شام کے سات بج چکے تھے،ماریہ ابراہیم گھر آ چکی تھی۔سب کچھ بظاہر معمول کے مطابق تھا،مگر اس کے دل کی دھڑکنیں ایک انجان سرشاری میں لرز رہی تھیں۔اس نے گہرے سانس کے ساتھ خود کو سنبھالا،دھڑکتے دل پر قابو پایا اور معمول کی روش اپناتے ہوئے تیزی سے اپنے کمرے میں جا کر دروازہ بند کر لیا۔
بیڈ پر گرتے ہی اس کی پلکوں میں نمی چمکنے لگی،مگر لبوں پر وہی الوہی مسکراہٹ تھی جو کسی خواب کے حقیقت میں ڈھل جانے کے بعد آتی ہے۔اس نے کبھی سوچا بھی نہ تھا کہ اسے یوں آسانی سے اسکی محبت مل جائے گی۔نیا رشتہ،نئے جذبات،نئے رنگ۔وہ بے ساختہ مسکرائی، اس کی دنیا ایک نئے چاندنی بھرے آسمان میں ڈھل چکی تھی۔
عین اسی لمحے موبائل کی اسکرین جگمگائی۔ایک پیغام موصول ہوا۔
”نکاح مبارک ہو،مسز ارمان“۔ساتھ ایک سرخ دل کا ایموجی بھی تھا۔ماریہ کے رخسار تپ گئے،وہ گہری مسکان لیے جواب ٹائپ کرنے لگی۔
”ہماری زندگی کا حسین ترین دن آپ کو بھی مبارک ہو،مسٹر ارمان“۔آنکھوں کی چمک،اور دل کی بے پناہ طمانیت،ہر احساس اپنے عروج پر تھا۔اگلے ہی لمحے ارمان کی کال آ گئی۔
”خوش ہیں؟“۔گھمبیر اور دل میں اترتی ہوئی آواز،جو ہمیشہ کی طرح اس کے دل کی دھڑکنوں کو بے قابو کر رہی تھی۔ماریہ نے بے اختیار تکیہ سینے سے لگا لیا۔
”بہت،بہت زیادہ خوش۔آپ کی وجہ سے مجھے میرے سب سے قیمتی رشتے بھی مل گئے۔میری زندگی میں آنے اور اسے روشن کرنے کے لیے شکریہ“۔وہ جذبات کی شدت سے بولی۔
”میری زندگی کا سب سے حسین باب،میری زندگی کی خوبصورت ترین عورت،میرے دل کی ملکہ ہیں آپ۔آپ وہ عورت ہیں جس نے ارمان کو تسخیر کر لیا“۔دوسری طرف ایک لمحے کی خاموشی رہی، پھر ارمان کی آواز میں گہری محبت در آئی۔
ماریہ اس کے الفاظ میں کھو کر رہ گئی تھی،مگر اس سے پہلے کہ وہ اس لمحے کو مکمل محسوس کر پاتی،نیچے سے شور کی آوازیں ابھریں۔اس کا دل زور سے دھڑکا۔یکدم کھڑی ہوئی اور کپکپاتے ہاتھوں سے کھڑکی کا پردہ ہٹایا۔نیچے کا منظر دیکھ کر سانس جیسے رک گئی۔
”کیا ہوا ماریہ؟سب ٹھیک ہے؟“۔ارمان کی آواز فکرمند ہو گئی۔
”ارمان… یہ… یہ گھر پر پولیس“۔اس کے لب لرز گئے۔
”پولیس؟افف…یہ فاز بھی نہ،اپنے نام کا ایک ہے“۔ارمان کے جھنجھلانے پر وہ حیران ہوئی۔
”آپ جانتے تھے؟“۔
”ہاں، اسے منع بھی کیا تھا کہ نکاح کے دن یہ سب نہ کرے، مگر وہ بندہ تو نکاح بھی مشکلوں سے ہونے دیا ہے“۔ارمان نے تپ کر کہا۔
