روشنی کی ہلکی سی لکیر شیشے سے چھن کر اس کے چہرے پر پڑ رہی تھی،مگر اس روشنی میں کوئی زندگی نہیں تھی۔فاطمہ کمال اپنی پیشانی ٹکائے،اندر زندگی اور موت کے درمیان جھولتے اپنے بابا کو دیکھ رہی تھی۔ آکسیجن ماسک سے ڈھکا چہرہ،ہاتھ میں پیوست ڈرپ کی سوئیاں،بےجان پلکیں۔وہی بابا جو کل تک مسکراتے تھے، ہنستے تھے،آج یوں بےسکون پڑے تھے۔سانسیں اس کے اندر جیسے کہیں اٹک گئی تھیں۔
بیٹیاں باپ کی محبت میں گندھی ہوتی ہیں،اپنے باپ سے ںےاتنہا محبت کرتی ہیں۔باپ بیٹیوں کی زندگی میں آنے والا پہلا مرد اور پہلی محبت ہوتا ہے۔اور وہ اپنے باپ کو کمزور اور بیمار نہیں دیکھ سکتیں۔ایک بوجھ تھا جو اس کے سینے پر آ پڑا تھا،ایک دکھ جو لفظوں میں بیان کرنا ممکن نہ تھا۔پیچھے ہلچل تھی،مگر اس کے لیے سب کچھ جیسے رک چکا تھا۔
فاز عالم بھی وہیں تھا،مگر اپنے اصل روپ میں نہیں۔وہ مسلسل فون پر مصروف تھا،کہیں کال ملاتا،کہیں احکامات دیتا،مگر اس کی نگاہیں بار بار فاطمہ پر ٹک جاتیں۔وہ بےحسی کا کوئی لبادہ اوڑھے ہوتا تو شاید خاموش رہتا،مگر فاطمہ کی ساکت شبیہ،اس کے زرد پڑتے لب،اس کی آنکھوں میں ٹھہری تکلیف۔یہ سب دیکھ کر دل کے کسی گوشے میں بےچینی انگڑائی لے رہی تھی۔
”فاطمہ“۔ایک مانوس آواز نے اچانک خاموشی میں ارتعاش پیدا کیا۔ماریہ ابراہیم تھی،جو تیزی سے آتے ہی فاطمہ سے لپٹ گئی۔بس،جیسے ہی کسی نے سہارا دیا،فاطمہ کمال ہچکیوں سے رو پڑی۔وہ دونوں گلے لگے یوں رو رہی تھیں جیسے برسوں کا ضبط ایک ہی پل میں ٹوٹ گیا تھا۔
کتنے دنوں کی جدائی تھی،کتنے حادثے،اور اب بابا کی یہ حالت۔وہ اپنے کن کن غموں میں روئے؟کس کس درد پر آنسو بہائے؟
”کیا ہوا تھا بابا کو؟یہ سب کیسے ہوگیا ماریہ؟میرے بابا تو ٹھیک تھے ناں؟“۔درد میں بھیگی،کانپتی ہوئی آواز نکلی، مگر نظریں شیشے کے اس پار جمی رہیں۔
”فاطمہ، کب سے کھڑی ہیں؟یہاں آ کر بیٹھ جائیں،پلیز“۔ماریہ نے نرمی سے اس کا بازو تھاما،مگر وہ ایک پتھر کے مجسمے کی مانند کھڑی رہی،جیسے قدم جڑ گئے ہوں، جیسے اس کا وجود بس اسی ایک منظر میں قید ہو چکا تھا۔
”فاطمہ پلیز“۔مجبور ہو کر ماریہ نے اسے کھینچا اور بینچ کے قریب لے آئی۔وہ جیسے کچھ محسوس ہی نہ کر رہی تھی۔
”ماریہ…“ہچکیوں میں بھیگی آواز نکلی۔
”بابا… وہ آج مجھ سے ملنے والے تھے،کل بات کی تھی،مجھ سے کہا تھا کہ میں انتظار کروں۔۔وہ میرے ساتھ لنچ کریں گے…پھر وہ ہسپتال میں کیوں ہیں ماریہ؟ کیوں؟“۔اس کی آنکھوں سے آنسو گرتے جا رہے تھے،بےساختہ،بغیر کسی وقفے کے۔ماریہ نے دونوں ہاتھ تھام لیے،مگر اس کے لب لرزنے لگے۔
”فاطمہ… تایا وہ..“وہ رکی، نظریں چرائیں، جیسے کچھ کہنا چاہ رہی ہو مگر الفاظ ساتھ چھوڑ رہے ہوں۔
”ماریہ، بولو“۔فاطمہ نے بےچینی سے اس کا چہرہ دیکھا۔
”وہ…کمرے میں بےہوش تھے۔اب… اب یہ تو ڈاکٹر ہی بتائیں گے کہ کیا ہوا“۔آخری جملہ ماریہ کی سرگوشی میں دب گیا، مگر فاطمہ کے لیے وہ کسی گونج سے کم نہ تھا۔اس نے ایک جھٹکے سے اپنے ہاتھ چھڑائے اور دوبارہ شیشے کی طرف پلٹی۔
اس پار ایک باپ تھا،جو اپنی بیٹی کے لیے سانس لینے کی جنگ لڑ رہا تھا۔اور ادھر ایک بیٹی،جو اپنے باپ کی حالت دیکھ کر ٹوٹ رہی تھی۔
کمرے میں ہلکی زرد روشنی پھیلی ہوئی تھی،اور درمیان میں رکھی شطرنج کی بساط پر سیاہ اور سفید مہرے اپنی جگہ خاموش کھڑے تھے۔
”کمال مصطفیٰ کو اچانک کیا ہوگیا؟کل کی بزنس پارٹی میں تو وہ بالکل ٹھیک تھا“۔حمید صاحب نے حیرانی سے کہا۔
