگت یہ سب اس نے ماں سے چرایا تھا۔باقی ہونٹ اور ناک اس کے بابا جیسے تھے۔
”اماں، آپ کے بھی کیا نصیب تھے!ترکی سے پاکستان بیاہ کر آ گئیں…یہاں تو لوگ پاکستان چھوڑنے کی سوچتے ہیں،اور آپ..“وہ ماں کی گود میں سر رکھے لیٹی تھی۔
وہ گزرے وقتوں کی یادوں میں کھوئی ہوئی تھی۔جب دروازے پر دستک ہوئی تو چونک کر حال میں لوٹی،اور سامنے فاز کو کھڑا پایا۔سرمئی رنگ کی ٹی شرٹ اور سیاہ ٹراؤزر میں ملبوس۔
”میرے ساتھ آئیے“۔بغیر کسی تمہید کے کہے گئے جملے پر اس نے حیرت سے دیکھا۔
”کہاں؟“۔
”جو کہا ہے وہ کریں“۔فاز کے لہجے میں کوئی نرمی نہ تھی، جیسے وہ کسی بحث کی گنجائش نہ چھوڑنا چاہتا ہو۔
فاطمہ نے موبائل اٹھایا،ماریہ کا پیغام دیکھا،اور دل ہی دل میں بڑبڑائی۔”ابھی تو چلتی ہوں،بعد میں دیکھ لوں گی تمہیں“۔وہ اس کے پیچھے چل دی،مگر اپنی مخصوص خفگی کے ساتھ۔
”ساتھ چلیں گی تو زیادہ اچھا لگے گا“۔مسکراہٹ دبائے وہ اس کے خفا خفا چہرے کو دیکھا۔غصے میں وہ تپی تپی سی اچھی لگ رہی تھی۔
”تمہارے ساتھ چلنے سے اچھا ہے کہ میں مر جاؤں“۔نخوت سے سر جھٹکا۔
”کچھ الفاظ بعد میں بہت بھاری پڑتے ہیں“۔وہ دھیرے سے بولا،کان کے قریب جھک کر۔فاطمہ پل بھر کو ٹھٹک گئی، مگر پھر سر جھٹک کر آگے بڑھ گئی۔
فاز اسے ایک کشادہ بالکونی میں لے آیا۔یہ لاؤنج سے ملحقہ بالکونی تھی۔فاطمہ نے قدم رکھا تو ہوا کے نرم تھپیڑے نے اس کے سنہرے بالوں کو گالوں پر بکھیر دیا۔وہ جو پہلے غصے میں بھری ہوئی تھی،بالکونی کا سحر دیکھ کر خود کو روک نہ سکی۔اس کا سخت چہرہ نرمی میں ڈھلنے لگا،جیسے دل کو کوئی نامعلوم سی راحت میسر آ گئی ہو۔
بالکونی میں رات کی خاموشی کا بسیرا تھا،مگر ہوا میں ہلکی ہلکی خنکی تھی جو بدن کو چھوتی تو جیسے دل کی دھڑکن میں نرمی گھل جاتی۔آسمان پر چمکتے ستارے اور چاند کی ملائم روشنی بالکونی کے حسن میں اضافہ کر رہی تھی۔ہواؤں کے ساتھ ہلکورے لیتے رنگ برنگے پھول مدھم روشنی میں سونے جیسے چمک رہے تھے،اور بالکونی کے کونے میں رکھی فینٹسی لائٹس سبز پتوں کے ساتھ جگنوؤں جیسی جھلمل کر رہی تھیں۔
وہ کچھ لمحے آنکھیں بند کیے کھڑی رہی،جیسے اس سکون کو اپنی روح میں اتار لینا چاہتی تھی۔جب آنکھیں کھولیں، تو سامنے فاز عالم کو کھڑا پایا۔وہ کافی کے دو کپ لیے اس کے قریب آیا،اور بنا کچھ کہے ایک کپ اس کی طرف بڑھا دیا۔فاطمہ نے بنا کسی تاثر کے کپ تھام لیا،موبائل میز پہ رکھا،پھر خاموشی سے ریلنگ کے قریب جا کر کھڑی ہو گئی۔آسمان پر ڈھلتی رات اور شہر کی مدھم روشنیوں کو تکتے ہوئے اس نے کافی کا ہلکا سا گھونٹ لیا۔تلخی اور مٹھاس کے حسین امتزاج نے زبان پر نرمی سی بکھیر دی۔فاز عالم اس بات سے واقف تھا کہ فاطمہ کمال کافی پیتی ہے۔چائے نہیں۔
