دوپہر کا کھانا کھانے کے بعد سب آرام کرنے کمروں میں گھس چکے تھے۔۔میر ولا کا ماحول اس وقت بہت پرسکون فضا میں ڈھلا ہوا تھا ۔۔تینوں ماموں کھانے کے بعد آفس میں ایک میٹنگ اٹینڈ کرنے گئے تھے ۔۔باقی سب اپنے اپنے ذاتی کاموں میں حصہ ڈالنے میں مصروف تھے۔۔
دادو دوپہر کے کھانے کے بعد اپنے کمرے میں بیٹھے شام کی چائے تک کتاب پڑھنے کے عادی تھے ۔۔نایاب کچن میں گھسی دن کے برتن دھو رہی تھی ۔۔بلال اور زوار ایک کمرے میں بیٹھے جانے کس راز ؤ نیاز میں مگن تھے۔۔ذیب حسبِ معمول برآمدے میں بیٹھی یوگا کر رہی تھی۔۔جبکہ مہر کاؤچ پر براجمان سر نیہواڑے بیٹھی تھی ۔۔چہرے پر گرین ماسک اور آنکھوں پر کھیرے کے ٹھنڈے قتلے رکھے گنگنا رہی تھی۔۔ذکاء نے بھرپور نیند لینے کے لئے ابھی ہی سر تکئیے پر رکھا تھا ۔۔کل شام کا کام کے سلسلے میں شہر سے باہر نکلا اب جا کر واپس آیا تھا ۔۔اس کا ارادہ سو کر تھکان اُتارنے کا تھا ۔۔
سب بے حد سکونت پذیر ہوئے بیٹھے تھے ۔۔جب یک دم ایک زوردار دھماکے کی دل دہلا دینے والی آواز نے سب کے کانوں کی گھنٹیاں بجا دی تھیں۔
دادو کے ہاتھ سے کتاب چھوٹی۔۔نایاب کے ہاتھ سے برتن گرا۔۔ مہر کی دائیں آنکھ سے کھیرے کا ٹکڑا پھسلا ۔۔ذیب اپنے یوگا اسٹیپ سے ہل کر رہ گئی ۔بلال زوار کے کان الگ سائیں سائیں کرنے لگے ۔۔جبکہ ابھی ہی غنودگی میں گیا ذکاء اس جھٹکے سے دہل گیا تھا ۔۔ایک دم اس کے اعصابوں پر طیش سوار ہوا۔۔سب کو پتا تھا میر ولا میں وقت بے وقت کس کے فارمولوں سے دھماکے ہوتے ہیں ۔۔ایک ہی تھا کمسٹری اسٹوڈنٹ میر ذیشان! جس کے فارمولے سے آج پھر کیمیکل ری ایکشن ہو گیا تھا ۔۔۔جو بلاسٹ کی صورت سب کے اوسان خطا کر گیا تھا ۔۔۔
”شانی!!“اس نے تلملاتے ہوئے مٹھی مسل کر تکیہ دور اچھالا اور برق رفتاری سے بستر چھوڑ کڑے تیوروں سے باہر کی سمت لپکا تھا ۔۔
”یہ آئن سٹائن کا چیلا نہیں سدھرنے والا!“زوار نے گود میں رکھا کشن ایک طرف پھینکا اور تپے ہوئے بلال کے ہمراہ کمرے سے نکلا تھا ۔۔
”آج تو یہ نہیں بچے گا.“ مہر نے چڑ کر دوسری آنکھ سے بھی کھیرا اتارا اور دھپ دھپ کرتی ہال کی جانب روئے سخن کیا۔۔
”کتنی بار کہا ہے اسکو گھر میں دھوم دھماکے کرنا منع ہے ۔۔“ذیب نے آؤ دیکھا نہ تاؤ اٹھ کر شانی کی شامت بجانے نیچے لپکی تھی۔۔۔
نایاب نے ناگوار آواز سے زمین پر قلا بازیاں کھاتے برتن کو پکڑا اور بے ساختہ کچن سے نکلی تھی۔۔۔جیسے ہی سب تیر کی طرح چہروں پر تناؤ لیئے ہال میں جمع ہوئے ویسے ہی اپنی اسٹڈی سے کچھ مایوسی اور کچھ متاسف کیفیت میں مبتلا میر ذیشان پھر اپنی ناکامی کے باعث سر جھکائے باہر نکلا تھا ۔۔۔کمرہ کھلتے ہی پوری اسٹڈی میں دھواں بھرا ہوا نظر آیا تھا ۔۔سب ہی اسٹڈی کے سامنے دائروں کی صورت کڑے تیوروں اور تادیبی گھوریوں سے نوازتے ہوئے انتقام جو انداز میں اس کے منتظر کھڑے تھے۔۔
