وہ بے کیفی سے ڈریسنگ ٹیبل پر اپنے کچھ چند کاسمیٹک پروڈکٹس ترتیب سے ایک طرف رکھ رہی تھی۔۔ذکاء کی تمام اشیاء دوسری طرف احتیاط سے رکھ کر اب اس کا سارا دھیان اپنے سامان پر تھا ۔۔پیچھے بستر کی پائنتی پر ٹانگیں لٹکائے کہنی کے بل نیم دراز شانی اس کی تمام نفاست کو ملاحظہ کر رہا تھا کہ اچانک اسے جانے کیا خیال آیا تھا ۔۔ایک دم اٹھ کر بیٹھا ۔۔
”نایاب ذکی نے تمہیں منہ دکھائی میں کیا دیا؟“اس کے متجسس اور غیر متوقع سوال پر وہ سٹپٹا سی گئی۔۔دل میں کچھ چبھا تھا۔۔شاید یہ سوال ۔۔یا اس سے مانگا گیا جواب ۔۔
”کچھ بھی نہیں.“پرفیوم کی شیشی کو باقی اشیاء کے درمیان رکھتے ہوئے اس نے مدھم سا جواب دیا تھا ۔۔شانی نے اس کے سرسری لہجے کو دیکھ کر منہ بنایا ۔۔
”ہے ہی کھڑوس ۔۔اسے کیا پتا یہ لمحہ کتنا انمول ہوتا ہے ۔۔جب آپ اپنی بیوی کو منہ دکھائی کا تحفہ دیتے ہیں اور بیوی ساری زندگی اسے سنبھال کر رکھتی ہے۔۔ بہت غلط کرتا ہے ویسے ذکاء ۔۔ اسے کم از کم تمہارے جذبات کا خیال رکھنا چاہیے ۔۔“شانی کو بڑا برا لگا تھا اور تعجب بھی ہوا تھا ۔۔ذکاء اتنی بڑی بات کیسے نظر انداز کر سکتا تھا ۔۔
”شادی بھی تو کن حالات میں ہوئی تھی۔۔انھیں کیا پتا تھا اچانک سے انھیں دادو کے کہنے اور مجبور کرنے پر مجھ سے شادی کرنی پڑے گی۔۔اگر پتا ہوتا تو لے ہی آتے کچھ نہ کچھ۔۔“نایاب نے حوصلگی مسکراہٹ لبوں پہ سجا کر شانی کو دیکھ شوہر کا دفاع کیا تھا ۔۔
”اوہ تو اب تک موصوف کو وقت نہیں ملا کچھ لے کر آنے کا۔۔اس کا کام بنتا تھا اگلے دن ہی کچھ لے آتا ۔۔مگر اس کے پاس تو وقت ہی نہیں ہے۔۔صبح نکلتا ہے اور رات گئے آتا ہے ۔۔چچی پوچھیں تو کہتا ہے نئے آفس کی مصروفیات ہیں ۔۔حالانکہ اتنی بھی کوئی مصروفیت نہیں ہے ۔۔یہ تو بس بہانے ہیں ۔۔پتا نہیں کیا کرنا چاہتا ہے اور دوسری بات تم سے کس نے کہہ دیا کہ اس نے دادو کے مجبور کرنے پر شادی کی ہے تم سے ۔۔اس نے اپنی مرضی سے نکاح قبول کیا تھا ۔۔“
شانی تو بہت تپا ہوا تھا ذکاء پر۔۔ان دنوں شانی کا کام بھی اس کی وجہ سے لٹکتا جا رہا تھا ۔۔فاریہ کے باپ کی تلاش کرنی تھی اور ذکاء نے اس سے وعدہ کر رکھا تھا کہ نایاب کی شادی کے جھنجھٹ سے نکلتے ہی وہ کچھ نہ کچھ کرے گا۔۔ ہاں ٹھیک ہے نایاب کے ساتھ جو انہونی درپیش آئی اس کے باعث ذکاء کی زندگی نے نیا موڑ لے لیا تھا ۔۔جس کی وجہ سے وہ ڈسٹرب تھا ۔۔ مگر اب تو کافی دن گزر چکے تھے ۔۔زکاء کو اب روٹین کی طرف لوٹنا چائیے ۔۔
”کیا مطلب ہے ۔۔دادو نے مجبور نہیں کیا تھا کیا انھیں ۔۔؟ ورنہ وہ کیونکر مجھ سے نکاح کرتے جبکہ وہ پسند بھی نہیں کرتے تھے مجھے ۔۔“
