’’بھیا،آپ کراچی جا رہے ہیں نا؟پلیز،مجھے بھی لے چلیں“۔فریحہ تیزی سے کمرے میں داخل ہوئی۔فاز عالم ڈریسنگ کے سامنے کھڑا پرفیوم کے ہلکے چھڑکاؤ میں محو تھا۔وہ ایک لمحے کو رکا،پھر آئینے میں بہن کی چمکتی آنکھوں کو دیکھ کر مسکرا دیا۔
’’کیوں گڑیا؟ کل گھر میں دعوت ہے،اتنا طویل سفر کرو گی تو تھک جاؤ گی‘‘۔اس کی طرف مڑتے ہوئے نرمی سے کہا، فکرمندی آنکھوں میں واضح تھی۔
’’میں نہیں تھکتی،بھیا۔اور اگر تھکن ہو گی بھی،تو خوشی کی ہو گی‘‘۔فریحہ نے اپنی بڑی بڑی نیلی آنکھیں مزید پٹپٹاتے ہوئے معصومیت سے جواب دیا۔
’’مگر کراچی کیوں جانا ہے؟‘‘۔ اس نے مسکراہٹ دباتے ہوئے الماری سے جیکٹ نکالی۔
’’مجھے تحفہ لینا ہے۔اماں جان کو بھی منا لیجیے گا‘‘۔فریحہ نے نچلا لب دبایا،انداز سراسر ضدی تھا۔
’’تحفہ تو تم یہاں سوات سے بھی لے سکتی ہو‘‘۔اس نے سفید شرٹ کے اوپر نیلی جیکٹ پہنتے ہوئے دھیرے سے کہا۔
’’اف!بس مجھے لینا ہے کراچی سے ہی۔اور میں آپ کی یونیورسٹی بھی دیکھ لوں گی‘‘۔وہ مخصوص انداز میں مسکرائی۔
نیچے لاؤنج میں بیٹھی خواتین نے یکبارگی سیڑھیوں کی سمت دیکھا۔فریحہ،بھائی کا ہاتھ تھامے،چہچہاتے ہوئے تیزی سے سیڑھیاں اتر رہی تھی،جبکہ فاز عالم دھیمی مسکراہٹ کے ساتھ اس کی باتیں سن رہا تھا۔
’’کس خوشی میں تیار ہوئیں ہیں آپ؟‘‘۔ایک باوقار خاتون، بائیں کندھے پر شال ڈالے،صوفے سے کھڑی ہوئیں۔
فریحہ نے بے اختیار گردن گھما کر بھائی کی طرف دیکھا۔مدد طلب نگاہوں سے۔
’’بھائی کی طرف کیوں دیکھ رہی ہیں؟یہاں میری طرف دیکھیں‘‘۔ان کی آواز میں تحکم تھا۔
’’اماں جان!میں اسے اپنے ساتھ کراچی لے جا رہا ہوں۔مجھے وہاں یونیورسٹی کا کچھ کام ہے اور چند ضروری اشیاء بھی خریدنی ہیں،اس لیے میں فری کو بھی ساتھ لے جاؤں گا“۔ فاز نے محبت سے اماں جان کے کندھے پر ہاتھ رکھتے ہوئے کہا۔
’’چپ کریں آپ۔یہ سب آپ کی بے جا ڈھیل کا نتیجہ ہے۔اور کراچی جانے کی اجازت دے رہی ہوں تو اس کا مطلب یہ نہیں کہ یہ بھی چلی جائینگی“۔اماں جان نے خفگی سے کہا اور بیٹی کو سخت نظروں سے گھورا۔
’’اماں جان،بھیا کے ساتھ جا رہی ہوں نا،پھر کیا مسئلہ ہے؟‘‘۔فریحہ نے کچھ جھنجھلا کر کہا۔
’’خاموش! آج کل کچھ زیادہ بولنے لگی ہیں“۔اماں جان نے اسے جھڑک دیا۔فریحہ نے نچلا لب لٹکایا اور بے بسی سے بھائی کو دیکھا۔
’’اماں، اسے کچھ نہ کہا کریں۔یہ میری چہچہاتی چڑیا ہے، اس کی ان ہی باتوں سے تو رونق لگی رہتی ہے“۔فاز نے نرمی سے کہا اور بہن کو محبت سے ساتھ لگایا۔شازمہ بیگم نے دل میں اس کی تائید کی۔
’’اماں،جانے دیں۔میں اپنی ذمہ داری پر لے جا رہا ہوں۔کیوں پریشان ہوتی ہیں آپ؟‘‘۔فاز نے بہن کی روہانسی صورت دیکھ کر اماں جان کو منانے کی کوشش کی۔