”یہ بات تو مجھے بھی سمجھ نہیں آئی۔میں نے فرید کو بھیجا ہے،وہ پتا کرے گا معاملہ کیا ہے“۔شاہد عباسی نے داڑھی کھجاتے ہوئے کہا۔وہ بزنس میں کمال مصطفیٰ کے سخت حریف تھے،اور ان کے بارے میں ہر چھوٹی بڑی خبر رکھتے تھے۔اسی لمحے سینٹرل ٹیبل پر پڑا موبائل وائبریٹ کرنے لگا۔شاہد عباسی نے سگریٹ ایش ٹرے میں مسلتے ہوئے کال اٹھائی۔
”ہاں، کہو فرید“۔کچھ دیر وہ خاموش سنتے رہے، ان کے تاثرات میں غیر اطمینانیت گھلنے لگی۔پھر وہ چند مخصوص ہدایات دے کر کال بند کر گئے۔
”کیا اطلاع ملی؟“۔حمید صاحب بےصبری سے بولے۔
”ہارٹ اٹیک“۔یہ کہتے ہوئے وہ گہری سوچ میں ڈوب گئے۔
”آج کل تو ہر دوسرے تیسرے بندے کو ہارٹ اٹیک ہو رہا ہے، لیکن تم اتنے غیر مطمئن کیوں ہو؟“۔حمید صاحب نے انہیں غور سے دیکھا۔
”شرط لگاؤ گے، حمید؟“۔شاہد عباسی نے مسکراتے ہوئے شطرنج کے مہرے آگے پیچھے کیے اور پھر معنی خیز لہجے میں بولے۔حمید صاحب چونکے۔
”سو فیصد یقینی کے ساتھ کہہ رہا ہوں، معاملہ کچھ اور ہے“۔
”تم کچھ زیادہ سوچ رہے ہو، شاہد“۔
”شاید…“۔وہ کندھے اچکاتے ہوئے سر جھٹک گئے۔اتنے میں حمید صاحب کا فون بجا،انہوں نے الوداعی کلمات کہے اور وہاں سے چلے گئے۔ڈرائنگ روم میں اب صرف شاہد عباسی باقی رہ گئے تھے۔چہرے سے مسکراہٹ غائب ہوچکی تھی۔ان کی آنکھوں میں ایک سرد پن اُمڈ آیا تھا۔
انہوں نے ملازمہ کو بلا کر مختصر سا حکم دیا،اور چند لمحوں بعد ارمان شاہد اندر آیا۔سرمئی رنگ کا ٹراوزر اور لال ٹی شرٹ میں،پیشانی پہ بکھرے بال،صاف رنگت۔بلا شبہ وہ وجیہہ تھا۔۔
”جی، ڈیڈ؟ آپ نے بلایا؟“۔اس نے ٹراؤزر کی جیبوں میں ہاتھ ڈالتے ہوئے کہا۔
”بیٹھو“۔شاہد عباسی کے سنجیدہ لہجے پر وہ چونکا، مگر چپ چاپ بیٹھ گیا۔
”تم نے کہا تھا کہ کمال مصطفیٰ کی بیٹی مر چکی ہے،اور فاطمہ، کمال مصطفیٰ کی سالی کی بیٹی ہے“۔وہ تھوڑا رکے، اور ارمان کی طرف غور سے دیکھا۔
”ہاں، کہا تھا“۔ارمان نے ناسمجھی سے سر ہلایا۔
”پھر فاطمہ کا رویہ ایک حقیقی بیٹی جیسا کیوں ہے؟“یہ جملہ گویا ہوا میں معلق رہ گیا۔ارمان نے ایک لمحے کے لیے ان کی آنکھوں میں جھانکا،پھر بیزاری سے مسکرایا۔
”افف! ڈیڈ، آبویس سی بات ہے۔وہ پندرہ سال کی عمر سے ان کے ساتھ رہ رہی ہے،کمال انکل کو بابا مانتی ہے، آپ بھی بس چھوٹی چھوٹی باتوں کو لے کر بیٹھ جاتے ہیں“۔وہ گویا یہ بحث ختم کرنا چاہتا تھا، اور اس نے کھڑے ہو کر جانا چاہا۔
”ارمان شاہد، لیکن مجھے کچھ ٹھیک نہیں لگ رہا“۔شاہد عباسی بھی کھڑے ہوگئے،ان کی نظریں اب بھی گہری سوچ میں ڈوبی تھیں۔
”واٹ ڈیو مین، ڈیڈ؟“۔ارمان کی آنکھوں میں حیرت جھلکی۔”آپ یہ کہنا چاہ رہے ہیں کہ میں نے غلط انفارمیشن لا کر دی؟آپ مجھ پر شک کر رہے ہیں؟“۔اس نے بےیقینی سے اپنی طرف اشارہ کیا۔
”ارمان“۔۔۔
”ڈیٹس ناٹ فئیر، ڈیڈ“۔وہ خفگی سے بولا۔”میں مام سے کہتا ہوں،آپ نے پہلے میری نیند خراب کی اور اب مجھ سے ایسی باتیں کر رہے ہیں“۔وہ ناراضی سے جانے لگا تھا جب شاہد عباسی نے اس کا بازو پکڑ لیا۔
”گروون اپ مین،یو آر ناٹ لٹل اینی مور۔بی ہیو لائک آ مین۔ میں تمہیں اس لیے بلایا ہے تاکہ تم دوبارہ اس معاملے کو دیکھ سکو۔سمجھے؟“۔ان کے لہجے میں سختی تھی، پھر آخر میں نرم پڑے۔
”اوکے، ڈیڈ۔ میں رات تک رپورٹ کر دوں گا“۔وہ سنجیدگی سے کہتا دروازے کی جانب بڑھا۔
”ناراض ہو؟“۔پیچھے سے شاہد عباسی کی آواز آئی۔
”آپ نے بات ہی ایسی کی ہے“۔ارمان نے رخ موڑا۔
”آئی ایم فرسٹریٹیڈ، مائی بوائے۔ سوری مل سکتی ہے؟“۔شاہد عباسی نے مسکراتے ہوئے اسے دیکھا۔
