رات کو تمام افراد کھانے کے بعد ٹی وی لاؤنج میں جمع تھے۔ خاصا رونق کا سا سما تھا۔ اور یہ رونق زینب کے دم سے تھی جو اپنے بھتیجے اور بھتیجیوں کے ساتھ لڈو کھیلتے ہوئے خود بھی بچی بنی ہوئی تھی۔
“آج ہماری بلبل کا آخری پیپر تھا نا۔ کیسا ہوا؟” زینب جو بچوں کے ساتھ مصروف تھی، فاروق صاحب کے مخاطب کرنے پر متوجہ ہوئی۔
“ جی پاپا۔ الحمدللہ بہت اچھا ہوگیا۔ اور شکر ہے میری تو اس سے جان چھوٹی۔” زینب نے مصنوعی تشکر آمیز آہ بھری۔
“ارے۔ ایسے کیسے جان چھوٹی؟ میں تو سوچ رہا ہوں کہ تمہارا ایم فل میں ایڈمیشن کروادوں. کیا خیال ہے؟” اب کے زینب کے چھوٹے بھائی حاتم نے گفتگو میں حصہ لیا۔
“ہرگز نہیں۔ اتنی مشکلوں سے تو مجھے آزادی نصیب ہوئی ہے۔ کیوں میری میری چھوٹی خوشیوں کے بڑے دشمن بنے پھرتے ہیں۔” آگے کی پڑھائی کا سن کر زینب تو اچھل ہی پڑی۔ جبکہ باقی سب مسکرا دیے۔
جانتے جو تھے کہ سوائے ناولز کے باقی پڑھائی سے اس کی کتنی جان جاتی ہے۔ ایسا نہیں تھا کہ وہ کوئی کند ذہن تھی۔ بلکہ امتحانات میں ہمشہ اچھے نمبروں سے پاس ہوتی تھی۔ بس وہ صرف دو کاموں میں ہی گہری دلچسپی لیتی تھی۔ ایک ناولز پڑھنا اور دوسرا گھر داری۔ اسی لیے کلثوم بیگم اسے کچھ نہ کہتیں۔ وہ الگ بات کہ اس کے حد سے زیادہ ناولز پڑھنے کی عادت سے وہ ہمیشہ نالاں رہتی تھیں۔ ٹوکنے کا کوئی فائدہ نہیں ہوتا تھا۔ الٹا اس کے حمایتی اس کا دفاع کرنے کھڑے ہوجاتے۔ جس پر کلثوم بیگم صرف کڑھ کر رہ جاتیں۔
”مذاق کررہا تھا۔ ہمیں پتا ہے کہ تمہیں بچپن سے ہی دلہن بننے کا کتنا شوق ہے۔ یاد ہے بچپن میں ہم سب سے پوچھا جاتا کہ بڑے ہوکر کیا بنو گے؟ زینب کا جواب سب سے انوکھا ہوتا۔ یہ کہتی کہ میں تو بڑے ہوکر دلہن بنوں گی۔” حاتم نے زینب کے بچپن کی بات کا حوالہ دیا تو جہاں زینب کا چہرہ شرمندگی سے سرخ پڑا، وہیں باقی سب اپنے قہقہے پر ضبط نہ کرسکے۔
“خبردار！ جو اب کسی نے ہماری بیٹی کو تنگ کیا تو۔ اور بچپن میں سب بچے ایسے ہی ہوتے ہیں۔” فاروق صاحب نے زینب کو ساتھ لگاتے حاتم کو مصنوعی جھاڑ پلائی۔ جس پر زینب نے حاتم کو زبان چڑائی تو وہ بھی مسکرادیا۔ یونہی ہنسی مذاق میں یہ محفل برخواست ہوئی۔
جاری ہے۔