’’تمہاری اماں ٹھیک کہہ رہی ہیں۔ دیا ہی کیا ہے کراچی نے تم لوگوں کو؟غم، دکھ،رسوائی کے سوا کچھ نہیں ملا۔اب بہن کو لے جا کر کیا مزید زخم لینا چاہتے ہو؟‘‘۔مامی جان کی تلخ آواز نے لاؤنج میں سناٹا طاری کر دیا۔اماں جان کی پتھرائی ہوئی آنکھوں میں نمی چمکنے لگی۔ فریحہ نے لرز کر بھائی کو دیکھا،جس کے چہرے کے نقوش سخت ہوگئے تھے۔
’’مامی جان،پلیز!ماضی کی تلخ یادوں کو نہ دہرائیے‘‘۔فاز نے بمشکل اپنی برہمی کو ضبط کیا،مگر اس کی آنکھوں میں چمکنے والی سرخی اماں جان سے چھپی نہ رہی۔
’’سچ ہی تو کہہ رہی ہوں۔کراچی نے زخموں کے سوا کچھ دیا؟‘‘۔مامی جان نے ناک چڑھاتے ہوئے کہا۔
’’اماں جان،تلخ ماضی کی زنجیروں میں جکڑے رہنے سے ہم اپنا حال نہیں برباد کر سکتے نا؟اگر فری کی خوشی کراچی جانے میں ہے تو جانے دیں۔چند گھنٹوں کی تو بات ہے۔کیا آپ کو مجھ پر اعتبار نہیں؟‘‘۔فاز نے ان کے نم آلود آنکھوں کو دیکھتے ہوئے کہا۔
’’پھر میں بھی ساتھ جاؤں گی‘‘۔چند لمحوں کی گہری خاموشی کے بعد ان کی مضبوط آواز لاؤنج میں گونجی۔ سب دم بخود رہ گئے۔یہاں تک کہ فاز عالم بھی۔
’’اماں، آپ؟‘‘۔وہ گنگ سا انہیں دیکھتا رہ گیا۔
’’کیوں؟ابھی آپ نے ہی تو کہا تھا کہ ماضی کے غموں کی زنجیر توڑنی حال پر مت ڈالوں،تو میں کیوں نہیں جا سکتی کراچی؟‘‘۔ان کے اٹل لہجے نے فاز کے حواس منتشر کر دیے۔
’’اماں جان،میرا مطلب تھا…آپ جا سکتی ہیں…ٹھیک ہیں اپٹ جلدی سے تیار ہو جائیں‘‘۔اس نے ہڑبڑاتے ہوئے کہا۔
’’شازمہ؟آپ نے فیصلہ لینے سے پہلے سوچا ہے؟‘‘۔سلطانہ بیگم کی آواز میں ناپسندیدگی تھی۔
’’اماں،سوچ کر ہی لیا ہے“۔شازمہ بیگم کی آواز دھیمی مگر پختہ تھی۔
’’آپ واقعی کراچی جانا چاہتی ہیں؟‘‘۔سلطانہ بیگم نے بے یقینی سے پھر سوال دہرایا۔
’’اماں،میں اپنے بچوں کی خوشیوں میں قدغن نہیں لگانا چاہتی۔یہ جہاں جانا چاہیں گے،میں ان کے ساتھ جاؤں گی۔ دل کی تسلی اور اپنی اولاد کی حفاظت کے لیے…پھر چاہے وہ جگہ کراچی ہی کیوں نہ ہو‘‘۔ان کے پختہ لہجے میں ایک عجیب سی مضبوطی تھی۔
فریحہ کی آنکھوں میں آنسو چمکنے لگے۔وہ اماں جان سے لپٹ گئی۔
’’شکر… شکریہ، اماں جان“۔اس نے جذباتی انداز میں ان کے ہاتھ چومے۔
’’خوش رہو، میری گڑیا‘‘۔شازمہ بیگم نے اس کے آنسو پونچھتے ہوئے محبت سے ماتھے پر بوسہ دیا۔
آج نو برس بعد انھوں نے کراچی کی زمین پر قدم رکھا تھا۔ جیسے ہی وہ ایئرپورٹ سے باہر آئیں،ایک لمحے کے لیے ہوا کی خنکی میں ایک مانوس سی اداسی محسوس ہوئی۔وہی اداسی جو برسوں پہلے ان کی روح میں سرایت کر گئی تھی۔دل کے نہاں خانوں میں ایک مانوس سی تڑپ جاگ اٹھی۔مگر انھوں نے خود کو سنبھال لیا۔چہرے پر گہری مسکراہٹ سجا کر بیٹی کو دیکھا جو خوشی سے جگمگا رہی تھی۔