ارمان نے شرارت سے آنکھیں سکیڑیں۔”سوچا جا سکتا ہے“۔یہ کہہ کر وہ نکل گیا۔پیچھے شاہد عباسی گہری سوچ میں مبتلا دکھائی دیتے تھے۔
ایک طرف گہرے اندھیرے میں ڈوبا ایک سنسان گوشہ تھا، جہاں روشنی کی مدھم کرنیں بھی پہنچنے سے ہچکچا رہی تھیں۔وہاں،دیوار کے ساتھ ٹیک لگائے،فاز عالم کھڑا تھا۔
”سر،شاہد عباسی فاطمہ کمال کے بارے میں پتہ کروا رہا ہے“۔ مراد نے دھیمے مگر چوکنے لہجے میں اطلاع دی۔
فاز عالم نے آہستہ سے سر جھکایا،گہری سانس لی،اور پھر اپنی سرد مگر پُراسرار آنکھیں مراد پر گاڑ دیں۔
”لگانے دو، مراد…“۔اس کی آواز میں ایک عجیب ٹھہراؤ تھا۔ ”اسے پہنچنے دو …اب اسے جواب دینے کا وقت آ گیا ہے“۔مراد حیرت سے فاز کو دیکھنے لگا۔وہ ہمیشہ فاز عالم کے فیصلوں پر یقین رکھتا تھا،مگر آج بھی وہ اس معمّے کو نہ سمجھ سکا کہ فاطمہ کمال کی فاز کی زندگی میں موجودگی کی اصل وجہ کیا ہے۔
”سر، کیا ارادے ہیں آپ کے؟“۔اس نے تجسس سے پوچھا۔فاز عالم کے لبوں پر دھیمی،راز بھری مسکراہٹ ابھری۔
”ارادے تو بہت نیک ہیں،مراد“۔اس نے ہلکے مگر پراسرار لہجے میں کہا۔اس کی آنکھوں میں ایک خاص چمک تھی۔ایک فاتح کی چمک۔
”فلوقت تم یہاں سخت نگرانی رکھو“۔اس نے قدم آگے بڑھاتے ہوئے کہا۔”کسی پرندے کو بھی کمال مصطفیٰ کے کمرے کے قریب پر مارنے کی اجازت نہیں ہونی چاہیے۔فاطمہ کمال اور ماریہ ابراہیم کو ایک خراش تک نہ آئے۔میں ضروری کام سے جارہا ہوں۔جو بھی یہاں گڑبڑ کرنے کی کوشش کرے،اسے انجام تک پہنچا دینا“۔بہت سنجیدگی سے وہ اسے تاکید کررہا تھا۔
”یور کمانڈ از مائی آرڈر، سر!“۔اس نے پوری تابعداری سے سر ہلایا۔
”ماریہ،کیا گھر میں کوئی مسئلہ چل رہا تھا؟بابا تو ٹھیک تھے… پھر اچانک یوں ہارٹ اٹیک؟“۔روئی روئی سوجی آنکھیں، چہرے پر الجھن اور بے یقینی کی دھند،لبوں پر مدھم ہوتی لپ اسٹک۔آج وہ بابا کے استقبال کے لیے دل سے تیار ہوئی تھی،لیکن یہ نہیں جانتی تھی کہ خوشبوؤں سے مہکتا گھر چھوڑ کر اسے اسپتال کے سنّاٹے میں آنا پڑے گا۔ہسپتال کے برف جیسے سفید دیواروں میں اداسی کا سایہ تھا۔ماحول میں دوائیوں کی تیز بو بکھری ہوئی تھی۔
”فاطمہ… ہارٹ…اٹیک… تایا کو… پتہ نہیں… کیسے؟“۔ماریہ نے بمشکل اپنا حوصلہ مجتمع کیا۔اس کی آنکھوں میں بھی حیرانی تھی،چہرے پر الجھن کے گہرے سائے۔الفاظ جیسے اس کے ہونٹوں پر لڑکھڑا رہے تھے۔وہ جو کچھ جانتی تھی اور جو کچھ دیکھ رہی تھی،دونوں میں زمین آسمان کا فرق تھا۔سب کچھ جیسے گڈ مڈ ہورہا تھا۔
”تین ماہ…ماریہ،پورے تین ماہ بعد ملنے والی تھی میں بابا سے…اور اب؟ماریہ،میرے ساتھ ہی سب کچھ کیوں ہوتا ہے؟“۔۔فاطمہ نے دیوار سے سر ٹکایا،نظر کہیں دور جمی تھی۔ اس کے لبوں سے ایک خالی،بکھری ہوئی سرگوشی نکلی۔ماریہ کے دل میں جیسے کچھ ٹوٹا۔وہ اسے تسلی دینے کے لیے آگے بڑھی تھی کہ اچانک کسی کی آواز نے دونوں کو اپنی گرفت میں لے لیا۔
”فاطمہ“۔وہ آواز گہری تھی،دھیمی،مگر ہر لفظ اپنی جگہ پر مکمل وزن رکھتا تھا۔فاطمہ چونک کر سیدھی ہوئی۔خالی نگاہوں سے اسے دیکھا۔اور پھر وہ آنکھیں غصے سے دہک اٹھیں۔
”تم یہاں کیا کر رہے ہو؟“۔وہ سلگتی آواز میں غرّائی،اپنی تکلیف کا غصہ اس پہ نکال رہی تھی۔
”مجھے جہاں ہونا چاہیے،میں وہیں ہوں“۔فاز کا لہجہ بے حد مدھم اور پُراسرار تھا۔”اپنا اور ماریہ کا بہت خیال رکھیے گا۔ میں کچھ دیر کے لیے جا رہا ہوں،لیکن جلدی واپس آؤں گا“۔