”پولیس کیوں آئی ہے؟“۔ماریہ کی آواز دب گئی،دل میں انجانے خوف کی پرچھائیاں لرزنے لگیں۔
”آپ حقیقت جانتی ہیں،ماریہ“۔ارمان کی آواز گہری اور پرخیال ہو گئی۔
”تو… کیا وہ انہیں لے جائیں گے؟“۔اس نے تکلیف سے آنکھیں بند کر لیں۔پلکیں لرزیں،اور آنسو رخساروں پر گرنے لگے۔
”فلحال انویسٹیگیشن کے لیے آئے ہیں،مگر ایک دو دن میں شاید…“ارمان کی بات ادھوری رہ گئی جب ماریہ نے خاموشی سے کال کاٹ دی۔اس لمحے اس کے ذہن میں ہزاروں خیالات دوڑ رہے تھے۔وہ نیچے جانے کی ہمت خود میں نہیں پا رہی تھی۔کچھ سوچتے ہوئے اس نے بے اختیار فاطمہ کو کال ملائی۔
ــــــــــــــــــــــــــــــــــــــــــــــــ
”آپ لوگ اس طرح کسی کے گھر میں کیسے داخل ہو سکتے ہیں؟“۔بڑے تایا کی آواز ناگواری اور غصے میں لپٹی ہوئی تھی۔گھر کی خواتین دل میں دھڑکتا خوف لیے ایک جانب سمٹی کھڑی تھیں،جبکہ پولیس افسران پورے پیشہ ورانہ انداز میں کھڑے تھے۔
”دیکھیے سر،ہمیں اپنا کام کرنے دیں۔اوپر سے آرڈرز ہیں، فلحال ہم صرف انویسٹیگیشن کے لیے آئے ہیں“۔آفیسر نے تحمل سے وضاحت دی اور باقی سپاہیوں کو اندر جانے کا اشارہ کیا۔
”کیسی انویسٹیگیشن؟“۔ابراہیم صاحب کی پیشانی پر شکنیں گہری ہو گئیں۔
”کمال مصطفیٰ کا کمرہ کہاں ہے؟“۔آفیسر نے اگلا سوال کیا۔ابراہیم صاحب کے اشارے پر ایک سپاہی فوراً آگے بڑھا اور کمرے کی تلاشی شروع کر دی۔ پیچھے کھڑے تمام لوگ حق دق رہ گئے۔چند لمحوں بعد پولیس آفیسر واپس آ چکا تھا۔
”کیا کوئی بتا سکتا ہے کہ یہ سب کس سلسلے میں ہو رہا ہے؟“۔تایا ضبط سے بولے۔
”کمال مصطفیٰ کی موت طبعی نہیں تھی“۔پولیس افسر نے گہری نظر ان پر ڈالی۔لاؤنج میں جیسے کوئی بم گرا تھا۔ایک پل کو سب ساکت ہو گئے۔
”ک… کیا مطلب؟“۔ابراہیم صاحب کے لب کانپے۔”ڈاکٹر نے تو ہارٹ اٹیک کہا تھا“۔صوفے کے پاس کھڑی دادی سکینہ پورے قد سے صوفے پر گر پڑیں،تائی اور چچی نے گھبرا کر انہیں تھاما۔
”کمال مصطفیٰ کا کیس ایک بہت پاورفل شخص کے ہاتھ میں ہے۔انہوں نے کوئی مصلحت جانی ہوگی،تبھی سب کو ہارٹ اٹیک کی خبر دی گئی“۔پولیس افسر نے سنجیدگی سے ایک اور انکشاف کیا۔
ابراہیم صاحب کے چہرے پر عجیب سا تاثر ابھرا۔ان کے لب لرزے،ایک نام بے اختیار زبان پر آیا۔
“فاز عالم!”
