Barang E Khwab E Seher By Saira Naz Part 2

سمیحہ جس وقت ابراد کے دفتر پہنچی اس وقت کہرے کی ایک دبیز تہہ نے آسمان کو اپنی آغوش میں لے رکھا تھا۔۔۔۔ فضا میں چہچہاتے پنچھیوں کی آوازیں تو سردی کے موسم میں یوں بھی کم ہی سنائی دیتی تھیں لیکن آج تو لگتا تھا کہ جیسے ماحول پہ ایک سناٹا سا چھایا ہو۔۔۔ یوں جیسے سورج کے ساتھ ساتھ باقی سب بھی سالوں پہلے بیتے حادثے کی خبر سن کر دنگ رہ گئے ہوں۔۔۔ اپنی گاڑی سے نکلتے ہی ٹھنڈی ہوا کے تھپیڑوں نے سمیحہ کا استقبال کیا تھا۔۔۔ اپنے دفتر میں موجود قد آدم کھڑکی کے سامنے کھڑے ابراد کو بے ساختہ اک سرد صبح کا وہ منظر یاد آیا جب وہ اریکہ کرمانی کی چاہ میں اسے لینے ہوائی اڈے پہنچا تھا۔۔۔ اس ایک منظر نے اور بھی بہت سی یادوں کے بخیے ادھیڑے تھے۔”تمھیں کوئی کام نہیں ہے کیا؟ جو یوں فارغ کھڑے ہو۔“ سمیحہ نے اس کے دفتر میں داخل ہوتے ہی پہلے جیسی بے نیازی کا مظاہرہ کرنا چاہا لیکن اس کے لہجے میں کچھ تو تھا کہ ابراد چونک کر پلٹا تھا۔”نہیں! ابھی دس منٹ میں ایک اجلاس میں شرکت کرنی ہے۔“ اسے کھوجتی نگاہوں سے دیکھتے ابراد نے اپنے فارغ ہونے کی وضاحت کی تھی۔”اسے ملتوی کر دو ابراد!“ اس نے بھنویں سکیڑ کر جانچتی نظروں سے سمیحہ کو دیکھا تھا۔”تمھیں لگتا ہے کہ میں ایسے تمھارے جھانسے میں آ کر تمھارے ساتھ خریداری کے لیے چلا جاؤں گا تو یہ تمھاری بھول ہے۔“ ابراد نے اس کے لہجے کے غیر معمولی پن کو اس کا کوئی حربہ ہی سمجھا جو اس کے تئیں وہ اسے منانے کی غرض سے آزما رہی تھی۔”میں ابھی انقہ سے مل کر آ رہی ہوں۔“ ایک جانب لگے صوفوں میں سے ایک پر بیٹھتے اس نے ابراد کو ششدر کرنے کا سامان کیا تھا۔”تو؟“ چند پل خاموشی سے اسے دیکھتے رہنے کے بعد اس نے بظاہر سرسری پن سے کہا لیکن اپنے لہجے کی بے چینی کو چھپا وہ بھی نہیں پایا تھا۔”ابراد! بیٹھ کر بات کرتے ہیں۔“ سمیحہ نے اس کی بے نیازی پہ چوٹ کرنے کی بجائے سنجیدگی سے کہا تو اس بار ابراد بھی اس کے سامنے آ کر بیٹھ گیا تھا۔”ثانیہ! ابراد آج مزید کسی بھی اجلاس میں شرکت نہیں کرے گا اور نہ ہی وہ کسی سے ملے گا۔۔۔۔ الطاف سے کہنا کہ سب سنبھال لے۔“ اس کے بیٹھتے ہی سمیحہ اٹھ کر سربراہی کرسی کے سامنے پڑے میز پہ موجود انٹرکام کی طرف گئی اور اس کی سیکرٹری کو ہدایات جاری کرتے، وہ واپس اپنی جگہ سنبھال گئی تھی۔”انقہ ایک اچھی لڑکی ہے۔“ سمیحہ نے ہلکے پھلکے انداز میں بات کا آغاز کیا کہ اس میں یک دم ابراد کو اتنی بڑی خبر دینے کی ہمت نہیں تھی۔”تم کَہ رہی ہو تو ٹھیک ہی کَہ رہی ہو گی۔