Barang E Khwab E Seher By Saira Naz Part 2

ہوش میں آنے کے بعد بھی ابراد کو مکمل طور پر اپنے حواسوں میں لوٹنے میں کئی ہفتے لگے تھے۔۔۔ وہ کسی نومولود بچے کی طرح بولنا، چلنا، کھانا، پینا سب نئے سرے سے سیکھ رہا تھا۔۔۔۔ حادثے کی رات اس کی گاڑی کے ساتھ اس کی شناخت بھی اس اندھیری کھائی میں جا گری تھی، یہی وجہ تھی کہ ابھی تک اس کے اپنوں کو اس کی حالت کی خبر ہی نہ تھی۔”آپ کا نام کیا ہے؟“ کئی دن کی مشقت کے بعد جب وہ بولنے کے قابل ہوا تو ڈاکٹر کے سوال پر وہ ٹکر ٹکر اس کی شکل دیکھنے لگا، یوں جیسے ذہن پہ زور دینے کی کوشش کر رہا ہو۔”ابراد! ابراد عثمانی!“ کچھ لمحے لگے اور وہ اپنا نام یاد کرنے میں کامیاب ہو چکا تھا۔”آپ کا تعلق کہاں سے ہے؟“ وہ لوگ اب اس سے اس کے گھر بار کی تفصیلات لے رہے تھے اور اس بار اسے سب یاد کرنے میں کسی دقت کا سامنا نہیں ہوا تھا۔”آپ کے ساتھ یہ حادثہ کیسے ہوا تھا؟“ اس وقت حاضرین مجلس میں سے زیادہ تر کی رائے یہی تھی کہ یہ گاڑی چھین کر بھاگنے کا چکر تھا لیکن اس رات کے ذکر پر ابراد عثمانی کے چہرے کے تاثرات نے ان سب کے خیالات کی نفی کر دی تھی۔”وہ ایک تکلیف دہ رات تھی۔۔۔ میں اس کا ذکر نہیں کرنا چاہتا۔“ ابراد نے ان کے مزید کسی بھی سوال کا جواب دینے سے انکار کر دیا تھا۔”میں خود ان سے جا کر ملنا چاہتا ہوں۔۔۔ آپ میں سے کوئی ان سے رابطہ نہ کرے۔“ اظہار میر نے اس کے گھر میں سے کسی کا نمبر مانگا تو وہ انھیں بھی صاف منع کر گیا۔۔۔ اس کی طبیعت کے پیشِ نظر کسی نے اس پہ دباؤ ڈالنا بھی مناسب خیال نہیں کیا تھا۔”یہ تمھارے لیے فون!“ سمیحہ نے کوئی سوال تو نہیں کیا لیکن اگلے دن وہ اس کے لیے نیا فون ضرور لے آئی تھی۔۔۔ ابراد نے کچھ پس و پیش کے بعد وہ اپنے پاس رکھ لیا تھا۔۔۔ جہاں اس خاندان کے اتنے احسان لیے تھے، وہاں ایک اور سہی!”یہ سب کے نمبر کیوں بند ہیں؟“ تنہائی میسر آتے ہی اس نے سب سے پہلے عشرت اور پھر پرویز عثمانی کا نمبر ملایا لیکن ان دونوں کے فون بند ملنے پر اس نے اریکہ کے ویٹس ایپ پر رابطے کی کوشش کی مگر اس میں بھی ناکام رہا۔۔۔ اس کے بعد اس نے فرجاد کا نمبر ملایا لیکن کسی ایک ہندسے میں گڑبڑ کی وجہ سے وہ اس سے بھی بات کرنے میں کامیاب نہیں ہو سکا تھا۔۔۔ اس کا ارادہ اب اسپتال سے فارغ ہوتے ہی خود گھر جانے کا تھا۔”ماما! ڈیڈ!