نایاب سنجیدگی سے پلٹی تھی۔۔اب تو اسے شک سا ہونے لگا تھا ۔۔دادو کے بعد اب شانی بھی یہی کہہ رہا تھا کہ ذکاء نے خود اس سے شادی کی۔۔لیکن کیوں کی۔۔اس پر ترس کھا کر یا کوئی اور وجہ تھی۔۔؟ وہ اب جاننا چاہتی تھی آخر ایسی کیا وجوہات تھی جس نے ذکاء جیسے انسان کو مجبور کیا تھا اس سے شادی کرنے پر جبکہ وہ بالکل راضی بھی نہ ہو۔۔
”پتا نہیں لیکن دادو نے مجبور نہیں کیا تھا ۔۔ہاں دادو نے کہا ضرور تھا اسے نکاح کا ۔۔مگر اس نے منع کر دیا تھا ۔۔دادو کمرے سے نکل گئے تھے اور ذکاء ان کے پیچھے گیا تھا ۔۔پھر اکیلے میں ان دونوں کی کیا بات ہوئی تھی اس کا کسی کو علم نہیں ۔۔دادو جانتے ہیں ۔۔لیکن میں نے دادو کو یہی کہتے سنا تھا کہ ذکاء نے خود کہا تھا وہ تم سے نکاح کرے گا۔۔۔مگر ایک بات تو پکی ہے۔۔دادو نے مجبور نہیں کیا تھا ذکی کو۔۔۔ کیونکہ ذکاء وہ انسان نہیں ہے جس سے کچھ مجبوری یا زور زبردستی سے کرایا جا سکے ۔۔وہ بچپن سے اپنی مرضی کا مالک ہے۔۔وہ صرف وہی کام کرتا ہے جس میں اس کا اپنا قلب راضی ہو۔۔ ورنہ اس بات کا تو پورا میر ولا گواہ ہے ذکاء کبھی کچھ مجبوری میں نہیں کرتا۔۔ “
شانی نے ہلکی پھلکی سنجیدگی سے کہتے ہوئے نایاب کو بری طرح سوچ میں گم کر دیا تھا ۔۔اگر ایساہی تھا تو ذکاء کا رویہ نامناسب کیوں تھا۔۔اس بات کو وہ کس زاویے سے منسوب کرے۔۔اپنی مرضی سے نکاح کر کے اتنی بے اعتنائی کی آخر وجہ کیا تھی ۔۔۔؟ وہ جتنا سوچتی گئی اتنا ہی اُلجھتی گئی۔۔
” ویسے اس کھڑوس کو سوچنا چاہیے تمہارا ۔۔اور اگر اسے پرواہ نہیں ہے تو تم خود اسے کہو تمہاری تمام ضروریات کا احسن طریقے سے خیال رکھے ۔۔یہ کیا بھئی نئی نویلی دلہن کو سارا سارا دن اکیلے چھوڑ کر خود کا دن وہ باہر گزار آتا ہے ۔۔اور تم بھی اسے احساس دلاؤ کہ گھر میں رہ کر تمہیں وقت دیا کرے ۔۔ایک دوسرے کے ساتھ وقت گزارو گے تو جلدی اس رشتے کو ایک نظریہ دے پاؤ گے ۔۔ورنہ سارے انمول دن وہ مصروفیت میں گنوا بیٹھے گا اور پھر پچھتاتا رہے گا۔۔منحوس کہی کا۔۔“شانی اسے نصیحتیں کر رہا تھا ۔۔
”تو پھر آپ کیا کر رہے ہیں مجھ منحوس کے کمرے میں ۔۔؟“ذکاء کی سخت تیکھی آواز دروازے کی سمت سے ابھری تھی۔۔نایاب سمیت شانی صاحب بھی اس اچانک افتاد پر گڑبڑا گئے۔۔ یک دم وہ کرنٹ کھا کر بستر کی پائنتی سے کھڑا ہوا تھا ۔۔نایاب کے حلق میں بھی الگ الفاظ اٹکے ۔
وہ ترچھی نگاہوں سے شانی کو گھور رہا تھا ۔۔