”پھر سے کیمیکل ری ایکشن ؟؟“زوار نے افسوس سے کہتے پہل کی تھی۔۔
”تم جب ہر بات میں ہی فیلر ہو تو کیوں کرتے ہو گھر میں ایسے ایکسپیرمنٹ ۔۔ “ذکاء کا بس نہ چل رہا تھا اپنی نیند اڑنے کے بدلے میں اس کی گچی مروڑ ڈالے۔۔
”تمہیں دادو نے پچھلی بار منع کیا تھا نا آئندہ سے گھر میں تم کوئی فارمولا نہیں بناؤ گے ۔۔“ذیبی نے اپنے بھائی کو سرزنش کی تھی۔۔
”شانی تمہیں کچھ ہوا تو نہیں ۔۔تم ٹھیک ہونا؟“نایاب کو بس اس کی فکر ہوئی تھی۔۔
”کیا جمگھٹا لگایا ہوا ہے یہاں ؟“دادو کی سخت آواز پر سب نے اچھل کر مڑتے ہوئے انھیں کمرے سے نکل کر باہر آتے دیکھا تھا ۔۔ذیشان کا دل بیٹھا ۔۔دادو پہلے ہی اسکی آرمی جوائن نہ کرنے پر خفا تھے۔۔اور ایسے میں آئے دن اس کی شکایات انھیں ملتی رہتی تھیں ۔۔۔اب تو گیا وہ.
سب نے راستے سے ہٹ کر تابعداری سے انھیں آگے آنے کا راستہ دیا تھا ۔ ان کی کڑک دار شخصیت دیکھ شانی کو چھپنے کی مناسب جگہ نہ ملی ۔۔
”اس بار کس کیمیکل کا غلط استعمال کیا ہے تم نے؟“دادو کی نظم و ضبط سے اکڑی ہوئی گردن اور تیکھے چھتوں اٹھے دیکھ شانی نے تھوک نگلا تھا ۔۔جبکہ باقی کسی کی جرات نہیں تھی دادو کے سامنے چوں چراں بھی کرلے۔۔۔
”دادو وہ ہائڈروجن پیروکسائیڈ اور yeast۔!“
اس نے سر جھکائے غلطی کا اعتراف کیا تھا ۔۔سب نے مشینی گردن موڑ کر ہونق نظروں سے اسے دیکھا۔۔۔
”دادو Hydrogen peroxide (H2O2) اور yeast کو ملانے سے ایک کیمیکل ری ایکشن ہوتا ہے جس میں آکسیجن گیس (O2) ریلیز ہوتی ہے۔۔
فارمولا ہے۔۔
H2O2 (Hydrogen Peroxide) + Yeast (Saccharomyces cerevisiae) → O2 (Oxygen Gas) + H2O (Water)
اس ری ایکشن میں آکسیجن گیس اتنی تیزی سے ریلیز ہوتی ہے کہ یہ بلاسٹ یا ایکسپلوشن کا سبب بن سکتا ہے ۔۔آئم سوری میں کچھ معلومات جمع کرنا چاہتا تھا اس فارمولے کی ریسرچ سے۔۔۔“وہ شرمندہ تھا۔۔ان سب کو کیا دکھنی تھی اس کی شرمندگی ۔۔وہ تو منہ کھولے اسے گھر میں اس طرح کے خطرناک فارمولے کو کرنے پر بونچھکے کھڑے تھے۔۔۔
”واہ واہ کیا بات ہے سر آپکی!“زوار کو سب سے پہلے ہوش آیا تھا ۔۔تالیہ بجا کر اس کی حوصلہ افزائی کرنے کی اداکاری کرتے تپ کر اس کی سمت آیا ۔۔
”یہ کس نے آئیڈیا دیا تھا تمہیں ۔۔گھر میں یہ فارمولا کر کے گھر والوں کا جینا حرام کرنے کا۔۔؟“زوار کا بس نہ چل رہا تھا ایک گھونسا تو جڑ ہی دے اسے۔۔اگر دادو وہاں موجود نہ ہوتے تو یقیناً وہ یہی کرتا۔۔۔
”شرم کرو شانی۔۔گھر میں کون اس طرح کے خطرناک کام کرتا ہے۔۔خدانخواستہ کوئی بڑا نقصان ہو جاتا تو.“دادو نے ضبط سے سرخ پڑتے چہرے سے اسے جھڑکا تھا ۔۔