”تم واپس نہ ہی آؤ تو بہتر ہے۔اکیلے چھوڑ دو مجھے“۔فاطمہ نے بھیگی پلکیں جھپکیں مگر لہجے میں ہٹ دھرمی تھی۔اور دل وہ ایک عجیب سی اذیت میں جکڑ گیا۔وہ چاہتی تھی کہ وہ واپس نہ آئے،وہ اس کی زندگی سے نکل جائے،مگر یہ بھی جانتی تھی کہ وہ اس کی غیر موجودگی میں بھی اس کے اندر کہیں موجود رہے گا۔فاز عالم نے کچھ لمحے اسے دیکھا۔
”اکیلا ہی تو نہیں چھوڑ سکتا آپ کو،فاطمہ۔آپ کے لیے میں نے بہت کچھ قربان کیا ہے،صرف آپ کو محفوظ رکھنے کے لیے۔آپ کی ضد کی وجہ سے آپ کو قربان نہیں کر سکتا“۔ اس کی آواز میں پہلی بار ایک بوجھل سی تکلیف ابھری۔یہ لہجہ…فاطمہ نے اس کی آواز میں پہلی بار یہ بے بسی سنی تھی۔فاز عالم پلٹ کر چلا گیا،اور فاطمہ کمال بے یقینی سے وہیں کھڑی رہ گئی۔
ماریہ نے بغور فاز کو جاتے دیکھا،اس کی اور فاطمہ کے درمیان ہونے والی گفتگو کو ہر زاویے سے سمجھنے کی کوشش کی۔وہ جانتی تھی کہ کچھ گڑبڑ ہے،کچھ ایسا جو صاف نظر نہیں آرہا تھا۔اس نے آہستگی سے فاطمہ کے کندھے پر ہاتھ رکھا۔
”آپ ٹھیک ہیں؟“۔
فاطمہ نے ہلکی سی ہنسی ہنسی،تکلیف سے بھری ہنسی۔
”ٹھیک ہی تو نہیں ہوں،ماریہ“۔اس کے گالوں پر آنسو گرتے گئے۔فاطمہ دوبارہ سے بینچ پر بیٹھی۔پھر ماریہ سے سے کچھ کہنا شروع کیا۔کل رات میں ہوئی فاز عالم سے گفتگو۔بابا سے بات کرکے وہ کچھ الجھ گئی تھی۔تو کچھ خود کی بدلتی کیفیت کا اثر تھا۔
ـــــــــــــــــــــــــــــــــــــــــــــــــــــــــــ
رات کی خاموشی میں صرف گھڑی کی ٹک ٹک سنائی دے رہی تھی۔ہلکی مدھم روشنی میں فاز عالم اپنی اسٹڈی میں بیٹھا ہوا تھا۔کچھ دیر پہلے ہی وہ گھر آیا تھا۔تب ہی فاطمہ اس کے پاس آئی۔دو کپ کافی اس کے ہاتھ میں تھے۔فاز آئبرو اچکاتے حیرانی سے اس کی مہربانی کو دیکھا۔
”تم یہ سب میری محبت میں کرتے ہو، نا؟“۔فاز کا ہاتھ کپ اٹھاتے رک گیا۔وہ جیسے چند لمحوں کے لیے ساکت ہوگیا۔
”ویٹ… واٹ؟ کیا کہا آپ نے؟ محبت؟“۔فاز کو جیسے یقین نہ آیا۔
”ہاں،محبت۔جو تم مجھ سے کرتے ہو“۔پراعتمادی سے کافی کے گھونٹ بھرتے اسے دیکھا۔اس کے چہرے پر مکمل یقین تھا۔
”آپ کو یہ خوش فہمی کیوں لاحق ہوئی کہ میں آپ سے محبت کرتا ہوں؟“۔فاز نے ایک گہری سانس لی،پھر پرسکون انداز میں چئیر کی پشت سے ٹیک لگاتا،اسے ہلکی مسکراہٹ کے ساتھ دیکھا۔م۔فاطمہ کے چہرے پر پل بھر کو سائے لرزے،لیکن اس نے جلدی سے خود کو سنبھالا۔
”تم ہچکچاتے ہو،اسی لیے اظہار نہیں کرتے“۔اس کا پُراعتماد انداز قابل دید تھا۔وہ آج جیسے ہر حال اس سے یہ اعتراف سننا چاہتی تھی۔
”کیا واقعی؟“۔ٹیک چھوڑتے آگے کو ہوا۔انگلیوں کو آپس میں پھنسا کر غور سے اسے دیکھا۔”مجھے دیکھ کر کہیں سے یہ لگتا ہے کہ میں کچھ بھی کہنے سے پہلے ہچکچاؤں گمیں سیدھی بات کرتا ہوں،فاطمہ۔اگر آپ سے محبت کرتا تو اظہار بھی کرچکا ہوتا“۔وہ مکمل سنجیدگی سے کہ رہا تھا۔یہ سن کر جیسے فاطمہ کے وجود میں زلزلہ آگیا۔
”لیکن تم نے کہا تھا کہ تم مجھے اپنی زندگی میں چاہتے ہو؟“۔اسے اپنی آواز کسی گہری کھائی سے آتی محسوس ہوئی۔فاطمہ کے چہرے کا رنگ متغیر ہوا۔کپ اس نے ٹیبل پہ رکھ دیا۔
فاز نے نرمی سے کہا،
”کہا تھا۔بالکل کہا تھا۔لیکن کبھی یہ نہیں کہا تھا کہ محبت کی وجہ سے چاہتا ہوں۔آپ کو اپنی زندگی میں شامل کرنے کی وجہ کچھ اور ہے،محبت نہیں“۔وہ کہتے جارہا تھا اور اس کے دل کے ٹکرے ہورہے تھے۔وہ مغرور ہونے لگی تھی کہ وہ اس کی محبت میں مبتلا ہے۔وہ بار بار اسے جتاتی تھی۔اور جیسے وہ سب کچھ ہاری تھی۔فاز عالم تو نہیں،ہاں لیکن فاطمہ کمال فاز عالم کی محبت میں ضرور گرفتار ہوگئی تھی۔وہ یونہی بےیقین تاثرات لیے بیٹھی رہی۔فاز اپنے کپڑے ٹھیک کرتا ہوا کھڑے ہوگیا۔