“ بالآخر وہ دن آ ہی گیا تھا جب وہ مکمل صحت یاب ہو کر اپنے گھر کی قیام گاہ میں کھڑا انھیں آواز لگا رہا تھا۔۔۔ وہ سمیحہ کی گاڑی میں یہاں تک آیا تھا جو اس وقت اس کے ساتھ ہی تھی۔”اب کیوں آئے ہو تم یہاں؟“ وہ جو اپنے کمرے سے نکلتے پرویز عثمانی کی جھلک پاتے ہی پرجوش سا ان کی جانب لپکا تھا، ان کے سرد انداز میں پوچھے گئے سوال پر وہ ٹھٹھک کر اپنی جگہ پہ رک گیا۔”یہ آپ کیا کَہ رہے ہیں ڈیڈ؟ یہ میرا گھر ہے، میں یہاں نہیں آؤں گا تو کدھر جاؤں گا؟“ اس نے حیرت بھرے لہجے میں استفسار کیا تھا۔”نہیں ہے یہ تمھارا گھر اور نہ ہی تمھارا ہم سے کوئی رشتہ ہے۔“ اس رات اور اگلا سارا دن انھوں نے اسے ڈھونڈنے کی ہر ممکن کوشش کی لیکن نہ تو اس کا کوئی سراغ ملا اور نہ ہی پولیس ہورے شہر میں اس کی گاڑی کو کہیں کھوج پائی سو پرویز عثمانی خود سے ہی یہ اخذ کر چکے تھے کہ وہ غصے کے اظہار کے طور پہ کہیں چلا گیا ہے۔۔۔۔ نکاح کے وقت ہوئے تماشے اور بیوی کی موت نے ان کے سوچنے سمجھنے کی صلاحیت ہی چھین لی تھی اور آج وہ بھی وہی غلطی دہرا رہے تھے جو نکاح والے دن ابراد نے کی تھی۔۔۔ اس دن اس نے بنا سچ جانے انقہ کو قصوروار قرار دے دیا تھا اور آج پرویز عثمانی اس کی بات سنے بنا اسے ہر چیز کے لیے موردِ الزام ٹھہرا رہے تھے۔۔۔ خاموش کھڑی سمیحہ نا سمجھی سے ان دونوں باپ بیٹے کی گفتگو سن رہی تھی۔”ڈیڈ! آپ میری بات تو سنیں۔ ماما کدھر ہیں؟ مجھے ان سے ملنا ہے۔“ ابراد نے عشرت عثمانی کا ذکر چھیڑ کر ان کے زخم ہرے کیے تھے۔”نہیں ہے تمھاری ماں یہاں! ہمارے بیچ سب کچھ اسی رات ختم ہو گیا تھا، جب تمھاری وجہ سے تمھاری ماما کی جان گئی تھی۔“ ان کی بات سنتے وہ لڑکھڑا کر دو قدم پیچھے ہوا تو دنگ کھڑی سمیحہ نے فوراً آگے بڑھ کر اسے سہارا دیا تھا۔”ڈیڈ! یہ کیا کَہ رہے ہیں آپ؟“ ابراد کو اپنی آواز کسی کھائی سے آتی محسوس ہوئی۔۔۔ اس کی جنت کو اس سے بچھڑے ایک سال ہونے والا تھا اور اسے علم ہی نہ تھا۔۔۔ اسے ٹھیک ہونے میں اتنا وقت شاید اسی لیے ہی لگا کہ اس کے لیے ہاتھ اٹھا کر اپنے رب سے خیر مانگنے والے ہاتھ سلامت نہ رہے تھے۔”میں وہی سچ بول رہا ہوں جس نے ہمارے ہنستے بستے گھر کو اجاڑ دیا۔۔۔ ہمارا اب کوئی رشتہ نہیں! تم جاؤ یہاں سے۔“ ابراد عثمانی نے اس کے دل کی حالت سے قطع نظر اپنی لفظوں سے اس کے دل کو چھلنی کرنا جاری رکھا۔۔۔ ٹھیک ہے اس رات غلطی ابراد کی تھی کہ وہ یوں غصے میں گھر سے گیا لیکن اسے ہر خسارے کا ذمہ دار ٹھہرانے سے پہلے ایک بار اسے بھی اپنی بات کہنے کا موقع تو ملنا ہی چاہیے تھا۔”انکل! آپ ایک بار اس کی بات تو سن لیں۔“ ابراد کے سفید پڑتے چہرے کو دیکھتے سمیحہ نے ان کی گفتگو کے بیچ مداخلت ضروری سمجھی تھی۔”جب اس نے نئے رشتے بناتے وقت ہمارا خیال نہیں کیا تو اب مجھے بھی کسی سے کوئی رشتہ نہیں رکھنا۔“ وہ یقیناً سمیحہ کی یہاں موجودگی کو کسی اور ہی پیرائے میں لے رہے تھے اور یہی ان کی سب سے بڑی غلطی تھی کہ بنا تصدیق کیے وہ خود سے ہی اپنے تمام مفروضوں پہ یقین کی مہر ثبت کرتے جا رہے تھے۔”آپ غلط سمجھ رہے ہیں۔“ سمیحہ نے ان کی غلط فہمی دور کرنے کی غرض سے کچھ کہنا چاہا تو ابراد اسے روک گیا تھا۔”سمیحہ! چلو یہاں سے۔“ اسے بازو سے تھام کر وہاں سے نکلتے ابراد نے ایک الوداعی نظر اس گھر پہ ڈالی جہاں اس نے اپنی تمام عمر گزارنے کے بعد اب دوبارہ کبھی وہاں نہ آنے کا تہیہ کر لیا تھا۔ ”ہمیں زیادہ تو کچھ نہیں معلوم لیکن آپ کے جانے کے بعد آدھی رات کو بیگم صاحبہ کو اسپتال لے کر گئے اور پھر ان کی میت ہی واپس آئی۔۔۔ ہمیں بس اتنا پتا ہے کہ صاحب جی نے سارا دن آپ کو تلاش کیا اور پھر رات کو بیگم صاحبہ کی تدفین کر دی گئی۔۔۔ اس دن انھوں نے یہاں کھڑے ہو کر کہا تھا کہ آپ ان کے لیے مر گئے۔“ باپ نے تو کچھ بتایا نہیں لیکن ابراد نے باہر چوکیدار سے ضرور اس رات کی ساری تفصیل جان لی تھی۔۔۔ چوکیدار رہائشی عمارت اور لان کے بیچ موجود روش کی طرف اشارہ کرتے ہوئے کَہ رہا تھا اور اس نے سوچا کہ مر تو وہ واقعی گیا تھا۔۔۔ اب جو ابراد زندہ تھا، وہ ایک الگ انسان تھا، جسے اب ان تمام رشتوں کے بنا زندگی گزارنی تھی۔”اور جو باہر والے مہمان تھے یہاں، وہ کب گئے؟“ ابراد کا دل ماتم کناں تھا لیکن وہ ایک بار ضرور جان لینا چاہتا تھا کہ اس کے پیچھے یہاں اور کیا ہوا؟”وہ تو جی بیگم صاحبہ کے سوئم کے دو دن بعد ہی چلے گئے تھے۔“ ابراد نے اس سے اور کچھ نہیں پوچھا اور اس کا شکریہ ادا کرتے وہاں سے نکل آیا تھا۔”ابراد! تم ٹھیک ہو؟“ وہ واپس گاڑی میں آن بیٹھے تو اس کی سرخ پڑتی آنکھوں کو دیکھتے سمیحہ نے فکر مندی سے استفسار کیا تھا۔”سمیحہ! مجھ پر ایک آخری احسان کر دو۔۔۔ مجھے قبرستان لے چلو۔۔۔ میں ماما سے ملنا چاہتا ہوں۔“ وہ عشرت عثمانی کی قبر کی ساری تفصیل بھی چوکیدار سے لے چکا تھا سو انھیں وہاں جانے میں کوئی دشواری نہیں ہوئی تھی۔ وہ جب سے ہوش میں آیا تھا، سمیحہ کو وہ خاصے مضبوط اعصاب کا مالک انسان لگا تھا لیکن آج وہ اسے عشرت عثمانی کی قبر سے لپٹ کر بلکتے ہوئے دیکھ کر یہی سوچتی رہی کہ کوئی بھی انسان چاہے کتنا ہی طاقت ور کیوں نا ہو، کسی بھی اپنے کی موت اسے توڑ کر رکھ دیتی ہے۔۔۔۔ ابراد کو بھی ماں کی موت اور باپ کی سرد مہری نے پچھاڑ دیا تھا۔”مجھے یہیں کسی سڑک پہ اتار دو۔“ وہ لوگ قبرستان سے نکلے تو شام ڈھل رہی تھی۔۔۔ ابراد نے سمیحہ کے برابر بیٹھتے، اس کی طرف دیکھے بنا کہا تو وہ اس کے ٹوٹے بکھرے وجود کو دیکھتے، ایک گہرا سانس بھر کر رہ گئی تھی۔۔۔ سمیحہ نے اسے تو کچھ نہیں کہا لیکن وہ راستے میں کہیں رکی بھی نہیں۔۔۔ وہ واپس اسے اپنے ساتھ ایبٹ آباد لے آئی تھی۔”اب آدھی رات کو ایک اکیلی لڑکی کو اتنی دور بھیجو گے؟“ ابراد نے کوئی مزاحمت کرنا بھی چاہی تو سمیحہ نے اتنی بے چارگی سے اپنے اکیلے ہونے کا جواز پیش کیا تھا کہ وہ چاہ کر بھی انکار نہیں کر سکا۔”آج تمھارے ڈیڈ نے بھی وہی غلطی کی جو اس رات تم نے کی تھی۔۔۔ ہم انسان اپنے خود ساختہ مفروضوں کی بنا پر جو نتائج اخذ کرتے ہیں، وہ اکثر و بیشتر غلط ہی ثابت ہوتے ہیں۔۔۔ ایک فریق دوسری جانب کی بات سنے بنا ہی جب کوئی فیصلہ لے لیتا ہے تو نقصان دونوں کا ہی برابر ہوتا ہے۔“ ابراد نے اس کے پوچھے بنا ہی آج اسے اپنے بارے میں ہر بات بتا دی تو سمیحہ نے خاصی عقل مندی سے ان تمام حالات کا تجزیہ پیش کیا تھا۔۔۔ ابراد نے البتہ اس کی بات کا کوئی جواب نہیں دیا تھا۔اس دن کے بعد سے ابراد کی زندگی یکسر بدل گئی تھی۔۔۔ اس نے اپنی سابقہ کمپنی کی ہی ایبٹ آباد میں کھلنے والی ایک نئی شاخ میں ملازمت شروع کر دی تھی۔۔۔ جب اس کے باپ نے اسے نہیں اپنایا تو پھر اس نے خاندان کے کسی اور فرد سے بھی رابطہ نہیں کیا تھا۔۔۔ اظہار میر نے تو کچھ نہیں کہا لیکن سمیحہ نے کئی بار اسے سمجھانے کی کوشش کی کہ وہ ایک بار دوبارہ اپنے والد سے رابطہ کر لے مگر وہ نہیں مانا۔۔۔ اس کی زندگی کا مقصد اب صرف اپنی ایک پہچان بنانا تھا اور وہ اس نے کر دکھایا تھا۔۔۔ آج کاروباری حلقوں میں ابراد عثمانی تیزی سے ابھرتا ہوا ایک نام تھا۔__________________۔