”اور دادو ذرا یہ بھی پوچھیں اس سے یہ سیدھی طرح اپنی سپلی کی تیاری کیوں نہیں کرتا یہ ناکام فارمولوں اور ریسرچ کی جان چھوڑ کے..“ذکاء کا پہلا وار ہی بڑا زبردست پڑا تھا ۔۔دادو کو پھر سے اس کی سپلی یاد دلا وہ جنگ عظیم کی شروعات کر چکا تھا ۔۔شانی نے دانت پیس کر اس فساد کی جڑ کو گھورا۔۔جو ہر بار دادو کا دھیان اس کی سپلی پر لے آتا تھا ۔۔۔دادو کے چھتوں پھر اٹھے تھے۔۔اور ذکاء نے شانی کی گھوریوں کو نظر انداز کر دیا تھا ۔۔وہ اپنا کام کر چکا تھا ۔۔اس کی پچھلی حرکت کا بدلا وہ لے چکا تھا ۔۔شانی نے من ہی من اسے وارننگ دی تھی ۔۔
”تم نے ابھی تک سپلی کی تیاری نہیں پکڑی ۔۔؟“انھوں نے آنکھیں ماتھے پر سجا غصے سے پوچھا ۔۔شانی کی گھگھی بندھ گئی ۔۔
”دادو یہ جائے گا پرسوں فارم فل کرنے ۔۔زوار نے اس کا دفاع کیا تھا ۔ ۔ بھلے سے شانی کی حرکتوں سے عاجز تھا ۔مگر اس کی حمایت کرجاتا تھا۔۔
”اور ایک بات بتاؤ شانی یہ ہر بار غلط فارمولے تیار کر کے تھکتے نہیں تم ۔۔ایک کام کرو کسی اچھے فارمولے پر کام کرو ۔ !“زوار نے ماحول کو ہلکا پھلکا کرنے کے لئے اسے ہمدردانہ مشورہ دیا ۔
”ہاں میں بھی وہی سوچ رہا تھا زوی۔۔تم نے تو میرے دل کی بات کر دی۔۔۔۔لیکن اس کے لئے مجھے ایک اسسٹنٹ چائیے ۔۔تم بنو گے میرے اسسٹنٹ ؟؟“وہ فوراً ساری باتیں بھول بھال کر خوشی سے کہتا اترا کر اسے آفر کر رہا تھا ۔۔وہ بوکھلایا ۔۔جبکہ دادو کی لاٹھی ہوا میں لہرائی تھی ۔۔
”میں بنتا ہوں تمہارا اسسٹنٹ.“
”نہیں بوڑھا اسسٹنٹ نہیں چائیے دادو!“وہ کہہ کر لاٹھی کے وار سے بچتا ہوا سر پٹ دوڑ لگا چکا تھا ۔۔اس کے بھاگتے ہی سب کے منہ سے قہقہوں کی آوازیں میر ولا کی دیواروں سے ٹکرائی تھیں ۔۔دادو کے ضعیف چہرے پر بھی محبت بھری مسکراہٹ در آئی تھی۔۔۔
سختی اور ناراضگی اپنی جگہ مگر انھیں اپنی ہر اولاد بے حد عزیز تھی۔۔۔مسکراہٹوں کی گونج نے ہر ایک ہی روح کو تازگی بخشی تھی۔۔ہنستے ہوئے نایاب مڑی تو مبہوت رہ گئی ۔۔ذکاء پیٹ پر ہاتھ رکھے ہنس رہا تھا اور اسے لگا تھا وہ تمام عمر کے لیے اس ہنسی میں قید ہو جائے گی ۔۔۔محویت سے اسے تکتے ہوئے بے ساختہ اس کے لبوں سے ہنسی سمٹی تھی ۔۔وہ اتنا ہنستا نہیں تھا ۔۔مگر بےشک ہنستے ہوئے پیارا لگتا تھا ۔ وہ اس کا نصیب نہیں تھا۔۔اسے خود کو اس تکلیف سے بچانا چاہیے ۔۔اسے موو آن کرنا چاہیے ۔۔وہ یک دم اس کے کھلکھلاتے چہرے سے نظر ہٹا پلٹ کر کچن میں غائب ہو گئی تھی۔۔۔شاید اسے ذکاء کے سامنے اتنا نہیں رہنا چاہیے ۔۔اسے جلد از جلد شادی کر کے یہاں سے بہت دور چلے جانا چاہیے ۔۔جہاں نہ ذکاء ہو اور نہ اس ناکام محبت کا غم۔۔۔
•••••••••••••