”تو پھر کیا ہے وہ وجہ؟“۔وہ چند لمحے خاموش رہی،پھر اسپاٹ انداز میں اسے دیکھتے ہوئے پوچھا۔
”وقت آنے پر سب معلوم ہو جائے گا“۔فاز نے ایک پل کے لیے اسے دیکھا، پھر دھیمے لہجے میں کہا۔یہ کہہ کر وہ چلا گیا۔ فاز عالم کی کافی ان چھوئی ٹھنڈی ہوچکی تھی۔بالکل اس کے دل کی طرح۔ناجانے کیوں ایک آنسو اس کی آنکھوں سے گرا تھا۔جسے وہ بےدردی سے صاف کرگئی۔
”نہیں فاطمہ کمال۔۔تمہیں ان فضول چیزوں میں نہیں پڑنا۔تمہیں اپنے مقصد پر توجہ دینی ہے۔تمہیں فاز عالم کی سچائی جاننی ہے اس کے علاؤہ کچھ نہیں“۔۔گہری سانسیں لیتی وہ خود کو پرسکون کرنے لگی۔
ــــــــــــــــــــــــــــــــــــــــــــــــــــــــــــــــــــــــ
”فاطمہ،آپ اس سے محبت کرنے لگی ہیں؟“۔ماریہ نے بغور فاطمہ کے چہرے کو دیکھا،اس کے بکھرتے تاثرات کو محسوس کیا۔ماریہ ابراہیم کو اردگرد قدموں کی آواز،درد سے تڑپتے مریض کسی کی بھی آواز محسوس نہیں کوئی۔سوائے اس بات کے،فاطمہ کمال فاز عالم سے محبت کرنے لگی تھی۔
”پتہ نہیں، ماریہ۔میرے ساتھ کیا ہورہا؟۔میرا دماغ اس پر یقین کرنے کو تیار نہیں اور میرا دل… دل کہتا ہے کہ آنکھیں بند کر کے اس کے پیچھے چلتی جاؤں“۔فاطمہ نے بے بسی سے آنکھیں بند کر لیں۔
”اس کا لب و لہجہ تو کہی سے بھی کسی غنڈے کا نہیں لگتا“۔ماریہ نے حیرانی سے تجزیہ کیا۔
”یہی بات تو مجھے بھی پریشان کرتی ہے“۔۔فاطمہ تھکے ہوئے لہجے میں بولی۔
تب ہی ایک نرس تیزی سے ان کے پاس آئی۔دونوں گھبرا کر کھڑی ہوئیں۔
”میرے بابا۔۔۔میرے بابا کیسے ہیں؟“۔۔فاطمہ بےتابی سے گویا ہوئی۔
”فاز عالم کون ہے؟“۔نرس کے غیر متوقع سوال پر دونوں جی بھر کر حیران ہوئیں۔
”کیا کام ہے ان سے؟“۔ماریہ نے سنبھلتے ہوئے سوال کیا۔
”پیشنٹ کو ہوش آچکا ہے۔لیکن وہ بار بار فاز عالم کا نام لے رہے ہیں۔وہ ان سے ملنا چاہتے ہیں“۔نرس پیشہ ورانہ انداز میں بتا رہی تھی۔یہ سنتے ہی فاطمہ کے دل میں جیسے کسی نے خنجر اتار دیا۔دکھ اور صدمے کی ملی جلی کیفیت میں وہ نرس کو دیکھ رہی تھی۔
”میں بلواتی ہوں انھیں“۔ماریہ کو بھی سخت حیرانی ہوئی۔نرس سر ہلا کر وہاں سے چلی گئی۔
”فاطمہ“۔۔پھر فاطمہ کے کندھے پہ ہاتھ رکھ کر ہولے سے ہلایا۔
”بابا؟ماریہ بابا نے اس کا نام لیا۔میرے بابا مجھ سے ملنے کے بجائے اس سے ملنا چاہتے ہیں؟“۔اس کا وجود لرزنے لگا۔
”فاطمہ،ہمت کریں۔جانتی ہوں یہ بات چھوٹی نہیں ہے۔لیکں ابھی تایا کی صحت زیادہ اہم ہے۔اگر وہ فاز سے ملنا چاہتے ہیں تو تایا کے لیے بلوا لیں۔۔۔نمبر ہے؟“۔دھیرے سے اسے سمجھاتی ہوئی،آخر میں سوال کیا۔
فاطمہ کے ہاتھ لرز رہے تھے اس نے بمشکل فون نکالا،اور ماریہ کی طرف بڑھادیا۔کانٹیکٹ لسٹ میں صرف تین نمبرز تھے۔ماریہ ابراہیم،کمال مصطفیٰ…اور فاز عالم۔
ماریہ ابراہیم نے نمبر ڈائل کیا۔دو تین بیل کے بعد کال ریسیو کرلی گئی۔
”جی“۔فاز کی گہری متوازن آواز سنائی دی۔
”تایا ہوش میں آگئے ہیں۔لیکن وہ بار بار آپ کا نام لے رہے ہیں۔آپ سے ملنا چاہتے ہیں۔ہاسپٹل آجائیں فوراً“۔۔ماریہ تیزی سے کہتی چلی گئی۔
”میں آرہا ہوں“۔فاز نے مختصر جواب دیا۔اور فون بند کردیا۔
کمرے کے اندر ایک ہلکی مدھم روشنی تھی۔بابا کے چہرے پر نقاہت نمایاں تھی۔مگر آنکھوں میں عجیب سی بےچینی تھی۔فاطمہ جیسے ہی قریب آئی۔انہوں نے دھیرے سے آنکھیں کھولیں۔
