Barang E Khwab E Seher By Saira Naz Part 2

وہ سچ میں جاننا چاہتی تھی کہ ایسی کون سی مجبوری تھی کہ اریکہ نے نکاح سے انکار کیا۔”وہیں جہاں سے کوئی واہس نہیں آتا۔“ اس بار چپ ہونے کی باری سمیحہ کی تھی۔”تمھارا مطلب ہے کہ وہ۔۔۔؟“ کچھ پل بعد وہ بولنے کے قابل ہوئی تو بھی اپنا سوال مکمل نہیں کر سکی لیکن انقہ نے اثبات میں سر ہلا کر اسے ادھورے سوال کا پورا جواب ضرور دے دیا تھا۔”کب؟“ ابراد کا سوچتے سمیحہ کو ایک عجیب طرح کی بے چینی لاحق ہوئی تھی۔”ابراد کے گھر سے جانے کے کچھ ماہ بعد وہ بھی ہمیں چھوڑ گئی تھیں۔“ انقہ نے بمشکل اپنی ہمت مجتمع کرتے اس اذیت ناک وقت کا ذکر کیا تھا۔”اس کا مطلب اس وقت نکاح سے انکار کی وجہ بھی یہی تھی؟“ بالآخر سمیحہ اس سچائی تک پہنچ ہی گئی تھی جس نے آج تک ابراد کو بے چین رکھا تھا۔”ہاں جی!“ انقہ اب اسے اس کی بیماری کی ساری تفصیل سے آگاہ کرنے لگی تو سمیحہ بھی گاہے بگاہے اسے دلاسہ دیتی رہی تھی۔”میں اب چلتی ہوں۔۔۔ تم نے پریشان بالکل نہیں ہونا اور سمجھو کہ میں اریکہ ہی ہوں۔۔۔ تمھارا جب دل چاہے تم مجھ سے رابطہ کر سکتی ہو۔“ ملازمہ کی لائی چائے پینے کے دوران وہ دونوں کتنی ہی دیر اریکہ کی باتیں کرتی رہی تھیں۔۔۔ اور اب سمیحہ رخصت لیتی، اسے بے ساختہ گلے سے لگا گئی تو انقہ ایک بار پھر ایک عجیب سے احساس سے دوچار ہوئی تھی۔”اچھا لگا آپ سے مل کر۔۔۔ آپ مجھے اپنا نمبر دے دیں۔“ انقہ نے بھی اپنی پسندیدگی کے اظہار میں تامل سے کام نہیں لیا تھا۔”مجھے تم سے مل کر اچھا نہ لگتا تو قیامت ہوتی۔“ سمیحہ کے اس چلبلے سے تبصرے پر انقہ آج کتنے دنوں بعد کھل کر ہنسی تھی۔”ماما کہیں باہر گئی ہیں وگرنہ وہ بھی آپ سے مل کر بہت خوش ہوتیں۔“ شیریں کرمانی کچھ ضروری سامان خریدنے کی غرض سے مارکیٹ تک گئی تھیں سو وہ سمیحہ کی آمد سے بے خبر ہی رہ گئیں۔”یار زندہ، صحبت باقی!“ وہ پھر آنے کے وعدے کے ساتھ چلی گئی تو انقہ کتنی ہی دیر اس کے ہی بارے میں سوچتی رہی تھی۔۔۔۔ کچھ لوگ زندگی میں پہلی بار ملنے کے باوجود بھی اجنبی نہیں لگتے اور انقہ کے لیے سمیحہ بھی انھی میں سے ایک تھی۔۔۔۔ وہ یہاں آ کر اپنے سوالات کے جواب تو لے گئی لیکن انقہ کو کوئی سوال پوچھنے کا خیال ہی نہ آیا تھا۔۔۔ وہ تاحال ابراد کی زندگی کی تلخ سچائیوں سے بے خبر ہی تھی اور یہ لاعلمی اس کے لیے ایک نعمت ہی تھی۔__________________۔