Mohabbat Fateh Tehri by Ayesha Asghar Episode 3

سردیوں کی صبح تھی،ہوا میں ایک ہلکی سی خنکی تھی جو یونیورسٹی کے لان میں بیٹھے درختوں کی شاخوں سے سرگوشیاں کر رہی تھی۔
”تو پھر کیا سوچا آپ نے؟“۔
خوشبو میں بسا وہ، آج پھر اس کے سامنے کھڑا تھا۔دھوپ میں سنہری ذرات جھلملاتے ہوئے اس کے اطراف کا احاطہ کر رہے تھے۔اردگرد کے طلبہ کی ہنسی اور سرگوشیوں کے شور میں یہ جملہ فاطمہ کے دل پر کسی پتھر کی مانند آ گرا۔اس نے چونک کر اسے دیکھا۔ وہی پراسرار مسکراہٹ، وہی بھوری رنگ کی گہری آنکھیں جو کسی ان کہے راز سے لبریز تھیں۔
”آپ کون ہیں؟ اور کیوں میرے پیچھے پڑ گئے ہیں؟“۔
فاطمہ کی آواز سخت تھی، لیکن اس کی آنکھوں میں چھپی بےچینی اس کے ضبط کو دھندلا رہی تھی۔وہ ایک قدم آگے بڑھا، قدموں کی چاپ گھاس پر ایک مدھم سرگم بکھیر رہی تھی۔
”میں کون ہوں؟ یہ جاننا ابھی ضروری نہیں“۔اس کا لہجہ سنجیدہ تھا۔”رہا دوسرا سوال…تو بس اتنا جان لیں۔۔آئی وانٹ یو ان مائی لائف“۔۔آج اس نے وہی جملہ دہرایا تھا۔آخری جملے کے ساتھ اس کی گہری نظریں فاطمہ کی کلائی پر جا ٹھہریں،جہاں ایک براؤن اسٹریپ والی گھڑی بندھی تھی۔فاطمہ نے ضبط سے اپنی سانس اندر کھینچی اور ایک قدم پیچھے ہٹی۔
”یہ آپ کی خواہش ہو سکتی ہے،میری نہیں۔اینڈ فار یور انفارمیشن، آئی ایم انگیجڈ“۔
اس کے لہجے میں برف جیسی سرد مہری تھی،مگر الفاظ کے پیچھے چھپا خوف اس کے دل کا راز ظاہر کر رہا تھا۔وہ مسکرایا۔
”فاطمہ، میں نے کہا تھا نا کہ میں آپ کے بارے میں سب جانتا ہوں۔تو مطلب سب۔اس منگنی کی میرے نزدیک کوئی حیثیت نہیں۔تو بتائیے، کب آؤں آپ کو لینے؟“۔اس کے جملے کی گونج نے ہوا میں ارتعاش پیدا کر دیا۔فاطمہ کے ضبط کا بندھن ٹوٹ گیا۔
”تم! تم گھٹیا انسان! تمیز نام کی کوئی چیز ہے تم میں؟ یہ فضول باتیں مجھ سے کرنے کی ہمت کیسے ہوئی؟“۔
اس نے اپنے غصے کو الفاظ کی صورت میں باہر نکالا، آنکھوں میں نفرت کے شعلے بھڑک رہے تھے۔
”تم جیسے لوگوں کو میں بہت اچھی طرح جانتی ہوں۔ لڑکیوں کو ورغلانا تمہارا ہنر ہو سکتا ہے،لیکن یاد رکھو، میں فاطمہ کمال ہوں۔تم جیسے کسی بھی گھٹیا شخص کے جال میں پھنسنے والی نہیں“۔۔برادشت سے باہر ہوا تو وہ جو منہ میں آیا کہتی چلی گئی۔وہ خاموشی سے اسے دیکھتا رہا، جیسے اس کی ہر بات اپنے اندر جذب کر رہا تھا۔
”ابھی آپ کو سب معاف ہے۔کیونکہ آپ کچھ نہیں جانتی۔ لیکن ایک بات یاد رکھیں۔الفاظ زخموں کی طرح ہوتے ہیں، جو وقت کے ساتھ بھر تو جاتے ہیں،مگر اپنے نشان چھوڑ جاتے ہیں۔احتیاط کریں، کہیں یہ نشان پچھتاوے میں نہ بدل جائیں“۔اس کے لہجے کی گہرائی اور آنکھوں کی اداسی نے لمحے بھر کو فاطمہ کو ساکت کر دیا۔
”تم جیسے غنڈے کے لیے یہی الفاظ ہیں میرے پاس“۔
اس نے اپنی آواز بلند کی،خود کو مضبوط دکھانے کی کوشش تھی۔
”یاد رکھیے گا،غنڈے اور بھی بہت کچھ کرتے ہیں“.وہ ایک لمحے کے لیے رکا، اور پھر جھک کر دھیمے گہرے لہجے میں بولا۔یہ کہہ کر وہ پلٹ گیا۔ قدموں کی چاپ دھیرے دھیرے مدھم ہوتی گئی، یہاں تک کہ وہ مکمل طور پر نظروں سے اوجھل ہو گیا۔
فاطمہ نے ایک پل کے لیے اردگرد کا جائزہ لیا۔ لان کے کنارے کھڑا پرانا برگد کا درخت، اس پر بیٹھی چند چڑیاں، اور کینٹین سے اٹھتی چائے کی خوشبو… سب کچھ معمول کے مطابق تھا،مگر فاطمہ کے دل میں ایک عجیب سی ہلچل مچ چکی تھی۔
دور، لائبریری کے قریب، ایک کونے میں دو آنکھیں یہ تمام منظر دیکھ رہی تھیں۔ان میں تجسس کی چمک تھی،اور شاید کچھ ایسا بھی، جو آنے والے وقت کی آہٹ کی پیشین گوئی کر رہا تھا۔