ـــــــــــــــــــــــــــــــــــــــــــــ
آج وہ گھر پر تھی۔بارہ بجے کا وقت تھا۔ سردیوں کی نرم دھوپ ہر شے کو سنہری رنگت عطا کر رہی تھی۔باہر لان میں رکھی لکڑی کی بھوری کرسیاں اور ان کے پاس سرسبز گھاس پر بکھری ننھی سفید کلیاں منظر کو حسین تر بنارہی تھیں۔وہ ایک کرسی پر بیٹھی تھی،دوسری کرسی پر اپنے دونوں پاؤں دراز کیے۔اس کے ہاتھ میں ایک کتاب تھی جس کے صفحات میں وہ یوں گم تھی جیسے دنیا سے کوئی سروکار نہ تھا۔ دھیرے دھیرے چلتی ہوا کبھی اس کے بالوں سے کھیلتی تو کبھی کتاب کے صفحات کو چھیڑ کر آگے بڑھ جاتی۔ایک دم پاس سے ابھرتی تیز آواز نے اس کے سکون کو تہہ و بالا کر دیا۔
”تم کیا سمجھتی ہو خود کو؟“۔۔وہ بیزاری سے چہرہ اٹھائے سامنے کھڑی شخصیت کو دیکھنے لگی۔
”تمہیں نظر نہیں آ رہا کہ میں کتاب پڑھ رہی ہوں؟“۔اس نے دونوں پاؤں زمین پر رکھتے ہوئے ناگواری سے کہا اور نظریں دوبارہ کتاب کی طرف موڑ لیں۔
”تم جو چاہو کر لو،لیکن یاد رکھنا،فاطمہ کمال!عابد کو تم مجھ سے چھین نہیں سکتی“۔سامنے کھڑی لڑکی غصے سے کسی زخمی شیرنی کی طرح غرائی۔اس کے میک اپ سے بھرے چہرے پر نفرت کی شدت نمایاں تھی۔بلیک جینز سیاہ ٹی شرٹ اور ڈینم کی جیکٹ میں ملبوس وہ باہر جانے کے لیے تیار لگ رہی تھی۔
”رئیلی؟میں اسے چھینوں گی؟میں نے تو اسے مانگا تک نہیں،بلکہ مجھے تو زبردستی دیا گیا ہے،ڈئیر کزن“۔فاطمہ کتاب کو بند کرتی آہستگی سے کھڑی ہوتی اس کے کندھے سے نادیدہ گرد جھاڑتے ہوئے طنزیہ انداز میں بولی۔علینہ کے چہرے پر مزید غصے کی لکیریں ابھریں۔
”تم اسے مجھ سے چھین نہیں سکتی۔عابد صرف علینہ زاہد کا ہے“۔فاطمہ نے ایک گہری نظر اس کے غصے سے سرخ ہوتے چہرے پر ڈالی اور ہلکا سا مسکرائی۔
”ویسے سوچنے والی بات ہے ناں؟اس گھر کی لاڈلی کو ہمیشہ سب کچھ دیا جاتا ہے۔لیکن اس بار اسے عابد کیوں نہیں دیا گیا؟“۔
”تم کسی خوش فہمی میں مت رہو۔وہ میرا ہے اور میرا ہی رہے گا۔تمہاری اس سے شادی کبھی نہیں ہوگی“۔علینہ کے چہرے کا رنگ مزید سرخ ہوا۔
”تم اس بار کچھ الٹا سیدھا کرنے کی کوشش مت کرنا۔ورنہ اس بار فاطمہ کمال تمہیں چھوڑے گی نہیں“۔۔سرد نگاہوں سے اسے دیکھتے ہوئے وارننگ دی۔
”کیا کرے گی فاطمہ کمال؟“۔ہاتھ باندھتے ہوئے طنزیہ انداز میں اسے دیکھی۔
”زیادہ کچھ نہیں،بس دادی سکینہ کی لاڈلی نواسی اور پھوپھی ریحانہ کی شہزادی بیٹی کی تین چار تصویریں اس گھر کے تمام واٹس ایپ نمبرز پر بھیج دوں گی۔سگریٹ کے کش لگاتی ہوئی اور شباب کے جام سے لطف اندوز ہوتی ہوئی پیاری ہر دلعزیز علینہ زاہد “۔۔آنکھیں پٹپٹاتے ہوئے وہ مسکرا کر علینہ کو دیکھی۔جس کا چہرہ فق پڑ گیا تھا۔گلٹی ابھر کر معدوم ہوئی۔
”جب میں نے ایسا کچھ کیا ہوگا تب تمہارے پاس تصویریں ہوں گی ناں“۔۔وہ مسکرائی لیکن لب مسکراہٹ کا ساتھ نہ دے سکے۔
