Shab E Gham Ki Seher by Zainab Khan Episode 8

زندگی کی گاڑی جوں کی رفتار سے گزر رہی تھی۔ یا آجکل اسے لگ رہا تھا ۔ کیونکہ پاکستان میں ایسا کوئی ہفتہ نہیں تھا گزرتا تھا جب سکینہ سیال کوئی نیا ایڈونچر نہ کرتی تھی۔ کبھی دل اداس ہوا تو گلی کرکٹ میں بچوں کے ساتھ بارہ بارہ اووذ کا میچ رکھ لیا، جو ہفتہ چلتا تھا۔ یعنی پورا ہفتہ بغیر بور ہوۓ گزرجاتا۔ کبھی اپنے ہی ٹاؤن کے باہر باغیچے کی کانٹ چھانٹ کرنا شروع کردیتی۔ اس سے بھی بورئیت ختم ہوجاتی۔ کبھی کچن کا رخ کرتی اور ہر روز ایک بڑا سا اہتمام کرتی۔ پھر جو کھانا ہوتا اسے آدھے سے زیادہ قریبی مسجد میں قرآن پڑھنے والے بچوں کو بھیج دیتی۔ ایسی چھوٹی چھوٹی وہ مصروفیات ڈھونڈ لیتی تھی۔
لیکن  اب چونکہ شادی ہوچکی تھی اور زندگی ایک اجنبی ملک میں لے آئی تھی۔ اب ایڈونچر تھوڑا مختلف ہونا چاہیے تھا۔ شادی سے قبل بھی حجاب لیتی تھی۔ لیکن اسکی شدید خواہش یہی ہوتی تھی کہ کوئی ایسا گھر ہو جہاں کوئی غیر محرم نہ ہو۔ اگر ہو تو عورتیں ہو۔ اسے ہمیشہ سے ایسا گھر چاہیے تھا جہاں ملازمین بھی عورتیں ہو۔ اب یہاں تو ایسا کوئی سین ہی نہیں تھا۔ لہٰذا یہاں وہ اپنی ایک خواہش پوری کرسکتی تھی۔ وہ اپنی مرضی سے تیار ہوسکتی تھی۔ میک اپ کرنا، نت نئے کپڑے پہننا، بال کھولنا۔۔۔یہ اسکی شدید خواہشیں تھیں۔ جو پہلے تو نہیں کرسکتی تھی۔ کیونکہ وہاں مالی بھی مرد تھا، گیٹ گیپر بھی مرد تھا، اور کام والی کا شوہر جو اسکے ساتھ کبھی کبھی گھر بھی آتا تھا۔ ایسے میں وہ اپنی اس خواہش کو پورا نہیں کرسکتی تھی۔ یہاں ایسا کچھ نہ تھا۔ یہاں صرف عارب تھا تو اسکو بھلا کیا اعتراض ہوگا اسکے تیار ہونے سے۔ ویسے بھی آدھے سے زیادہ حجابی عورتوں کی خواہش ہوتی ہے کہ وہ بھی ساڑھیوں پر، بال کھولیں۔ جدید ڈیزانر کپڑوں کو پہنیں۔ سلاد کا چمچ منہ میں لے جاتی وہ یہی سکیم لڑا رہی تھی ۔
 اب یہاں تو پورا ماحول میسر تھا۔
عارب بھی محرم تھا، یعنی کوئی گناہ نہیں۔ ارے واہ!