فاز عالم نے یونیورسٹی کا کام مکمل کرتے ہوئے ماں اور بہن کو وہاں کا سرسری دورہ بھی کروایا،اور پھر وہ ڈولمین مال کی طرف روانہ ہو گئے۔کلفٹن کی بلند و بالا،پرشکوہ عمارت کے سامنے کھڑی فریحہ عالم نے سر اٹھا کر اسے دیکھا تو ذہن کے کسی تاریک گوشے میں پرانی یادوں کے کچھ بوسیدہ عکس لرز اٹھے۔پانچ برس کی عمر میں جب وہ آخری بار بابا کے ساتھ یہاں آئی تھی،تب بھی یہی منظر تھا، یہی نیلا شیشہ، یہی سنگ مرمر کی چمک،اور وہی لہری شکل کی بناوٹ جو بچپن میں بھی دل کو بھا گئی تھی اور آج بھی اس کا دل موہ لے رہی تھی۔یہ منظر شاید اسے یاد نہیں رہتا اگر وہ جو بابا کے ساتھ آخری بار نہ آئی ہوتی۔یہ وہ جگہ تھی جہاں وہ بابا کے ساتھ کئی بار آئی تھی لیکن پانچویں سالگرہ پر آخری بار۔پھر بابا اس کی زندگی سے چلے گئے۔سترہ سال کی اس لڑکی کا دل پانچ سالہ فریحہ کا دل بنا ہوا تھا۔جو اس آس سے آئی تھی شاید بابا کی جھلک نظر آجائے۔
”بھیا، گاڑی پارک کر کے نہیں آئے؟“۔ناریل کے درخت کے پاس وہ دونوں کھڑی تھیں۔فریحہ ماں سے بے چینی سے سوال کی۔اسے بس اندر جانے کی جلدی تھی۔
”سوری، ایک دوست مل گیا تھا“۔وہ تیز قدموں سے ماں اور بہن کے پاس آیا۔خفت آمیز مسکراہٹ کے ساتھ معذرت خواہ ہوا۔
”کوئی بات نہیں،بیٹا۔چلو، اندر چلتے ہیں“۔شازمہ بیگم ہمیشہ کی طرح دھیمے لہجے میں شفقت بھری مسکراہٹ کے ساتھ بولیں۔چہرے پر ایک ٹھہراؤ،ایک باوقار سا سکون تھا۔
اندرونی حصے میں داخل ہوتے ہی قدرتی روشنی سے لبریز وسیع اٹریوم نے ان کا استقبال کیا۔سنگ مرمر کے فرش پر چلتے ہوئے دونوں بہن بھائی خوشگوار موڈ میں شاپنگ کرتے رہے،ہنستے رہے۔مگر شازمہ بیگم کا ہر قدم کسی بوجھ تلے دبا ہوا تھا۔ان کی نظریں ہر طرف بکھری ہوئیں یادوں کو ٹٹول رہی تھیں۔ہر قدم کے ساتھ ماضی کے دریچے کھل رہے تھے۔
خریداری کے بعد جب وہ فوڈ کورٹ میں کھانے سے فارغ ہو کر پارکنگ کی طرف آئے۔ایک خوشگوار دن بیت چکا تھا اور شاید خوشی کی اس گھڑی کا دورانیہ بہت ہی مختصر تھا۔ اچانک ایک نسوانی آواز سنائی دی۔
”آپا؟ آپ یہاں؟“۔خوشگوار حیرانی لیے ایک خاتون ان کی طرف بڑھیں۔
یہ ان کی خالہ تھیں،جو دو سال بعد ان سے مل رہی تھیں۔ وہ محبت اور خلوص سے بغل گیر ہوئیں۔
”خالہ،دو سال ہو گئے،آپ آئیں نہیں“۔فریحہ نے خفگی سے کہا اور لاڈ بھرے انداز میں ان سے لپٹ گئی۔
”اب تو مل لیا نا میری جان“۔خالہ نے محبت سے اس کا ماتھا چوما۔
پارکنگ میں فاز عالم گاڑی میں سامان رکھ رہا تھا،اور فریحہ عالم اس کے پیچھے کھڑی چہچہاتے ہوئے خوشگوار موڈ میں باتیں کر رہی تھی۔