چکن کڑاہی کی خوشبو پورے کچن میں پھیل رہی تھی۔ تڑکے کی مخصوص خوشبو دیواروں میں بستی ہوئی محسوس ہوئی۔موبائل رنگ کیا تو فاطمہ نے فون کو اسپیکر پر ڈالا اور ایک ہاتھ سے چمچ ہلاتے ہوئے ماریہ سے مسکراتی ہوئی پوچھی۔
”کیسی ہو، ماریہ؟“۔
”ٹھیک… ہوں۔آپ کیسی ہیں؟“۔سامنے سے خاموشی کا پل لمحے بھر کو کھنچا،پھر ایک مدھم، لرزتی ہوئی آواز آئی۔
”تم رو رہی ہو، ماریہ؟“۔۔فاطمہ کا دہی ڈالتا ہوا ہاتھ رکا، بھنویں سکیڑیں۔ماریہ کی آواز میں جو نمی تھی،وہ اس سے پوشیدہ نہیں تھی۔پھر دوبارہ سے چمچہ ہلانے لگی۔
”پولیس آئی تھی گھر میں“۔
چمچ کے چلنے کی آواز یکدم تھم گئی۔سالن کے بلبلے ابھرتے رہے مگر فاطمہ جیسے منجمد ہو گئی۔
”واٹ؟پولیس؟گھر میں… لیکن کیوں؟“۔اس نے تیزی سے برنر ہلکی آنچ پر کیا،ہاتھوں کو خشک کیا اور فون کان سے لگا لیا۔
”تایا کے ڈیتھ کے سلسلے میں انویسٹیگیشن کے لیے“۔لفظ کانوں سے ٹکرائے، مگر دماغ تک پہنچنے میں وقت لگا تھا۔
”بابا کی؟ لیکن کیوں؟“۔اسے اپنی آواز کسی گہری کھائی سے ابھرتی محسوس ہوئی۔
”تایا کی موت طبعی نہیں تھی،ان کا قتل ہوا ہے“۔اس نے بہت دقت سے فاطمہ تک یہ خبر پہنچائی۔
”قتل؟“۔یہ لفظ سینے کے درمیان کہیں آ کر ٹھہر گیا۔
سانسیں بےترتیب ہوئیں،کچھ سمجھ میں نا آیا،پھر جیسے سب کچھ خالی خالی سا ہو گیا۔
”کس نے کیا،ماریہ؟“۔اس کی آواز ہر جذبات سے خالی تھی۔سرد جامد سی۔
”پولیس پتہ لگانے کی کوشش کر رہی ہے“۔ماریہ کی آواز دھیمی ہوگئی۔
(فاطمہ کے کانوں میں ایک سرگوشی ابھری،ایک مدھم مگر گہری سرگوشی۔وہ لمحہ اس کے سامنے ابھرا، جب بابا نے اس کے ہاتھ تھامے تھے،جب ان کی آنکھوں میں ایک انجانی اداسی تیر رہی تھی۔)
”پولیس کو اطلاع کس نے دی؟“۔بےتاثر خالی آنکھیں۔ایک ہاتھ سے موبائل پکڑنے دوسرے سے وہ کپڑا لیے ماربل صاف کرنے لگی۔وہ روئی نہیں تھی۔نا چیخی تھی۔ایک غم کا طوفان تھا جو اس نے اپنے اندر دبا لیا تھا۔
(”فاطمہ بیٹی،اگر آپ کو مجھ سے متعلق کوئی بات معلوم ہو تو آپ انتقام کا راستہ نہیں اپنائیں گی“۔اس وقت وہ چونک گئی تھی،انہیں حیرانی سے دیکھا تھا۔
”بابا، کیسی بات کر رہے ہیں؟“۔
وہ ان کے ساتھ لنچ نہیں کر سکی تھی،مگر آج انہیں اپنے ہاتھ سے سوپ پلا رہی تھی۔)
”فاز عالم“۔ماریہ نے آہستگی سے بتایا یہ نام سنتے ہی وہ چونکی۔ماربل صاف کرتا ہوا ہاتھ رک گیا۔
(”آپ کو میں نے اور ناز نے کیا سکھایا تھا،بیٹی؟اگر کبھی صورتحال ایسی ہو تو کون سا راستہ اپنانا ہے؟“۔بابا نے اس کی بات نظرانداز کر دی، بس ایک اور سوال کر دیا۔
”معافی کا“۔فاطمہ کے لبوں پر بےاختیار ایک جواب ابھرا تھا۔
