”شاہد عباسی،خبر ملی ہے۔تمہارے خاتمے کا دن قریب آ رہا ہے“۔وہ شخص شیشے کی دیوار کے سامنے کھڑا تھا۔باہر حد نگاہ تک سبزہ پھیلا تھا،فطرت نے حویلی کے گرد خاموشی کی چادر تان رکھی تھی۔حویلی کے ارد گرد سبزہ ہی سبزہ تھا۔دور دور تک کسی انسانی وجود کا گمان تک نہ تھا۔سوائے اس حویلی کے گرد کھڑے اس کے گارڈز کے۔وسیع وعریض پرانی طرز کی یہ حویلی وقت کی گواہ تھی،جہاں پرانی دیواریں کتنے ہی راز اپنے اندر دفن کیے ہوئے تھیں۔دیوار گیر فانوس کی مدھم روشنی میں اس کا عکس لمبا اور پراسرار لگ رہا تھا۔اس کے ہاتھ میں سلگتا ہوا سگار تھا،جس کی دھوئیں کی لہریں نیم تاریک کمرے میں تحلیل ہو رہی تھیں۔
شاہد عباسی سختی سے لب بھینچے،آنکھوں میں بےچینی لیے کھڑا تھا۔وہ شخص،جس کی پشت اس کی طرف تھی، ولیم جیک تھا۔وہی شخص جس کی انگلی کے اشارے پر مہرے چلتے تھے۔آج وہی ولیم اس کے ساتھ شطرنج کا آخری کھیل کھیل رہا تھا۔
”اب تم مجھ سے کوئی تعلق نہیں رکھو گے“۔ولیم کی آواز میں سفاکیت تھا۔”تم اپنے ذہن کے ہر خانے سے یہ نکال دو کہ کبھی ولیم جیک نامی کوئی شخص تمہاری زندگی میں تھا“۔
شاہد عباسی کے گلے میں کچھ اٹکا۔وہ چاہ کر بھی کوئی لفظ نہ کہہ سکا۔ولیم کی پشت کی جانب دیکھتے ہوئے اس کی پیشانی پر پسینے کے ننھے قطرے نمودار ہونے لگے۔
”تم نے جتنا نقصان کرنا تھا،کر چکے۔اب مزید میں تمہیں کوئی کام نہیں دوں گا۔آج سے تمہیں باس کے عہدے سے برطرف کیا جاتا ہے“۔ولیم کی کھردری،کاٹ دار آواز دیواروں سے ٹکرا کر واپس آئی۔”اور اگر کبھی پکڑے جانے پر تم نے میرا نام لیا،تو یاد رکھنا۔۔۔وہ تمہارے ساتھ کچھ کرے نہ کرے،لیکن میں تمہارا ہر دن،ہر لمحہ،اذیت ناک بنا دوں گا۔ تمہیں ہر روز موت کے قریب لے جا کر چند سانسیں چھوڑ دوں گا۔۔۔اور تم جانتے ہو کہ میں یہ سب بآسانی کر سکتا ہوں۔اب تم سوچ لو تمہیں کیا کرنا ہے؟“۔ولیم آہستہ آہستہ مڑا۔کمرے میں ایک عجیب وحشت ابھر آئی۔جیسے کوئی درندہ اپنی شکار کو آخری وارننگ دے رہا ہو۔چہرہ سنجیدہ، بے رحمی کی مورت بنا ہوا تھا۔اس کی آنکھیں ذیادہ مشروب پینے کی وجہ سے سرخ ہو چکی تھیں،ان میں ایک جنون بھرا شعلہ تھا۔ان کی پسندیدہ مخصوص مشروب۔جس کا نام ہی سن کر نیک مسلمان کراہیت محسوس کرے،شاہد عباسی جیسے فقط نام کے مسلمان نہیں جن کی زندگی میں یہ مشروب باخوشی شامل تھا۔
