”دیکھیں یہ اس پر ٹھیک لگے گا نا؟“فاریہ کی خوشی دیدنی تھی ۔۔مسرور سی وہ پورے کمرے میں تیزی سے اڑتی پھرتی تیاری میں مصروف تھی۔۔ شانی نے اسے اجازت تو دے دی تھی مگر وہ سوچ سوچ کر اب خائف ہو رہا تھا ۔۔فاریہ نے اپنے کپڑوں کی میچنگ جیولری لا کر اسے دکھائی تھی۔۔
”ہوں۔۔اچھی لگ رہی ہے۔۔“اس نے سنجیدگی سے کہہ کر مسکرانے کی موہوم سی کوشش کی تھی ۔۔فاریہ کھلکھلاتے ہوئے پلٹ گئی ۔۔شانی نے دیکھا تھا ۔۔اس کے لائے ریڈی میٹ سوٹ میں وہ بہت پیاری لگ رہی تھی ۔۔سوٹ اس کے حساب سے کچھ کھلا تھا۔۔مگر فاریہ پر اچھا لگ رہا تھا ۔۔ساتھ ہی وہ ہلکے پھلکے سے میک اپ اور جیولری میں خوبصورت تو پتا نہیں مگر معصوم اور پیاری ضرور لگ رہی تھی ۔۔
شانی کو تو وہ ویسے بھی کیوٹ سی لگتی تھی ۔۔وہ کم عمر تھی اور بھولی بھی ۔۔ لیکن اس سب سے زیادہ اب شانی کو اسے باہر لے جانے کا اضطراب تھا۔۔ہاں بہت سے مہمان آنے تھے۔۔جن میں اس پر کسی کا دھیان نہیں جاتا۔۔مگر جاتا تو وہ کیا کرتا ۔۔
اس کی خوشی کے لئے وہ حامی بھر کر کہیں غلطی تو نہیں کر رہا تھا ۔۔
”چلیں میں تیار ہوں.“ فاریہ کی چہکتی آواز اسے بہت قریب سے سنائی دی تھی۔۔اس نے سر اٹھایا ۔۔وہ عین سامنے کھڑی تھی۔۔مسکراتی ہوئی خوشی سے پھولے نہیں سما رہی تھی۔۔شانی نے نظر بھر کر اسے دیکھا۔۔ اس میں کشش تھی ۔۔اور ہلکے سے بناؤ سنگھار نے تو اس کی دبی ہوئی خوبصورتی بھی نکھار دی تھی ۔۔۔ شانی نے اعتراف کیا تھا وہ کافی خوبصورت تھی ۔۔
”تم بیٹھو یہاں ۔۔میرا انتظار کرنا ۔۔میں خود موقع دیکھ کر تمہیں لے جاتا ہوں۔۔“وہ بول کر اسے ہدایت کرتا باہر نکل گیا تھا ۔۔
•••••••••••••رات کا اندھیرا شام کی لالیوں میں اتر رہا تھا ۔۔خوشبوں سے مہکتا برقی قمقموں سمیت میر ولا کے لان کو کسی دلہن کی طرح آراستہ کیا گیا تھا ۔۔اور روشنیوں کی آماہ جگاہ بنا لان مہمانوں کی آمد سے آباد ہو چکا تھا ۔۔
مہمانوں سے لان بھرا پڑا تھا ۔۔حتی کہ لڑکے کے ساس سسر اور رشتے دار بھی پہنچ چکے تھے۔۔لڑکے نے سیدھا پارلر سے ہی آنا تھا ۔۔نایاب کو لا کر اسٹیج پر بٹھا دیا گیا تھا ۔۔گھونگھٹ گرائے بیٹھی نایاب نے نظر اٹھا کر پورا ہال دیکھا تھا ۔۔ہر ٹیبل پر نت نئے چہروں کے لوگ بیٹھے ہوئے تھے ۔۔ان میں سے کچھ کو تو نایاب پہچانتی تھی ۔۔مگر کچھ شاید لڑکے والوں کی طرف سے تھے۔۔یونہی مٹے مٹے حنائی پھولوں سے بگڑے ہاتھ گود میں رکھے وہ خالی خالی نظروں سے خوشیوں میں رقصاں محفل کو دیکھ رہی تھی۔۔۔ دل پر عجیب ہی بوجھ تھا۔۔دماغ بند تھا۔۔سب نے تو بہت بار اسکی خراب مہندی کی وجہ بھی پوچھی تھی ۔۔لیکن مسلسل خاموشی کا سامنا تھا ۔۔نایاب کے اطراف میں لڑکے کی ماں اور بہن بیٹھی ہوئی تھیں ۔۔نایاب کا دل چاہا وہ وہاں سے نکل کر اندر جائے اور کمرے میں بند کر لے خود کو۔۔ مگر بعض فیصلوں سے بھاگ جانا ممکن نہیں ہوتا ۔۔