”ویسے لڑکیاں کافی پیتے ہوئے اتنی خاموش نہیں ہوتی جیسے آپ ہیں“۔فاز کی آواز میں شرارت کی ہلکی سی لہر تھی۔اس کا انداز صاف اسے چھیڑتا ہوا تھا۔فاطمہ نے آنکھیں سکیڑیں،چہرہ ذرا سا اس کی طرف موڑا اور چبھتی نگاہوں سے دیکھا۔
”کتنی لڑکیوں کے ساتھ کافی پی چکے ہو؟“۔اس کے لہجے میں بے نیازی تھی مگر آنکھوں میں غیر محسوس سی جلن تھی۔توقع کے عین مطابق اس نے خاموشی توڑ دی تھی۔ٹھنڈی ہوائیں،فاطمہ کے کھلے بالوں کے ساتھ اٹھکیلیاں کررہی تھیں۔
”زیادہ نہیں…کوئی آٹھ،دس؟زیادہ تر تو فاریہ ہاشم،مبشرہ اور کومل کے ساتھ“۔فاز نے لب بھینچ کر مسکراہٹ دبائی، پھر یونہی کندھے اچکا کر بولا۔سادگی سے بھرپور انداز۔فاطمہ کمال پہلی بار اس کا یہ روپ دیکھ رہی تھی۔
”تو مجھے کیوں ڈسٹرب کیا؟انہی کے پاس جانا تھا نا پھر“۔فاطمہ نے آنکھیں گھما کر رخ پھیر لیا۔سامنے رات کا آسمان چاندنی میں نہایا ہوا تھا۔
”ہاں،مگر کسی لڑکی کے ساتھ اکیلے کبھی نہیں پی…فاریہ ہاشم کے ساتھ جب جب پی،ہاشم ارتضیٰ ساتھ ہی ہوتے تھے۔مبشرہ اور کومل کے ساتھ حارث اور مراد بھی ساتھ ہی ہوتے تھے۔اکیلے کسی لڑکی کے ساتھ پہلی بار پی رہا ہوں۔سو ٹرسٹ می،یہ میری پہلی کافی ڈیٹ ہے“۔اس کا انداز یکسر بدل چکا تھا۔اس کی نگاہیں،اور گھمبیر آواز۔فاطمہ کی سانس ایک لمحے کو رکی،جیسے ہوا نے اس کے اردگرد لمحاتی جادو کر دیا ہو۔وہ اس کی طرف دیکھنے سے گریز کرتے ہوئے بالوں کی لٹیں پیچھے کرنے لگی،مگر کانوں کی لو سرخ پڑ چکی تھیں۔اس نے کب فاز کو ایسے دیکھا تھا؟وہ تو ہمیشہ سنجیدہ سا رہتا تھا۔زیادہ تر گھر سے غائب۔اسے بس لاکر تنہا چھوڑ دیا تھا۔
”تم… تم مجھ سے ایسی باتیں نہیں کرسکتے“۔اس نے سخت لہجے میں کہتے ہوئے خود کو نارمل رکھنے کی کوشش کی۔ فاز کی نظریں گہری مسکراہٹ میں ڈوبی ہوئی تھیں۔
”میں کیسی باتیں کر رہا ہوں،محترمہ؟“۔ وہ اسے مسکرا کر دیکھ رہا تھا۔اس کا انداز اور طرز تخاطب۔فاطمہ کو الفاظ نہیں ملے،وہ کچھ کہتی مگر اتنے میں کسی کے کھانسنے کی آواز آئی۔وہ دونوں جھٹ سے پیچھے مڑے۔سامنے ایک اجنبی نوجوان کھڑا تھا،ہاتھ میں پانی کا گلاس تھامے،شاید کچھ لمحے پہلے وہ پانی پیتے پیتے سرک گیا تھا۔فاطمہ کی نظریں فوراً فاز پر گئیں،جس کی آنکھوں میں شناسائی تھی،تو وہ کچھ ریلیکس ہوگئی۔
”تم یہاں کیا کر رہے ہو؟“۔فاز نے خشمگیں نگاہوں سے پوچھا۔نوجوان نے مصنوعی معصومیت سے کندھے اچکائے۔