پھر۔۔۔
اچانک ایک گولی کی گرج دار آواز نے فضا چیر ڈالی۔
وہی گولی،جس نے لمحہ بھر میں سب کچھ ملیا میٹ کر دیا۔وہی گولی، جس نے ہنسی کو سسکی میں،روشنی کو اندھیرے میں اور خوشی کو ماتم میں بدل دیا۔
فریحہ عالم کا سینہ چیرتی ہوئی گولی اسے بےدم کر گئی تھی۔ چہچہاتی ہوئی چڑیا،جو ابھی چند لمحے پہلے زندگی کی خوبصورت ساعتوں سے لطف اندوز ہورہی تھی،زمین پر تڑپتی گر گئی۔
”فری!!!“
یہ دلدوز چیخ فاز عالم کی تھی۔
”فریحہ!!!“
یہ کلیجہ چیر دینے والی چیخ شازمہ بیگم کی تھی۔
”یااللہ“۔خالہ کے لبوں سے بےساختہ نکلا۔
فضا میں درد اور قیامت کے سائے تھے۔کراچی کی گواہ دیواریں بھی اس منظر کو دیکھ کر لرز رہی تھیں۔کلفٹن کی سرکش لہریں بھی ساکت ہو گئی تھیں۔ہر چیز ایک پل کے لیے تھم سی گئی تھی،مگر فاز عالم کے دل میں قیامت برپا ہو چکی تھی۔اس کی بہن،اس کی زندگی کی روشنی،اس کی چڑیا،اس کے سامنے خون میں نہا چکی تھی۔وہ لڑکھڑاتا ہوا اس کے پاس آیا،اسے بانہوں میں بھر لیا۔
”فریحہ۔۔۔ آنکھیں کھولو۔۔۔ فری۔۔۔ میری گڑیا۔۔۔“ اس کی آواز کپکپا رہی تھی۔
مگر فریحہ کی نیلی آنکھیں،جو ہمیشہ چمکتی تھیں،اب بےنور ہو رہی تھیں۔اس کے لب ہلکے سے کانپے،مگر آواز نہ نکل سکی۔
”فری!!!“فاز کی سسکی بلند ہوئی۔
کراچی نے ایک بار پھر انھیں زخم دیا تھا۔
یہ زخم پچھلے زخم سے زیادہ گہرا تھا،یہ تڑپ پچھلی تڑپ سے زیادہ اذیت ناک تھی۔کراچی نے ایک بار پھر انھیں آنسوؤں کے ساتھ سوات لوٹا دیا تھا۔پرانے زخموں کو مندمل کرنے کے بجائے نئے زخموں کے ساتھ۔فریحہ عالم کی میت کے ساتھ،دکھوں کے ایک نئے سفر پر روانہ کیا تھا۔
”فاز…“ وہ آگے کچھ کہہ نہ سکی،الفاظ نے اس کا ساتھ چھوڑ دیا۔اس کی آواز رندھ گئی تھی،اور آنکھیں نمی سے بھرنے لگیں۔کمرے میں مدھم روشنی تھی،جیسے دیواروں پر زردی مائل سائے رقص کر رہے ہوں۔گھڑی کی سوئیاں مسلسل آگے بڑھ رہی تھیں،مگر وقت جیسے ٹھہر گیا تھا۔فاز عالم نے سر جھکا لیا۔اس کی آنکھیں برسوں بعد آنسوؤں سے تر ہوئی تھیں۔اس کی جان،اس کی چہچہاتی چڑیا، لاس کی معصوم گڑیا۔۔فریحہ عالم اسے شدت سے یاد آئی تھی۔اس قدر کے دس سال بعد اس کی آنکھیں بھیگی تھیں۔
”میں اسے اپنی ذمہ داری پر کراچی لایا تھا۔میں نے اماں جان سے کہا تھا کہ مجھ پر بھروسہ کریں،میں اسے دوبارہ لے کر آؤں گا۔میں نے انھیں فورس کیا تھا، کاش…کاش میں اماں کو فورس نہیں کرتا…“اس کے لہجے میں پچھتاوے کی سلگتی راکھ تھی۔وہ تکلیف جو سالوں سے سینے میں دبائے رکھی تھی،آج لفظوں میں ڈھل رہی تھی۔
فاطمہ کے دل میں ایک ہی لفظ گونج رہا تھا—گلٹ۔