”بابا آپ ٹھیک ہیں؟“۔فاطمہ نے لرزتی آواز میں پوچھا۔ان کا ہاتھ اپنے ہاتھ میں لیا۔
”فاطمہ….فاز….کہاں ہے؟“۔۔کمال مصطفیٰ دھیمی آواز میں بمشکل پوچھے۔
”وہ آرہا ہے بابا۔۔مگر آپ اس کا نام کیوں لے رہے ہیں؟“۔۔فاطمہ کی آنکھوں میں درد اترا۔۔کمال مصطفیٰ لب بھینچے ہوئے تھے۔دروازہ دھیرے سے کھلا اور فاز اندر آیا۔
”تم….تم آگئے“۔۔ان کے لہجے میں تھکن تھی۔
فاز ان کے بیڈ کے پاس کھڑا ہوگیا۔
”آپ کو مجھ سے کیا کہنا ہے؟“۔۔فاز کی آواز میں نرمی تھی۔فاطمہ کی نظریں بار بار فاز اور بابا کے چہروں پر جارہی تھیں۔
”فاطمہ…آپ تھوڑی دیر کے لیے باہر جائیں“۔۔کمال مصطفیٰ نے دقت سے کہا۔فاطمہ حیران سی انھیں دیکھی۔پھر باہر چلی گئی۔۔
کمرے میں مدھم روشنی پھیلی ہوئی تھی۔سکون کہیں رخصت ہو چکا تھا، اور اب ہر طرف بےچینی کے سائے منڈلا رہے تھے۔ابراہیم مصطفیٰ نے پریشان نظروں سے اپنی والدہ کو دیکھا۔
”اماں،کمال بھائی تو بالکل ٹھیک تھے،اچانک انھیں کیا ہو گیا؟“۔ان کا لہجہ فکرمند تھا۔دادی سکینہ نے ناگواری سے ایک گہری سانس لی۔
”مجھے کیا معلوم؟بیٹی کی ہی ٹینشن لے رکھی تھی“۔ان کے الفاظ کا زہر فضا میں تحلیل ہو گیا۔
”اماں،ہمیں ہسپتال میں ہونا چاہیے تھا اس وقت“۔علی مصطفیٰ نے سنجیدگی سے ماں کی جانب دیکھا۔
”اس کی آوارہ بیٹی کے ہوتے ہوئے میں کبھی ہسپتال نہیں جاؤں گی۔تم دونوں کو بھی کوئی ضرورت نہیں جانے کی“۔ ان کی آواز تلخی اور بےزاری سے لبریز تھی۔
”اماں،اس میں غصہ کرنے کی کیا بات ہے؟“۔علی مصطفیٰ نے جلدی سے آگے بڑھ کر پانی کا گلاس ان کے سامنے کیا۔
”اس کی بیٹی نے جو کچھ کیا،کیا وہ کافی نہیں؟“۔وہ تیز نظروں سے بیٹے کو دیکھنے لگیں،ان کے چہرے پر سختی اور لہجے میں بےرحمی تھی۔
”اماں،بیٹی نے جو کیا وہ آپ بھی جانتی ہیں،لیکن ابھی ہمیں ہسپتال جانا چاہیے“۔ابراہیم صاحب نے ایک گہری سانس لی اور تحمل سے بولے۔
سکینہ بیگم نے بےزاری سے ہاتھ اٹھایا۔”زیادہ مسئلہ ہے تو عابد کو بھیج دو“۔جیسے جان چھڑانے کی کوشش کر رہی ہوں۔
”عابد کہاں ہے؟“۔علی مصطفیٰ نے اپنی بیوی کی جانب دیکھا۔
”باہر ہے۔آپ کو تو معلوم ہے کہ اس نے اپنا بزنس سیٹ کیا ہے“۔ان کے لہجے میں ناگواری تھی، شاید اپنی ساس کے مشورے کی وجہ سے۔
”یہ کون سا بزنس شروع کر دیا ہے اس نے،جو دن رات غائب رہتا ہے؟“۔علی صاحب نے بھنویں سکیڑیں ان کی آواز میں تشویش نمایاں تھی۔
”آپ کی بھتیجی نے جب سے میرے بچے کو دھوکا دیا ہے، اس دن سے وہ خود کو کام میں غرق کیا ہوا ہے۔دن رات اپنی صحت کا خیال کیے بغیر بس کام میں لگا رہتا ہے۔اس لڑکی نے اچھا نہیں کیا میرے بیٹے کے ساتھ،مگر کسی کو پرواہ نہیں“۔وہ تیز لہجے میں گویا ہوئیں۔فضا میں ایک بوجھل خاموشی در آئی،جیسے سب کو کچھ کہنا تھا،مگر الفاظ کہیں کھو گئے تھے۔
”احس… ماریہ کہاں ہے؟“۔ابراہیم مصطفیٰ کہتے کہتے رکے، جیسے زبان لڑکھڑا گئی ہو۔کمرے میں ایک پل کے لیے سناٹا چھا گیا۔خاص طور پر شمائلہ بیگم کا چہرہ تاریک پڑ گیا تھا۔
”ماریہ ایمبولینس کے ساتھ ہی ہسپتال گئی ہے“۔چند لمحوں کے توقف کے بعد انہوں نے دھیمے لہجے میں کہا۔شمائلہ بیگم نے بیٹی کو روکنے کی کوشش کی تھی۔مگر رہ رکی ہی نہیں تھی۔
”ماریہ کی کال آئی تھی؟ کچھ بتایا اس نے؟“۔یہ سنتے ہی ابراہیم مصطفیٰ نے فوراً سوال کیا۔
”ڈاکٹر کہہ رہے ہیں کہ ہارٹ اٹیک ہوا ہے“۔شمائلہ بیگم نے آہستہ سے کہا۔