“ ابراد کا انداز بھی بے نیازی لیے ہوئے تھا۔”تمھارے ساتھ خوب جچے گی۔۔۔ کیوں نا میری شادی پہ تمھاری بھی رخصتی کروا دیں؟“ اس کے مشورے پر ابراد کا ماتھا ٹھنکا تھا۔”میں نے رخصت نہیں ہونا۔“ برا سا منھ بناتے ابراد نے اس کی تصحیح کرنا چاہی تھی۔”کروانا تو ہے نا؟“ سمیحہ نے بھی ناک چڑھائی تو اس بار وہ جواب دیے بنا چند پل اسے یوں ہی دیکھتے رہنے کے بعد گویا ہوا تھا:”تم یقیناً ان سب باتوں کے لیے تو سارے کام چھوڑ کر یہاں نہیں آئی؟“ یہ اس بات کا اشارہ تھا کہ وہ فی الوقت اصل مدعے پہ ہی بات کرنا چاہتا ہے۔”تم جاننا چاہتے ہو نا کہ اریکہ نے اس دن نکاح سے انکار کیوں کیا تھا؟“ یہ سوال کم از کم ابراد کے لیے ضرور غیر متوقع تھا۔”میں جانتا ہوں کہ اس نے یہ سب اپنی بہن کی محبت میں کیا تھا۔“ سمیحہ کو اس سے اسی جواب کی توقع تھی۔”نہیں! ایسا نہیں ہے۔“ وہ ابھی بھی اصل بات بتانے کے لیے مناسب الفاظ کی تلاش میں تھی۔”تم ملی ہو کیا اریکہ سے؟“ ابراد اس کی باتوں سے یہی نتیجہ اخذ کر سکا تھا سو اس بار قدرے بے چینی سے پوچھ بیٹھا۔”نہیں!“ اسے اپنی بات مکمل کرنے کے لیے ابھی کچھ اور ہمت درکار تھی۔”تو پھر؟“ ابراد کی آنکھوں میں اضطراب ہلکورے لینے لگا تھا۔”اس سے اب کوئی نہیں مل سکتا۔“ وہ مبہم الفاظ کا سہارا لے رہی تھی لیکن ابراد ان کے اصل مفہوم سے نا آشنا ہی رہا تھا۔”کیا مطلب؟ وہ کہیں چلی گئی ہے کیا؟ اسے چلے بھی جانا چاہیے۔۔۔ مجھے یوں دھوکہ دے کر وہ میرا سامنا کر بھی نہیں سکتی۔“ اس کے مفروضہ گڑھنے پر سمیحہ نے تاسف سے نفی میں سر ہلایا تھا۔”دھوکہ تو اس کے ساتھ ہوا ہے ابراد!“ سمیحہ کے لہجے کی رنجیدگی پر ابراد پہلی بار ٹھٹھکا تھا۔”سمیحہ! کیا یہ بہتر نہیں؟ کہ تم پہیلیاں بھجوانا بند کر کے صاف سیدھی بات کرو۔“ اس کے جھنجھلانے پر وہ اثبات میں سر ہلا گئی تھی۔”ابراد! ہم انسان کتنے کم فہم ہیں نا کہ اپنی سوچ کو ہی کُل مان لیتے ہیں۔۔۔ ہمیں لگتا ہے کہ جو ہم نے سوچا ہے، وہی سچ ہے جب کہ حقیقت تو اس کے برعکس ہوتی ہے۔۔۔۔ اریکہ سچ میں اب کبھی تمھارا سامنا نہیں کر سکتی کیوں کہ وہ وہاں ہے، جہاں سے کوئی لوٹ کر نہیں آتا۔۔۔ تم لوگوں کے نکاح سے کچھ دن پہلے ہی اسے یہ حقیقت پتا چلی تھی کہ اس کے پاس وقت بہت کم ہے۔“ سمیحہ نے یر ممکن کوشش کی کہ وہ مناسب ترین الفاظ میں موت کے رقص کی یہ داستان بیان کر سکے لیکن یہ ایک ایسا سانحہ تھا کہ اسے بیان کرنے کو شہد میں گھلے لفظ بھی بولے جاتے تو بھی وہ اَنی کی طرح مقابل کے دل میں پیوست ہو جاتے۔”سمیحہ! یہ تم کیا کَہ رہی ہو؟