شاہد عباسی کا دل ایک پل کے لیے سینے میں دھڑکنا بھول گیا۔اس نے ضبط سے مٹھیاں بھینچیں،حلق تر کرنے کی کوشش کی۔”تم پورا سندھ میرے حوالے کرنے والے تھے“۔مدھم مگر تلخ لہجے میں احتجاج کیا۔
ولیم ہنسا،مگر یہ ہنسی زہر میں بجھی ہوئی تھی۔وہ سگار کا آخری کش لے کر فرش پر پھینک چکا تھا۔پاؤں سے اسے روندتے ہوئے وہ آگے بڑھا۔
”بالکل۔۔۔ کرنے والا تھا۔لیکن تمہاری احمقانہ چالوں نے تمہاری اپنی قبر کھود دی ہے۔تمہیں معلوم بھی ہے کہ تمہاری وجہ سے مجھے کتنا نقصان اٹھانا پڑا؟تم نے اپنی ہر معلومات خفیہ ادارے تک پہنچا کر خود اپنے پاؤں پر کلہاڑی ماری ہے“۔
”خفیہ ادارے؟“۔شاہد عباسی کے لب کانپے،آنکھوں میں لرزش ابھری۔رونگٹے کھڑے ہو گئے۔”تت…تم مجھے بچاؤ گے نہیں؟میں۔۔۔ میں تو تمہارے لیے کام کرتا ہوں“۔
ولیم نے تمسخر سے ایک نظر اس پر ڈالی اور حقارت سے سر جھٹک دیا۔
”ہنہہ۔۔۔میرے لیے؟نہیں،شاہد عباسی،تم نے ہمیشہ صرف اپنے لیے کام کیا ہے،پیسوں کے لیے۔اور اب تم نے خود اپنے ہاتھوں اپنی تباہی لکھی ہے۔تمہیں میں نے اس دلدل میں نہیں ڈالا، تم خود اس میں دھنسے ہو“۔ولیم ایک قدم اور آگے آیا۔اس کی آنکھوں میں ایک ایسی وحشت تھی جو شاہد عباسی کو اندر تک دہلا گئی۔”اب خود نکلو اس سے۔۔۔اور اگر ذرا بھی گڑبڑ کرنے کی کوشش کی،تو یاد رکھنا،تمہاری ہر سانس میں تم پر حرام کردوں گا“۔اس کے آخری الفاظ جیسے برف کی دھار تھے،جو سیدھا شاہد عباسی کے دل میں اتر گئے۔
حویلی میں ایک لمحے کے لیے خاموشی چھا گئی۔دیواروں نے ولیم کی طنزیہ ہنسی کو کئی بار گونجتے سنا۔شاہد عباسی کے قدم پیچھے ہٹے۔اس کی ریڑھ کی ہڈی میں ایک ٹھنڈک سرایت کر گئی تھی۔
کیا کبھی سیاہ دل والے کسی اور کے خیر خواہ ہوتے ہیں؟ کیا کبھی کسی شیطان میں ہمدردی جاگتی ہے؟
نہیں۔۔۔
سیاہ دل والے کبھی کسی کے نہیں ہوتے۔
سیاہ دل والے خود کے ہوتے ہیں۔
اپنی پرواہ کرنے والے۔
اپنی جان بچانے کے لیے
دوسرے کی جان لینے والے۔
شاہد عباسی شکست خوردہ،جھکے کندھوں اور بوجھل قدموں کے ساتھ اس حویلی سے باہر نکل گیا۔باہر وہی بے رحم ہوا چل رہی تھی،جو گواہ تھی کہ آج ولیم نے بلکہ ان کے خود کے کرتوت نے اسے موت کی دہلیز پر لا کھڑا کیا تھا۔