”میں تو نایاب سے بات کرنے آیا تھا ۔۔کیا اب تمہیں دے دی ہے تو اس کا یہ مطلب ہرگز نہیں ہے کہ ہمارا اس سے کوئی تعلق نہیں رہا ۔۔بلکہ اب تو ڈبل رشتہ ہے ۔۔پھپھو زاد بھی ہے اور بھابھی بھی بن چکی ہے۔۔“شانی نے اپنے خوف کو کسی حد تک چھپاتے ہوئے کچھ ڈھٹائی کا مظاہرہ کیا تھا ۔۔
”ایک کام کرو اسے اپنے کمرے میں ہی لے جاؤ ۔۔وہاں اس کی خوب برین واشنگ کرنا اور اپنی کبوتری سے بھی ملوا دینا۔۔دونوں کو بہت اچھا لگے گا محفل لگا کر۔۔“وہ بے نیازی سے بولتا ہوا آگے ہی چلا آیا تھا ۔۔شانی کا حلق خشک ہوا۔۔وہ تو آئے دن اب فاریہ کے طعنے دینے لگا تھا ۔۔نایاب نے کچھ ناسمجھی سے شانی کو دیکھا ۔۔
”بس بس۔۔اگر میرا اپنے کمرے میں آنا نہیں پسند تو صاف صاف بول دو۔۔گھوما پھرا کر بات کرنے کی ضرورت نہیں ۔۔“شانی نے تڑی دکھائی۔۔
” نہیں بھئی۔۔میری کیا مجال جو میں تمہارا یہاں آنا ناپسند کروں ۔۔خیر سے یہ اب صرف میرا کمرہ نہیں رہا ۔۔“وہ لاپرواہی سے کہتا الماری کھول کر کھڑا ہو گیا تھا ۔۔شانی کا بس نہ چلا اس کی گچی مروڑ ڈالے۔۔لیکن دل پر پتھر رکھ کر صبر کرتا واک آؤٹ کر گیا تھا ۔۔ذکاء کے منہ لگنا اپنی ہی پول کھولنے کے مترادف تھا۔۔جو کم از کم اس وقت شانی تو بالکل افورڈ نہیں کر سکتا تھا ۔
”میں نکال دیتی ہوں کپڑے ۔۔“نایاب اپنے ہاتھ میں پکڑی چیزیں ڈریسنگ پر رکھتی اس کی سمت آئی تھی ۔۔عجیب اتفاق تھا آج وہ سہ پہر کو میر ولا میں دِکھ رہا تھا ۔۔
”نہیں۔۔میں نکال لوں گا۔۔تمہیں ضرورت نہیں یہ بیویوں والے کام کرنے کی۔۔“اس نے سنجیدگی سے انکار کر دیا تھا ۔۔
”میں بیوی ہوں آپ کی تو کام بھی بیویوں والے کروں گی ہی۔۔آپ کو احساس نہیں ہے تو کیا ہوا۔۔مجھے تو ہے نا۔۔اور میں اپنے فرائض نبھانا جانتی ہوں ۔۔“نایاب کو اس کا انکار برا لگا تھا ۔۔فوراً سے بیشتر اس نے جتاتے ہوئے لہجے میں باور کرایا تھا ۔۔وہ رک سا گیا ۔۔ہلکی سی طنزیہ مسکراہٹ لبوں پہ لیئے گھوما اور اس کی آنکھوں میں جھانکتے ہوئے بازو سینے پر لپیٹے ۔۔
”اگر اتنا ہی شوہر کے فرائض نبھانا جانتی ہو تو یہ کام میرے آنے سے قبل ہونا چاہیے تھا ۔۔“اس نے کپڑوں کی سمت نظروں سے اشارہ کیا تھا ۔۔نایاب نے گہری سانس کھینچی ۔۔
”اگر شوہر بتا کر جاتے کہ وہ آج رات بارہ بجے تک نہیں تین چار بجے تشریف فرما ہونگیں تو ضرور کر دیتی ۔۔لیکن آپ کو شاید اپنے آنے جانے کا بیوی کو بتا کر جانا گوارا نہیں ۔۔“ وہ پختہ لہجے میں طنز کرتی آگے بڑھ کر الماری سے اس کے کپڑے نکالنے لگی ۔۔وہ بے ساختہ پیچھے ہٹ کر اسے راستہ دے گیا تھا ۔۔اس کا مضبوط انداز واقعی میں قابلِ دید تھا۔۔لمحہ بھر کے لیے وہ لاجواب ہو گیا تھا ۔۔خاموشی سے اسے دیکھا وہ اپنے کام میں مصروف رہی۔۔پھر جب پلٹی تو اس کے کپڑے اس کے ہاتھ میں تھے۔۔