کمرے میں موجود سب کے چہرے افسوس کی لکیروں سے بھر گئی۔لیکن ایک شخص…ایک شخص تھا جو چونک گیا تھا۔اس کی آنکھوں میں حیرت کی لہر اٹھی،جیسے اس خبر کے پیچھے کچھ اور بھی تھا،جو سب کی نظروں سے اوجھل تھا۔
رات کے اندھیرے میں کراچی کی پرانی بندرگاہ سنسان دکھائی دے رہی تھی۔چند مزدور کرین سے بھاری کنٹینرز لوڈ کر رہے تھے،جبکہ کچھ مسلح گارڈز اردگرد چوکنے کھڑے تھے۔سائے میں دبے قدموں چلتا ارمان ایک گودام کے پیچھے چھپا ہوا تھا۔
”اے آئی سب کلیئر ہے؟“۔ایئرپیِس میں فاز کی سرگوشی گونجی۔کمال مصطفیٰ کے پاس سے بات کرکے وہ فوراً نکل گیا تھا۔ہسپتال میں فاطمہ تھی۔
”ابھی تک ہاں،لیکن ہمیں جلدی کرنی ہوگی،یہ آخری لوڈنگ ہے“۔ارمان نے دھیرے سے جواب دیا۔
فاز اندھیرے میں ایک سایے کی طرح حرکت میں آیا۔ سائلنسر والی گن سے پہلے گارڈ کو خاموشی سے گرا دیا،پھر دوسرے کو۔ایک مزدور نے بے خیالی میں یہ منظر دیکھ لیا اور گھبرا کر پیچھے ہٹا۔
”کون ہو تم؟“۔اس کی گھٹی گھٹی آواز نکلی،لیکن فاز نے فوراً آگے بڑھ کر مخصوص نبض دبا کر اسے بےہوش کردیا۔
ادھر ارمان ایک کنٹینر کا لاک کھول چکا تھا۔جیسے ہی دروازہ کھلا،اندر کا منظر دیکھ کر اس کی آنکھیں غصے سے دہکنے لگیں۔زنجیروں میں جکڑی لڑکیاں خوفزدہ نظروں سے اسے دیکھ رہی تھیں۔دوسری طرف،ڈبوں میں بھری نشہ آور دوائیاں پڑی تھیں۔
”آج یہاں سے سرحد پار کوئی نہیں کرسکے گا“۔ارمان دھیمی آواز میں خود سے بولا۔
”بیس پر حملہ ہوا ہے!سب الرٹ ہو جاؤ“۔اتنے میں ایک گارڈ کو شک ہوا اور اس نے فوراً اپنے ساتھیوں کو اطلاع دے دی۔
بندرگاہ پر صرف وہی نہیں تھے۔عام مزدوروں جیسے لباس میں کچھ لوگ پہلے سے یہاں موجود تھا۔فاز کے آدمی۔وہ خاموشی سے اپنی پوزیشنز لے چکے تھے۔بس اشارے کے منتظر تھے۔
”اب وقت آگیا ہے۔۔اٹیک“۔فاز نے فوراً ائیر پیس میں کہا۔
فائرنگ شروع ہو چکی تھی۔بندرگاہ افراتفری کا شکار ہوگئی۔کچھ مزدور بھاگنے لگے۔کچھ حیرت زدہ رہ گئے۔فاز کے آدمی گارڈز کو اپنے ساتھ الجھائے ہوئے تھے۔فاز نے جلدی سے ایک دھواں چھوڑنے والا گرنیڈ نکالا اور مخالف سمت اچھال دیا۔ جیسے ہی دھویں نے فضا کو اپنی لپیٹ میں لیا،وہ دوڑتے ہوئے ارمان کے پاس پہنچا۔
”ہمیں لڑکیوں کو فوراً یہاں سے نکالنا ہوگا“۔فاز نے عجلت میں کہا۔
اندھیرے، دھویں اور گولیوں کی آوازوں میں دونوں نے لڑکیوں کو کنٹینر سے باہر نکالا اور ایک خفیہ راستے کی طرف بڑھنے لگے۔بندرگاہ پر اب بھی گارڈز کی بھاگ دوڑ جاری تھی،مگر وہ کسی نامعلوم دشمن کے تعاقب میں ادھر ادھر ہو رہے تھے۔
”باہر گاڑی تیار ہے،بس ہمیں وہاں تک پہنچنا ہے“۔فاز نے آخری گولی چلاتے ہوئے کہا اور دونوں تیز رفتاری سے نکل گئے۔
مصطفیٰ ہاؤس ماتم کی چادر میں لپٹا تھا۔فضا میں بین کی گونج تھی،ہر آہٹ میں دکھ سمویا ہوا تھا۔ہوائیں بھی اداس معلوم ہوتی تھیں،دیواریں سوگوار کھڑی تھیں۔پورا گھر ایک ایسی ویرانی میں ڈوبا تھا،جہاں غم کی مہک نے ہر ذی روح کو اپنی لپیٹ میں لے رکھا تھا۔
کفن میں لپٹے وجود کو دیکھتی فاطمہ کمال،خود سے بےحال معلوم ہوتی تھی۔اس کا دل جیسے کسی نے نوچ لیا ہو،آنکھیں شدت غم سے سرخ ہو رہی تھیں۔پھر اچانک اس کے اندر ضبط کی آخری دیوار بھی گر گئی۔
”بابا۔۔بابا، لآنکھیں کھولیں۔۔پلیز بابا،بس ایک بار“۔وہ بے بسی سے زمین پر بیٹھ گئی،ہاتھ جوڑ دیے،جیسے دعائیں کر رہی ہو کہ وقت پلٹ جائے،کچھ بھی ہو،مگر اس کے بابا دوبارہ اٹھ بیٹھے۔
لیکن وہ وجود خاموش تھا۔وقت بے حس تھا۔زندگی آگے بڑھ چکی تھی۔