”پانچ منٹ صبر کرو۔واٹس ایپ کرتی ہوں تمہیں۔دیکھ لینا تم کیا کیا کی ہو“۔۔ایک نظر اس کے ساکت ہوتے وجود کو دیکھی اور پھر وہاں سے چلی گئی۔ کتاب پڑھنے کا سارا مزہ میک اپ والی چڑیل کی آمد نے خاک میں ملا دیا تھا۔کمرے میں آکر کتاب بیڈ پر رکھی اور سائیڈ ٹیبل سے فون اٹھا لیا۔
”کیسے ہو ارمان؟“۔موبائل کان سے لگائے،دھیمی مسکراہٹ کے ساتھ،وہ نرم لہجے میں محوِ گفتگو تھی۔سورج اپنی دھیمی گرمائش کے ساتھ کمرے میں موجود ہر شے کو سنہری رنگ میں نہلا رہا تھا۔کھڑکی کے شیشے پر ہلکی دھند جمی ہوئی تھی،اور باہر لان میں سبزے پر پڑی دھوپ جیسے موتیوں کی طرح جھلک رہی تھی۔کمرے میں جلتا ہوا ہیٹر سرد ہوا کو مات دے رہا تھا۔
”ٹھیک ہوں،خیریت؟آج آپ نے کال کی؟“۔
ارمان کی آواز موبائل سے سنائی دی تو اس کے چہرے پر پھیلی ہلکی مسکراہٹ مزید گہری ہوگئی
”ہاں، ایک چھوٹا سا کام تھا۔“ وہ کھڑکی کے قریب آتے ہوئے پردے کو ایک طرف ہٹا کر نیچے لان کا منظر دیکھنے لگی، جہاں علینہ زاہد کرسی پر غائب دماغی سے بیٹھی تھی۔
”کہیے، حکم کریں۔“ارمان کی شوخی بھری آواز نے اس کے لبوں پر لمحاتی مسکراہٹ لا دی،مگر فوراً ہی اس کی آنکھوں میں گہری سنجیدگی اتر آئی۔
”میں نے علینہ کی تصویریں مانگی تھیں،وہ مجھے بھیج دو۔“
”کیا اس نے پھر کچھ کیا ہے؟“۔ارمان کی آواز میں بھی اب کی بار سنجیدگی شامل ہوگئی۔
”نہیں،کیا تو کچھ نہیں،لیکن کرنے کا ارادہ رکھتی ہے۔میں چاہتی ہوں کہ اسے پہلے ہی وارن کر دوں“۔فاطمہ نے گہری نظروں سے لان میں بیٹھی علینہ کو دیکھتے ہوئے نفی میں سر ہلایا۔
”چلیں ٹھیک ہے،میں بھیج دیتا ہوں۔اگر کوئی مسئلہ کرے تو مجھے فوراً بتائیے گا۔“ارمان کی مخلصانہ آواز نے ایک لمحے کے لیے اس کے دل میں سکون کی لہریں دوڑا دیں۔
”شکریہ ارمان“۔اس نے مختصر جواب دیا اور الوداعیہ کلمات کے ساتھ کال بند کر دی۔کال ختم کرتے ہی وہ کھڑکی سے ہٹ کر بیڈ پر جا بیٹھی۔کمرے میں ایک لمحے کے لیے مکمل خاموشی چھا گئی، صرف ہیٹر کی ہلکی گڑگڑاہٹ اور دور کہیں سے کسی پرندے کی آواز سنائی دے رہی تھی۔
”فاطمہ، علینہ کے ساتھ کوئی بات ہوئی ہے کیا؟“۔ماریہ کے اچانک کمرے میں آنے پر فاطمہ چونک گئی۔ پلٹ کر دیکھا تو ماریہ فکر مند نگاہوں سے اسے دیکھ رہی تھی۔
”ہاں، بس عابد کے متعلق وہی باتیں کررہی تھی۔مجھے آکر یوں کہتی ہے جیسے میں اس سے شادی کرنے کے لیے مری جارہی ہوں۔اگر اتنی محبت ہے تو جائے اور اپنی پیاری نانی سے بات کرے“۔فاطمہ نے بیزاری سے جواب دیا اور تکیے سے ٹیک لگا کر بیٹھ گئی۔
”یہ کبھی سدھر نہیں سکتیں۔“ماریہ نے افسوس سے سر ہلاتے ہوئے بیڈ پر اس کے قریب بیٹھتے ہوئے کہا۔
”جانتی ہو؟کل پھر سے ایک اسکینڈل پلان ہوا تھا۔“فاطمہ نے عام سے لہجے میں کہا،لیکن ماریہ کے چہرے پر حیرت اور تشویش کے آثار نمایاں ہوگئے۔
”کیا مطلب؟“۔