وہ پلک جھپکائے بغیر،ٹوٹتے ہوئے الفاظ کو اپنے وجود میں جذب کر رہی تھی۔فاز کے لبوں سے نکلتا ہر جملہ اور ہر جملے کا ہر لفظ۔
“کس نے شوٹ کیا تھا؟“۔اس نے لرزتی آواز میں پوچھا۔”ڈکیتی کا کیس تھا؟“۔کراچی، قتل، گولی۔یہ تین الفاظ سنتے ہی ذہن فوراً ڈکیتی کی طرف جاتا تھا۔
فاز عالم کی آنکھوں میں اندھیرا گہرا ہوگیا۔”مرڈر کیس تھا“۔یہ تین الفاظ نہیں تھے،ایک زلزلہ تھا،جس نے فاطمہ کے اندر تک لرزا دیا۔
”قاتل کون تھا؟سزا ہوئی اسے؟“۔ہمدردی اور تشویش کا امتزاج لیے وہ اس کی طرف دیکھ رہی تھی۔مگر فاز عالم کی آنکھوں میں اب صرف ایک چیز تھی—انتقام۔
“قاتل اور قتل کا مقصد دونوں سے اچھی طرح واقف ہوں۔ بس اب سزا دینے کی باری ہے“۔اس کی آواز سنجیدہ تھی، بھاری،پراسرار۔کسی ویران راستے پر گرتے پتھروں کی گونج، اور کسی گہرے کنویں میں گرتے پانی کی طرح۔فاطمہ نے دھیرے سے سر ہلایا۔
”موت کا وقت مقرر ہوتا ہے،فاز۔دن، وقت،حالات سب طے شدہ ہوتے ہیں۔تم خود کو الزام نہیں دے سکتے۔فریحہ کی موت یونہی مقدر میں تھی۔تم اس طرح خود کو تکلیف دے کر اس کی روح کو بھی تکلیف دے رہو ہو۔کیا تمہیں لگتا ہے کہ فریحہ ہوتی تو وہ تمہیں اس طرح دیکھ پاتی؟“۔اس کی نظریں فاز کے چہرے پر جمی رہیں۔دل میں ضربیں لگنا شروع ہوئی تھیں۔
”خود کو اس گلٹ سے نکالو،فاز۔جو قصوروار ہے،اسے سزا دو۔خود کو نہیں“۔فاز عالم نے سر جھکایا اور خاموشی سے اس کے الفاظ سنتا چلا گیا۔اس کے دل میں کہیں زخموں پر مرہم رکھنے والی روشنی پھیلنے لگی تھی۔
”بابا… میرے لیے سب کچھ تھے“۔اس کی آواز بوجھل تھی، آنکھوں میں دھندلاہٹ پھیلتی جا رہی تھی۔”وہ پہلے ہی بزنس میں مصروف رہتے تھے،وقت کم ملتا تھا،مگر…اس بار تو تین ماہ ہوگئے تھے،میں ان سے ملی نہیں۔ اور جب ملنے کا وقت آیا تو… وقت نے مہلت ہی نہیں دی“۔حلق میں آنسوؤں کا گولہ اٹک گیا۔آنکھوں میں ستارے لرزے،مگر وہ ضبط کر گئی۔
”دل چاہتا ہے خود کو الزام دوں۔مجھے انتظار نہیں کرنا چاہیے تھے۔ہر خوف،ہر تذبذب کو پس پشت ڈال کر بابا کے پاس جانا چاہیے تھا۔اگر میں وہاں ہوتی تو شاید… شاید کوئی انھیں نقصان نہ پہنچا پاتا۔مگر پھر وہی بات، موت کا وقت مقرر ہوتا ہے۔ہم پاس ہوں یا دور،مگر ہم اپنے پیاروں کو موت سے نہیں بچا سکتے۔اس گلٹ میں رہنے سے بہتر ہے کہ میں اپنے بابا کے قتل کا حساب لوں۔میں ان کے لیے دعا کروں، لبخشش کی،مغفرت کی…“۔اس کا لہجہ بھیگ گیا تھا، ہاتھ ایک دوسرے میں بھینچے،دل میں بڑھتی تکلیف پر قابو پانا چاہتی تھی۔
”اگر مجھے معلوم ہوتا کہ وہ لوگ اس حد تک گر جائیں گے، تو میں انکل کی حفاظت کے لیے کچھ ضرور کرتا“۔فاز عالم نے دھیرے سے لب کھولے، اس کی آواز میں پچھتاوے کی سلگتی راکھ تھی۔فاطمہ کمال کے لرزتے وجود کو دیکھ کر وہ بےچین ہوا،وہ اسے یوں بکھرتا ہوا نہیں دیکھ سکتا تھا۔
