Dil O Janam Fida E Tu by Aniqa Ana Episode 45

سیاہ پاجامے پہ سیاہ رنگ ہی کی لمبی کرتی، اور سیاہ ہی دوپٹہ اوڑھے ہوئے، کرتی اور دوپٹے پہ لگی لیس سے میل کھاتی سرخ لپ اسٹک لگائے ہوئے، کانوں میں چھوٹی چھوٹی بالیاں بھی ہلکورے لے رہی تھیں ۔آج اس کی چھب ہی نرالی تھی یا شاید آج قیام ہارون کے دیکھنے کا انداز بدلا ہوا تھا تب اسے زیادہ محسوس ہو رہا تھا۔ خود قیام نے بھی سیاہ جینز کے ساتھ گہری نیلی شرٹ اور سیاہ جیکٹ پہنی ہوئی تھی۔ اسے دیکھ کر ایک ساعت کے لیے بختاور کی آنکھوں کی پتلیاں پسندیدگی کا تاثر لیے پھیلی تھیں۔ تاہم یہ کیفیت بس پل بھر کی ہی تھی۔ وہ اسے سرسری سا ایک نظر دیکھ کر دائیں بائیں دیکھنے لگی تھی۔ میز کی ہموار سطح کو انگلیوں سے بجاتے ہوئے وہ اسے پوری طرح نظر انداز کر رہی تھی۔
”پرفیکٹ میچنگ ہے۔“ حمزہ نے دور سے ان دونوں کو آمنے سامنے بیٹھے دیکھ کر کہا تھا۔
”نا سمجھ انسان! تمھیں پرفیکٹ میچنگ نہیں پرفیکٹ کپل کہنا چاہیے۔“ شاہ زمان نے اس کی تصحیح کی تھی۔
”ابھی کیسے کَہ دوں؟ ابھی سب یک طرفہ ہے۔“ اس نے کَہ کر دوبارہ ان دونوں کو دیکھا تھا۔
”تصویر تو صاف دکھائی دے رہی ہے مگر آواز نہیں ہے۔“ وہ اپنے دور ہونے پر جھنجھلاہٹ سے بولا تھا۔
”ہم نے ان کی باتیں سننی بھی نہیں ہیں۔ اس لیے جہاں بیٹھے ہو، بیٹھے رہو۔“ شاہ زمان نے یاد دلایا تھا۔ ان تینوں میں یہی طے ہوا تھا کہ وہ دور سے بیٹھ کر صرف قیام کے تاثرات ہی دیکھیں گے۔
”ایک تو تم حاجی بغلول کہیں کے۔۔۔“ حمزہ نے جو منھ میں آیا بول دیا۔
”نہ میں بھلا کس زاویے یا کلیے سے حاجی بغلول ہو گیا؟“ چہرے پر مصنوعی غصہ سجائے وہ استفسار کرنے لگا تھا۔
”میری مرضی۔۔۔“ اس نے بھی شانے اچکائے تھے۔ اور قیام کو آنکھیں سکیڑ کر غور سے دیکھنے لگا تھا۔ ہونٹ ہلتے نظر آ رہے تھے مگر سمجھ ایک لفظ نہیں آ رہا تھا۔
”کیا ہوا؟ تم ناراض ہو؟“ اس نے حیرت سے اس سے پوچھا جو سامنے بیٹھ کر بھی بات نہیں کر رہی تھی۔
”مجھے کیا پڑی ہے کہ تم سے ناراض ہوتی پھروں؟“ وہ اسی طرح رخ موڑے ، منھ پھلائے بولی تھی۔
”پھر یہ ناز، یہ ادا، یہ نخرے۔۔۔ چہ معنی دارد۔۔۔“ اس کی مشکل اردو پہ بختاور نے اسے گھورا تھا۔
”لگتا ہے تم نے واقعی محبت نامے لکھنا سیکھنے کے لیے کلاس لینا شروع کر دی ہے۔“ وہ بولے اور جتائے بغیر رہ نہیں سکی تھی۔
”؏ کفر ٹوٹا خدا خدا کر کے“ ایک اور مصرعے کی آمد ہوئی تھی۔ بس بہت ہو گیا تھا۔ اس سے زیادہ بے نیازی دکھانے کی اداکاری کرنا اس کے بس سے باہر تھا۔
”کیا میں پوچھ سکتی ہوں کہ تم آج کل کرتے کیا پھر رہے ہو؟“ سیدھی ہو کر بیٹھتے، قدرے آگے کو جھک کر اس سے پوچھا تھا۔