Mohabbat Fateh Tehri by Ayesha Asghar Episode 3

”کہتے ہیں، انتظار کبھی رائیگاں نہیں جاتا، بس صبر کے ساتھ انتظار کرنا چاہیے“۔اس کے چہرے پر فاتحانہ مسکراہٹ پھیل گئی۔
”تو پھر کیا پتہ چلا تمہیں؟“۔فاخر سلمان تلخ مسکراہٹ کے ساتھ پوچھے۔کمرے میں سگریٹ کی دھوئیں کی تہہ اور مشروب کی مٹھاس گھلی ہوئی تھی۔
”وہی جو میں چاہتا تھا،ایک غلطی،اور بازی ہمارے ہاتھ میں“۔اس نے ہنستے ہوئے کش لگایا،سگریٹ کا دھواں بڑی نرمی سے فضا میں مڑ کر گم ہوگیا۔
”پہلیاں بجھوانا بند کرو اور اصل بات بتاؤ“۔فاخر سلمان نے ضبط کی انتہاء کو چھوتے ہوئے اس کی ڈرامہ بازی کو نظر انداز کرنے کی کوشش کی۔
”اتنی بھی کیا جلدی ہے؟ بتاتا ہوں“۔اس نے آرام سے کوٹ اتار کر صوفے پر پھینکا اور خود بھی اس پر ڈھیر ہو گیا۔ٹائی کی ناٹ کو ڈھیلا کرتے ہوئے ہنس کر گویا ہوا۔
”صرف ایک چیز ہاتھ لگی ہے، پورا وائے ڈی نہیں۔اس لیے فضول کے ڈرامے کرنا بند کرو“۔ناگواری سے اس کے انداز کو دیکھا۔شاہد عباسی اور حمید صاحب خاموشی سے ان دونوں کو دیکھ رہے تھے۔کمرے کا سکوت ایک پُر اسرار سیاہی کی مانند فضا میں پھیل چکا تھا۔
”چلیں، غصہ نہ کریں،بتا دیتا ہوں۔صنف نازک کا معاملہ ہے، سمجھ رہے ہیں؟محبت، اور آپ جانتے تو ہیں، محبت اچھے اچھوں کا کام تمام کر دیتی ہے“۔اس کا قہقہ کمرے میں گونجا۔
”وہ ایسا نہیں ہے۔ تم سچ کہ رہے ہو؟“ تینوں کے چہروں پر شبہات کی لکیریں ابھریں،اور ان کی نظریں ایک دوسرے سے سوال کر رہی تھیں۔
”کوئی شروع سے ایسا نہیں ہوتا۔ بس زندگی کا ایک لمحہ کافی ہوتا ہے، اور وہ لمحہ انسان کی زندگی کو بدل کر رکھ دیتا ہے“۔اس کی آنکھوں میں ایک چمک تھی،جو روشنی بکھیرتی پرسکون ہرگز نہیں تھی۔بلکہ تباہی کی ایک نئی حقیقت کا پیش خیمہ تھی۔