”یہ لیں۔۔“ہینگر اس کی سمت بڑھا کر وہ سنجیدگی سے کھڑی ہو گئی ۔۔ذکاء کو اس کے سخت انداز پر حیرت ہوئی تھی ۔۔لیکن بنا کچھ کہے ہینگر پکڑ لیا اور مڑا۔۔
”ایک بات پوچھوں آپ سے ؟“یک دم اسے نایاب کی وہی سنجیدہ آواز سنائی دی ۔۔وہ سوالیہ نظروں سے اسے دیکھ گھوما ۔۔کہا کچھ نہیں ۔۔وہ نہ کہتا تب بھی نایاب نے سوچ رکھا تھا آج وہ اس سے بات کرکے رہے گی۔۔
”مجھے بہت سے لوگوں سے پتا چلا ہے کہ آپ نے مجھ سے شادی اپنی مرضی سے کی ہے۔۔مگر مجھے اس بات پر پہلے بھی یقین نہیں آ رہا تھا اور اب آپ کے اتنے دنوں کے رویے کے بعد تو اور بھی نہیں آ رہا ۔۔مجھے جاننا ہے یہ بات کہاں تک حقیقت ہے ؟ کیا آپ نے اپنی مرضی اور خوشی سے مجھ سے شادی کی ۔۔اور اگر ایسا ہے بھی تو آپ کا رویہ اس اقدام کا ساتھ کیوں نہیں دے رہا۔۔۔“اس کی بات پر ذکاء نے اس کے مضبوط انداز سے نگاہیں پھیر کر گہری آہ بھری تھی ۔۔
”میں نے دادو کے مجبور کرنے پر تم سے شادی کی تھی۔۔کیوں کہ وہ ناراض ہو گئے تھے مجھ سے ۔۔ان کی خوشی کے لیے تمہیں اپنایا ہے ۔۔اور اگر گھر والے تمہیں اس بات سے کوئی تسلی دینا چاہتے ہیں اور تم کوئی خوش فہمی پالے بیٹھی ہو تو میں ایک بات صاف کردوں ۔۔میں نے تم سے شادی اپنی مرضی سے نہیں کی۔۔صرف دادو کے کے مجبور کرنے پر کی ہے۔۔ تم سے شادی کرنے کے لئے گھر کے ہر لڑکے نے انکار کر دیا تھا۔۔شانی زوی بلال تینوں نے ۔۔“
”اور آپ نے بھی تو کر دیا تھا انکار۔۔پھر کیا وجہ تھی کہ انھیں چھوڑ کر صرف آپ کو ہی مجبور کیا گیا ؟“
ذکاء کی باتیں اگر چہ کڑوی تھیں اور روح فرسا بھی۔۔مگر نایاب کو اب مضبوط رہنا آ گیا تھا ۔۔دل جو ایک دم چھن سے ٹوٹا تھا اس کی کرچیاں اس نے ذکاء تک نہیں پہنچنے دی تھیں ۔۔وہ دوٹوک لہجے میں سوال کر کے اب اس کے چہرے کو بغور جانچ رہی تھی ۔۔ذکاء نے نظریں چرا لیں ۔۔
”مجھے کیا پتا ۔۔یہ تو دادو ہی جانیں.“ اس نے بات ٹال مٹول کر کے وہاں سے جانا چاہا تھا ۔۔مگر جا نہیں سکا تھا ۔۔
”ٹھیک ہے پھر میں دادو سے ہی پوچھ لیتی ہوں.“وہ اٹل انداز میں کہہ کر یک دم پلٹی اور دروازے کی سمت چل پڑی ۔۔ذکاء کو زوردار جھٹکا لگا تھا ۔۔کرنٹ کھا کر وہ کپڑے بستر پر پھینکتا اس کی سمت لپکا تھا ۔
”رک جاؤ نایاب۔۔! کہاں جا رہی ہو تم؟“اس نے لپک کر اس کو بیچ راستے میں ہی بازو سے دبوچ کر روک لیا تھا ۔۔
”دادو سے پوچھنے کہ اُنھوں نے کیوں آپ کو ہی مجبور کیا ۔۔باقیوں کو کیوں نہیں ۔۔“نایاب نے ایک جھٹکے سے اپنا بازو چھڑا لیا تھا ۔۔ذکاء ہکا بکا رہ گیا ۔۔جانے اس میں اتنی ہمت کہاں سے آ گئی تھی ۔۔اسے بالکل یقین نہیں آ رہا تھا ۔۔سامنے کھڑی لڑکی وہی نایاب تھیں جسے وہ بچپن سے جانتا تھا ۔۔