”تو تم نے مجھ سے نکاح میری حفاظت کے لیے کیا ہے؟“۔فاطمہ کے لبوں پر ہلکی سی اداس مسکراہٹ در آئی۔وہ سوال جو شاید دل میں کئی مدت سے دبا تھا،آج بےساختہ لبوں پر آگیا۔فاز عالم نے کوئی جواب نہیں دیا۔نظریں جھکائے خاموشی سے فرش کو گھورتا رہا۔ شاید وہ اس موضوع پر بات نہیں کرنا چاہتا تھا۔
”تم کہتے ہو کہ جب بھی تم خوش ہوتے ہو اس کے دوسرے لمحے کچھ برا ہوجاتا ہے۔فاز عالم،تم ایک سمجھدار میچیور شخص ہوکر اس طرح کی بیک ورڈ سوچ کیسے رکھ سکتے ہو؟“۔فاطمہ نے افسوس بھری نگاہوں سے اسے دیکھا۔
”غم، پریشانیاں، دکھ یہ صرف تمہاری زندگی میں نہیں آتے، دنیا میں ہر شخص کے ساتھ ہزاروں مسئلے ہیں۔کیونکہ یہ ہماری قسمت میں لکھا ہوتا ہے۔جو ہونا ہوتا ہے،وہ ہوکر رہتا ہے۔اس کا یہ مطلب نہیں کہ ہم کرسڈ ہیں برے ہیں۔تمہیں خوشیاں راس نہیں آتیں یہ سوچ دقیانوسی ہے،بےبنیاد ہے۔ تم بہت اچھے ہو، فاز۔بہت اچھے۔اور رہی بات خوشیوں کی تو زندگی تو امتزاج ہے ہی خوشیوں اور غموں کا۔تمہیں پورا حق ہے خوش ہونے کا،خوشیاں منانے کا“۔
فاز نے پلکیں جھپکائیں۔اس کی آواز فاز عالم کو متاع حیات لگ رہی تھی۔دوا سے زیادہ سکون دیتی ہوئی۔روح کو ملائم کرتی ہوئی۔زخموں پر مرہم رکھ رکھتی ہوئی،اور اندھیروں میں روشنی بھرتی ہوئی۔
”میں ان سب سوچوں سے نکل ہی نہیں پاتا۔مجھے محتاط رہنا چاہیے تھا،اماں جان نے فریحہ کو کراچی نہیں آنے دیا۔ میں بھی ان کے فیصلے سے راضی تھا،مگر…مگر اس دن، میں اس کی آنکھوں میں موجود مان کو نظر انداز نہیں کر سکا۔میں نرم پڑ گیا تھا۔مجھے نرم نہیں پڑنا چاہیے تھا“۔اس کی آواز میں بے بسی تھی،صدیوں کا تھکن زدہ مسافر اپنے بوجھ سے نجات چاہتا تھا۔
”تم خود کو موردِ الزام نہیں ٹھہرا سکتے،ان چیزوں کے لیے جو تمہارے اختیار میں تھیں ہی نہیں۔تم چاہے جتنی کوشش کرلیتے،جتنے محتاط ہو جاتے،جن چیزوں کو ہونا ہوتا ہے وہ کسی بھی طرح ہوکر رہتی ہیں۔کبھی کبھی ہماری پلاننگ کچھ اور ہوتی ہے،اور تقدیر کچھ اور فیصلہ کرچکی ہوتی ہے“۔فاطمہ کمال نے اس کے چہرے کو بغور دیکھا،پھر دھیرے سے بولی۔فاز عالم نے کہا تھا فاطمہ کمال ججمنٹل ہے لیکن اس لمحے اس نے محسوس کیا اس نے اس پورے لمحے میں اس ججمنٹل نگاہوں سے نہیں دیکھا تھا۔وہ اس کا اصل روپ نہیں تھا۔لیکن یہ روپ،یہ اس کا اصل تھا۔
ایک تلخ جملہ فاز کی یادداشت میں گونجا۔
”شازمہ،تمہیں ہر بری خبر تب ملتی ہے جب تم فاز کی خوشی سیلیبریٹ کرنا چاہتی ہو۔ایسا کرو،فاز کی خوشیاں منانا چھوڑ دو“۔یہ مامی کی آواز تھی،زہر میں بجھا ہوا تیر۔
