Ishq Ki Baazi by Hadisa Hussain Episode 9

کمرے میں مکمل اندھیرا چھایا ہوا تھا۔
اچانک دروازہ کھُلنے کی وجہ سے روشنی کمرے میں پھیلی۔
“پلیز۔۔اماں سائیں میری جان چھوڑ دیں۔” بیڈ پر اوندھے منہ لیٹی ستائیس سالا لڑکی نے غصے سے کہا۔
“تمہارا دماغ خراب ہوگیا ہے، جانتی ہوں بھائی کے لیے نہیں مرری ہو اس پیٹ درد کی وجہ کچھ اور ہی ہوگی۔” درمیانی عمر کی خاتون بیٹی پر چلائی تھیں۔
“ہاں مجھے نہیں تھا کبھی کوئی بھائی عزیز جس طرح آپ کو نہیں تھا۔” اس لڑکی نے جیسے ماں کو آئینہ دکھایا۔
“اب ماں سے اس لہجے میں بات کروگی۔” وہ خاتون غصہ ہوئیں۔
“ہاں کیونکہ آج جو کچھ بھی ہورہا ہے وہ آپ کی وجہ سے ہورہا ہے۔” وہ لڑکی اُن پر تپی ہوئی تھی۔
“وہ اب شادی شدہ ہے یہ بات دماغ میں بٹھالو اپنے، زیادہ اُچھلنے کی ضرورت نہیں ہے۔” وہ خاتون سمجھ گئیں تھی ان کی بیٹی کس بات پر ناراض ہوکر بیٹھی تھی۔
“وہ میرے علاوہ کسی کا نہیں ہوسکتا آئی سمجھ آپ کو۔” وہ لڑکی جنونی ہوئی تھی۔
“وہ ہوچکا ہے میں نے سنا ہے اس کی بیوی بہت خوبصورت ہے وہ اب تمہیں گھاس نہیں ڈالے گا۔” ان خاتون نے اسے باور کروایا۔
“اماں سائیں میں محبت کرتی ہوں اس سے اور وہ میرا ہی ہوگا، وہ لڑکی تو بس کام کرنے کے لیے ہے۔” وہ لڑکی کسی طور ماننے کو تیار نہیں تھی۔
“ہاں خود کو دو تسلیاں جتنی ہوسکے۔” وہ خاتون طنزیہ لہجے میں بولیں۔
“اماں دیکھنا میں اسے پاکر ہی رہوں گی۔” وہ یقین نہیں کرنا چاہتی تھی۔
“پاگل ہوچکی ہو مجھے پورا یقین ہے۔” ان خاتون نے اس سر پھری سے سر نہ کھپانے میں عافیت جانی۔
درمیانی عمر کی خاتون کمرے کا دروازہ بند کرکے واپس چلی گئیں ایک بار پھر اس کمرے میں اندھیرا چھا گیا۔
کمرے میں کافی دیر خاموشی چھائی ہوئی تھی۔
دروازے کے کھلنے پر نظر اٹھاکر دیکھا تو سامنے ایک عمر رسیدہ خاتون کمرے میں داخل ہوئیں۔
وہ چپ چاپ آکر بیڈ پر بیٹھ گئیں اس لڑکی نے اپنا سر اُن کی خود میں رکھتے ہی سسکیوں سے رونا شروع کردیا۔
“نانی میں ارحاب سے محبت کرتی ہوں۔” وہ رونے کے دوران بولی۔
“جانتی ہوں میری بیٹی۔” عمر رسیدہ خاتون نے اس کے بال سہلاتے کہا۔
“نانی ارحاب میرا ہے وہ کسی اور کا نہیں ہوسکتا۔” وہ ایسے زور دے کر بولی جیسے خود کو بھی یقین نہ ہو۔
“ہاں ارحاب تمہارا ہی ہے وہ کسی کا بھی نہیں ہے۔” وہ اسے تسلی دے رہی تھیں۔
“نانی ہم ارحاب سے اتنی شدت سے محبت کرتے ہیں کے اس کے لیے جان دے بھی سکتے ہیں اور لے بھی سکتے ہیں۔” اچانک اس لڑکی کا لہجہ پراسرار ہوگیا۔
“اے ناز پاگل مت بن وہ تیرا ہے بس تونے اس کا دل جیتنا ہے۔” ان عمر رسیدہ خاتون نے ڈرتے اسے پچکھارا۔
“نانی میں اتنے سالوں سے یہی تو کرتی آئی ہوں پچھلے بیس سالوں سے ہر پل اس کا دل جیتنے کی کوشش کی ہے مگر ایسا لگتا ہے جیسے اس کے پاس دل ہی نہیں ہے۔” ناز بے بسی سے بولی۔
“ارے پگلی وہ تمہارے بڑے ماموں کی طرح ہے جو دل میں جذبات چھپاکر رکھتا تھا شاید وہ بھی تمہیں پسند کرتا ہو مگر بتاتا نہیں ہو۔” اُنہوں نے اسے دوسری نظر سے دیکھنے کا موقع فراہم کیا۔
“نانی اماں سائیں تو کہ رہی ہیں اس کی بیوی خوبصورت ہے۔” ناز نے اسے کچھ دیر پہلے والی ہوئی بات بتائی۔
“وہ ونی میں آئی ہوئی لڑکی ہے ایسی لڑکی بس ان کی کچھ دیر ہی پیاس مٹانے کے لیے ہوتی ہے اس سے بڑھ کر کچھ بھی نہیں۔” اُنہوں نے اسے رازداری سے بتایا۔
“نانی میں ارحاب کو پاکر رہوں گی ہر قیمت پر چاہے اس کے لیے مجھے کوئی بھی حد پار کرنی پڑجائے۔” وہ خیالوں ہی خیالوں میں ان سے مخاطب ہوئی تھی۔
ناز کی آنکھوں میں شیطانی چمک تھی جس کا نتیجہ بہت برا ہونے والا تھا۔
*************************
جاری ہے