”کوئی ضرورت نہیں ہے کسی سے کچھ بھی پوچھنے کی ۔۔ہمارے درمیان کا معاملہ ہے ۔۔ہمارے درمیان ہی رہنے دو۔۔کیوں اپنا اور میرا تماشا لگانا چاہتی ہو تم؟“ذکاء نے تحمل سے کام لیا تھا ۔مگر آج وہ اسکے تمام تحمل کو سرے سے لپیٹ کر رکھنے پر آمادہ تھی۔۔
”آپ کا تو کوئی تماشا نہیں لگ رہا ذکاء! تماشا تو میری زندگی بن کر رہ گئی ہے۔۔۔آپ کو جب میں قبول ہی نہیں تھی تو نہیں قبولنا چاہئے تھا نکاح بھی۔۔کیوں اپنے ساتھ یہ ظلم کیا آپ نے۔۔اور جب مجھ سے کوئی شادی کو تیار نہیں تھا تو دادو کو کوئی ضرورت نہیں تھی آپ کو مجبور کرنے کی۔۔میں ان سے جواب مانگنے جا رہی ہوں ۔۔انھوں نے کیوں زور زبردستی مجھے آپ کے متھے مار دیا ۔۔کیوں کیا ایسا انھوں نے ہم دونوں کے ساتھ ۔۔“وہ کہتے ہوئے پھر دروازے کی سمت چل دی۔۔بوکھلایا ہوا ذکاء پھر سے اس کے راستے میں حائل ہوا تھا ۔۔
”نایاب پاگل پن مت کرو۔۔۔فضول میں وہ پریشان ہونگیں ۔۔اور اب جب نکاح ہو ہی گیا ہے تو کیا فائدہ ہے یہ ڈھنڈورا پیٹنے کا کہ کیوں کرایا گیا ۔۔ہو گیا بس ٹھیک ہے ۔۔نبھاؤ اب.“
”میں اکیلے نبھاؤں یہ ادھورا رشتہ ۔۔بے معنی تعلق ۔ میں ہی کیوں ذکاء؟ آپ کیوں نہیں ۔۔ڈیڑھ ہفتے سے یہی چل رہا ہے ۔۔آپ صبح نکلتے ہیں اور رات گئے لوٹتے ہیں ۔۔میں کسی بے کار شے کی طرح پڑی رہتی ہوں آپ کے کمرے میں ۔۔میری کوئی حیثیت کوئی وقعت نہیں ہے ۔۔ آپکو مجھ سے کوئی غرض نہیں ہے۔۔ تو پھر میں کیوں نبھاؤں اس لاحاصل تعلق کو۔۔مجھے آج دادو سے پوچھنا ہے اُنھوں نے کیوں میری شادی آپ سے کرا کر میری زندگی اجیرن کردی ہے ۔۔میں ساری زندگی ایسے ہی آپ کے ساتھ یہ رشتہ نہیں جوڑے رکھ سکتی ذکاء ۔۔۔آپکی تو زندگی مست چل رہی ہے ۔۔بیچ راہ میں بھٹک تو میں گئی ہوں۔۔ آپ کو شاید کنارہ مل گیا ہے ۔۔میں ابھی سفر کر رہی ہوں ۔۔اور میں اس سفر کو تمام کر کے اپنا کنارہ ڈھونڈنا چاہتی ہوں ۔۔جو مجھے دادو سے بات کرنے کے بعد ہی ملے گا۔۔اب ہٹیں میرے راستے سے ۔۔“وہ آج ضد پر اڑے چلا رہی تھی۔۔ذکای نے استعجاب سے اس کی آنکھوں میں کڑا پن دیکھا تھا ۔۔اسے سمجھ نہ آیا اسے کیسے کنٹرول کرے ۔۔
”دیکھو نایاب۔۔تم دادو سے کوئی بات مت کرو! بس مجھے تھوڑا وقت دو ۔۔میں کوشش کر رہا ہوں اس نئے رشتے کو دل سے قبول کرنے کی۔۔میں کر لوں گا۔۔مگر تمہیں پتا نہیں کس بات کی جلدی ہے ۔دیکھو اچانک سے ہماری زندگی بدلی ہے۔۔۔اسے ہموار کرنے کے لئے وقت لگنا ہے۔۔میں بس وہی وقت لے رہا ہوں ۔۔تم کچھ تو صبر رکھو!“