”لیکن ہر غم ہمارے حصے میں ہی کیوں آتا ہے؟ہماری مشکلات ختم کیوں نہیں ہوتیں؟“۔۔اس نے فاطمہ کو تسلی دی تھی،لیکن اس بار وہ فاطمہ کی رائے جاننا چاہتا تھا۔ہمسفر کا مطلب ہی تو یہی ہوتا جب ایک تھکے تو دوسرا ساتھ دینے کے لیے ہو۔
”اکثر اوقات برے واقعات اچھے لوگوں کے ساتھ ہوتے ہیں۔ یہ آزمائش ہوتی ہے۔جو لوگ صبر سے اس پیریڈ کو گزارتے ہیں،ان کے حصے میں پھر بےشمار خوشیاں بھی لکھی جاتی ہیں“۔فاطمہ کمال کے چہرے پر آسودہ سی مسکراہٹ پھیل گئی۔”سب سے اہم بات یہ کہ ہم ایسی صورتحال میں کس طرح ریسپانس کرتے؟یا تو ہم اسے اپنے دل و دماغ پر حاوی کرلیں یا پھر وہ راستہ تلاش کریں جو ہمیں ہیل کرے۔ہمیں آگے بڑھنے میں مدد دے“۔فاز عالم نے پہلی بار نظریں اٹھائیں۔ اس کی سیاہ آنکھیں نیلی آنکھوں میں جذب کے عالم میں دیکھ رہی تھیں۔آج اس پر ادراک ہورہا تھا کہ فاطمہ کمال بہت اچھا بولتی ہے۔وہ ہر وقت چڑھ دوڑنے والی فاطمہ کمال نہیں تھی۔وہ ایک سلجھی ہوئی نرم گو سائیکالوجسٹ تھی۔
”تم نے فاز ان حالات کو خود کے اندر کنزیوم کرلیا ہے۔تم نے خود کو ہیل کرنے کا راستہ ڈھونڈا ہی نہیں۔تم نے ان ساری چیزوں سے بڑھنے کی کوشش نہیں کی۔بس خود پر ایک خول چڑھالیا“۔۔آنکھوں میں خفگی لیے وہ اسے دیکھتے ہوئے کہ رہی تھی۔تھوڑے ڈپٹنے والے انداز میں اور کچھ افسوس سے۔
”کیونکہ آج سے پہلے مجھے کسی نے یوں سمجھا ہی نہیں۔کسی نے مجھے سمجھایا ہی نہیں۔کسی نے مجھے بتایا ہی نہیں کہ میری خوشیوں کا کوئی قصور نہیں۔کسی نے میری خاموشی کو توڑا ہی نہیں“۔۔اس کی آنکھوں میں دیکھتے وہ جذب کے عالم میں بول رہا تھا۔
”تم اینٹی ڈپریسنٹ لیتے ہو؟“۔کچھ دیر کی خاموشی کے بعد فاطمہ کی آواز گونجی۔اس کا لہجہ سوال کرتا ہوا بالکل نہیں تھا۔
”آپ کو کس نے بتایا؟“۔گہری سانس بھرتے فاز نے نظروں کا زاویہ بدل لیا۔
”فاریہ ہاشم نے۔پہلے تم غصہ ان بےجان چیزوں پر نکالتے تھے، پھر…میری وجہ سے اپنی انزائیٹی پر قابو پانے کے لیے تم یہ دوا لینے لگے تاکہ میں تم سے خوفزدہ نہ ہوں“۔۔فرش پر بکھری چیزوں کو دیکھ کر اس نے تاسف سے کہا۔
”تمہیں اب اس کی ضرورت نہیں ہے،فاز۔اگر تمہیں کوئی پریشانی ہو تو مجھ سے کہو۔بات کرنے سے بہت سے مسئلے حل ہوجاتے ہیں،دل ہلکا ہوجاتا ہے۔تنہائی انسان کو ڈپریس کرتی ہے،اور اچھا ساتھی انسان کو اس سے نکال لیتا ہے“۔۔اس نے پُراعتماد اور مضبوط لہجے میں حکم صادر کرتے انداز میں کہا۔فاز عالم کے ہونٹوں پر دھیرے سے مسکراہٹ پھیل گئی۔اس لمحے میں بھی وہ اپنی تعریف کرنے سے نہ چُوکی تھی۔
