Shab-e-Gham Ki Sehar by Zainab Khan Episode 1 Classic Novel Saga Online Reading

“میری ایک شرط ہے۔”داؤد سیال نے وہاں بیٹھے تمام نفوس کو چونکنے پر مجبور کردیا۔ ڈرائینگ روم میں یکدم خاموش چھاگئی۔ ایسی خاموشی کہ سوئی گرنے کی آواز آتی۔ سب کے چہروں پر ناقابلِ بیان تاثرات تھے۔
“کیسی شرط؟” نمیر سیال نے خاموشی توڑی۔
“میں اپنی بیٹی کو ایک ہی شرط پر عارب کے ساتھ بھیج سکتا ہوں کہ۔۔۔!” وہ چپ کرگئے، اور نمیر سیال کو دیکھا۔
“کہ؟” نمیر صاحب نے کہا۔
“کہ آپ کا بیٹا، اپنا لندن والا گھر سکینہ کے نام کردے۔” داؤد سیال کی بات پر وہاں بیٹھے تمام نفوس کو جیسے ثانپ سونگھ گیا۔ دم سادے سبھی انہیں دیکھنے لگے۔ انکی کہی یہ بات وہاں بیٹھے ہر شخص پر بڑی بھاری پڑی تھی۔
“باؤلے ہوگئے ہو داؤد، میرے بیٹے کی سالوں کی محنت سے بنایا گیا گھر ہے وہ، وہ کیونکر تمہاری بیٹی کے نام کرے ؟” فرحت تائی، نمیر سیال کی بیگم بولیں۔
“اس میں قباحت ہی کیا ہے فرحت باجی، آپ یہ مت بھولیں کہ آپ کے بیٹے کی وجہ سے مجھے اپنی بیٹی کی قربانی دینی پڑ رہی ہے۔” داؤد سیال اذیت سے بولے۔ بیٹیوں کے غم نے انہیں رات و رات ادھ موا کردیا تھا۔ بیوی ہسپتال میں زیست و موت کی جنگ لڑ رہی تھی۔ اور وہ ادھر اپنی بیٹیوں کی۔ فرحت تائی نے تنفر سے سر جھٹکا۔
“تو میاں نہ کرو، کیسی بدنامی۔۔۔بیٹی تو تمہاری بھی بھاگ گئی نا۔ نِرا میرا بیٹا غلط نہیں ہے۔ بھلے سبب اپنی بیٹی کے پر کاٹے ہوتے تو آج دوسری بیٹی بدنامی سے بچ جاتی۔” فرحت بیگم نفرت اگل رہی تھیں۔
“میری ایک بیٹی اگر غلط راہ پر چل نکلی تو دوسری کو یونہی جونک دوں۔ عارب لندن میں رہتا ہے، وہاں جاکر اسنے میری بیٹی کو چھوڑ دیا تو؟ کم از کم ضمانت کے طور پر تو کچھ کریں۔۔۔۔تاکہ میرے دل کو سکون رہے۔” اور عارب خاموش سا ایک کونے میں بیٹھا تھا۔ جیسے کسی گہرے نقطے تک پہنچنے کی کوشش کررہا ہو۔ بھورے بال، جو پیشانی پر بکھرے تھے، اٹھی ہوئی مغرور ناک، آنکھیں تھکی ہوئی تھیں، رنگ دیکھنا مشکل تھا۔ لیکن اسکی رنگت بڑی کھِلی ہوئی سی تھی۔ سفید شکن زدہ سی شرٹ پہنے ہوۓ تھا۔ جس کے اوپری دو بٹن کھلے تھے، نیچے سیاہ پینٹس تھیں، قیمتی سیاہ جوتوں پر اس وقت زمانے بھر کی خاک تھی، کلائی پر مہنگی سپورٹس واچ پہنی ہوئی تھی۔
“داؤد زیادتی تو دونوں کے ساتھ ہوئی ہے۔ پھر تم بتاؤ ضمانت کے طور پر میرے بیٹے کو کیا دے رہے ہو؟” یہ فرحت بیگم تھیں ۔ اپنے بیٹے کیلئے وہیں لڑ رہی تھی۔ ورنہ نمیر سیال کو تو ایسی چپ لگی تھی کہ جیسے صدمے سے باہر ہی نہ نکلے ہو۔
