”نایاب!!“زرناب پھپھو جیسے ہی عصر کی نماز پڑھ کر فارغ ہوئیں قرآنی آیات کا ورد کرتی اس پر پھونکنے کے بعد اسے پکار لیا تھا ۔۔وہ بستر پر رکھے کپڑے سمیٹ رہی تھی۔۔۔
”جی ماما!“اس نے تابعداری سے جواب دیا ۔۔
”بیٹا تمہارے ماموں کے دوست نے آج پھر تمہارے لئے بات کی ہے۔۔۔شاہ ویر بھائی پوچھ رہے تھے مجھ سے ۔۔اگر تم کہو تو اگلے ہفتے انھیں کھانے پر بلا لیں۔۔۔تمہارے نانوں نے بھی کہہ دیا ہے اگر تم ہاں کرتی ہو تو لڑکے کو دیکھ لینے میں کیا حرج ہے ۔۔اور پھر لڑکا بھی اگلے ہفتے ہی واپس پاکستان آ رہا ہے ۔۔میرے خیال سے اب تمہیں سوچنا چاہیے اس متعلق ۔۔! تمہارے ماموؤں کو انکار کرنا اچھا نہیں لگ رہا مجھے ۔۔تم کیا کہتی ہو۔۔۔“وہ مضطرب سی بستر پر بیٹھ گئیں ۔۔
ان کی بات پر نایاب کے ہاتھ ساکت ہوئے تھے۔۔وہ جانتی تھی اس کے دل کی خواہش کبھی پوری نہیں ہو سکتی ۔۔اور میر ذکاء ۔۔وہ بھلا کہاں تھا اسکے بخت میں۔۔۔مگر دلِ ناداں سنبھل تو جاتا۔۔۔اس حقیقت کو مان تو لیتا۔۔پھر شاید کسی اور کے لئے دل کو راضی کر لینا آسان ہوتا۔۔مگر ہر بار انسان جو چاہے وہ ہو جائے یہ ضروری تو نہیں ۔۔۔
”بیٹا میں بھی کیا کہوں ۔۔تم جانتی ہو تمہارے ماموؤں کے کتنے احسانات ہیں ہم پر۔۔بچپن سے اب تک کسی چیز کی کمی نہیں ہونے دی ہمیں ۔۔اور تمہاری ممانیوں نے بھی کس قدر حسن سلوکی سے ساتھ دیا ہے ہمارا ۔۔سب تمہارے فرض سے سبکدوش ہونا چاہتے ہیں ۔۔کہ کہیں کل کو کوئی بات نہ کرے ۔۔میں بھی یہی چاہتی ہوں تمہارے ماموؤں نے دیکھ بھال کر ہی فیصلہ کیا ہوگا ۔۔تو کیا میں ہاں کر دوں انھیں مہمانوں کے لیئے ؟“وہ سوالیہ نظروں کو اس کے جھکے چہرے پر جمائے مستفر تھیں۔۔نایاب کی آنکھوں میں نمی سمائی ۔۔حلق میں گولا اٹکا۔۔
”جی ماما جیسا آپ کو ٹھیک لگے.“اس نے کہتے ہوئے تہہ شدہ کپڑوں کو اُٹھایا اور تیزی سے رخ موڑ گئی ۔۔آنسؤوں کو چھپانے کا اچھا بہانا تھا۔
”مجھے پتا تھا تم مجھے کسی مشکل میں نہیں ڈالو گی ۔۔!“وہ خوشی سے کہتی ہوئیں اسے دعائیں دیتی کمرے کو خالی چھوڑ گئیں ۔۔الماری کے سامنے کھڑی نایاب نے بھرائے دل سے مڑ کر انھیں دیکھا اور پلکوں کی نمی جھٹک دی۔۔
بعض لوگ ہمارے لئے نہیں ہوتے ۔۔بس اتنی سی بات تھی اور دل نے مان لی تھی ۔۔وہ خاموشی سے اپنی محبت سے کنارہ کر لینے پر آمادہ ہو گئی تھی ۔
•••••••••••
