Shab E Gham Ki Seher by Zainab Khan Episode 8

یہ منظر کراچی کی ایک چال سوسائٹی کا تھا۔ جہاں بڑی بڑی تین چار عمارتیں آمنے سامنے کھڑی تھیں۔ انکی حالت نہ  تو بہت خستہ حال تھی، نہ ہی بڑی جدید۔۔۔صفائی کی بات کریں تو عمارتوں کے سامنے والے صحن، برآمدے، انکے آگے بنی سیڑھیاں صاف تھیں۔ کہیں پانی کے پمپ کے پاس کھڑی خواتین جھگڑ رہی تھیں۔ تو کہیں چند بچوں کے رونے کی آواز نے آسمان سر پر اٹھا رکھا تھا۔ حجام کی دکان پر لوگوں کا رش تھا، وہی  کاشی کی ہٹی پر اکا دکا کھڑے نیند سے جھولتے لڑکے، دہی لینے میں مصروف تھے۔
“جب میں پہلے آئی تھی تو پانی بھی میں ہی لونگی، زیادہ زبان چلانے کی ضرورت نہیں ۔” سانولی سی عورت، سیاہ اور سرخ لباس پہنے اپنے سامنے والی عورت سے بحث و تکرار کررہی تھی۔
“تیرے باپ کا نل ہے، سرکاری ہے۔۔سرکاری، یہاں تیری نہیں چلے گی۔ ” سامنے والی اسی کے لہجے میں بولی تھی۔
“میری نہ چلے، تیری بھی چلنے دی تو جمنہ نہ کہیو!” چمک کر بالٹی اٹھائی، اور رکھ کر سیمنٹ کی تھڑی پر دے ماری۔” یہ لے، ڈال پانی اب۔”  پلاسٹک کی خستہ حال بالٹی تین چار ٹکڑوں میں بکھر گئی۔ وہ تو جیسے ٹوٹنے کے بہانے ڈھونڈ رہی تھی۔ پھر وہاں ایک دنگل شروع ہوا تھا۔ آتے جاتے لوگ دیکھتے ، پھر آگے بڑھ جاتے۔ دہی لینے آۓ لڑکے وہی کھڑے ہوکر دیکھنے لگے۔ جمنہ کی بیٹی جو کب سے رو رہی تھی اب منہ میں انگلی ڈالے ٹکر ٹکر ماں کو گتھم گتھا ہوا دیکھ رہی تھی۔
تھوڑا اوپر جاؤ، دوسری منزل پر تو وہاں ایک اپارٹمنٹ کے کمرے کا منظر اس وقت انتہائی گھٹن زدہ محسوس ہورہا تھا۔ یا آئینے کے سامنے کھڑی دانیہ کو لگ رہا تھا۔ جاتی گرمیاں بھی اس گھٹن کو ختم نہ کرپارہی تھی۔ اپنے بال بناتے ہوۓ اسکی نظر آئینے سے نظر آتے اپنے شوہر کے وجود پر پڑی تھی۔ جو دنیا و مافیہا سے بے خبر پڑا سورہا تھا۔ اوندھے منہ لیٹے اسے اردگرد کی جیسے خبر ہی نہ تھی۔ یہ بیہوشی نیند کے باعث تو تھی ہی لیکن زیادہ خماری اس مشروب کی تھی جو رات کے ڈھائی بجے وہ پی کر آیا تھا۔
جیسے ہی دانیہ نے دروازہ کھولا تو تیمور کو نشے میں غرق دیکھ کر دل جیسے ڈوب سا گیا۔ خوابوں کے محل کی پہلی دیوار چھن سے گری تھی۔ اسے غصہ آیا ، بے تحاشہ۔ اسی غصے میں اسنے تیمور کی اچھی خاصی بے عزتی کر دی تھی۔  اسکا خیال تھا کہ وہ اسکے دیر سے آنے پر ناراضی دکھاۓ گی اور آگے سے تیمور اسکے نخرے اٹھاۓ گا۔ لیکن ایسا نہیں ہوا۔ جلد ہی دانیہ داؤد سیال کا وہ خوابوں کا محل چکنا چور ہوتا گیا۔ جب تیمور کے تھپڑ، اور گھونسیں پڑنے لگے۔وہ شدید صدمے اور بے یقینی کی کیفیت میں اس سے مار کھاتی رہی، دل جیسے بند ہوگیا تھا۔ آنکھ سے ایک قطرہ آنسو نہ گرا تھا۔ حالانکہ دل کی کیفیت یہ تھی کہ وہ چاہتی تھی وہ روۓ، اس کا ظلم سہتی وہ ایسی پتھرائی کہ ہر احتجاج چھوڑ دیا۔
رات کا صدمہ ایسا کربناک تھا کہ بے اختیار آنکھ سے گرنے والے آنسو نے اسے حال میں پٹخا۔ وگرنہ وہ تو نجانے کن خیالوں تک پہنچ چکی تھی۔ اپنے وجود پر نگاہ ڈالی تو بے اختیار ایک جھرجھری سی لی۔
کیا خواب اس قدر خوبصورت سراب کی شکل اوڑھتے ہیں؟
کیا خوابوں کی بظاہر شکل ایک خوبصورت محل کی طرح کی ہوتی ہے، جس کے اندر داخلہ تو مل جاتا ہے لیکن واپسی ممکن نہیں ہوتی۔ غائب دماغی، اور کانپتے ہاتھوں سے اسنے کنگھی  ڈریسنگ پر رکھی۔ اور خود باہر آگئی۔
دونوں خواتین ابھی بھی لڑ رہی تھیں۔ بس فرق یہ تھا کہ اب شاید انکے گھر والے انہیں قابو کرچکے تھے۔ دور دور کھڑے ہوکر نجانے کون کونسی گالیاں ایک دوسرے کو دے رہی تھیں۔ دانیہ کو ایک عجیب سی بے چینی نے آگھیرا تھا۔ کیا وہ بھی آنے والے سالوں میں ایسی ہوجاۓ گی۔۔۔۔۔ان عورتوں کی گالیوں میں اور تیمور کی گالیوں میں کوئی فرق نہ تھا۔وہ مرد تھا اسلئے تھوڑی کھل کر دے رہا تھا اور یہ عورتیں تھیں یہ کبھی “کتی کمینی” پر آجاتی ، کبھی وہی اندازِ تخاطب! 
اسے شدت سے اپنے اٹھاۓ قدم کے غلط ہونے کا احساس ہوا تھا۔ تیمور کی بظاہر شخصیت ایسی تھی کہ یونی کی آدھی سے زیادہ لڑکیاں اس پر مرتی تھیں۔ لیکن ظاہر کو دیکھنے والی آج دانیہ سے اسکا باطن پوچھتی۔ جس رشتے کو اسنے خوابوں کی دنیا میں نجانے کتنا اونچا مقام دے رکھا تھا، جس کا ایک ایک لمحہ اسکے لیے زندگی بننے والا تھا۔ وہ رشتہ محض ایک سراب تھا۔ وہ اسکے لیے ایک ایسی عورت کی طرح تھی جسے اسنے چند دنوں کیلئے، کسی کوٹھے سے لیا تھا۔ جیسے ہی  محبت کا  بھوت اترتا وہ اسے چھوڑنے والا تھا۔
__________