شام کا نارنجی آسمان کچھ دیر پہلے ہی سیاہی میں ڈوب چکا تھا۔رات نے اپنے پر پوری طرح پھیلا لیے تھے،اور چودھویں کے چاند کی نرم چمک زمین پر خاموشی کی ایک چادر بچھا رہی تھی۔ستارے کہیں کہیں جھلملاتے تھے،مگر چاند کی روشنی کے آگے مدھم پڑ گئے تھے۔
فاطمہ کمال کے کمرے کی ایک دیوار مکمل شیشے کی تھی، جس کے پار سیاہ آسمان کا بے انت منظر بکھرا تھا۔ گوشے میں موجود شیشے کے دروازے کا سنہری ہینڈل چمک رہا تھا۔ وہ نرمی سے دروازہ کھول کر بالکونی میں آ گئی۔ہوا میں نمی تھی،جولائی کے اوائل دن تھے،گرمی کے شدید لمحات ابھی باقی تھے۔شہر کی روشنیوں میں دھندلی روشنی پھیلی ہوئی تھی۔
فاز عالم ناجانے کہاں تھا؟۔وہ ریلنگ کے قریب جا کر کھڑی ہوگئی،نگاہیں آسمان پر جما دیں۔سوچوں کا ہجوم تھا۔
اچانک فون کی تیز گونجتی ہوئی آواز نے اس کے خیالات کے تسلسل کو توڑ دیا۔وہ چونکی،ہاتھ میں تھامے موبائل کو دیکھا۔ اسکرین پر ایک اجنبی نمبر جگمگا رہا تھا۔ماتھے پر ہلکی سی شکن نمودار ہوئی۔فاز نے جب سے اسے موبائل دیا تھا،صرف تین لوگ اس نمبر سے واقف تھے،پھر یہ کون تھا؟
فون بند ہوگیا۔لمحہ بھر کو خاموشی چھا گئی،مگر پھر دوبارہ بج اٹھا۔دل میں ایک انجانا اضطراب جاگا،اس نے آہستہ سے فون اٹھا لیا۔
”ہیلو… ہیلو فاطمہ، کیسی ہو؟“۔یہ آواز…سب کچھ رک گیا۔ لمحے کے ہزارویں حصے میں وہ جیسے ماضی کی گلیوں میں جا کھڑی ہوئی۔لیکن اگلے ہی پل خود کو سنبھالا۔
”نمبر کہاں سے ملا؟“۔آنکھیں بند کرکے کھولیں،خود کو پرسکون کیا،مگر آواز میں ایک انجانی سختی تھی۔
”نمبر؟… تمہاری یاد نے ہر لمحہ پاگل کر رکھا تھا مجھے،ہر جگہ تمہاری تلاش تھی،بس ڈھونڈ لیا“۔اس کی بات کچھ عجیب سی تھی۔فاطمہ کے چہرے پر ناگواری در آئی۔ہاتھ میں پکڑا موبائل جیسے بوجھل لگنے لگا۔وہ تیز قدموں سے کمرے میں واپس آئی،دروازہ بند کیا۔اور پردے گرا دیے۔
”تمہاری باتیں وقت کا ضیاع ہیں،بھول جاؤ مجھے“۔اس کے لہجے میں کسی قسم کی گنجائش نہیں تھی۔
”تم میرے جذبات کو وقت کا ضیاع کہہ رہی ہو؟“۔دوسری طرف سے اذیت بھری آواز آئی۔
”کال کس لیے کی ہے؟اگر یہی سب کہنا تھا تو میں فون بند کر رہی ہوں“۔فاطمہ کا صبر لبریز ہونے لگا۔
”کیا تم ایک موقع بھی نہیں دے سکتیں؟میں سب ٹھیک کر دوں گا“۔