”تم سے ملنے آیا تھا… لیکن شاید غلط وقت پر آ گیا ہوں“۔ پھر وہ مسکین سی شکل بناتے ہوئے معنی خیز مسکراہٹ کے ساتھ فاطمہ اور فاز کو دیکھنے لگا۔فاطمہ کا دل زور سے دھڑکا۔وہ ایک جھٹکے سے سیدھی ہوئی،بات سمجھ میں آتے ہی خفت سے چہرہ موڑ لیا۔”میں اندر جا رہی ہوں“۔سخت لہجے میں کہتی،ایک خفگی بھری نگاہ فاز پہ ڈالتی،اور تیز قدموں سے اندرونی حصے کی طرف بڑھ گئی۔
”اطلاع دے کر آتے ہیں شاید“۔فاز نے اسے گھور کر دیکھا۔
”یو آر فلرٹنگ؟نو وے!آئی کانٹ بلیو دِس“۔پیچھے وہ نوجوان بے ساختہ مسکرایا اور شرارت بھرے انداز میں بولا۔
”بکواس بند کرو“۔فاز عالم نے اسے گھورا،پھر ایک مکہ اس کے کندھے پر رسید کیا۔
”سچ سچ بتاؤ“۔وہ مسلسل شرارت پر آمادہ تھا۔
”ان آنکھوں میں جو شرارت ناچ رہی ہے ناں،سب نکالنا آتا ہے مجھے“۔فاز نے انگلی اس کی آنکھوں کی طرف کی اور دھیرے سے بولا۔
”ناں کر یار،بڑی مشکلوں سے یہ لینز لگائے ہیں“۔اس نے مصنوعی دکھ بھرے انداز کہا۔
”ہاں جیسے میں تو جانتا ہی نہیں،کتنی مہارت حاصل ہے تمہارے ہاتھوں کو اس کام میں“۔فاز نے کافی کا آخری گھونٹ بھرتے ہوئے طنز کیا۔
”آہ،میری آنکھوں کا اصل رنگ تو میری محبوبہ کو بھی نہیں معلوم“۔نوجوان نے ٹھنڈی سانس خارج کی۔دکھ سے کہتا وہ آسکور جیتنے کے موڈ میں تھا۔
”ڈرامے بازی بند کرو“۔فاز نے مسکراہٹ دبائی۔”اور اس کا ذکر میرے سامنے تمیز سے کیا کرو“۔پھر سنجیدگی سے تنبیہ کرنا ضروری سمجھا۔
”بہن کے بھائی نہ بنو“۔۔وہ منہ بنایا۔
”یہ بتاؤ کس لیے آئے ہو؟“۔۔
”تمہارا زخم کیسا ہے؟“۔۔وہ اب بالکل سنجیدگی سے فاز سے پوچھ رہا تھا۔
”ٹھیک ہے یار“۔لاپرواہ سا انداز تھا۔
” اچھی طرح جانتا ہوں۔جب ہی ڈاکٹر کو لے کر آیا ہوں،تمہارا زخم چیک کروانے“۔اب کہ وہ بھی سنجیدہ ہوا۔
”میں نہیں کروا رہا کوئی چیک اپ،آئی ایم اوکے“۔
”ڈاکٹر کو دکھانا چاہیے آپ کو“۔تبھی پیچھے سے ایک سنجیدہ مگر نرمی سے لبریز نسوانی آواز آئی۔فاطمہ کی آواز سن کر دونوں چونک گئے۔وہ آہستہ قدموں سے آئی، گول میز سے اپنا موبائل اٹھایا،اور دوبارہ پلٹ گئی۔اس کے لہجے میں غصہ نہیں تھا،کوئی خفگی نہیں تھی،بس سنجیدگی تھی۔فاز کی نظریں اس راستے پر تھیں جہاں سے فاطمہ گئی تھی۔ لمحہ بھر کو خاموشی رہی۔
”اب تو دکھاؤ گے ناں؟“۔نوجوان نے فاز کو چھیڑنے والے انداز میں دیکھا۔
”شٹ اپ“۔فاز اسے جھڑکا۔وہ برا منائے بغیر ہنس دیا۔
”چلو“۔۔پھر ہنستا ہوا فاز کا بازو پکڑ کر کھینچتا ہوا باہر لے
گیا۔
دل میں اک لہر سی اٹھی ہے ابھی
کوئی تازہ ہوا چلی ہے ابھی
شور برپا ہے خانۂ دل میں
کوئی دیوار سی گری ہے ابھی
بھری دنیا میں جی نہیں لگتا
جانے کس چیز کی کمی ہے ابھی
تو شریکِ سخن نہیں لیکن
کوئی ہم راز تو بنی ہے ابھی
یاد کے بے نشاں جزیروں سے
تیری آواز آ رہی ہے ابھی
شہر کی بے چراغ گلیوں میں
زندگی تجھ کو ڈھونڈتی ہے ابھی
(ناصر کاظمی)
