Ye Zindagi Nahin Koi Fasana by Sumbul Tauseef Episode 2

ہانیہ اور نمرہ کے گھر چلے جانے کے بعد وہ دونوں جامعہ کے باہر بنے پوائنٹ پر انتظار کررہی تھیں۔ مریم اکیلے ہی گھر چلی جاتی تھی۔ جبکہ زینب کو گھر سے ڈرائیور لینے آتا تھا۔ اکثر اوقات اس کے تنہا رہ جانے کے خیال سے مریم بھی اس کے ساتھ رک جاتی تھی۔
“زینب۔ ایک بات کہوں۔ ایک  افسانوی دنیا کی باتیں صرف پڑھنے اور سننے میں ہی اچھی لگتی ہیں۔ درحقیقت یہ صرف ایک دھوکے کے سوا کچھ نہیں۔ کیونکہ ناولز اور افسانوں میں ہیرو کا اکھڑ اور غصیلا ہونا بہت لطف دیتا ہے۔ جب کہ حقیقت میں ایسے انسان سے پالا پڑجائے تو سوائے دکھ اور اذیت کے کچھ نہیں ملتا۔ یہ اصل دنیا ہے۔ یہاں ہر انسان میں خوبیاں اور خامیاں برابر پائی جاتی ہیں۔ کوئی بھی اتنا کامل نہیں ہوتا کہ اس سے غلطیاں سرزد نہیں ہوسکتیں۔ اس لیے میرا تمہیں یہی مشورہ ہے کہ تم ان افسانوی باتوں میں پڑنے کی بجائے حقیقی زندگی میں جینا سیکھو۔” نمرہ اور ہانیہ کے گھر جانے کے بعد وہ دونوں اکیلی رہ گئی تھیں جب مریم نے زینب کو سمجھانے کی اپنی سی کوشش کی۔
“اوہو۔ بس کردو یار۔ یہ میرے جڑے ہاتھ دیکھو تم۔ میں اچھے سے جانتی ہوں کہ کیا صحیح ہے اور کیا غلط۔ یہ میری زندگی ہے تو اس کو اپنی مرضی سے جینے کا اختیار بھی مجھے ہی ہونا چاہیے۔ تم سب اپنے کام سے کام رکھا کرو۔” زینب نے مریم کی بات پر زچ ہوتے ہوئے کہا۔ اس پہلے مریم اسے پھر سے سمجھاتی کہ زینب کا ڈرائیور اسے لینے آگیا۔ تو وہ بنا مریم کی جانب دیکھے تیزی سے اس میں سوار ہوکر اپنے گھر کیلئے روانہ ہوگئی۔ مریم نے دکھ سے اسے جاتے دیکھا اور اس کے اچھے نصیب کیلئے دعا کرکے اپنے گھر کے راستے کی جانب چل پڑی۔