وہ تھکی ہوئی نظروں سے خلا میں دیکھنے لگی۔کچھ چیزیں کبھی ٹھیک نہیں ہو سکتیں،کبھی نہیں۔اگلے ہی لمحے اس نے بنا کوئی جواب دیے کال کاٹ دی۔موبائل ایک طرف رکھ دیا، اور خود بیڈ پر بیٹھ گئی۔کمرے میں خاموشی تھی۔لیکن اس کے اندر جیسے ہزاروں سرگوشیاں تھیں، وہی پرانی یادیں، وہی زخم، وہی تکلیفیں،وہی قصے، جو کبھی مٹ نہیں سکتے تھے۔سب سے پہلے اس کے کردار پر سوال تو اسی شخص نے اٹھایا تھا۔
زندگی اپنی روانی میں چل رہی تھی۔بیٹا چھ سال کا ہو چکا تھا،بیٹی بھی اب تین برس کی تھی۔وہ کراچی کی تقریباً ہر سڑک،ہر گوشہ اپنے شریکِ حیات کے ساتھ دیکھ چکی تھیں۔ایک محبت کرنے والا شوہر، ننھے منے ہنستے بستے بچے۔۔زندگی کا ہر پہلو خوبصورت تھا،مگر کہیں نہ کہیں ایک ان کہی کسک تھی،جو کسی بےآواز سائے کی طرح ان کا پیچھا کرتی رہتی۔
یہی دھڑکا،یہی بےنام خوف،آخر ایک دن حقیقت بن کر سامنے آ گیا۔جب بیٹے نے سات اور بیٹی نے چار سال کی عمر میں قدم رکھا،تو شازمہ پر ایک ناگہانی قیامت ٹوٹ پڑی۔جس محبت میں وہ خود کو محفوظ سمجھتی تھیں،وہی محبت دھوکہ بن کر ان کے سامنے کھڑی تھی۔
وہ جس شخص کو اپنا سب کچھ سمجھتی تھیں،وہی شخص کسی اور کا بھی سب کچھ تھا۔وہی ہوا،جس کا خدشہ انہیں ہمیشہ سے تھا۔ان کا شوہر،ان کی محبت،ان کی زندگی کا محور۔دوسری شادی کر چکا تھا۔
کسی طوفان کی طرح یادیں ان کے ذہن میں گونجنے لگیں۔ وہ دن جب وہ شوہر سے التجا کرتی تھیں کہ انہیں ان کے سسرال میں باقاعدہ مقام دیا جائے،مگر ہر بار جواب صرف ایک خاموشی ہوتی۔وہ راتیں جب وہ دل کو تسلی دیتی تھیں کہ شاید وقت کے ساتھ سب ٹھیک ہو جائے گا۔مگر وقت نے ثابت کیا کہ وہ دھوکہ کھا چکی تھیں۔
اب شوہر کا گھر آنا کم ہو چکا تھا۔بحثیں روز کا معمول بن گئیں،مگر ان کی تمام باتیں،تمام سوالات دیواروں سے ٹکرا کر واپس آ جاتے۔اور پھر وہ دن آیا جب بحثوں نے بھی دم توڑ دیا۔کیونکہ شازمہ شاہ خود ہی خاموش ہو گئیں۔
دن گزرتے گئے اور شازمہ شاہ کی زندگی میں ایک نیا مہمان اور آنے والا تھا۔مگر اس بار وہ جوش و خروش،وہ چمک،وہ خوشی جو شادی کے پہلے آٹھ سال میں تھی،کہیں معدوم ہو چکی تھی۔
پھر ایک دن وہ ہسپتال گئیں۔شاید مقدر انہیں کسی تلخ سچائی سے روشناس کرانے لے گیا تھا۔وہ ابھی استقبالیہ پر کھڑی تھیں کہ اچانک ان کی بیٹی کی پرجوش آواز گونجیم
“بابا… بابا!”