اب یہاں پر وہ اپنے سارے فیشن پورے کرسکتی تھی۔ ناخن  بڑھانے کی عادت نہ تھی۔ نہ ہی نیل پالش کبھی لگائی تھی۔ ویسے بھی اسے اپنے ناخن سادہ زیادہ پسند تھے، نیل پالشز سے ناخنوں کا گلابی پن ختم ہوجاتا ہے۔ اسکے تو بڑے پیارے لمبی انگلیوں والے ہاتھ تھے۔ جن کی ہڈیاں اور نسیں بڑی خوبصورت لگتی تھیں۔ ان پر کسی زیب و زینت کی ضرورت نہ تھی ۔
اسنے گہری سانس بھری، سلاد کا باؤل پیچھے کرتے ہوۓ پرسوچ انداز میں کرسی کی پشت کو ٹیک لگالی۔ یعنی کوئی جگاڑ کرنا چاہیے تھا۔ اگر اللہ نے موقع فراہم کیا تھا تو دو دو ہاتھ سے اسکا فائدہ اٹھایا جانا چاہیے۔ چند پل پرسوچ نظروں سے شیشے کے پار مختصر سے لان کو دیکھتی رہی۔ پھر ذہن میں ایک جھماکا سا ہوا۔ فوراً اٹھی اور اندر کی طرف بڑھ گئی۔
اپنی سیف کا پٹ کھولا، دانیہ کے سارے جدید ڈیزائنر سوٹ ممانی بیگ میں پیک کرواکے بھیج چکی تھیں۔ جب الماری میں یہ سوٹ لگاۓتھے تو اندازہ نہیں تھا کہ کبھی وہ انہیں پہنتی۔ لیکن اب اتنے مہنگے جوڑے وہ محض دانیہ سے ناراضی کے باعث پھینک تو نہیں سکتی تھی نا۔ ہونہاں!
“میں تو پہنوں گی۔۔۔یہاں کچھ ڈیزائنر ہیں، عارب سے بات کرکے ایک آدھ جوڑا اور لے لونگی۔ پھر ویسٹرن ڈریسز بھی تو لینے ہیں۔” آئیڈیا اچھا تھا۔ اسنے الماری کا پٹ بند کیا اور اپنے کمرے سے باہر نکل آئی۔ اب رخ عارب کے کمرے کا تھا۔ دروازہ ہلکہ سا ناک کیا اور اندر آگئی۔ عارب واشروم سے نکل رہا تھا۔ گول گلے والی سفید شرٹ پر گلے میں تولیہ ڈالے، ایک سرے سے سر رگڑتا وہ ٹھٹھکا تھا۔
“خیریت؟” سکینہ کو کمرے میں دیکھ کر وہ ایک پل کو  رکا ۔
“ہاں۔۔۔دراصل مجھے ایک بات کرنی تھی تم سے۔” دوستی کے بعد آپ جناب کا تکلف کرنا وہ گوارہ نہیں سمجھتی تھی۔ عارب نے مسکراہٹ دباتے ہوۓ سوچا۔
“جی کہیں!” اب وہ آئینے کے سامنے جاکھڑا ہوا تھا۔ سکینہ ایک طرف رکھی کرسی پر بیٹھ گئی۔
“مجھے تھوڑی شاپنگ کرنی تھی، کیا تمہیں یہاں کسی  انڈین ڈیزائنر کا پتا ہے؟” وہ پرسوچ سی اسے دیکھ رہی تھی۔ عارب ٹھٹھک کر مڑا اور قدرے الجھن سے پوچھا۔
“کوئی فنکشن ہے؟”
“ارے نہیں، دراصل۔۔۔دیکھو اگر میں گھر میں میک اپ وغیرہ کرلیا کروں، بال کھول لیا کروں۔۔۔تو تمہیں کوئی اعتراض تو نہیں ہوگا نا؟” وہ اسے اجازت نہیں مانگ رہی تھی۔ مکمل منصوبے کے تحت اسے آگاہ کررہی تھی۔ بس طریقہ زرا مختلف تھا۔ عارب تحیر سے اسے دیکھتا رہا۔ پھر  مڑ کر ڈریسنگ سے برش اٹھا کر بالوں میں پھیرنے لگا۔
“بولو بھی!”
“نہیں۔۔مجھے بھلا کیا اعتراض ہوگا۔ ویسے بھی تم اپنی خواہش پوری کروگی، میری مرضی یا اجازت کی تمہیں کیا ضروت۔” اسنے ہلکے سے کندھے اچکاۓ تھے۔ پھر قدرے رک کر اسکے چہرے کو فوکس میں لیتے ہوۓ بولا۔ ”  کوئی اور وجہ تو نہیں ہوگی نا؟” سوال، اور سوال کرنے کا انداز دونوں ہی معنی خیز تھے۔ سکینہ جو خیالوں میں گھم اسے ہی دیکھ رہی تھی ایک دم سیدھی ہوئی۔