میر ولا کے مکین بھی نک سن سے تیار ہال میں سب مہمانوں کی تواضع میں مصروف نظر آ رہے تھے ۔۔ایک طرف اسے تینوں ماموں دادو کے ساتھ کھڑے نظر آئے تھے ۔۔ خواتین لڑکے والوں کے آؤ بھگت گرمجوشی سے سنبھال رہی تھیں ۔۔
مہر اور ذیب اپنی چند سہیلیوں کے گرد کھڑی تعریفیں سن کر خود پر ناز کر رہی تھیں ۔۔
ایک طرف اسے میر ولا کے لڑکے بھی نظروں سے گزرے۔۔ذمان ،بلال اور شانی کھڑے ہوئے ہنسی مذاق میں مگن تھے۔۔۔اور پھر ایک طرف سے چل کر آتا وہ بھی نظر آیا تھا ۔۔۔
بلیک شیروانی میں ملبوس ست رنگی دوپٹہ گلے میں ڈالے اس بے نیاز کی وجاہت اس قدر دل کی دھڑکن تھام رہی تھی کہ خاندان کی لڑکیوں کی نظر تو ٹک ہی رہی تھی اس پر۔۔۔ وہ اس کے سامنے سے گزرا اور دوسری سمت کھڑے باقی لڑکوں کے پاس آیا تھا ۔۔اب وہ کھڑا ہوا ان سے کچھ بات کر رہا تھا ۔۔چہرے پر بلا کی سنجیدگی تھی۔۔ اب کئی نظروں کا مرکز میر ولا کے لڑکوں کی یہ ٹولی تھیں ۔۔جس میں زوار کے علاؤہ سب کھڑے تھے۔۔۔نایاب نے من ہی من میں سب کی نظر اتاری تھی ۔۔سب کتنے پیارے لگ رہے تھے ۔۔
اس نے باری باری میر ولا کے ہر مکین کو دیکھا تھا۔۔اتنی فرصت سے ۔۔اور اب تو بہت کم وقت بچا تھا اسکا ان سب کے بیچ ۔۔وہ جانے والی تھی یہاں سے ۔۔اس کا دل بے اختیار بھر آیا ۔۔وہ میر ولا سے جانے والی تھی ۔۔ایک اشک آنکھوں سے ٹوٹ کر گرا اور اس کی حنائی ہتھیلی پر نشان چھوڑ گیا ۔۔کتنے یاد آنے تھے اسے سب لوگ۔۔وہ سچ میں سب کو بہت یاد کرنے والی تھی۔۔۔ایک بار پھر اس کی نظر اب ذکاء پر ٹھہر گئی تھی ۔۔وہ کسی بات پر ہنستے ہوئے ذمان کو کچھ بتا بھی رہا تھا ۔۔وہ کتنا خوش تھا۔۔۔لاپرواہی اور غفلت بھی اچھی چیزیں ہیں ۔۔انسان کو بہت سے دکھوں سے بچا لیتی ہے ۔۔اور کچھ محبتیں خاموشی سے دفن ہو جانی چاہیے ۔۔کچھ جذبے واقعی میں آپ کے لئے موزوں نہیں ہوتے ۔۔
ہر طرف رونقیں اور خوشیاں پھوٹ رہی تھیں ۔۔اتنی مسرتوں کی فضا قائم تھی کہ نایاب کو سانس لینے میں دشواری ہوئی تھی۔۔۔وہ چاہتی تھی اب بس نکاح ہو جائے ۔۔اور سب ختم بھی۔۔اور وہ چلی جائے یہاں سے ہمیشہ کیلئے ۔۔
اور پھر اچانک ہی لان میں ایک پریشان کن لہر دوڑ گئی تھی ۔۔۔
اس کے ساتھ بیٹھی اس کی ساس کے نمبر پر عاصم کا مسیج آیا تھا۔۔اور اس مسیج نے ان کے پیروں تلے سے زمین کھینچ لی تھی ۔۔۔وہ ایک دم اٹھیں اور سیدھا میر ولا کے مرد حضرات کے ساتھ کھڑے اپنے شوہر کو پکڑ کر ایک علیحدہ جگہ لے گئیں ۔۔سب نے خاتون کے چہرے پر اڑتی ہوائیاں دیکھی تھیں ۔۔۔پھر سب بے اختیار تشویش سے ان کے پاس چلے آئے ۔۔