وقت جیسے تھم گیا۔نگاہیں بےاختیار اس سمت اٹھ گئیں، جہاں ان کے شوہر اپنی دوسری بیوی اور اپنی ماں کے ساتھ کھڑے تھے۔یہ وہ لمحہ تھا جب آٹھ سال کا راز،ایک معصوم بچی کے لبوں سے ادا ہونے والے دو لفظوں میں فاش ہو گیا تھا۔
وہ لمحہ،جب ان کی دنیا حقیقت کے بوجھ تلے زمین بوس ہو گئی تھی۔پھر ان کی ماں نے طلاق کے لیے دباؤ ڈالنا شروع کیا۔مگر شوہر نے طلاق نہیں دی۔بس خاموشی اختیار کر لی۔اب ان کے لیے زندگی کا ہر دن پہلے سے زیادہ ویران ہو چکا تھا۔شوہر نے گھر آنا مکمل طور پر چھوڑ دیا،بس ہر مہینے بینک میں پیسے ٹرانسفر کر دیتے،جیسے رشتے کی قیمت چکا رہے تھے۔
اور پھر وہ دن آیا،جس دن زندگی نے ایک اور زخم دیا۔ان کی تیسری اولاد مردہ پیدا ہوئی تھیں۔وہ لمحہ،جب کسی دلاسے،کسی تسلی،کسی محبت بھرے لمس کی سب سے زیادہ ضرورت تھی۔مگر شوہر نے صرف ایک رسمی ذمہ داری نبھائی،تدفین میں شرکت کی،اور پھر پلٹ گئے۔
ایک سال بمشکل گزرا تھا،اور پھر بیٹے کی آٹھویں سالگرہ کا دن آیا۔مگر خوشی کی بجائے،اس دن کا تحفہ کچھ اور تھا۔
طلاق کے کاغذات۔نو سال کا سفر تمام ہوا۔
شازمہ شاہ نے وہ لمحہ ہزار بار اپنی آنکھوں کے سامنے دہرایا تھا۔ وہ منظر،جب ان کے ہاتھ میں وہ سفاک کاغذ تھما دیے گئے تھے،جن پر ان کی نو سالہ محبت، لان کے خواب،ان کے آنسو۔سب کا فیصلہ لکھا تھا۔
آج بھی وہ کھڑکی کے قریب کھڑی تھیں۔باہر سرد ہوا چل رہی تھی، مگر ان کے دل میں کوئی جذبات باقی نہیں بچے تھے۔
آنکھیں؟ وہ اب بھی خشک تھیں۔
دل؟ وہ کب کا ویران ہو چکا تھا۔
وہ خاموشی سے پلٹ گئیں،جیسے زندگی کے ہر دکھ کو اپنے اندر دفنا چکی تھی۔
چلا تھا ذکر زمانے کی بے وفائی کا
سو آگیا ہے تمہارا خیال ویسے ہی
دن تیزی سے گزرتے جا رہے تھے،مگر آج کا دن جیسے تھم سا گیا تھا۔مصطفیٰ مینشن کے بلند و بالا در و دیوار خاموش تھے،مگر ان کی سنگین چپ میں ایک گونج تھی،ایک کہانی جو ابھی مکمل نہیں ہوئی تھی۔
لان میں ہلچل مچی تھی۔پولیس کی گاڑی پورچ میں کھڑی تھی،اور لیڈی پولیس ایک ملازمہ کو بازو سے پکڑے کھینچ رہی تھی۔وہ روتی،بلکتی،اپنے آپ کو چھڑانے کی ناکام کوشش کر رہی تھی،قدموں میں لڑکھڑاہٹ تھی،مگر مزاحمت مسلسل جاری تھی۔آنکھوں میں خوف تھا،بےبسی تھی،اور کہیں اندر گہرائی میں ایک بےنام سا غصہ بھی۔
”چھوڑ دو مجھے۔۔میں نے کچھ نہیں کیا“۔وہ بار بار دہائی دے رہی تھی،نظریں ان چہروں کو تلاش کر رہی تھیں،جن کے لیے اس نے سالوں اپنی جان کھپائی تھی۔
لیکن کوئی آگے نہیں بڑھا۔سب خاموش تماشائی بنے کھڑے تھے۔کچھ نے نگاہیں چرا لیں،کچھ نے بےحسی اوڑھ لی۔
”چپ کر کے چلتی ہے یا لگاؤں دو ہاتھ؟“۔لیڈی پولیس نے سخت لہجے میں کہتے ہوئے ایک جھٹکا دیا۔
”میں بےقصور ہوں…میں نے کچھ نہیں کیا…“وہی ایک جملہ، جو وہ پچھلے آدھے گھنٹے سے دہرا رہی تھی۔
”ہاں تو پھر بتاؤ نا قصوروار کون ہے؟کیوں زبان بند کر رکھی ہے؟“۔لیڈی پولیس نے اسے زبردستی موبائل وین میں دھکیل دیا۔