وہ جھنجھلاتے ہوئے بھڑک اٹھا تھا ۔۔
” میرا صبر ختم ہو گیا ہے ۔۔مجھے اب آر پار لگانا ہے اس معاملے کو ۔۔۔ میں اب مزید ایسے ہی اس رشتے کو لٹکا کر اپنا اور آپ کا قیمتی وقت ضائع نہیں کر سکتی ۔۔مجھے دادو سے اب بات کر کے ہی رہنا ہے۔۔آپ مجھے مت روکیں ۔۔!“
وہ کچھ بھی سننے سمجھنے کو قطعاً تیار نہیں تھی ۔۔ذکاء اس کی ایک ہی رٹ پر چکرا کر رہ گیا ۔
”نایاب تم کیوں نہیں سمجھ رہی۔۔دادو کو اس معاملے میں مت گھسیٹو!“اس کا لہجہ پہلے سے کچھ اور کھردرا ہوا تھا ۔
”یہ معاملہ ان ہی کا بنایا ہوا ہے ان کا آنا تو لازم ہے ۔۔“وہ چٹخ کر کہتی اس کی سرعت سے نکلی ۔۔ذکاء نے ایک دم اس کی کلائی دبوچ کر اس کے دروازہ کھول کر نکلنے سے قبل ہی اسے دھکیلتے ہوئے دیوار سے پن کیا تھا ۔۔وہ سراسیمگی سے پھیلی آنکھوں سے اسے تکنے لگی ۔۔اس کے چہرے پر بہت سے رنگ آ جا رہے تھے ۔۔غصہ، جھنجھلاہٹ ، گھبراہٹ ،خوف جانے کیا کچھ تھا جو اس لمحے ذکاء کے چہرے پر وہ دیکھ سکتی تھی ۔۔
”تم ان سے کچھ نہیں پوچھو گی۔۔سمجھی تم۔۔بے جا تماشا لگانے کی ضرورت نہیں ۔۔میں کہہ رہا ہوں نا میں کچھ دنوں میں خود ہی سب ٹھیک کر لوں گا ہمارے درمیان ۔۔بس مُجھے وقت چائیے ۔۔“وہ اس کے سامنے کھڑا جبڑا بھینچ کر اسے تنبیہی نگاہوں سے گھورتا کہہ رہا تھا ۔۔نایاب کے وجود میں سینسنی دوڑ گئی ۔۔لیکن وہ اس لمحے کمزور نہیں پڑنا چاہتی تھی ۔۔تبھی پوری قوت لگا کر اسے پیچھے دھکیل دیا تھا ۔۔
”آپ کو وہ وقت دینے کے لئے میرے پاس کوئی وقت نہیں ہے ۔۔“وہ قطیعت سے صفا چٹ جواب دیتی تیز رفتاری سے وہاں سے نکل آئی تھی۔۔وہ اس کی پھرتی کو حیرت سے دیکھتے ہوئے فوراً اس کے پیچھے لپکا تھا ۔۔
”نایاب…!“وہ تیزی سے آگے ہی آگے بڑھتی جا رہی تھی ۔۔جب عقب سے غراتے ہوئے وہ تیر کی طرح اس تک پہنچا تھا ۔۔
”تمییں سنائی نہیں دے رہا میں کیا کہہ رہا ہوں ۔۔تم کیسے میری بات کو نظر انداز کر سکتی ہو نایاب ۔۔مت بھولو میں شوہر ہوں تمہارا۔۔یہ اکڑ اور طور طریقے نہیں چلیں گے میرے سامنے ۔۔“
وہ پھر سے اس کے سامنے راستہ روک کر کھڑا ہو گیا تھا ۔۔نایاب نے چھچھلتی نگاہ سے اسے دیکھ کر اس کے الفاظ سنے تھے۔۔
” واہ! یہ بھی ٹھیک ہے۔۔۔جب چاہے شوہروں کا رعب جھاڑ دو اور جب چاہے بیویوں کے رتبے سے گرا دو۔۔میں یہ دہری زندگی نہیں جینا چاہتی ۔۔مجھے انصاف چاہیے ۔۔میرے ساتھ نا انصافی ہوئی ہے۔۔میں دادو..! “
”بس !“وہ انگلی اٹھائے متنبہ کرتا چینخا تھا ۔
”ابھی اسی وقت واپس کمرے میں چلو immediately !“