”لیکن بابا ہر بات تو معاف نہیں کی جاسکتی نا“۔بچپن کی طرح اس نے اعتراض کیا۔)
”میں تم سے بعد میں بات کرتی ہوں، ماریہ“۔کال بند کرتے ہی وہ دھیرے سے نیچے بیٹھتی چلی گئی،کچن کی ٹھنڈی ٹائلیں اس کی پشت سے ٹکرائیں،اور ضبط کے سارے بندھن ٹوٹ گئے۔اس کی سانسیں بےترتیب ہوئیں،آنکھیں چھلک گئیں،اور وہ ہچکیوں سے رونے لگی۔
(”بیٹی،آپ انہیں معاف کر دینا۔یہ جان کر کہ آپ کا باپ ان سے مخلص تھا،ان سے محبت کرتا تھا۔ان کی عزت آپ کے بابا کو عزیز تھی،اور آپ کے بابا کبھی نہیں چاہیں گے کہ وہ رسوا ہوں“۔بابا کی کمزور مسکراہٹ ابھری،اور وہی شفقت بھری مگر بوجھل آنکھیں۔
”بابا، آپ یہ سب کیوں کہہ رہے ہیں؟“۔فاطمہ کی پلکیں لرز گئیں۔
”ہر چیز اپنے وقت پر سمجھ میں آتی ہے۔میں تھوڑی دیر آرام کروں گا۔آپ بھی جائیں“۔بابا نے ہلکی سی مسکراہٹ کے ساتھ آنکھیں موند لیں۔لیکن فاطمہ کے اندر بے چینی سرائیت کرگئی۔)
کڑاہی کی خوشبو کچن میں تحلیل ہو رہی تھی،مگر اسے اب کسی چیز کی پرواہ نہیں تھی۔
”آپ جانتے تھے بابا۔آپ جانتے تھے بات کیا ہے۔اور پھر بھی مجھے معاف کرنے کا کہ گئے“۔۔آج بابا کی وہ بات گونج رہی تھی،مگر آج معافی کا راستہ اس کے سامنے کہر میں لپٹا ہوا تھا۔
”فاطمہ“۔گھر میں داخل ہوتے ہی فاز کو سالن لگنے کی بو آئی۔ماتھے پر بل ڈالے وہ تیزی سے کچن کی طرف بڑھا،مگر جیسے ہی اس نے فاطمہ کو زمین پر بیٹھے،زار و قطار روتے دیکھا۔
”فاطمہ، کیا ہوا؟“۔وہ پریشانی سے سوال کیا۔اس نے خالی نگاہوں سے فاز کو دیکھا۔فاز تیزی سے آگے آکر چولہا بند کیا۔پھر اس کے قریب آیا،گھٹنوں کے بل بیٹھ کر اسے بازوؤں سے تھام کر کھڑا کیا۔
”آپ ٹھیک ہیں؟“۔اسے اپنے ساتھ صوفے پر بٹھایا۔فاطمہ نے نیلی آنکھیں اٹھائیں، آنسوؤں سے لبریز آنکھیں،پھر دھیرے سے نفی میں سر ہلایا۔
”کیا ہوا ہے مجھے بتائیں؟“۔اس کے یخ ٹھنڈے ہاتھوں کو اپنے ہاتھوں میں لیا۔
”میرے بابا کا قتل کس نے کیا ہے؟“۔آواز میں دکھ کی شدت تھی۔فاز نے ایک سرد سانس بھری،تو خبر اس تک پہنچ گئی تھی۔
”مصطفیٰ مینشن کے کسی ایک فرد نے“۔اس کا سوال سُن کر اس کی پلکیں ہلکی سی جھپکیں۔
فاطمہ نے تکلیف سے آنکھیں میچ لیں۔وہ یہ نہیں سننا چاہتی تھی۔
”فاز…میرے بابا نے ہمیشہ ان کو سپورٹ کیا،محبت دی،پھر کیوں؟کیوں کیا انھوں نے ایسا؟کیوں؟“۔وہ بچوں کی طرح بلکنے لگی تھی۔
”کیوں ان لوگوں نے مجھ سے میرے بابا کو چھین لیا؟“۔
اسے یوں روتا دیکھ کر اسے تکلیف ہورہی تھی۔وہ اسے یوں ٹوٹتے نہیں دیکھ سکتا تھا۔
”روئیں نہیں،اس طرح…آپ بہت بہادر ہیں،فاطمہ“۔اس کی نرم، مگر گہری آواز پر فاطمہ ٹھر سی گئی،پلکوں میں لرزتے آنسوؤں کے ساتھ،اسے دیکھتی گئی۔