ملازمہ نے آخری بار نظریں اٹھائیں۔مجمع میں ایک چہرہ تھا۔بس ایک چہرہ،جس پر اس کی نظریں ٹک گئیں۔وہ چہرہ جو جانتا تھا،وہ چہرہ جو سچ سے واقف تھا۔اس کی آنکھوں میں نفرت تھی،گہری اور تیزاب کی طرح جلتی ہوئی نفرت۔پھر اس نے رخ موڑ لیا۔
آج پھر پولیس مصطفیٰ مینشن میں آئی تھی۔ملازموں کے کوارٹر میں ایک کمرے کی تلاشی لی گئی،اور وہاں سے زہر کی ایک شیشی برآمد ہوئی تھی۔
ایک شخص کھڑا وہاں ملازمہ کی اس بیوقوفی پر اسے کوس رہا تھا۔
اوپر منزل پر خاموشی کا راج تھا۔فاطمہ کمال کی دھڑکنیں بےترتیب ہو رہی تھیں،خوف اور تجسس کا امتزاج اسے بےقرار کر رہا تھا۔مگر اسے ہر حال میں حقیقت کا کھوج لگانا تھا۔آگے بڑھتے ہوئے اس کی نظریں سمٹ گئیں۔راہداری کے اختتام پر ایک کم چوڑائی والا دروازہ دکھائی دیا،جس کی بناوٹ دور سے لکڑی کی نفیس تراش خراش معلوم ہو رہی تھی۔
وہ تیز ہوتی سانسوں کو قابو میں لاتے ہوئے آگے بڑھی۔ گھبراہٹ کے مارے ادھر اُدھر نظریں دوڑائیں۔اس وقت دوپہر تھی،ہاجرہ کوارٹر میں جاچکی تھی،اور پورا ماحول پُرسکون تھا۔آج وہ پہلی بار اوپر کے حصے میں آئی تھی۔
دروازے کے سامنے پہنچ کر،وہ کچھ لمحے ٹھہری۔ہاتھ بڑھا کر لاک کو دیکھا،پیشانی پر بل نمایاں ہوگئے۔”ڈیجیٹل لاک“۔اس کے ہونٹوں پر بےزاری ابھری۔وہ آج کسی قیمت پر خالی ہاتھ واپس نہیں جا سکتی تھی۔
دوبارہ دروازے کی طرف دیکھا،آنکھیں چمکیں۔وہ دھیرے سے مسکرائی۔ شاطرانہ نگاہوں سے کوڈ درج کرنے لگی،پہلے اپنا نام ڈالا مگر یہ کیا اسکرین پر “انکریٹ” چمک اٹھا۔اس نے منہ بنایا۔
”بلاوجہ ہی خوش فہمی ہورہی تھی مجھے۔ہنہہ مغرور انسان“۔وہ زیرلب بڑبڑائی،پھر سوچ میں ڈوب گئی۔لاک پر نظریں جمائے دماغ کے گھوڑیں دوڑانے لگی،ایک ایک امکان پر غور کرتی رہی۔اچانک اس کی آنکھوں میں ایک اور چمک ابھری۔جھک کر بٹن دبایا،کوڈ اینٹر کیا۔۔”فریحہ عالم”۔۔اور دروازہ دھیرے سے کلک کی آواز کے ساتھ انلاک ہو گیا۔
وہ ایک لمحے کے لیے حیرت زدہ رہ گئی،پھر فاتحانہ مسکراہٹ اس کے ہونٹوں پر پھیل گئی۔”اتنا بھی مشکل نہیں تھا“۔۔
اندر قدم رکھا تو حیرت میں ڈوب گئی۔یہ کوئی عام کمرہ نہیں تھا،بلکہ علم و رازوں کا گنجینہ لگ رہا تھا۔دیواروں کے ساتھ کتابوں کی قطاریں،بھاری ریکس میں سجی جلدیں، اور کونے میں رکھی ایک میز،جس پر ترتیب کاغذات رکھے ہوئے تھے۔لائبریری کا گمان ہوا تھا اسے۔اتنی ساری کتابیں دیکھ کر وہ پرجوش سی ہوئی تھی۔لیکن پھر یاد آیا وہ یہاں مطالعہ کرنے نہیں آئی تھی۔وہ ایک واضح مقصد کے ساتھ آگے بڑھی،نیچے کے تمام دراز کھنگال ڈالے،مگر مطلوبہ شے ہاتھ نہ آئی۔نظریں اوپر والے دراز پر جمگئیں،جو اس کی پہنچ سے کچھ بلند تھا۔اوپر اکیلے آتے ہوئے جو خوف تھا وہ تجسس اور اشتیاق میں کہیں پیچھے رہ گیا تھا۔
پاس رکھی کرسی گھسیٹی،تیزی سے چڑھ کر کھڑی ہوئی اور دراز کھول دیا۔”ڈیٹیکٹیو فاطمہ کمال“۔زیر لب خود سے کہتی مسکرائی۔اندر بکھرے کاغذات پر اس کی نظریں جم گئیں۔ایک ایک صفحہ پلٹنے لگی،اور ہر گزرتے لمحے کے ساتھ اس کی آنکھیں پھیلتی جا رہی تھیں۔پھر اچانک اس کے ہاتھ ایک چیز لگی۔ایک آئی ڈی کارڈ!