اس کی دھاڑ کو نظر انداز کر نایاب نے سر جھٹکا اور پھر دادو کے کمرے کی سمت قدم بڑھا دیئے ۔۔ذکاء کے لئے یہ حیرت انگیز بات تھی۔۔۔
”نایاب..!“وہ آواز دبا کر چلایا تھا ۔۔
”میں کہہ رہا ہوں کمرے میں چلو ۔۔ہم بیٹھ کر بات کرتے ہیں ۔۔“وہ اس کے پیچھے آیا تھا ۔۔
”مجھے آپ سے کوئی بات نہیں کرنی۔۔“وہ تڑخ کر جواب دیتی چلتی رہی۔۔ذکاء کا بس نہ چلا اسے پکڑ کر کمرے میں بند کر دے۔۔اس وقت سب ہی ہال میں بیٹھے چائے سے لطف اندوز ہوتے خوش گپیوں میں مصروف تھے۔۔۔اور ایسے میں نایاب کا یہ تماشا لگانا ذکاء کو ناگوار گزر رہا تھا ۔۔
”میں آخری بار کہہ رہا ہوں اندر چلو کمرے میں ورنہ۔۔۔“اس نے عقب سے لپک کر پھر سے اس کا بازو استحقاق سے دبوچا تھا۔۔وہ ایک جھٹکے سے رکی ۔۔
”ورنہ کیا؟؟“چلاتے ہوئے اس نے ذکاء کو برانگیختہ نظروں سے دیکھا تو ذکاء کا ضبط جواب دے گیا ۔۔ایک دم اسے کھینچتے ہوئے وہ واپس لے جانے لگا ۔۔نایاب بری طرح ہل کر رہ گئی۔
”یہ کیا زبردستی ہے۔۔چھوڑیں مجھے میں چلاؤں گی۔۔“وہ اس کے ساتھ کھنچتی چلی جاتی ہوئی اس کی سخت گرفت سے خود کو چھڑانے کی مزاحمت کرنے لگی ۔۔مگر وہ کان لپیٹے اس کی ایک نہ سنتا اسے کھینچ کر کمرے کی سمت لے جا رہا تھا ۔۔نایاب نے اپنی کلائی پر اس کی سخت گرفت سے اٹھتی ٹھیس سے مچل کر اس کے چہرے کو دیکھا تھا۔۔وہ بہت غصے میں تھا۔۔اس کی سلگتی کنپٹیاں اس کی برداشت کا پتا دے رہی تھیں ۔۔طیش اس کی سرخ آنکھوں میں رقم تھا۔۔نایاب کا دل یک دم خوفزدہ ہوا تھا۔۔
”میں نے کہا ہاتھ چھوڑیں میرا۔۔آپ میرے ساتھ اس طرح سلوک نہیں کر سکتے ۔۔میں دادو کو بتاؤں گی..“
وہ اسے دھمکیاں دینے لگی ۔۔جس کا کوئی اثر اس پر نہ ہوا ۔۔
”آپ سن کیوں نہیں رہے..“نایاب نے چلاتے ہوئے راستے میں آئے ایک کمرے کے کواڑ کو پکڑ لیا تھا ۔۔ذکاء کے قدم اچانک تھمے ۔۔گھوم کر غصے سے اسے دیکھا ۔۔وہ مضبوطی سے کواڑ کو تھامے کھڑی تھی ۔۔ذکاء نے دانت پیس کر خشونت سے گھورتے ہوئے اس کے پیچھے کھڑے ہو کر اس کا ہاتھ کواڑ سے ایک جھٹکے میں چھڑایا تھا ۔۔وہ بونچھکی رہ گئی ۔۔اپنی کم ہمتی یا اس کی طاقت پر اب اسے رونا آنے لگا تھا ۔وہ بڑی آسانی سے پھر اسے کھینچتا ہوا کمرے میں لے جانے لگا تھا ۔۔نایاب کے حلق میں کانٹے اگ آئے ۔
”چھوڑیں مجھے کیا بدتمیزی ہے یہ.“اس نے دل برداشتہ ہو کر چینختے ہوئے اس کے چنگل سے نکل کر دیوار کا سہارا لیا تھا ۔۔ذکاء کے لئے یہ لمحہ اس کی برداشت کی انتہا نکلا ۔۔
”ابھی یہی پر بتاؤں کیا تمہیں میں کس قدر بدتمیزی پر اتر سکتا ہوں۔۔“غضب ناکی سے دبی آواز میں دھاڑ وہ اس کے گرد دیوار پر زور سے ہاتھ جما اس پر جھکا تھا۔۔۔وہ سہم کر آنکھیں میچ سمٹ سی گئی ۔۔