“ ابراد نے گھبرا کر اس کو بیچ میں ہی ٹوک دیا کہ اس کے الفاظ جس جانب اشارہ کر رہے تھے، ایسا تو کچھ اس کے وہم و گمان میں بھی نہیں تھا۔۔۔ اس دن منگنی کی تقریب میں جب انقہ نے کسی اپنی کی موت کا حوالہ دیا تھا تو اسے لگا کہ وہ عشرت عثمانی کی بات کر رہی ہے لیکن آج اسے پتا چلا کہ اس کے سر سے آسمان ہی نہیں بلکہ قدموں تلے سے زمین بھی کھینچی جا چکی تھی۔”میں تمھیں اس سچائی سے روشناس کروا رہی ہوں جو تمھاری زندگی کے اس بدلاؤ کی وجہ بنا تھا۔“ سمیحہ کی بات پر ابراد اضطراری انداز میں اپنی پیشانی مسلنے لگا۔۔۔ وہ اس کی بات کا یقین نہیں کرنا چاہتا تھا لیکن اسے سچائی کو بدلنے کا بھی اختیار نہیں تھا۔”اس نے مجھ سے کہا کیوں نہیں؟“ بھلے سے یہ خود کلامی تھی لیکن سمیحہ کے لیے جواب دینا پھر بھی لازم تھا:”محب بھی بھلا کبھی محبوب کو اذیت دیتا ہے؟“ یہ الفاظ ادا کرتے اس کے ہونٹوں کو ایک مجروح سی مسکراہٹ نے چھوا تھا۔”یہ کب ہوا؟“ اس کی آواز سرگوشی سے زیادہ بلند نہ تھی۔”جب تم ہوش کی دنیا سے ناطہ توڑے ہوئے تھے۔“ سمیحہ کی اطلاع پر اس نے کرب سے دونوں میں اپنا چہرہ چھپایا تھا۔”ابراد! تم ٹھیک ہو؟“ چند پل بعد اس کے ہاتھ کچھ نیچے سرکے تو اس کی لہو رنگ آنکھوں کو دیکھتے سمیحہ نے فکر مندی سے استفسار کیا تھا۔”سمیحہ! میں کچھ دیر اکیلے رہنا چاہتا ہوں۔“ اس کے لہجے کی بے بسی پر سمیحہ کا دل کٹا تھا۔”ٹھیک ہے لیکن ایک بات مزید بتانا چاہوں گی۔“ اس نے اپنی جگہ چھوڑتے ہوئے کہا تو ابراد نے پل کے پل ایک نظر اسے دیکھا تھا۔”اریکہ کی خواہش تھی کہ تم انقہ کے ساتھ خوش رہو۔۔۔ اس نے مرتے دم تک انقہ کو یہی تاکید کی تھی کہ وہ کبھی تمھیں نہ چھوڑے۔“ اس کی وضاحت پر وہ سر ہاتھوں میں گرا گیا تو اس بار سمیحہ اسے مزید پریشان نہ کرنے کا اعادہ کرتے وہاں سے چلی گئی تھی۔”مجھے معاف کر دو اریکہ! میں اتنے سال تمھیں غلط سمجھتا رہا جب کہ تم تو کہیں تھی ہی نہیں۔“ کچھ خاموش آنسو اس گالوں سے ڈھلک کر زمیں بوس ہوئے تو وہ صوفے کی پشت سے ٹیک لگاتا دل گرفتگی سے سوچنے لگا تھا۔”یہ تم مجھے کس مقام پہ چھوڑ گئی ہو؟ اتنے سال تمھاری بے وفائی سہنا مشکل تھا لیکن آج جو ادراک مجھ پہ ہوا ہے، وہ اس سے زیادہ اذیت ناک ہے۔۔۔ تمھاری محبت نے تو مجھے منھ کے بل گرا دیا ہے۔ میں اب کیسے اٹھ کر کھڑا ہو سکوں گا؟“ دن ڈھل کر شام سے رات میں بدل گیا لیکن اپنی زندگی کے سود و زیاں کا شمار کرتے ابراد کو وقت کا احساس ہی کہاں تھا؟ وہ تو آج نئے سرے سے اپنے رستے زخموں کے لیے کوئی مرہم تلاش رہا تھا۔۔۔ جانے اس رات کی صبح اب کیسی ہونی تھی؟___________________