یہ وہ چیز تھی جس کی اسے شدت سے تلاش تھی۔اس نے دھیرے سے کارڈ اٹھایا،انگلیاں لرزنے لگیں۔نظریں اس پر جم گئیں،الفاظ واضح تھے،سچائی اس کے سامنے کھڑی تھی۔وہ گہری سانس بھر کر رہ گئی۔
چند لمحے بےحس و حرکت کھڑی رہی،پھر جیسے ہوش میں آئی۔تیزی سے باقی چیزیں ترتیب سے رکھیں،کرسی نیچے دھکیلی،اور ہاتھ میں آئی ڈی کارڈ مضبوطی سے تھامے باہر نکل آئی۔آج وہ خالی ہاتھ نہیں جا رہی تھی۔آج ایک راز اس کی مٹھی میں تھا۔
گھر میں قدم رکھتے ہی فاز کی نگاہیں بےاختیار فاطمہ کمال کو ڈھونڈنے لگیں۔آج کل وہ اتنا مصروف تھا کہ اس سے ملاقات نہیں ہو پارہی تھی۔یوں بھی کل شام سے اب تک اسے ایک بار بھی نہیں دیکھا تھا۔وہ خود بھی انجان تھا کہ اس کی آنکھیں اسے دیکھنے کو کس قدر بیتاب ہیں؟۔
کچن میں جھانکا،پھر کمرے میں،لاؤنج میں،مگر وہ کہیں بھی نہیں تھی۔پیشانی پر شکن نمودار ہوئے۔اور فکر کی گہری لہر آنکھوں میں اتر آئی۔اچانک دماغ میں جیسے بجلی کوندی۔اس نے بےاختیار سیڑھیوں کی طرف قدم بڑھائے۔
عین اس لمحے فاطمہ کمال سرشاری میں مست،دوسری سیڑھی پر قدم رکھ چکی تھی کہ اچانک اوپر آتے فاز کی موجودگی نے اسے گڑبڑا دیا۔جو خوشی اس کے چہرے پر رقصاں تھی وہ پل بھر میں اڑن چھو ہوگئی۔
”آپ اوپر کیوں گئی تھیں؟“۔باقی سیڑھیاں چڑھتے ہوئے وہ سنجیدگی سے اس کی طرف دیکھ رہا تھا۔
”اکیلی بور ہو رہی تھی،سوچا تمہارا گھر ہی دیکھ لوں“۔اس نے جلدی سے بہانہ بنایا،حالانکہ دل چاہا کہ آئی ڈی کارڈ اس کے سامنے رکھ کر جھنجھوڑ کے پوچھے کہ اس نے سب کچھ کیوں چھپایا۔مگر اس کی آنکھوں میں موجود سنجیدگی نے اسے سچ بولنے سے باز رکھا۔
”بوریت کی وجہ سے؟یا پھر تجسس کی وجہ سے؟“۔وہ اس کے مزید قریب آیا اور اس کی نیلی آنکھوں میں جھانکا۔
”فاز…“ وہ اس کے غیر متوقع قریب آنے پر دیوار کی پشت سے جا لگی۔
”کہیے“۔اس کی ذہین اور چمکتی ہوئی سیاہ آنکھیں جیسے نیلی آنکھوں کے حصار میں قید ہو گئیں۔
”تم… تم اس طرح کیوں کھڑے ہو؟“۔اس کی نظروں سے بچتے ہوئے وہ نظریں نیچے جھکا گئی۔اس کے پرفیوم کی مہک جیسے اس کی سانسوں میں بس چکی تھی۔