انسانی دکھ کا سب سے بڑا المیہ یہ نہیں کہ وہ برداشت سے باہر ہوتا ہے، بلکہ یہ ہے کہ اسے کبھی زبان نہیں ملتی۔ جو غم دل میں دفن رہے، وہ زہر بن جاتے ہیں۔ مگر جیسے ہی کوئی کان سننے والا مل جائے، جیسے ہی کوئی دل سمجھنے والا موجود ہو، تو وہی زہر تریاق میں بدل جاتا ہے۔ بعض زخموں کا علاج دوا نہیں، گفتگو ہوتی ہے۔
”آپ جانتی ہیں،پورے ٹیم میں میرا بہت رعب ہے۔ لایک جملے سے آگے کوئی مجھ سے کچھ کہنے کی جرات نہیں کرتا۔اگر کسی نے آپ کو مجھ سے اس انداز میں بات کرتے، آرڈر دیتے دیکھ لیا،تو وہ شاید غش کھا کر گر جائے“۔اس نے مسکراہٹ روکتے ہوئے کہا۔
”ہاں، تو مجھ میں اور ان میں فرق ہے“۔فاطمہ جھینپ کر ہنس دی۔وہ کھڑی ہوگئی،اور دروازے تک پہنچ کر اس کی پکار پر پلٹی۔
”ایک بات پوچھوں؟“۔فاز نے سوالیہ نگاہوں سے اسے دیکھا۔
”پوچھو“؟۔
“How do I do that?How do I move forward?”
تھکے ہوئے انداز میں اس نے پوچھا۔اس لمحے وہ انتیس سالہ فاز نہیں بلکہ وہ انیس سالہ نوعمر فاز لگ رہا تھا۔جس نے فریحہ کی موت کے صدمے میں خود کو کمرے میں محدود کرلیا تھا۔اس نے انجنئیرنگ چھوڑ دی تھی۔اس بچے سے بات کرکے کبھی کسی نے اس کے اندر کے گلٹ کو ختم کرنے کی کوشش نہیں کی۔کوئی ساتھ میسر ہی نہیں ہوا جو اس کو سنتا،اس کا غم بانٹتا۔گزرتے دنوں کے ساتھ یہ ہوا وہ اس غم سے نکل تو نہیں پایا لیکن اسے اپنے اندر چھپا کر ایک سنجیدہ سخت انسان میں بدل گیا۔
اگر کوئی شخص برسوں تک اپنے جذبات کو دبا کر رکھے اور پھر پہلی بار کسی کے سامنے بالخصوص ایک سائیکالوجسٹ اور قریبی شخص کے سامنے اپنے دل کی بات کہے تو وہ جذبات گویا قید سے آزاد ہو جاتے ہیں۔اسی لیے دکھ غم اور مایوسی کو دل میں نہیں رکھنا چاہیے۔بلکہ کسی ایسے شخص کے ساتھ شئیر کرنا چاہیے جو نہ صرف آپ کو سنے بلکہ سمجھے بھی۔
“That’s what I’m here for. As your wife and a psychologist. I want to help you work through your grief and find a way to heal. We’ll do it together.”
مسکراتی ہوئی،یقین بھرے لہجے میں،اس نے نہ صرف اس کے مسئلے کا حل دیا بلکہ اس کے اور اپنے درمیان کے رشتے کو بھی قبول کرگئی تھی۔فاز عالم نے پہلی بار محسوس کیا کہ وہ اس گِلٹ سے باہر آ سکتا ہے۔
“شکریہ!”یہ صرف ایک لفظ نہیں تھا، اس میں برسوں کی یاسیت کا بوجھ ہلکا ہونے کا احساس تھا۔
”یا اللّٰہ! چار بج گئے“۔وہ حیرت سے بولی،اس کی حیرت زدہ آواز پر اس نے بھی چونک کر گھڑی دیکھا۔
”سوری، میری وجہ سے آپ سو نہیں سکیں۔ جا کر آرام کریں“۔اس کی نیند سے بھری آنکھوں کو دیکھ کر اسے افسوس نے آگھیرا۔
”فجر پڑھ کر ہی سوؤں گی۔امید ہے، میری باتوں کو سوچو گے“۔دروازے کے پار جاتے ہوئے اس کی آنکھوں میں امید کی روشنی تھی۔ فاز نے دھیرے سے سر ہلایا۔
جاری ہے
