Ye Zindagi Nahin Koi Fasana by Sumbul Tauseef Episode 11

“مریضہ کے ساتھ کون ہیں؟ ذرا میرے کیبن میں تشریف لائیں۔” ڈاکٹر نے اسے مخاطب کیا۔ ابراہیم ان کو اپنا تعارف کرواتا ان کے پیچھے ہی کیبن میں داخل ہوا۔
“دیکھیے۔ مریضہ کی حالت بالکل اچھی نہیں ہے۔ لاپرواہی کی بھی حد ہوتی ہے۔ ایسی حالت میں بخار کا ہونا ماں کے ساتھ ساتھ بچے کیلئے بھی خطرناک ثابت ہوسکتا ہے۔” ڈاکٹر نے سرزنش کی۔
“ماں اور بچہ؟ آپ کا مطلب۔۔۔” ابراہیم نے ناسمجھی سے سوال کرنا چاہا۔
“کیا آپ کو نہیں پتا؟ وہ ماں بننے والی ہیں۔ اور بےہوشی کی حالت ميں مسلسل ایک ہی بات بڑبڑاتے ہوئے کہہ رہی تھیں کہ ” ماما بابا مجھے وپس لے جائیں۔” ڈاکٹر نے آگاہ کیا۔
“معذرت ڈاکٹر صاحبہ۔ میں لاعلم تھا۔ اب کیسی ہے وہ؟ کیا میں مل سکتا ہوں اس سے؟” ابراہیم کو سمجھ ہی نہ آیا کہ وہ اس خبر پر کیسا ردعمل دے۔
“فی الوقت میں نے ان کو سکون آور دوا دے دی ہے۔ کچھ ہی دیر میں انہیں ہوش آجائے گا۔ اور کوشش کیجیے گا کہ انہیں ہر قسم کی پریشانی سے دور رکھیں۔ یہ کچھ ادویات میں لکھ کر دے رہی ہوں۔ یہ بھی ان کو باقاعدگی سے کھلاتے رہیے گا۔” ڈاکٹر نے اس کو ہدایات دیں۔
“بہت شکریہ آپ کا ڈاکٹر صاحبہ۔” ابراہیم ڈاکٹر کے کیبن سے نکل کر زینب کے کمرے میں آیا۔ جہاں وہ دوا کے زیراثر سورہی تھی۔ وہ قدم اٹھاتا بیڈ کے پاس رکھے سٹول پر بیٹھ کر بغور اس کا چہرہ دیکھنے لگا۔ جوکبھی کھلتے گلاب کی مانند تھا اور اب سرسوں کے پھول کی طرح زردیوں میں گھل کملا گیا تھا۔
ابراہیم کو اپنے گزشتہ رویے پر پشیمانی ہوئی کہ اس نے زینب کو کیا سے کیا بناڈالا تھا۔ زینب کی اس حالت کا ذمہ دار وہ خود تھا تو ازالہ بھی وہی کرے گا۔ اس نے سوچ لیا تھا کہ اب وہ کسی بھی معاملے میں زینب کے ساتھ زورزبردستی نہیں کرے گا۔ وہ اس کے ساتھ رہنا چاہے گی تو ٹھیک۔ ورنہ وہ جو بھی فیصلہ لے گی وہ اس کا ساتھ دے گا۔
جاری ہے۔