”کیا میں مخلتف انداز میں کھڑا ہوں؟سب ایسے ہی تو کھڑے ہوتے ہیں“۔اس کے گھبرائے ہوئے انداز پر وہ بھرپور مسکرایا۔
”نہیں… میرا مطلب… کہ… تم“۔وہ اٹکی۔الفاظ بےوفا ہوئے۔وہ جملہ مکمل نہ کر سکی۔اسے کہ نہ سکی کے وہ اتنے قریب کیوں کھڑا تھا؟
”آپ اوپر کیوں گئی تھیں؟“۔اس کے دونوں کندھوں پر ہاتھ رکھ کر اس نے دھیمے مگر گہرے لہجے میں دوبارہ سوال کیا۔فاطمہ کی ہتھیلیاں نم ہو گئیں۔
”نیچے… نیچے چل کر بات کریں“۔اس نے بمشکل نظریں اٹھا کر کہا،وہ دھیرے سے ہنس دیا۔اسے یوں ہنستا دیکھ کر اس کے دل نے ایک دھڑکن مس کی۔
”مجھے اندازہ نہیں تھا کہ فاطمہ کمال اتنی لیس کانفیڈینٹ بھی ہو سکتی ہیں“۔وہ شرارت سے بولا،اور اس کی مسکراہٹ نے اسے مزید بےچین کر دیا۔
”بہت ہی غلط لگا آپ کو۔فاطمہ کمال ایک پراعتماد لڑکی ہے…مائنڈ اِٹ“۔اس نے ایک گہری سانس لی،اپنی گھبراہٹ کو پس پشت ڈالتے ہوئے اپنے مضبوط لہجے میں جواب دیا۔فاز نے اس کے دھوپ چھاؤں جیسے تاثرات کو بغور دیکھا۔
”اب میرے سوال کا جواب دیں“۔پھر دھیرے سے مسکرادیا۔
”تمہاری شناخت معلوم کرنے گئی تھی“۔۔وہ نظریں اس کی آنکھوں میں ڈال کر مضبوط لہجے میں بولی۔
”آپ ڈیٹیکٹیو ہیں۔۔ڈیٹیکٹیو۔۔ذرا صبر نہیں ہوتا آپ سے“۔اس نے مصنوعی ڈپٹنے والے انداز میں کہا۔
”آفکورس میجر فاز عالم کی بیوی جو ہوں“۔۔اس نے اٹھلاتے ہوئے کہا۔فاز نے بےساختہ نرمی اور محبت سے اس کے یہ ناز بھرے انداز کو دیکھا۔
”اس حرکت کی سزا ملے گی آپ کو“۔مسکراہٹ روکتے ہوئے بھرپور سنجیدگی سے گویا ہوا۔
”اونہوں۔۔نہ میں پہلے تمہارے رعب میں آئی ہوں اور نہ اب آؤں گی“۔۔وہ ہنستے ہوئے بولی۔پھر نامحسوس انداز میں اس کے ہاتھ ہٹائے اور تیزی سے اس کے حصار سے نکلتی نیچے بھاگی۔
”فاطمہ آرام سے گر جائیں گی“۔۔پیچھے سے وہ فکرمندی سے پکارا۔پھر اس کی چالاکی پر نفی میں سر ہلاتا مسکرادیا۔نیچے پہنچ کر وہ سر اٹھائے فاز کو دیکھتی کھلکھلا کر ہنس دی۔زندگی سے بھرپور ہنسی۔فاز مبہوت سا اسے دیکھتے گیا۔
وہ ہنسی تھی تو میں نے دیکھا تھا
پھول کھلتے ہیں کس طرح دل میں