فاطمہ نے ٹھہرے ہوئے انداز میں لفٹ والے واقعے کی پوری تفصیل بیان کی۔ماریہ کی آنکھوں میں فکر مزید گہری ہوتی گئی۔
”یہ سب کون کرتا ہے؟“۔ماریہ نے پریشانی سے سوال کیا۔
”تمہیں کیا لگتا ہے؟ہر دفعہ ایک ہی اسکینڈل میں کیوں پھنستی ہوں؟“۔فاطمہ نے گہری نظروں سے اسے دیکھا اور ساتھ ہی موبائل پر موصول ہونے والی تصویر پر نظر ڈالی۔
”کیونکہ لڑکیوں کو بدنام لڑکوں کے ساتھ کیا جاتا ہے۔ان کی عزت اسی طرح خراب کی جاتی ہے“۔ماریہ نے الجھ کر کہا۔
”یہ تو ہے۔لیکن ایک بات اور ہے جِسے ہم نظر انداز نہیں کرسکتے“۔۔فاطمہ کے لب استہزایہ مسکراہٹ میں ڈھلے۔
”کیا؟“۔
”میرا دشمن اگر مجھے تباہ کرنا چاہتا ہے تو وہ ہر ممکن طریقے سے وار کرے گا۔میرا نام کسی اور اسکینڈل میں ڈال دے،جیسے میں نشے کی حالت میں ڈرائیونگ کرتے ہوئے پائی گئی۔یا جیسے میری ہسپتال کی ساکھ خراب کر کے ڈرگز کیس میں ملوث کر دے،سوچو اگر ہسپتال سے ڈرگز مل جائیں تو کیا ہوگا؟میری ساری محنت،ساری ریپوٹیشن برباد ہو جائے گی۔اور مجھے کیرئیر سے زیادہ عزیز کچھ نہیں“۔فاطمہ کا لہجہ گہرا اور سوچ میں ڈوبا ہوا تھا۔
”بس بس یہ سب آپ اپنے بارے میں ہی کہ رہی ہیں ناں؟“۔ماریہ جھرجھری لیتے ہوئے بولی۔فاطمہ ہنس دی۔
”تو پھر ہر بار ایک ہی اسکینڈل کیوں؟“۔۔فاطمہ کے سوال پر ماریہ ناسمجھی سے اسے دیکھنے لگی۔
”اس لیے کیونکہ جو یہ سب کررہا ہے وہ مجھ سے جیلس ہوتا ہے۔اگر کسی کو انتقام لینا ہو تو وہ ہر زاویے سے نقصان پہنچانے کی کوشش کرے گا۔کسی کو تباہ کرنا ہو تو پہلے اسے فائنینشلی طور پر کمزور کرتے ہیں۔ایک اہم بات یہ بھی جو یہ پلین کرتا ہے وہ خود صرف لڑکوں کی طرف اٹریکٹ ہوتا ہے۔اسے صرف لڑکا اور لڑکی کے ریلیشن میں دلچسپی ہے۔اس لیے اس کا بیمار دماغ ہر بار ایک ہی پلین بناتا ہے۔کوئی دوسرا پلین اس کے دماغ میں سماتا ہی نہیں۔malicious intent ہے وہ۔“۔۔فاطمہ پرسکون سی کہتے جارہی تھی۔اور دوسری جانب ماریہ ابراہیم کی آنکھیں حیرانی سے بڑی ہو رہی تھیں۔
”آپ کا مطلب ہے۔۔یو مین۔۔۔یہ سب علینہ کر رہی ہے؟“۔ماریہ نے حیرت سے سوال کیا۔
”بالکل۔“ فاطمہ نے موبائل اسکرین بند کرتے ہوئے کہا اور بیڈ سے اٹھ کھڑی ہوئی۔
”علینہ ایسا کیوں کرے گی؟“۔ماریہ نے بے یقینی سے پوچھا۔
”وہ اس لیے کہ تایا تائی ایک بدنامِ زمانہ لڑکی کو بہو نہ بنائیں،اور علینہ زاہد اُن کی چوائس بن جائے۔“فاطمہ نے بے نیازی سے کہا اور موبائل چارجنگ پر لگانے لگی۔
”اور وہ شخص؟ جس نے آپ کو بچایا؟“ماریہ نے یاد آتے ہی پوچھا۔فاطمہ کے ہاتھ لمحے بھر کو رک گئے،سیاہ گہری آنکھیں ذہن کے پردے میں نمودار ہوئیں۔
”میں نہیں جانتی وہ کون تھا، لیکن اتنا جانتی ہوں،وہ مجھے نقصان نہیں پہنچائے گا“۔اس نے کھوئے ہوئے لہجے میں کہا۔نیلی آنکھوں میں عجیب سا سکون چھا گیا۔
ــــــــــــــــــــــــــــــــــــــــــــــــــــــ
Mohabbat Fateh Tehri by Ayesha Asghar Episode 3