”کیا بات ہے ۔۔کوئی پریشانی ہے کیا؟“وہ ایک کونے میں کھڑے آپس میں بہت دھیمی آواز میں بات کر رہے تھے۔۔جب بڑے ماموں ممانی نے جا کر ان سے پوچھا تھا ۔۔ان کے سوال پر انھیں سانپ سونگھ گیا ۔۔عاصم کے والد کی گھبراہٹ کسی اچھی خبر کا عندیہ نہیں لگ رہی تھیں ۔۔ انھیں اس طرح دیکھ کر باقی گھر والے بھی پریشانی سے پاس چلے آئے ۔۔
”کیا بات ہے بھائی صاحب ۔۔کچھ بتائیں ۔۔سب ٹھیک تو ہے نا؟“ چھوٹے ماموں نے سنجیدگی سے پھر اصرار کیا تھا ۔۔مگر ان کے پاس بولنے کو کچھ بچا ہی نہیں تھا ۔۔بس فون ان کی سمت بڑھا دیا تھا ۔۔زرناب پھپھو کا دل بیٹھا۔۔۔منجھلے ماموں نے خاموشی سے فون پکڑ کر عاصم کا مسیج پڑھا۔۔
”آئم سوری مام اینڈ ڈیڈ۔۔۔میں واپس جا رہا ہوں ۔۔آپ کی پسند کی لڑکی کے لئے خود کو تیار کرنے کی بہت کوشش کی لیکن میں نہیں کر پایا ۔۔میں لارا کو پسند کرتا ہوں ۔۔اور میں واپس جا کر اسی سے شادی کرنے والا ہوں ۔۔آپ کی پسند کی لڑکی کے ساتھ میرا کوئی جوڑ نہیں ۔۔امید کرتا ہوں آپ میری بات سمجھیں گے اور مجھے ڈھونڈنے کی کوشش بالکل نہیں کریں گے۔۔۔میں اس وقت ائیر پورٹ پر ہوں اور میری فلائٹ کچھ دیر میں ہے۔۔ میری طرف سے لڑکی والوں کو معذرت کر لیجئے گا اور اپنی طرف سے بھی۔۔کیونکہ آپ نے ہی زبردستی مجھے مجبور کیا تھا اس لڑکی کے لئے ۔۔آپ کا بیٹا عاصم ۔۔۔“
مسیج پڑھتے ہی ان کے سروں پر آسمان گر پڑا تھا ۔۔۔متزلزل نگاہوں سے بڑے ماموں نے عاصم کے والد کو دیکھا تھا ۔۔لڑکا بھاگ چکا تھا ۔۔یہ قیامت خیز خبر رونگھٹے کھڑے کر دینے والی تھی۔۔ہر کوئی اپنی جگہ منجمد رہ گیا تھا ۔۔۔
”میں معزرت کرتا ہوں شامیر ۔۔مجھے بالکل بھی اندازہ نہیں تھا عاصم ایسا کچھ کرے گا۔۔میں شرمندہ ہوں بہت !“ انھوں نے ندامت سے سر جھکا کر ہاتھ جوڑے تھے۔۔اس لمحے عاصم کے والدین سچ میں سوگوار سے کھڑے تھے۔۔
”اب کیا ہوگا بھائی جان!“چھوٹے ماموں نے ششدر نظروں سے پورے ہال میں موجود مہمانوں کو دیکھا تھا ۔۔کھچا کھچ مہمانوں سے بھرا لان ان کے حوصلے پست کرنے لگا تھا ۔۔سب کے چہروں پر ہوائیاں اڑنے لگیں تھیں ۔۔ایک دم ہی فضا سنگین ہو گئی تھی۔۔۔
”ہمیں معاف کر دیں ۔۔ہم سچ میں بہت شرمندہ ہیں ۔۔“ عاصم کی والدہ نے ملال سے کہتے ہوئے زرناب پھپھو کی سمت دیکھا تھا۔۔وہ صدمے سے نڈھال ہو کر صوفے پر گری تھیں ۔۔اس وقت کسی کی سمجھ میں کچھ نہیں آ رہا تھا ۔۔ حواس خمسہ ہو کر انھوں نے دادو کی سمت دیکھا تھا ۔۔جنہوں نے جانے کب پیچھے سے آ کر ان کی گفتگو سن لی تھیں ۔۔پشت پر ہاتھ باندھے انھوں نے گہری سنجیدگی سے عاصم کے والدین کی سمت دیکھا تھا ۔۔