“بہن تو اسی کی ہے نا، اگر وہاں جاکر اسے بھی کوئی اور پسند آگیا۔۔۔تو؟” انکی سفاکی پر سب نے دہل کر انہیں دیکھا۔ سکینہ سیال ایسی لڑکی نہ تھی، مگر حالات کے پیشِ نظر محض اپنی بہن کے غلط قڈم اٹھانے پر اسکا کردار بھی سب کی نظروں میں ڈانواں ڈول ہوکر رہ گیا تھا۔ اس سے قبل کے فرحت اپنی دلی بھڑاس کیلئے مزید گلفشانی کرتی ، عارب بول پڑا۔
“مجھے کوئی اعتراض نہیں ہے، اگر چاچو چاہتے ہیں کہ میں وہ گھر سکینہ کے نام کردوں تو ٹھیک ہے۔” پہلی دفعہ اسنے سَکِی٘نہ کے بجاۓ “سُکَی٘نہ کہا تھا۔ سب گھر والوں نے مڑ کر اسکے سپاٹ چہرے کو دیکھا۔ جہاں ڈھونڈنے سے بھی کوئی تاثر نہیں ملتا تھا۔ کونے میں بیٹھی، عروسی لباس میں ملبوس سُکَیْنہ سیال نے بے اختیار اسے دیکھا۔
“تم ہوش میں تو ہو عارب؟” فرحت بیگم بولیں۔ انہیں اپنے بیٹے کی عقل پر جیسے صدمہ پہنچا تھا۔
“جی! میں ہوش میں ہوں۔ سکینہ میرے گھر کی عزت ہے۔ جو ہوا وہ نہیں ہونا چاہیے تھا، لیکن اب وہ میرے نکاح میں ہے، چچا حق مہر میں، میں وہ گھر سکینہ کے نام کردوں گا۔” وہ سنجیدگی سے چچا کی طرف دیکھنے لگا۔ جن کے چہرے پر پہلے حیرانگی آئی، پھر انہوں نے قدرے بوکھلا کر سر اثبات میں ہلایا۔
“عارب ٹھیک کہہ رہا ہے فرحت، زلیخہ کی طبعیت ٹھیک نہیں ہے اور میرا خیال ہے ہمیں اب اس محفل کو برخاست کردینا چاہیے۔ ” نمیر سیال اٹھتے ہوۓ بولے۔ آہستہ آہستہ کرکے سب وہاں سے چلے گئے۔ اگر کوئی رہ گیا تو وہ دونوں تھے۔سنہری بھاری بھرکم لہنگے میں ملبوس، جس کا دوپٹہ ہلکے جامنی رنگ تھا، دوپٹے کے چاروں اطراف آدھے ہاتھ جتنا دھبکے کا کام تھا۔ عارب نے ایک نظر کونے میں بیٹھی، اپنی عجلت میں بنی دلہن کو دیکھا۔ جو آنکھیں پوری کھولیں اسے ہی دیکھ رہی تھی۔ پھر یک دم اسنے نظریں پھیریں۔ دل یوں دھڑکا جیسے ابھی باہر آجاۓ گا۔ یہ کسی جذبے کے تحت نہیں تھا، یہ عارب کی آنکھوں کی سردی تھی، جس نے اسے نظریں پھیرنے پر مجبور کردیا۔
“مجھ سے کوئی بہت زیادہ توقعات مت رکھنا سکینہ، میری لائف ہر طرح سے پرفیکٹ چل رہی ہے، وہاں مجھے کسی قسم کی کمی نہیں ہے۔” اسنے جیسے اسکے وجود کی طرف اشارہ کیا تھا کہ وہاں اسے سکینہ سیال جیسی ہزاروں مل سکتی ہیں، یا مل چکی ہیں۔ سکینہ حیرت سے اسے دیکھے گئی۔ اس سے کوئی جواب نہیں بن پڑا۔
“ تم میرے لیے ایک اضافی کردار ہو۔ ایک ایسا کردار جس کی میری زندگی میں گنجائش نہیں، لیکن فی الوقت مجبور ہوں، تمہین چھوڑ نہیں سکتا۔” وہ ٹھہرا ، پھر بولا۔