”آپ نے میرے ساتھ لنچ کرنا تھا بابا۔۔آپ نے مجھے بہت کچھ بتانا تھا۔۔پلیز آنکھیں کھولیں بابا۔۔اپنی فاطمہ کو یوں نہ چھوڑ کر جائیں“۔۔فاطمہ کی آواز میں وہ کرب تھا جو لفظوں میں قید نہیں ہو سکتا تھا۔عورتیں اسے سنبھالنے کی کوشش کر رہی تھیں۔
یہ کیسا امتحان تھا؟یہ کیسی جدائی تھی؟
آنے والے مہمان خاموش کھڑے تھے،آنکھوں میں آنسو، چہروں پر افسردگی۔کچھ سر جھکائے کونے میں بیٹھے تھے، کچھ تسلی کے بول کہہ کر آگے بڑھ رہے تھے،مگر فاطمہ کے لیے یہ سب بے معنی تھا۔
کمال مصطفیٰ… لجو دیانت داری، نرمی اور وقار کی جیتی جاگتی مثال تھے،آج وہ خاموش لیٹے تھے۔وہ اپنے باپ عالم مصطفیٰ کا عکس تھے،ویسے ہی صلح جو،ویسے ہی بردبار۔ مگر آج،ان کی آنکھیں ہمیشہ کے لیے بند ہو چکی تھیں۔
پیر کے روز اسپتال میں داخل ہوئے،پیر کی رات آٹھ بجے تک ہوش میں تھے،فاطمہ سے باتیں کرتے رہے،مسکراتے رہے۔مگر منگل کے روز صبح دس بجے کے بعد جو سوئے،تو دوبارہ نہیں جاگے۔
فاطمہ بڑی مشکلوں سے خود کو سنبھالتی بابا کے پاس بیٹھ کر سورہ بقرہ کی تلاوت کرنے لگی۔درد بھری آواز میں۔
لان کے کنارے دو سائے خاموش کھڑے تھے۔۔ایک درخت کی اوٹ میں،دوسرا اس کے عین مقابل۔دونوں کی آنکھوں میں اداسی تھی،چہرے غم کی تہہ میں ڈھکے ہوئے تھے۔
”مجھے ان کے پاس جانا چاہیے“۔آواز میں ایک بے قراری تھی،ایک ٹوٹ پھوٹ۔دوسرا شخص خاموش رہا۔
”میں سمجھ سکتا ہوں تمہاری کیفیت۔لیکن ابھی نہیں۔ وہاں جانا،مطلب ساری محنت ضائع کر دینا ہوگا۔بس تھوڑا اور حوصلہ…تھوڑا اور صبر۔جلد ہی یہ سب ختم ہو جائے گا، پھر تم آزاد ہو گے“۔پھر آہستہ سے بولا۔آواز دھیمی مگر پُراعتماد تھی۔وہی آواز،جو ہمیشہ دل کی گہرائیوں میں اترتی تھی،جو اندھیروں میں امید کا چراغ جلا دیتی تھی۔
سامنے کھڑے شخص نے گہری سانس لی،نگاہیں زمین پر گاڑ دیں،پھر آہستہ سے سر جھکا کر اس کی بات ماننے کا اشارہ دیا۔
عصر کا وقت ہوتے ہی جنازہ اٹھا دیا گیا۔
فضا میں سورۃ یٰسین کی تلاوت گونج رہی تھی،ہر چہرہ اداسی کی تصویر بنا ہوا تھا۔فاطمہ کا دل جیسے سینے سے نکلنے کو تھا۔اس کی سسکیاں گونجنے لگیں۔۔
شدید رونے سے اس کی سانسیں تیز ہو گئیں،نظر دھندلانے لگی، اور پھر اچانک وہ نڈھال ہو کر زمین پر گر گئی۔
”فاطمہ“۔ماریہ ابراہیم نے تیزی سے آگے بڑھ کر اسے سنبھالا۔اس کی اپنی آنکھیں بھی رو رو کر سوج چکی تھیں۔اسے اپنے تایا سے بےحد محبت تھی۔باپ اور چچا کے نسبت کمال مصطفیٰ سے زیادہ انسیت رکھتی تھی۔وہ کسی کا دکھ کم تو نہیں کر سکتی تھی،مگر فاطمہ کے پاس رہ سکتی تھی،اور وہی کر رہی تھی۔
”فاطمہ، ہوش میں آئیں“۔آنکھوں کے آگے اندھیرا چھانے لگا۔شور کی آوازیں دھندلا گئیں۔اور اگلے ہی لمحے سب کچھ سیاہ ہوگیا۔
ـــــــــــــــــــــــــــــــــــــــــــــــــــــــــ
شاہد عباسی اپنی رہائش گاہ کے باغ میں ٹہل رہا تھا جب اچانک اس کے فون کی گھنٹی بجی۔
”ہاں بولو؟“ اس نے بےچینی سے پوچھا
”باس! پولیس نے بندرگاہ پر دھاوا بول دیا تھا۔ ہماری ساری شپمنٹ ضبط ہوگئی، کچھ لوگ پکڑے گئے ہیں“۔ دوسری طرف سے کسی نے گھبرائی ہوئی آواز میں کہا۔وہ بندہ وہاں سے بھاگ نکلا تھا۔اس کا سارا سامان وہیں چھوٹ گیا تھا۔پولیس کے خوف سے وہ چھپ گیا تھا۔اور اب وہ اطلاع دے رہا تھا۔
شاہد نے غصے سے فون زمین پر دے مارا۔ ”یہ کس نے کیا؟“۔ولیم آج کل کافی پریشر ڈال رہا تھا۔ایک کے بعد ایک ہونے والے نقصانات پر وہ کافی برہم بھی تھا۔کون تھا جس پر بات معلوم ہوجاتی تھی؟۔