”عاصم نے جو کیا وہ بالکل بھی معافی کے قابل نہیں ہے ۔۔مگر اس میں ہمارا بھی قصور ہے ۔ہمیں اس کی مرضی کے بغیر جا کر اسے مجبور کرنا ہی نہیں چاہئیے تھا ۔۔لیکن اب جو ہوا وہ پلٹ نہیں سکتا ۔۔ہاں سدھارا ضرور جا سکتا ہے ، عزت تو بچانی ہی ہے۔۔۔اگر آپ کو اعتراض نہ ہو تو میں نایاب کا نکاح اپنی بہن کے بیٹے سے ۔۔۔“
عاصم کے والد نے پشیمانی سے کہنا شروع کیا ہی تھا کہ دادو نے ٹھہرے ہوئے انداز میں ٹوک دیا۔۔
”آپ اپنے مہمانوں کو لے کر چلیں جائیں یہاں سے ۔۔ہم اپنی عزت بھی دیکھ لیں گے اور نایاب کا نکاح بھی کرا لیں گے۔۔“ان کا انداز اتنا مستحکم اور دوٹوک تھا کہ وہ دونوں خجل ہو کر رہ گئے ۔۔ شرمندگی محسوس کرتے ہوئے انھوں نے بڑے ماموں کی سمت دیکھا تھا ۔۔انھوں نے رخ موڑ لیا ۔۔اب جو بھی تھا دادو کا فیصلہ تھا۔وہ کچھ نہیں کر سکتے تھے۔۔۔اچانک سے لان میں انتشار پھیلا اور عاصم کے والدین اپنا سا منہ لے کر اپنے مہمانوں کے ساتھ وہاں سے جانے لگے۔۔ایک دم ہی میر ولا کی خوشیوں میں گرہن لگا تھا ۔۔ہکا بکا سے کچھ مہمان معاملہ سمجھنے کی کوشش کرنے لگے تھے ۔۔نایاب کے ساتھ بیٹھی زیب اور مہر ہونق شکل لیئے لان کو لڑکے والوں سے خالی ہوتا دیکھنے لگیں ۔۔
”یہ کیا ہوا ہے اچانک ؟“کچھ لوگ ابھی تک لاعلم تھے ۔۔جن میں یہ تینوں بھی تھیں ۔۔
”پتا نہیں ۔۔کیا بات ہو گئی ؟“ مہر نے اسٹیج سے کچھ دور کھڑے میر ولا کے بڑوں کو دیکھا تھا ۔۔دادو کے چہرے پر تناؤ تھا اور باقی سب ان کے گرد کھڑے ان سے بات کر رہے تھے ۔۔ سب کے چہرے پریشان تھے۔۔
”ابا اب کیا ہوگا ؟“زرناب پھپھو کے حلق میں آنسوں اٹک رہے تھے۔۔ہر چہرے پر تشویش تھی۔۔مگر انھیں اپنی بیٹی کا خیال تھا ۔۔جو ہنوز اسٹیج پر بیٹھی پریشان ہو رہی تھی ۔۔لان میں اب بس میر ولا کے مہمان ہی تھے۔۔جن میں چہ مگوئیاں شروع ہو گئی تھیں ۔۔اڑتی اڑتی خبر ان تک بھی پہنچی تھی ۔۔
”کہہ رہے ہیں عاصم بھائی نے نکاح کرنے سے انکار کر دیا ہے ۔۔ اور دادو نے غصے میں آ کر سب کو واپس بھیج دیا ہے۔۔“مہر نے کہیں سے خبر لے کر آتے ہوئے نایاب کو بتایا تھا ۔۔
”کیا؟“اس نے صدمے سے گردن موڑ کر مہر کو دیکھا ۔۔سرخ گھونگھٹ کے پار متفکرانہ سی بیٹھی نایاب کا دل زور سے دھڑکا تھا۔۔مہر نے سر اثبات میں ہلا کر تصدیق کی تھی۔۔نایاب کا دل زلزلوں کی زد میں آیا ۔۔
دھواں دھواں چہرے سے اس نے میر ولا کے مکینوں کو دیکھا۔۔جہاں دادو نے سب مہمانوں کو کچھ دیر انتظار کا کہا اور تمام گھر کے بڑوں کے ساتھ اپنے کمرے میں چلے گئے تھے ۔۔نایاب کو کسی انہونی کا احساس شدت سے ہوا۔۔لڑکے والے جا چکے تھے۔۔باقی مہمانوں کو رکنے کا کہا گیا تھا ۔۔جانے اب کیا ہونے والا تھا ۔۔بے اختیار نایاب نے دل پر ہاتھ رکھا تھا ۔۔
••••••••••••••