“ کوشش کرنا وہاں جاکر میرے لیے مسائل پیدا نہ ہو۔” یہ کہہ کر وہ اٹھا، چند قدم اٹھا کر اسکے قریب آیا، اور جیب سے ڈبیہ نکال کر اسکی گود میں پھینکی۔ اسکی بے یقینی سے کھلی آنکھوں میں دیکھتے ہوۓ اسنے سر جھٹکا اور باہر کی طرف قدم بڑھاۓ۔سکینہ سرد سی اسکی چوڑی پشت دیکھنے لگی۔ اسکے الفاظ اس کے ذہن و دل پر زیروبم گراچکے تھے۔ قدرے ٹھہر کر، اپنے آپ کو سنبھالتے ہوۓ اسنے لب ہلاۓ۔
“سنو عارب!” اسکا انداز بڑا سرد اور ٹھنڈا تھا۔ عارب کے چلتے قدم رکے۔ ہلکی سی گردن کو موڑ کر اسکی طرف دیکھا۔
“لندن جانے سے پہلے ضروری ہے کہ میں تمہاری بعض خوش فہمیوں کو ختم کردوں۔” وہ اٹھی، آنکھیں آنسوؤں سے بھری ہوئی تھیں۔ آواز قدرے بھاری تھی، مگر مضبوط تھی، دلیروں کی طرح وہ اسکے سامنے آکھڑی ہوئی۔
“میں کوئی عام لڑکی نہیں ہوں، اور یہ بات تم سے بہتر اس دنیا میں ، شاید ہی کوئی جان سکے۔”
“میں جانتی ہوں رونے سے مرد اٹریکٹ ہوتے ہیں۔حالانکہ یہ اٹھارویں صدی کی ٹرک ہے، مگر دیکھو آج بھی کام کررہی ہے۔” وہ مضبوط انداز میں بول رہی تھی۔عارب سرد نظروں سے اسکے چہرے کو دیکھے گیا۔
“لیکن یقین کرو، میں ایسی لڑکی نہیں ہوں۔ محض اسلئے رونا کہ کوئی مرد میری طرف اٹریکٹ ہو، یہ میرے لیے مرنے کا مقام ہے۔ سکینہ سیال اپنی عزت کرنے والی لڑکی ہے۔اگر تمہاری زندگی میں میں ایک اضافی کردار کی حیثیت سے جارہی ہوں تو یقین کرو ، تم بھی۔۔۔میری زندگی کا ایک ایسا کردار ہو، جو ان چاہا ہے، بوجھ ہے، اور زبردستی میرے سر پر مسلط کیا گیا ہے۔ ” عارب کی نظروں میں خون اترنے لگا۔
“اسلئیے ضروری ہے کہ مسٹر عارب سیال میں آپ سے کہہ دوں کہ مجھ سے کچھ زیادہ توقعات رکھنے کی ضرورت نہیں، اگر آپ ایک قدم مجھ سے دور ہونا چاہتے ہیں تو یقین کریں میں پہلے ہی آپ سے دس قدم کے فاصلے پر کھڑی ہوں۔۔۔اور میں اپنی اتنی عزت کرتی ہوں کہ یہ راستہ جب بھی ختم ہوا، آپ کی طرف سے ہوگا۔ میری طرف سے نہیں!” اسکی آنکھوں میں آنکھیں ڈال کر وہ غرارہی تھی۔ عارب لب بھینچ کر اسے دیکھے گیا۔ سکینہ نے ہاتھ میں پکڑی ڈبیہ اسکے سینے پر پخٹنے والے انداز میں رکھی۔ اگر وہ بروقت نہ پکڑتا تو ڈبیہ لڑھک کر نیچے گرتی۔
پریشان ہونے کی ضرورت نہیں، یہ لوگ کزنز ہیں۔ کل تک سو فیصد نہیں تو تیس فیصد بات کو بھول بھال جائیں گے۔ اور ڈھیٹوں کی طرح ایک دوسرے کو بلانے لگیں گے۔ایسے مرنے جیونے ان لوگوں میں پہلے بھی بڑی دفعہ ہوچکے تھے۔ اس دفعہ کشیدگی کچھ زیادہ تھی۔ اس کی وجہ پھر کبھی۔ لیکن اگلے دن سے ہی انہیں ایک ایک پل کیلئیے ایک دوسرے کی ضرورت پڑنے والی ہے۔ اس لڑائی سے کچھ بھی اخذ کرلینا حماقت ہے۔
۔_