”آپ مجھے اس طرح ڈرا کر روک نہیں سکتے ذکاء!“میچی آنکھوں کو کھول کر وہ کسی قدر ہمت بٹور اس کی آنکھوں میں پہلی بار جھانکی تھی۔۔وہ اس کے بہت قریب تھا ۔۔نایاب کے لئے اس سنگین نوعیت پر بھی اپنا دل اس حسین منظر میں سنبھال پانا دوبھر ہوا تھا۔۔۔محبت نے جانے کیوں زور پکڑا تھا۔۔۔ سچ کہتے ہیں لوگ خوبصورتی بڑی سفاک ہوتی ہے۔۔اور اس سے محبت اس سے بھی زیادہ سفاکانہ ۔۔۔
”اچھا میں تمہیں روک نہیں سکتا ۔۔؟“ذکاء نے سر متنبہ کرتی نگاہوں سے ہلاتے ہوئے دانت کسے سوال کیا ۔۔نایاب کا وجود لرز اٹھا ۔۔اس کی آنکھوں میں بڑی جنونی لپک اٹھی تھی ۔۔
”مجھے دادو سے بات کرنی ہے ۔۔“اب کی بار نایاب کے لب و لہجے میں وہ اکڑ نہیں صرف عاجزی تھی۔۔۔
”اور وہ تم نہیں کرو گی۔۔کسی بھی صورت میں نہیں ۔۔ آج کے بعد دادو کا نام ہمارے رشتے میں نہیں آنا چاہیے ۔۔۔ بس جیسا چل رہا ہے چلنے دو۔۔میں اس وقت بہت مصروف چل رہا ہوں ۔۔ایک بار میرے نیو آفس کی اوپننگ ہو جائے ۔۔پھر تمہارے معاملے کو بھی آر پار لگا دوں گا ۔۔تب تک کے لئے تم اپنا منہ بند رکھو گی۔۔“ذکاء کی سانسیں اسے اپنے چہرے پر تپش گھولتی محسوس ہوئی تھیں ۔۔وہ ڈھیلی پڑ گئی ۔۔
”دھمکا رہے ہیں ؟“ ایک شکوہ کناں نظر اٹھی تھی ۔۔ ذکاء نے اس نظر میں دیکھا اور پیچھے ہٹا۔
”نہیں ۔۔ریکوئسٹ کر رہا ہوں ۔۔بس مجھے فری ہو لینے دو ۔۔میں کچھ نہ کچھ کرلوں گا۔۔تب تک تم بھی انتظار کر لو۔۔!“اس کے لہجے میں نرمی تھی۔۔ دیوار سے چپکی نایاب نے اس کے قدم پیچھے ہٹتے دیکھے تھے۔۔
”لو بھئی اب یہ ہی رہ گیا تھا ۔۔“شمیم ممانی اوپر آ رہی تھیں ۔۔سامنے ہی انھیں دیکھ شریر مسکراہٹ سے چھیڑا تھا ۔۔وہ دونوں ان کی آواز پر پہلے ٹھٹکے اور پھر شرمندہ ہوگئے ۔۔نایاب کا چہرہ لمحوں میں سرخ پڑا تھا ۔۔گلے سے ڈھلکتا دوپٹہ واپس کندھے پر چڑھاتے ہوئے وہ تیزی سے ہٹ گئی تھی ۔۔۔سامنے کھڑے ذکاء کی سمت دیکھنا اب مشکل تھا ۔۔
”وہ میں بس بات کر رہا تھا ۔۔“ذکاء نے خجالت سے وضاحت پیش کی تھی۔۔
”ہاں ہاں بھئی۔۔اب شادی شدہ جوڑے ایسے ہی بات کریں گے ۔۔ویسے مجھے تو اب شک سا ہونے لگا ہے۔۔تم نے جو ابا کو نایاب سے نکاح کرنے پر منع کیا تھا ۔۔وہ جھوٹی موٹی کا کیا تھا۔۔اصل میں تو تم اسے پسند کرتے ہو۔۔اب ابھر ابھر کر باہر آ رہی ہے تمہاری پسندگی ۔۔“وہ اسے تنگ کرتی ہوئی اس کے کندھے پر پیار کرتی آگے بڑھ گئی تھیں۔۔۔وہ سبکی سے انھیں جاتے ہوئے دیکھنے لگا۔۔اور کون جانے ذکاء کے دل میں کیا تھا۔۔وہ اب واپس کمرے میں جانے کے بجائے گہری آہ بھر کر نیچے ہی اتر گیا تھا ۔۔
•••••••••••••