”تم جانتے ہو نہ وہ یہ سب کیوں کیے؟پلیز،فاز،مجھے بتاؤ۔ اب مجھ سے کچھ مت چھپانا“۔اس نے امید بھری نگاہوں سے دیکھا۔فاز نے سر کو دھیرے سے جنبش دی۔
ــــــــــــــــــــــــــــــــــــــــــــــــــــــــــــــــــ
عالم مصطفیٰ ایک سلجھے ہوئے،تعلیم یافتہ اور سمجھدار انسان تھا۔انہیں اپنی کلاس فیلو سعدیہ سے محبت ہوگئی تھی۔ماں کی موجودگی میں،باپ سے چھپ کر،ان سے نکاح کر لیا۔ان کے بابا ایک سخت مزاج آدمی تھے۔کچھ عرصہ سکون سے گزرا۔لیکن پھر بابا نے شادی کے لیے دباؤ ڈالنا شروع کیا تو انہوں نے اپنی بیوی سعدیہ خاتون اور ایک سالہ بیٹے کمال مصطفیٰ کا تعارف کروا دیا۔
یہ سن کر حویلی میں زلزلہ آگیا۔
”تمہاری جرات کیسے ہوئی،عالم؟تم بھول گئے کہ سکینہ تمہاری منگ ہے؟“۔بابا سائیں کی گرجدار آواز نے سب کو کانپنے پر مجبور کر دیا۔
”بابا سائیں،میں اپنے لیے ایک ایسی ہم سفر کا خواہشمند تھا جو میرے ہر سفر میں میرے ساتھ کھڑی ہو،میرے ہم مزاج ہو“۔عالم مصطفیٰ نے دھیمی،مگر باوقار آواز میں نظریں جھکائے جواب دیا۔
”نکاح ہوجائے تو سارے مزاج مل جاتے ہیں۔ہمارے سامنے فضول بہانے مت بناؤ۔پرسوں تمہارا نکاح سکینہ سے ہوگا“۔بابا سائیں کے لہجے میں دو ٹوک فیصلہ تھا۔
”لیکن بابا سائیں،میں شادی شدہ ہوں“۔عالم مصطفیٰ نے احتجاج کیا۔
”تم یا تو سکینہ سے نکاح کرو گے یا میرا جنازہ اٹھاؤ گے“۔سفاکیت سے کہتے ہوئے وہ مڑ گئے۔
”بابا سائیں، لیکن۔۔۔“
”پرسوں تمہارا نکاح ہوگا،یا میری موت“۔وہ نفرت بھری نظر ڈال کر جا چکے تھے۔
اور پھر وہ دن آن پہنچا۔عالم مصطفیٰ نے ایک بار پھر انکار کیا،اور اس کا نتیجہ یہ نکلا کہ بابا سائیں نے چاقو اپنی کلائی پر رکھ لیا۔عالم مصطفیٰ اپنے باپ کی ضد کے آگے ہار گئے اور سکینہ حبیب کو نکاح میں لے لیا۔
شہر آئے تو سعدیہ نے بے مثال ظرف کا مظاہرہ کیا۔وہ اپنے شوہر سے ناراض ہونے کے بجائے انہیں سپورٹ کیں۔سعدیہ بیگم کا ساتھ ہی تھا کہ عالم مصطفیٰ دو بیویوں توازن قائم رکھنے میں کامیاب ہوئے،لیکن اس سب کے باوجود سکینہ بیگم کبھی خوش نہ ہو سکیں۔عالم مصطفیٰ کی نگاہوں میں سعدیہ کے لیے محبت دیکھ کر وہ جلتی رہیں۔ابھی تو وہ پچھلی باتیں ہی نہ بھلا سکی تھیں کہ عالم نے انہیں سعدیہ کی وجہ سے رد کیا تھا۔عالم کا خواب تو ان کی آنکھوں میں بچپن سے سجا تھا۔اور اب ان کا دیوانہ روپ سعدیہ کے لیے دیکھ کر وہ پاگل سی ہورہی تھیں۔ان کے دل میں کدورت کی آگ تب مزید بھڑکی جب ان کے ہاں علی مصطفیٰ کی پیدائش ہوئی۔کمال مصطفیٰ اور علی مصطفیٰ کے درمیان ہمیشہ ایک غیر محسوس موازنہ جاری رہا۔
عالم مصطفیٰ دونوں بیٹوں سے محبت کرتے تھے،لیکن جب وہ کمال مصطفیٰ کو دیکھتے تو ان کے رگ و پے میں ایک الگ سا احساس سرایت کر جاتا،کیونکہ یہ بچہ ان کی محبوب ترین عورت کی نشانی تھا۔اور جب سعدیہ خاتون کا اچانک انتقال ہو گیا تو عالم مصطفیٰ کمال کے لیے مزید حساس ہوگئے۔
انہوں نے جائیداد میں برابری رکھی،لیکن سعدیہ کو دیے گئے تمام تحائف کمال کے حصے میں آئے۔پھر جب فاطمہ کمال پیدا ہوئی،تو وہ اپنے دادا کی آنکھ کا تارا بن گئی۔
کمال مصطفیٰ نے ہمیشہ سکینہ بیگم کو ماں کا درجہ دیا۔نہ کبھی سوتیلے پن کا احساس اپنے اندر جگہ دی،نہ کبھی فاطمہ کو اس حقیقت سے آگاہ کرنے کی ضرورت محسوس کی۔عالم مصطفیٰ نے بھی ہمیشہ سب کو ان کا جائز حق دینے کی کوشش کی،لیکن سکینہ بیگم کی تشنگی کبھی ختم نہ ہوئی۔
وہ کمال مصطفیٰ کی آنکھوں میں سعدیہ کی جھلک دیکھ کر سلگتی رہیں۔عالم مصطفیٰ کے ہاتھوں رد کیے جانے کا دکھ کبھی مانند نہ پڑا۔دوسری بیوی ہونے کی تکلیف،کمال مصطفیٰ کو ملنے والی محبت اور زائد جائیداد،فاطمہ کمال کی لاڈلی ہونے کی حقیقت،یہ سب زخم ہمیشہ ہرے رہے۔اور جب فاطمہ کمال کی سالگرہ پر انہیں نے وہ بنگلہ بطور تحفہ فاطمہ کے نام کردیا جو عالم مصطفیٰ کے نام تھا۔وہ ہر وہ چیز دیکھتی رہیں جو سعدیہ،کمال اور فاطمہ کو ملی، مگر وہ نہ دیکھ سکیں جو انہیں خود حاصل تھی۔ان ساری چیزوں میں وہ دیکھ نہ سکی عالم مصطفیٰ کی آنکھوں میں اپنے لیے عزت و احترام،بچوں کے لیے محبت،اور وہ تمام نعمتیں جو ان کے دامن میں ڈالی گئیں۔سکینہ بیگم نے وہی دیکھا جو وہ دیکھنا چاہی۔لاحاصل خواہشوں کا گھر دل میں بنائے،وہ کبھی مطمئن نہ ہوسکی۔
انہیں مسئلہ تھا عالم مصطفیٰ کی آنکھوں میں سعدیہ کی محبت سے۔انہیں مسئلہ تھا دوسری بیوی ہونے پر۔کمال مصطفیٰ کو ملنے والی اہمیت و محبت سے۔فاطمہ کمال کی لاڈلی ہونے پر۔۔اور ان زائد رقم اور جیولری سے جو کمال مصطفیٰ کے حصے میں آئے۔اور یہ وہ رقم جیولری تھی جو سکینہ سے شادی سے پہلے عالم نے سعدیہ کو تحائف میں دیے تھے۔سکینہ سے شادی کے بعد وہ دونوں کے لیے تحائف لاتے تھے۔
کہتے ہیں کہ جب انسان اپنی میسر چیزوں پر شکر ادا کرنے کے بجائے لاحاصل خواہشوں پر ماتم کرنے لگے تو سکون رخصت ہو جاتا ہے۔دوسروں کی نعمتیں دیکھ کر حسد میں مبتلا ہو جائیں تو زندگی میں پھر سکون باقی نہیں رہتا۔حسد آہستہ آہستہ آپ کو راکھ کا ڈھیر کردیتی ہے۔جبکہ شکر گزاری محبت،مال اور سکون سے غنی کر دیتی ہے۔غنی ہونا ہے تو بس شکر ادا کرتے رہیں۔لیکن سکینہ بیگم یہ بات کبھی نہ سمجھ سکیں،اور یہی چیز ان کے دل کی بےچینی اور ناآسودگی کا سبب بن گئی۔
حسد کرنے والا نہ خود خوش رہتا ہے اور نہ دوسروں کو
خوش دیکھ سکتا ہے۔
